Nechka, Jehová ayokmo kipias iyolo ininuaya maseualmej. Kema kiampa panos, Jehová kintsontlamiltis religiones tlen amo melauak, miakej tlanauatianij kinekisej kintsontlamiltisej toTeotsij itekipanojkauaj uan ipan Armagedón Jehová kintsontlamiltis nochi katli kichiuaj tlen amo kuali. Nochi ya tijnekiskiaj ma mochiua ni tlamantli.

Amo tijmatij nochi tlamantli tlen panos ipan ueyi tlaijiyouilistli. Se neskayotl, amo tijmatij tlake tonali peuas. Nojkia amo tijmatij kenke tlanauatianij kinekisej kintsontlamiltisej nochi religiones. ¿Keski tonali tlanauatianij kinekisej kintsontlamiltisej toTeotsij itekipanojkauaj uan tlake panos ipan nopa tonali? Uan ipan Armagedón, ¿kenijkatsa Jehová kintsontlamiltis katli amo kuajkualmej? Amo tijmatij.

Amo moneki timajmauisej kema timoiljuisej tlen panos teipa, pampa tlen Biblia kiijtoua techpaleuia amo kiampa ma tijyolmatikaj. Tijmatij tiitstokej ipan “itlamia tonali” (2Ti 3:1). Nojkia tijmatij amo uejkauas kintsontlamiltijtosej religiones, kiampa amo kitsontlamiltisej religión tlen melauak (Mt 24:22). Uan nojkia tijmatij Jehová kinmanauis itekipanojkauaj (2Pe 2:9). Nojkia, Jehová kitlapejpenijtok se akajya katli kipia miak chikaualistli uan katli kichiua tlen xitlauak ma kintsontlamilti katli amo kuajkualmej uan kiampa kinmanauis nopa tlauel miakej maseualmej ipan Armagedón (Ap 19:11, 15, 16).

Kema panos nochi ni tlamantli, maseualmej “tlapolosej pampa tlauel majmauisej” (Lu 21:26). Tojuantij amo kiampa techpanos. Tlaj tijpouasej uan timoyoliljuisej kenijkatsa Jehová kinmanauik itekipanojkauaj katli uejkajkia itstoyaj uan tlen kiijtoua panos teipa, techpaleuis amo ma timajmauikaj uan ma tijchiuakaj tlen kiijtoua Lucas 21:28: “Ximoyolchikauakaj uan xiajkotlachiakaj ika pakilistli pampa nechkatsi para niualas uan niinmechmakixtis”.