¿Kuali tiitstos tlaj kuali timonejnemiltis?
Miakej moiljuiaj tlaj se akajya kineki kuali itstos teipa, moneki kichiuilis tlen kuali. Se neskayotl, Confucio, se tlamachtijketl uan filósofo katli itstoya ipan xiuitl 551 uan mijki ipan 479 a.u.J., kiijtok: “Amo xikinchiuili sekinok tlen amo tijnekiskia ma mitschiuilikaj”. * Miakej katli euaj Asia nojkia kiampa moiljuiaj.
¿TLAKE KICHIUAJ SEKINOK?
Miakej moiljuiaj tlaj se akajya kineki kuali itstos teipa, moneki kuali monejnemiltis. Yeka, tlatlepanita, kichiua tlen kuali, kinpaleuia sekinok uan kipia kuali itlalnamikilis. Linh, se siuatl katli eua Vietnam, kiijtoua: “Nimoiljuiyaya kuali niitstoskia tlaj amo nitetlachtekiliskia uan tlaj amo niteistlakauiskia”.
Sekij kichiuaj tlen kuali pampa kiampa kinmachtiaj ipan ininreligión. Hsu-Yun, se tlakatl katli eua Taiwán, kiijtoua: “Nechmachtijkej kema se akajya miki, nochipa yolpakis tlaj kichijki tlen kuali o nochipa tlaijiyouis tlaj amo kuali monejnemiltik”.
¿TLAKE KINPANO TEIPA?
Maske kema tikinpaleuiaj sekinok techpaleuia kuali ma tiitstokaj, miakej kiitstokej amo nochipa kiampa pano. Shiu Ping, se siuatl katli eua Hong Kong, kiijtoua: “Nikitstok amo nochipa kuali tiitstos maske tikinpaleuis sekinok. Na tlauel nikinmokuitlauik nochampoyouaj uan nijchiuayaya tlen kuali. Maske kiampa nijchijki, amo kuali tiitstoyaj iuaya noueue uan teipa techtlauelkajki”.
Miakej kiitstokej religión amo nochipa kichiua se akajya kuali ma monejnemilti. Etsuko, se siuatl katli eua Japón, kiijtoua: “Niitstoya ipan se religión uan nijyakanayaya tlen kichiuayayaj telpokamej. Amo nechpaktik kema nikitak kenijkatsa katli itstoyaj ipan noreligión amo kuali monejnemiltiyayaj, nochi kinekiyayaj tlayakanasej uan amo kuali kitekiuiyayaj tomij tlen temakayayaj”.
“Na tlauel nikinmokuitlauik nochampoyouaj uan nijchiuayaya tlen kuali. Maske kiampa nijchijki, amo kuali tiitstoyaj iuaya noueue uan teipa techtlauelkajki” (SHIU PING, HONG KONG)
Sekij amo kuali kiyolmatij pampa kiitstokej maske kichijkej tlen kuali, amo kinpaleuik sekinok. Kiampa kiyolmatki Van, se siuatl katli eua Vietnam. Ya kiijtoua: “Mojmostla nijtlaliyaya ipan tlaixpamitl kuatlajkayotl, xochitl uan tlakualistli pampa nijnekiyaya ma nechpaleuikaj katli ya uejkaj mijkej. ¡Nochi tlen nijchijki elki san tlapik...! Noueue tlauel mokokok. Teipa, noichpoka katli momachtiyaya ipan seyok altepetl, mijki kema kipixtoya 20 xiuitl”.
Kej tikitstokej, maske kuali timonejnemiltisej nopa amo kiijtosneki teipa kuali tiitstosej. Uajka, ¿tlake techpaleuis? Moneki tijpiasej se tlamantli tlen techyakanas ipan tonemilis, tlen kinankilis tlen tijnekij tijmatisej uan tlen techpaleuis kuali ma tiitstokaj teipa. ¿Tlake tlamantli?
^ párr. 2 Tlaj tijneki tijmatis sekinok tlamantli tlen tlamachtik Confucio, uelis tikitas ipan www.pr418.com nopa amochtli El hombre en busca de Dios, tlamachtili 7, párrafos 31-35, tlen kichijtokej Jehová itlajtoltemakauaj.
Tlen nojkia mitspaktis tikitas
¡XITLACHIXTOKAJ!
Timoyakanas ika kuajkuali tlamantli
Tlaj tikinmachtis mokoneuaj ma moyakanakaj ika kuajkuali tlamantli, kinpaleuis teipa kuali ma kitlapejpenikaj tlen kichiuasej.
TLEN BIBLIA KINANKILIA
¿Tlake kiijtosneki tikinchiuilisej sekinok tlen tijnekiskiaj ma techchiuilikaj?
Kema Jesús kiijtok nopa tlajtoli kamanaltitoya kenijkatsa moneki tikinchiuilisej tlen kuali tokualankaitakauaj uan amo san katli kuali techitaj.
