Jesús kimoyajki nopa “kuali tlajtoli tlen toTeotsij iTlanauatijkayo” uan kiniljuik maseualmej ma tlajtlanikaj ma uala tlanauatiki (Lu 4:43, TNM; Mt 6:9, 10). Ipan noviembre tijchiuasej kampeka tikinkamanaljuisej maseualmej tlen toTeotsij iTlanauatijkayo (Mt 24:14). ¿Uelis tijpatlasej se keski tlamantli ipan tonemilis uan kiampa tlauel titlajtolmoyauasej ipan nopa metstli? Katli tlatekipanosej kej precursores auxiliares, uelis temakasej 30 o 50 horas.

Ipan nopa metstli, xikinpouili nochi maseualmej katli tikinpantis se texto kampa kamanalti tlen toTeotsij iTlanauatijkayo. Kema tijtlapejpenis tlake texto tikinpouilis maseualmej katli itstokej kampa ta tiitstok, ximoiljui ipan tlen kineltokaj. Tlaj se akajya kuali mitstlakakilis kema achtoui tijnojnotsas, xijmaka Tlen Tematiltia pilamochtsi 2, 2020 (tlen ika titlajtolmoyauaj). Nimatsi xijpaxaloti uan xijmachti ika se amatlajkuiloli tlen tlauel tijtekiuiaj. ToTeotsij iTlanauatijkayo nechka kintsontlamiltis nochi tlanauatianij (Da 2:44; 1Co 15:24, 25). Yeka ipan ni metstli xijnexti tijpaleuiaj Jehová uan iTlanauatijkayo.