Maske motekiuik miak tomij uan tlauel tekitikej kema mochijki nopa teokali ne Israel, nopa israeleuanij tepaleuijkej ika nochi ininyolo (1Cr 29:2-9; 2Cr 6:7, 8). Teipa, kema kikualchijchiuayayaj nopa teokali kinextiyayaj kuali tlaneltokayayaj (2Re 22:3-6; 2Cr 28:24; 29:3). Ipan ni tonali nojkia tlauel titekitij kema kichijchiuaj, kikualchijchiuaj uan kema tlachpanaj ipan nopa kali kampa timosentiliaj o kampa mochiua uejueyi tlanechikolistli. Kema tijchiuaj ni tekitl nojkia tijueyichiuaj Jehová, uan ni nelia se ueyi tlateochiualistli (Sl 127:1; Rev 7:15).

• Kema tlamis tlanechikoli moneki kuali ma titlajtlalikaj nochi uan amo ma tijkajteuakaj tlasoli kampa timoseuijkej.

• Ma titlapaleuikaj kema moijtos ma titlachpanakaj, ma titlapojpouakaj o ma tijkualchijchiuakaj nopa kali kampa timosentiliaj. Tlaj nochi titlapaleuisej, titekitisej ika pakilistli uan nima tijchiuasej nopa tekitl (lv iamayo 92, 93 párr. 18).

• Uelis titemakasej tomij. Jehová tlauel kipatiita kema titemakaj tomij maske amo miak (Mr 12:41-44).

• Tlaj tiuelij, kualtiaskia titlapaleuisej kema kichijchiuaj o kikualchijchiuaj nopa kali kampa tijueyichiuaj Jehová. Uelis titlapaleuisej maske amo tijmatij tikalchiuasej.