ToTeotsij techiknelia uan kitekipachoua tlen techpano
1. KICHIUA MA KISA TONATI
¿Timoiljuijtok tlake panoskia tlaj amo kisaskia Tonati? Tonati kichiua se kuauitl ma kipia ixiuiyo, ma xochiyoua, ma kipia itlajka uan iyol. Nojkia, tonati kichiua ineljuayo se kuauitl ma kichichina atl, ma tlejko nopa atl ipan ixiuiyo uan nopaya nopa atl ma pojkeui.
2. KICHIUA MA UETSI ATL
Kema uetsi atl, eli se tlateochiualistli tlen toTeotsij techmaka pampa ipan Tlaltipaktli tlaejeli. ToTeotsij kichiua ma uetsi atl, ma tlaejeli uan techmaka miak tlamantli tlen uelis tijkuasej, uan kichiua tlauel ma tiyolpakikaj.
3. TECHMAKA TLAKUALISTLI UAN TLEN TIMOKENTISEJ
Miakej tetajmej kichiuaj kampeka kinmakasej ininchampoyouaj tlen kikuasej uan tlen mokentisej. Biblia kiijtoua: “Xikintlachilikaj totomej tlen patlantinemij. Yajuantij axmomiltiaj, uan axpixkaj, niyon axkiajokuij inintlakualis. Pero inmoTata tlen itstok nepa iluikak kintlamaka. Uan toTeko nojkia inmechtlamakas pampa más inmopati iixtla que totomej” (Mateo 6:25, 26).
“Xijtlachilikaj xochitl tlen moskaltiaj kampa ueli [...]. Pero niinmechiljuia, nopa ueyi tlanauatijketl Salomón ika nochi iueyitilis axkema kipixki iyejyejka keja nopa xochitl. Kena, nochi xochitl toTeko kinmakatok ininyejka [...]. Uajka miak más inmechyoyontis inmojuantij, yonke ouij inkineltokasej para inmechmakas tlen inmechpoloua” (Mateo 6:28-30).
Tlaj toTeotsij ueli techmaka tlakualistli uan tlen timokentisej, uajka ya nojkia uelis techmakas sekinok tlamantli tlen techpoloua. Tlaj tijchiuasej tlen toTeotsij kipaktia, ya techteochiuas kema kiitas tijchiuaj kampeka tijtemosej tlen ika timopanoltisej o nojkia uelis kichiuas ma tijpiakaj se tekitl (Mateo 6:32, 33).
Kema timoiljuiaj ipan Tonati, kema uetsi atl, totomej uan xochitl, kichiua ma tikiknelikaj toTeotsij. Ipan seyok tlamachtili tikitasej kenijkatsa toTeotsij kinkamanaljuijtok maseualmej.
