¿TLAKE TECHPALEUIS AYOKMO TITEKUALANKAITASEJ?
4 | Xijtemo toTeotsij itlapaleuil
Tlen Biblia kiijtoua:
“Kema tijpiaj itonal toTeko, [...] titeikneliaj, tipakij, tijpiaj tlaseuilistli, tijpiaj toyolo ininuaya sekinok, titetlasojtlaj, tikinchiuiliaj sekinok tlen kuali, tiitstokej titemachmej, timoiknonekij uan timonauatiaj” (GÁLATAS 5:22, 23).
¿Tlake kiijtosneki?
ToTeotsij uelis techpaleuis ayokmo titekualankaitasej. Itonal techpaleuis ma tijnextikaj kuajkuali tlamantli tlen toselti amo kema ueliskia tijnextisej. Yeka, tlaj ayokmo tijnekij titekualankaitasej, ma tijkauakaj toTeotsij ma techpaleui. Tlaj kiampa tijchiuasej, uelis techpanos kej apóstol Pablo. Ya kiijtok: “Nopa ueyi chikaualistli tlen tijpiaj, uala tlen toTeko. Axuala tlen tojuantij” (2 Corintios 4:7). Uan kiampa uelis tikijtosej: “Notlapaleuil uala tlen toTeko [Jehová]” (Salmo 121:2).
Uelis tijchiuas ni:
“Achtouia tlauel nimosisiniyaya [...]. Nama Jehová nechpaleuijtok ayokmo nimosisinis” (WALDO).
Xijtlajtlani Jehová ika nochi moyolo ma mitsmaka itonal uan ma mitspaleui tijnextis kuajkuali tlamantli (Lucas 11:13). Tlaj titeiknelis, tijpias tlaseuilistli, tijpias moyolo ika sekinok uan kuali timonauatis, mitspaleuis ayokmo xitekualankaita. Ipan Biblia ximomachti tlen ni kuajkuali tlamantli uan xijchiua kampeka tijnextis ipan monemilis. Nojkia, tlauel ipati timouikas ininuaya katli kinextiaj nopa kuajkuali tlamantli, inijuantij mitspaleuisej xiteikneli uan xijchiua tlen kuali (Hebreos 10:24).
