1, 2. ¿Tlake moneki tijchiuasej ipan ni tonali maske toTeotsij ayamo kikualtlalia Tlaltipaktli?

 TLAUEL tiyolpakij pampa Jehová kiijtojtok kitlamiltis tlen amo kuali ipan Tlaltipaktli uan teipa kuali tiitstosej (2 Ped. 3:13). Maske amo tijmatij kema kikualtlalis Tlaltipaktli, nochi tlen tikitaj ipan ni tonali kinextia toTeotsij nechka kichiuas tlen kiijtojtok (Mat. 24:32-34, 36; Hech. 1:7).

² Nochi moneki tijchiuasej kampeka timotemachisej Jehová temachtli kichiuas tlen kiijtojtok. ¿Kenke? Pampa maske se akajya kuali tlaneltoka, uelis kaxanis itlaneltokilis. Apóstol Pablo kiijtok kema se akajya amo kuali tlaneltoka eli kej “nopa tlajtlakoli tlen más techtsakuilia” (Heb. 12:1). Tlaj amo tijnekij kiampa ma techpano, moneki tijchiuasej kampeka timomachtisej tlen techpaleuis ma timotemachikaj Jehová nelnelia kikualtlalis Tlaltipaktli (Heb. 11:1).

3. ¿Tlake tikitasej ipan ni tlamachtili?

³ Ipan ni tlamachtili tikitasej eyi tlamantli tlen techpaleuis ma timotemachikaj Jehová nelia kikualtlalis Tlaltipaktli: 1) ma timoyoliljuikaj kenijkatsa Jesús imikilis techpaleuia, 2) ma timoyoliljuikaj kenijkatsa Jehová kipia chikaualistli uan 3) ma tijchiuakaj tlen techpaleuis kuali titlaneltokasej. Teipa tikitasej kenijkatsa tlen Jehová kiiljuik Habacuc techpaleuia kuali ma titlaneltokakaj. Achtoui ma tikitakaj kenke moneki timotemachisej Jehová nelia kikualtlalis Tlaltipaktli.

¿KENKE MONEKI KUALI TITLANELTOKASEJ?

4. ¿Kema moneki tijnextisej kuali titlaneltokaj?

⁴ Mojmostla moneki tijnextisej tlaj kuali titlaneltokaj ika  tlen tijtlapejpeniaj pampa nochipa tikitaj ininuaya ajkia timouampojchiuasej, ika tlake timopakilismakasej, tlaj timomachtisej, tlaj timosenkauasej, tlaj tikinpiasej tokoneuaj o tlake tekitl tijchiuasej. Kema tijtlapejpenisej ni tlamantli, uelis timotlajtlanisej: “¿Tlake kinextia tlen nijtlapejpenia? ¿Kinextia nimotemachia toTeotsij nechka kiyankuilis nochi tlen onka? ¿O nijnextia nimoiljuia kej maseualmej katli amo kiixmatij Jehová?” (Mat. 6:19, 20; Luc. 12:16-21). Tlaj nojua tlauel timotemachiaj toTeotsij nechka kikualtlalis Tlaltipaktli, techpaleuis kuali ma tijtlapejpenikaj tlen tijchiuasej ipan tonemilis.

5, 6. ¿Kenke moneki kuali titlaneltokasej kema tikixnamikij tlaouijkayotl? Xikijto se neskayotl.

⁵ Nojkia moneki tijnextisej kuali titlaneltokaj kema techtlatsakuiltiaj, kema tijpiaj se kokolistli o kema tikixnamikij se tlaouijkayotl tlen tlauel techyolkokoua. Uelis achtoui amo tlauel ouij tijmatisej tikixnamikisej nopa tlaouijkayotl. Uan tlaj uejkauas, monekis kuali titlaneltokasej pampa nopa techpaleuis ma tikijiyouikaj uan nojua ma tijtekipanojtokaj Jehová ika pakilistli (Rom. 12:12; 1 Ped. 1:6, 7).

⁶ Kema tikixnamiktokej se tlaouijkayotl, uelis timoiljuisej Jehová amo kema kikualtlalis tlen onka ipan Tlaltipaktli. Kema kiampa timoiljuiaj, ¿kiijtosneki amo kuali titlaneltokaj? Amo. Ma timoiljuikaj ipan ni tlamantli, kema tlauel tlaseseya kampa tiitstokej, uelis timoiljuiaj ayokmo kema sampa tlatotonias. Maske kiampa timoiljuiaj, teipa sampa tlatotonia. Nojkia kiampa uelis techpanos kema tlauel timokuesouaj, uelis timoiljuisej toTeotsij amo kema kikualtlalis Tlaltipaktli. Uan tlaj kuali titlaneltokasej, timotemachisej Jehová temachtli kichiuas tlen kiijtojtok (Sal. 94:3, 14, 15; Heb. 6:17-19). Tlaj timotemachiaj ipan Jehová, techpaleuis nojua ma tikachtouitlalikaj tijtekipanosej.

