2 | ‘Itlajtol techyolchikauaʼ
BIBLIA KIIJTOUA: “Nochi tlen kiijkuilojkej uejkajkia, kiijkuilojkej para techmachtis para uelis tikijiyouisej tlen techpanotiuala. Nojkia ijkuilijtok Itlajtol para techyolchikauas para ma tijchiakaj nochi tlen techiljuia para tijselisej teipa” (ROMANOS 15:4).
¿Tlake kiijtosneki?
Biblia kipia tlajtoli tlen techyolchikaua, tlen techpaleuia ma tikijiyouikaj tlen techpano uan ayokmo ma timoiljuikaj tlen techyolkokoua. Nojkia techiljuia nechka nochipa kuali tijyolmatisej.
¿Kenijkatsa techpaleuia?
Kemantika nochi timokuesouaj, pero katli mokuesouaj miak tonali uan moyolkuesouaj, mojmostla kiampa kiyolmatij. ¿Kenijkatsa uelis kinpaleuis Biblia?
Kuajkuali tlajtoli tlen uala ipan Biblia uelis techpaleuis ayokmo ma timoiljuikaj tlamantli tlen techtekipachoua (Filipenses 4:8). Tlen nopaya kiijtojtok techpaleuia ma timoiljuikaj tlen techyolseuia, uan ayokmo tlauel ma timoiljuikaj tlen techtekipachoua (Salmo 94:18, 19).
Biblia techpaleuia ayokmo ma timoiljuikaj amo tleno topati (Lucas 12:6, 7).
Biblia kiualika miak textos tlen techpaleuia ma timotemachikaj amo toselti tiitstokej uan techiljuia toTeotsij kikuamachilia tlen tijyolmatij (Salmo 34:18; 1 Juan 3:19, 20).
Biblia kiijtoua toTeotsij kiijtojtok teipa ayokmo tikilnamikisej tlen techtekipachoua (Isaías 65:17; Apocalipsis 21:4). Kema timoyoliljuiaj ipan ni tlamantli, techmaka chikaualistli uan kiampa ueli tikijiyouiaj tlen tijyolmatij.
Tlen nojkia mitspaktis tikitas
TLEN BIBLIA KINANKILIA
¿Uelis nechyolchikauas tlen Biblia kiijtoua?
Miakej maseualmej amo kuali kiyolmatij uan kiixnamiktokej miak tlaouijkayotl. Maske kiampa kinpanotok, Biblia tlauel kinyolchikajtok.
