Ipan tlamachtili tlen ya tikitakej, nopaya kiijtoua toTeotsij nechka kintsontlamiltis katli amo kuali monejnemiltiaj uan nochi tlen amo kuali. ¿Kenke timotemachiaj toTeotsij nelnelia kiampa kichiuas? Pampa ipan Biblia kiijtoua:

“Panoti ni Tlaltipaktli” (1 JUAN 2:17).

Tijmatij nelnelia momanauisej maseualmej pampa nopa texto nojkia kiijtoua:

“Ajkeya kichiua tlen toTeko kineki, itstos para nochipa”.

Uajka, tlaj tijnekij timomanauisej moneki tijneltokasej toTeotsij. Uan, tlaj tijnekij tijneltokasej, achtoui moneki tikixmatisej.

Jesús kiijtok: “Inijuantij kipiaj yolistli yankuik para nochipa intla mitsixmatij ta tlen melauak tiDios” (Juan 17:3). Tlaj tijnekij timomanauisej kema kitsontlamiltisej tlen amo kuali uan tiitstosej nochipa, moneki tikixmatisej toTeotsij. Uajka, amo kinamiki san tijmatisej itstok toTeotsij yon tijmatisej san se kentsi tlen ya, moneki timouampojchiuasej iuaya. Kema timouampojchiuaj iuaya se akajya tijkixtiaj tonali, kiampa moneki tijchiuasej ika toTeotsij. Ma tikitakaj se keski textos tlen techpaleuis kuali ma timouampojchiuakaj iuaya uan nochipa kiampa ma tijchijtokaj.

Tlaj tijnekij tiyoltosej moneki mojmostla titlakuasej. Maske nopa nelia, Jesús kiijtok: “Axsan pantsi moneki para itstosej tlakamej. Nojkia moneki tijneltokilijtiasej nochi iTlajtol toTeko” (Mateo 4:4).

Ipan Biblia uelis tijpantisej tlake kineki toTeotsij ma tijchiuakaj. Kema tijpojtiasej tikitasej tlake kichijki uejkajkia, tlake kichiua ipan ni tonali uan tlake kichiuas teipa.

Tlaj kuali tikixmatisej toTeotsij, techpaleuis tijkauasej tlen amo kuali, maske kemantika tijmatisej ouij tijchiuasej.

Ma tikitakaj tlen kipanok se siuatl katli tijtokaxtisej Sakura. Ya auilnemiyaya, uan kema pejki momachtia Biblia kiyekok tlen toTeotsij kiijtoua: “Uajka amo xijchiuakaj tlen ueli ika tlen axinmonamik” (1 Corintios 6:18). Sakura kiiljuik toTeotsij ma kipaleui ayokmo kiampa monejnemiltis, uan kena kipatlak inemilis. Maske kiampa kichijki, nojua moneki kichijtos kampeka. Ya kiijtoua: “Kema sampa nimoiljuia tlen amo kinamiki, nikiljuia Jehová, uan amo tleno nijtlatia pampa nijmati san ya uelis nechpaleuis. Tlauel nechpaleuijtok nimomaijtos ika Jehová”. Kej Sakura, tlauel miakej nojkia kichiuaj kampeka kiixmatisej toTeotsij, uan ya kinpaleuia kipatlasej ininnemilis uan monejnemiltisej kej ya kipaktia (Filipenses 4:13).

Kema tijchiuaj kampeka nojua tikixmatisej Jehová, ya nojkia techixmatis uan nojua timouampojchiuasej iuaya (Gálatas 4:9; Salmo 25:14). Tlaj kiampa tijchiuasej, techpaleuis ma timomanauikaj uan kiampa uelis tiitstosej ipan se yankuik Tlaltipaktli. Uan, ¿kenijkatsa elis nopa yankuik Tlaltipaktli? Ipan seyok tlamachtili moixtomas.