7. ¿Tlake amo kinamiki timoiljuisej?

⁷ Nojkia moneki kuali titlaneltokasej kema titlajtolmoyauaj. Kema tikiniljuiaj sekinok tlen toTeotsij kichiuas teipa, miakej moiljuiaj amo kema mochiuas pampa tikiniljuiaj miak tlamantli tlen kuali (Mat. 24:14; Ezeq. 33:32). Yeka ma tijchiuakaj kampeka amo timoiljuisej kej inijuantij. Tlaj amo tijnekij ma techmauakaj, moneki tijchiuasej kampeka kuali titlaneltokasej. Ma tikitakaj eyi tlamantli tlen techpaleuis.

MA TIMOYOLILJUIKAJ KENIJKATSA JESÚS IMIKILIS TECHPALEUIA

8, 9. ¿Kenijkatsa techpaleuia kema timoyoliljuiaj ipan Jesús imikilis?

⁸ Tlaj tijnekij kuali titlaneltokasej moneki timoyoliljuisej kenijkatsa Jesús imikilis techmakixtik. Imikilis kinextia Jehová nelnelia kichiuas tlen kiijtojtok. Moneki tijkixtisej tonali uan timoyoliljuisej tlen kichijki Jehová uan kenke kitemaktilik iKone. Nopa techpaleuis ma timotemachikaj Jehová nelnelia kikualtlalis Tlaltipaktli uan nelia tiitstosej nochipa. ¿Kenke kiampa tikijtouaj?

⁹ Ma timoiljuikaj nochi tlen Jehová kichijki kema kitemaktilik iKone. Ya kiualtitlanki ipan Tlaltipaktli iyojtsi iKone katli tlauel kiiknelia uan katli kuali iuaya mouampojchijtok pampa kinekiyaya ma tlakatiki kej se tlakatl katli xitlauak. Kema Jesús itstoya ipan Tlaltipaktli tlauel tlaijiyouik uan kimiktijkej kej se akajya katli kichijtoya tlen tlauel amo kuali. Jehová tlauel tlaijiyouik pampa temaktilik katli tlauel kiiknelia. Ya tlauel teiknelia, uajka amo kikajtoskia ma kimiktikaj iKone tlaj imikilis amo kichiuaskia ma tiitstokaj nochipa (Juan 3:16; 1 Ped. 1:18, 19). Jehová temaktilik katli tlauel kipatiita, yeka uelis kichiuas  ma tiitstokaj nochipa ipan nopa yejyektsi Tlaltipaktli.

MA TIMOYOLILJUIKAJ KENIJKATSA JEHOVÁ KIPIA CHIKAUALISTLI

10. Kej kiijtoua Efesios 3:20, ¿tlake ueli kichiua Jehová?

¹⁰ Nojkia tlauel techpaleuis kuali titlaneltokasej tlaj timoyoliljuiaj Jehová kipia miak chikaualistli. Ya uelis kichiuas nochi tlen mosentlalijtok. Uelis tojuantij tijmatij ouij tijneltokasej tiitstosej nochipa. Maske kiampa timoiljuiaj, Jehová miakpa kiijtojtok kichiuas tlen amo tiuelij, uan san ya uelis kichiuas pampa kipia miak chikaualistli (Job 42:2; Mar. 10:27). Yeka kiijtojtok kichiuas uejueyi tlamantli (xijpoua Efesios 3:20).

11. Xikijto se tlamantli tlen Jehová kichijki maske tojuantij timoiljuiaj amo ueliskia kichiuas (xikita recuadro “ Nopa uejueyi tlamantli tlen Jehová kichijki”).

