“Ta titechnankilia kema timomaijtouaj [...], uajka nochi tlakamej ipan Tlaltipaktli ma ualakaj kampa ta” (Salmo 65:2).

Miakej maseualmej momaijtouaj san pampa kinpaleuia kuali ma kiyolmatikaj maske moiljuiaj amo aka kintlakakilia. Nopa tlamaijtoli amo san techpaleuia kuali ma tijyolmatikaj kema tikixnamikij kuesoli. Biblia kiijtoua: “ToTeko [Jehová] * itstok ininnechka nochi tlen kinotsaj. Kena, itstok ininnechka nochi tlen kitemouaj ika nochi ininyolo. [...] Kintlakakilia kema kitsajtsiliaj ma kinpaleui” (Salmo 145:18, 19).

Yeka, uelis timotemachisej Jehová kintlakakilia katli kiueyichiuaj. Ika miak tlaiknelili ya techiljuia: “Inmojuantij inualasej inmomaijtosej ika na, uan na niinmechtlakakilis” (Jeremías 29:12).

“Nochipa ximomaijtojtinemikaj” (Romanos 12:12, TNM).

Biblia techiljuia nochipa ma timomaijtokaj uan amo kema ma tijkauakaj timomaijtosej. Ni kinextia Jehová kineki ma timomaijtokaj (Mateo 26:41; Efesios 6:18).

¿Kenke toTeotsij kineki ximomaijto? Ximoiljui ipan ni tlamantli: se tetaj tlauel yolpaki kema ipilkone kiiljuia ma kipaleui. Maske uelis nopa tetaj ya kimati tlake kineki o tlake kiyolmati ipilkone, kema kikaki kiiljuia tlen kineki, kiita ipilkone motemachia ipan ya uan kiiknelia. Sanse pano kema timomaijtouaj, pampa kiampa tijnextiaj timotemachiaj ipan Jehová uan tijnekij tijnechkauisej (Proverbios 15:8; Santiago 4:8).

“Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia” (1 Pedro 5:7).

ToTeotsij kineki ma timomaijtokaj pampa tlauel techiknelia uan kitekipachoua tlen techpano. Ya kiita kema tijpiaj kuesoli uan kineki techpaleuis.

Tlanauatijketl David nochipa kiiljuiyaya Jehová ma kipaleui uan nojkia kiiljuiyaya tlen moyoliljuiyaya uan tlen kiyolmatiyaya (Salmo 23:1-6). ¿Kenijkatsa kiitayaya David? Tlauel kiikneliyaya uan nochipa kitlakakiliyaya kema momaijtouayaya (Hechos 13:22). ToTeotsij nojkia techtlakakilia kema timomaijtouaj pampa kitekipachoua tlen techpano.

Ni tlajtoli tijpantisej ipan se salmo. Katli kiijkuilok ni salmo motemachiyaya Jehová kitlakakiliyaya kema momaijtouayaya, uan nopa tlauel kipaleuik. Kiyolmatiyaya itstoya inechka toTeotsij uan nopa kipaleuik kiixnamikis miak tlaouijkayotl (Salmo 116:1-9).

Tlaj timotemachiaj toTeotsij techtlakakilia, nochipa timomaijtosej. Ma tikitakaj tlen kipanok se tlakatl tlen itoka Pedro, ya itstok ika norte tlen España. Itelpoka, katli kipixtoya 19 xiuitl, mijki pampa kipanok tlen amo kuali kema yauiyaya ipan carro. Kema panok nopa tlamantli, Pedro kiiljuik toTeotsij nochi tlen kiyolmatiyaya uan nochipa kiiljuiyaya ma kiyolchikaua uan ma kipaleui. ¿Tlake panok? Pedro kiijtok: “Jehová kintekiuik toikniuaj uan kiampa nechnankilik kema nimomaijtouayaya. Inijuantij techpaleuijkej uan techyolchikajkej”.

Maske tlamaijtoli amo kichijki inintelpoka sampa ma itsto, Pedro uan ichampoyouaj tlauel kinpaleuik kema momaijtojkej. Isiua, katli itoka María del Carmen, kiijtok: “Tlamaijtoli tlauel nechpaleuik nikixnamikis tlen techpanotoya. Nijmatiyaya Jehová nechkuamachiliyaya, yeka kema nimomaijtouayaya, kuali nijyolmatiyaya uan nijpiayaya tlayolseuilistli”.

Tlen kinpanotok miakej maseualmej uan tlen kiijtoua Biblia kinextia toTeotsij kena techtlakakilia kema timomaijtouaj. Maske Jehová techtlakakilia, amo nochi katli momaijtouaj kintlakakilia. ¿Kenke sekij kena kintlakakilia uan sekinok amo?