ASTROLOGÍA: Miakej moiljuiaj kej motejtekpankej sitlalimej kema tlakatkej, kichiuas kuali ma itstokaj teipa. Yeka, kipouaj horóscopos pampa kinekij kimatisej tlake kinpanos teipa. Uan moiljuia uelis kichiuasej se keski tlamantli uan kiampa amo kipiasej kuesoli o tlauel tlapijpiasej.

CARTAS DEL TAROT O TETLAJCHIUIANIJ: Katli kipouaj cartas del tarot kiniljuiaj maseualmej tlake uelis kichiuasej kema kinpano se keski tlamantli. Kema kiniljuiaj kenke kinpano tlen amo kuali, uelis kichiuasej tlen kinpaleuis kisenkauasej nopa kuesoli uan kuali itstosej.

KINUEYICHIUAJ KATLI YA MIJKEJ: Sekinok kineltokaj moneki kinueyichiuasej katli ya mijkej o sekinok teotsitsij, kiampa uelis kinmokuitlauisej uan kinpaleuisej. Van, * se siuatl katli eua Vietnam kiijtoua: “Nimoiljuiyaya tlaj nikinueyichiuaskia katli ya mijkej, nokoneuaj uan na kuali tiitstoskiaj uan amo tleno techpoloskia”.

SAMPA YOLI IPAN SEYOK MASEUALI O IPAN SEYOK TLAMANTLI: Miakej moiljuiaj kema se akajya miki, sampa yoli ipan seyok tlamantli. Uan kiijtouaj kema kinpano tlen kuali o tlen amo kuali, eli pampa kiampa monejnemiltijkej ipan seyok inemilis.

Maske miakej amo motemachiaj ipan ni tlamantli, kipouaj ininhoróscopo, kitekiuiaj tabla ouija^®, cartas del tarot uan yauij kampa tetlajchiuiaj, pampa kinekij kimatisej tlaj kuali itstosej teipa.

¿Kuali itstokej katli motemachiaj ipan ni tlamantli?

Ma tikitakaj tlen kipanok Hào, katli eua Vietnam. Ya motemachiyaya ipan astrología, ipan tetlajchiuianij uan nojkia kinueyichiuayaya katli ya mijkej. ¿Nelia kipaleuik? Hào kiijtoua: “Ayokmo nitlanamakak, pampa tlauel nitlauikayaya, amo kuali nimouikayaya ika nochampoyouaj uan tlauel nimotekipachouayaya”.

Qiuming katli eua Taiwán, kineltokayaya astrología, kema se akajya sampa yoli ipan seyok maseuali, kema kiijtouaj ijkuilijtok tlen mitspanos teipa, ipan tetlajchiuianij uan nojkia kinueyichiuayaya katli ya mijkej. Kema momachtik ni tlamantli, kiijtok: “Nikitak amo eliyaya melauak. Nopa astrología amo eli temachtli. Uan tlaj tijneltoka se akajya sampa yoli ipan seyok maseuali..., ¿kenijkatsa kuali timonejnemiltis tlaj amo tikilnamiki kenijkatsa tieliyaya achtouia?”.

Hào, Qiuming uan sekinok maseualmej kiitstokej tlaj tijneltokas ijkuilijtok tlen mitspanos teipa, astrología, tikinueyichiuas katli ya mijkej o tijneltokas se akajya sampa yoli ipan seyok maseuali, nopa amo mitspaleuis tijmatis kenijkatsa tiitstos teipa. Uajka, ¿tlake techpaleuis?

Miakej moiljuiaj tlaj tijnekij kuali tiitstosej, moneki tlauel timomachtisej o tlauel titlatominpiasej. Maske kiampa moiljuiaj, ¿kenijkatsa kiyolmatij katli kiampa kichijtokej?