¹¹ Ma timoiljuikaj tlen Jehová kintenkauilik kinmakaskia se keskij itekipanojkauaj katli itstoyaj uejkajkia. Tlen kiniljuik nesiyaya ouij moaxitiskia, kiniljuik Abraham uan Sara kipiaskiaj se ininkone maske ya eliyayaj uejueyij (Gén. 17:15-17). Nojkia kiiljuik Abraham, iteipaixuiuaj moaxkatiskiaj tlali Canaán. Teipa ipan miak xiuitl, iteipaixuiuaj Abraham o israeleuanij kinchiualtijkej san tlapik ma tekitikaj ipan Egipto, yeka uelis moiljuijkej amo kema moaxkatiskiaj nopa tlali. Maske kiampa moiljuijkej, kena moaxitik. Uan kema panok miak xiuitl, Jehová kiiljuik Elisabet kipiaskia se ikone maske ya eliyaya ueyi. Uan María kiiljuik kipiaskia Jesús maske amo kipiayaya iueue. Kiampa Jehová kichiuaskia ma moaxiti nopa tlajtolpanextili tlen kiijtok ipan xochimili Edén (Gén. 3:15). Nochi tlen Jehová kitenkajki nelnelia kichijki.

12. ¿Kenijkatsa techpaleuia Josué 23:14 uan Isaías 55:10, 11?

¹² Kema timoyoliljuiaj ipan tlen Jehová kitenkajki kichiuas uan nelnelia kichijki, tikitaj ya kipia miak chikaualistli. Nopa techpaleuia ma timotemachikaj ya nelnelia kikualtlalis Tlaltipaktli (xijpoua Josué 23:14; Isaías 55:10, 11). Tlaj nelnelia timotemachiaj, techpaleuis ma tikiniljuikaj sekinok tlen Jehová kichiuas nelia eli melauak. Kema Jehová kiijtok kiyankuilis nochi tlen onka, kiijtok ni tlamantli: “Xikijkuilo ni pampa ni tlajtoli temachtli uan melauak” (Apoc. 21:1, 5). Ma tijchiuakaj tlen techpaleuis kuali ma titlaneltokakaj.

MA TIJCHIUAKAJ TLEN TECHPALEUIS KUALI TITLANELTOKASEJ

13. ¿Kenijkatsa techpaleuia tlanechikoli?

¹³ Tlaj tijnekij kuali titlaneltokasej, moneki tijchiuasej se keski tlamantli. Ma tikitakaj kenijkatsa tlauel techpaleuia kema tiauij tlanechikoli. Anna, b katli senkistok tlatekipanojtok miak xiuitl, kiijtoua: “Tlanechikoli nechpaleuijtok kuali ma nitlaneltoka, eli kej nopa tepostli tlen kipaleuia se barco amo ma kiuika ajakatl. Maske se toikni amo tlauel kuali tlamachtia o amo kiijtoua se tlamantli tlen tlauel pankisa, nochipa nijyekoua se tlamantli tlen nechpaleuia nojua kuali ma nijkuamachili Biblia, uan nopa nechpaleuijtok nojua tlauel kuali ma nitlaneltoka”. Ipan tlanechikoli toikniuaj nojkia kiijtouaj tlen uelis techpaleuis kuali ma titlaneltokakaj (Rom. 1:11, 12; 10:17).

14. ¿Kenijkatsa techpaleuia kema titlajtolmoyauaj?

¹⁴ Kema titlajtolmoyauaj nojkia techpaleuia kuali ma titlaneltokakaj (Heb. 10:23). Barbara, katli kitekipanojtok Jehová kipano 70 xiuitl, kiijtoua: “Tlauel nechpaleuijtok kuali ma nitlaneltoka kema nitlajtolmoyaua. Kema nikiniljuia sekinok kenijkatsa eli Jehová uan  tlen mosentlalijtok kichiuas, nechpaleuia nojua tlauel kuali ma nitlaneltoka”.

15. ¿Kenijkatsa techpaleuia kema timomachtiaj toselti? (Nojkia xikita tlaixkopinkayomej).

¹⁵ Ma tikitakaj seyok tlamantli tlen techpaleuis kuali ma titlaneltokakaj: kema timomachtiaj toselti. Susan, katli mosentlalijtok momachtis se keski tonali, kiijtoua: “Sejse domingo nimomachtia Tlen Tematiltia tlen timomachtisej seyok semana. Lunes uan martes, nimomachtia tlen timomachtiaj ipan semana uan ipan sekinok tonali, nimomachtia sekinok tlamachtili”. Susan nochipa kiampa momachtia, yeka nojua tlauel kuali tlaneltokatok. Uan Irene, katli tlatekipanojtok miak xiuitl ipan Ueyi Kali Betel, kiijtoua tlauel kipaleuijtok kuali tlaneltokas pampa momachtia se keski tlajtolpanextili, ya kiijtoua: “Tlauel nimosentlachilia kema nikita kenijkatsa sejse tlajtolpanextili moaxitia kej Jehová kiijtojtok”. c

“NI TLAMANTLI PANOS SENKISTOK KEJA NIMITSILJUIA”

16. ¿Kenke tikijtouaj tlen Jehová kiiljuik Habacuc nojkia techpaleuia? (Hebreos 10:36, 37).

