Se mouampo katli amo mitspaleuia

Ta uelis tijpia se “mouampo” katli tikixmatki kema tieliyaya titelpokatl. Uelis kichiuayaya kuali xijyolmati uan mitspaleuiyaya kuali timouikas ininuaya sekinok. Kema tlauel timotetsopayaya nochipa tijtemouayaya, uan miakpa timoiljuik amo kema uelis tijkauas.

Teipa tikitak ya amo tlauel mitspaleuiyaya. Nochipa kinekiyaya itstos mouaya, maske kanajya amo kuali kiitayayaj. Maske timoiljuiyaya mitspaleuiyaya, ya tlauel mitstlanauiyaya uan nojkia kichiuayaya xijpolo miak tomij.

Maske uelis tijchijtok kampeka tijkauas, ya amo mitskaua. Nama mochijtok kejuak moteko uan timoiljuia kuali eltoskia tlaj amo tikixmajtoskia.

MIAKEJ kiampa kinpanotok pampa tlachichinaj. Kiampa kipanok Earline, se siuatl katli cincuenta xiuitl tlachichinki. Ya kiijtoua: “Kema nitlachichinayaya tlauel kuali nijyolmatiyaya uan amo kej kema niitstoya iuaya se akajya. Nikitayaya iyatl kej se kuali nouampo katli kemantika itstoya nouaya maske sekinok amo”. Teipa, ya kiitak nopa iyatl amo nelnelia eliyaya iuampo uan tlauel kitlaijiyouiltiyaya. Kampa peua ni tlamachtili kuali kiixtoma tlen kipanoyaya Earline. Maske kiampa kipanoyaya, ya ayokmo tlachichinki kema kiitak toTeotsij amo kipaktia kema se akajya tlachichina pampa kitlanauia totlakayo tlen ya techmakatok (2 Corintios 7:⁠1).

Se tlakatl katli itoka Frank nojkia kiampa kichijki pampa kinekiyaya kiyolpakiltis toTeotsij. Maske ya nopa kitlapejpenik, kema panok ome tonali, kalajki itsintla ichaj uan pejki kitemoua cigarros tlen ya kichichintoya tlen nopaya kitepejtoya. Ya kiijtok: “Nopa kichijki ma nimotlalnamikti. Kema nimoiljuik kenijkatsa pejki nitlauauana pampa nijnekiyaya nijpantis nopa cigarros tlen ya nijchichintoya, tlauel nikijiak. Ayokmo kema sampa nitlachichinki”.

¿Kenke tlauel ouij kimatij ayokmo tlachichinasej? Ixtlamatinij kiitstokej ni tlamantli: 1) Nochi tlen kichijchijtokej ika tabaco tlauel ouij tijkauas sanse kej drogas. 2) Kema kiijiyotilanaj nopa nicotina asi ipan inintsontekuich san ipan siete segundos. 3) Se maseuali katli tlachichina nochipa kiampa kichiua: kema tlakua, kema kiiji se tlamantli, kema kamanalti, kema motetsopa uan ipan sekinok tlamantli.

Tlen kinpanok Earline uan Frank kinextia maseualmej katli tlachichinaj kena uelis ayokmo kiampa kichiuasej. Tlaj ayokmo tijneki titlachichinas, uelis mitspaleuis tijpatlas monemilis tlaj tijpouas nopa sekinok tlamachtili tlen uala ipan ni pilamochtsi.