¹⁶ Miakej toikniuaj ipan miak xiuitl kichixtokej Jehová ya ma kitsontlamilti tlen amo kuali. Miakej moiljuiaj toTeotsij ya monektoskia kitsontlamiltis tlen amo kuali. Jehová kikuamachilia tlen kiyolmatij itekipanojkauaj, yeka kiiljuik tlajtolpanextijketl Habacuc: “Ni tlamantli tlen nimitsyolmelauas axpanos nimantsi. Pero ika yolik monechkauijtias nopa tonali kema temachtli panos tlen nimitsiljuis ipan ni tlanextili. Intla tikitas para axpano nimantsi, amo ximokueso pampa temachtli panos. Xijpia ueyi moyolo pampa ni tlamantli panos senkistok keja nimitsiljuia ipan nopa tonali tlen nikixtlalijtok” (Hab. 2:3). Ika tlen kiijtok Jehová, amo san kinekiyaya kiyolchikauas Habacuc, nojkia kinekiyaya techyolchikauas. Jehová kichijki apóstol Pablo ma kinilnamikili ni tlajtoli toikniuaj katli kinekij ya ma mokualtlali  Tlaltipaktli (xijpoua Hebreos 10:36, 37). Uan tlaj kemantika tikitaj amo nima kichiua, ma tikilnamikikaj ya techiljuijtok: “Xijpia ueyi moyolo pampa ni tlamantli panos senkistok keja nimitsiljuia ipan nopa tonali tlen nikixtlalijtok”.

17. ¿Kenijkatsa se tosiuaikni kichijki tlen Jehová kitlajtolmakak Habacuc?

¹⁷ Miakej toikniuaj ipan miak xiuitl kichijtokej tlen Jehová techtlajtolmaka uan kichixtokej nopa tonali kema kiyankuilis nochi tlen onka. Ma tikitakaj tlen kichijki tosiuaikni Louise, katli pejki kitekipanoua Jehová ipan 1939. Ya kiijtoua: “Nimoiljuik mochiuaskia Armagedón kema ayamo nikaxitiyaya 18 xiuitl, uan amo kiampa panok. Tlauel nechpaleuijtok ipan miak xiuitl tlen kichijkej katli kinextikej kipia ininyolo kej Noé, Abraham, José uan sekinok Jehová itekipanojkauaj, katli kichixkej miak xiuitl Jehová ma kiaxiti tlen kitenkajtok. Nijchixtok Jehová ma kikualtlali Tlaltipaktli uan nopa nechpaleuijtok uan kinpaleuijtok sekinok ma motemachikaj Jehová nechka kichiuas tlen kiijtojtok”. Miakej toikniuaj katli miak xiuitl tlatekipanojtokej, uelis nojkia moiljuiaj kej Louise.

18. ¿Kenijkatsa techpaleuia tlen Jehová kichijchijtok ma timotemachikaj nelnelia kikualtlalis Tlaltipaktli?

¹⁸ Maske ayamo mokualtlalia Tlaltipaktli, kena uelis tikitasej se keski tlamantli tlen kena eltok, kej sitlalimej, kuauitl, tlapialmej uan maseualmej. Maske uejkajkia amo eltoya, nama nelnelia tikitaj pampa Jehová kichijchijki (Gén. 1:1, 26, 27). Jehová kiijtojtok kiyankuilis Tlaltipaktli, uan nelnelia uelis kichiuas tiitstosej nochipa uan amo kema timokokosej. Kema Jehová kikualtlalis Tlaltipaktli, nelnelia tikitasej tlen kichiuas sanse kej tlen kichijchijtok ipan ni tonali (Is. 65:17; Apoc. 21:3, 4).

19. ¿Tlake moneki tijchiuasej tlaj tijnekij kuali titlaneltokasej?

¹⁹ Maske toTeotsij ayamo kikualtlalia Tlaltipaktli, ma tijchiuakaj kampeka kuali titlaneltokasej. Ma timoiljuikaj kenijkatsa techpaleuia pampa Jesús techmakixtik, kenijkatsa Jehová kipia miak chikaualistli uan ma tijchiuakaj se keski tlamantli tlen techpaleuis kuali ma titlaneltokakaj. Tlaj kiampa tijchiuasej, tielisej kej katli “kipiaj ininyolo para kichiasej hasta kiselisej nochi tlen Toteko techtenkauilijtok para techmakas” (Heb. 6:11, 12; Rom. 5:5).