1. ¿Kenke titlanankiliaj ipan tlanechikoli?

 ¿KENKE tiauij tlanechikoli? Pampa tijnekij tijueyichiuasej Jehová (Sal. 26:12; 111:1). Uan timoyolchikauasej pampa ipan ni tonali tlauel ouij kej tiitstokej (1 Tes. 5:11). Uajka, kema titlanankiliaj ipan tlanechikoli tijchiuaj ni ome tlamantli.

2. ¿Kema uelis titlanankilisej ipan tlanechikoli?

² Nochipa uelis titlanankilisej ipan tlanechikoli tlen mochiua sejse semana. Uelis titlanankilisej kema timomachtiaj pilamochtsi Tlen Tematiltia uan kema timomachtiaj pilamochtsi Kej Timonejnemiltiaj uan Titlajtolmoyauaj. Uelis titlanankilisej kampa kiijtoua “Xijpanti tlamachtili tlen tlauel ipati”, “Kampa techmachtiaj ika Biblia” o sejkanok kampa toikniuaj techiljuisej ma titlanankilikaj.

3. 1) ¿Tlake uelis kichiuas amo ma titlanankilikaj? 2) ¿Kenijkatsa techpaleuia Hebreos 10:24, 25?

³ Tijnekij tijueyichiuasej Jehová uan tikinyolchikauasej toikniuaj kema titlanankiliaj. Maske kiampa tijnekij tijchiuasej, onka ome tlamantli tlen uelis kichiuas amo ma titlanankilikaj: uelis tlauel timajmauisej o amo techiljuisej  ma titlanankilikaj maske miakpa timomatlananasej. Nopa amatlajkuiloli tlen apóstol Pablo kintlajkuiljuilik hebreos, kiijtoua se tlamantli tlen uelis techpaleuis. Kema Pablo kiijtok ma timonechikokaj, nojkia kiijtok: “Ma tijtemokaj kejatsa timosemakasej se ika seyok para más timoiknelisej” (xijpoua Hebreos 10:24, 25). Tlaj tikilnamiktosej uelis tikinyolchikauasej sekinok kema titlanankilisej maske amo tikijtosej miak tlamantli, techpaleuis amo tlauel ma timajmauikaj kema timomatlananasej. Uan tlaj amo techiljuisej ma titlanankilikaj maske miakpa timomatlananasej, tiyolpakisej pampa sekinok kena tlanankiliaj (1 Ped. 3:8).

4. ¿Tlake eyi tlamantli tikitasej ipan ni tlamachtili?

⁴ Ipan ni tlamachtili achtoui tikitasej kenijkatsa uelis timoyolchikauasej ininuaya toikniuaj ipan se tlanechikoli tlen amo ueyi, kampa amo itstokej miakej toikniuaj uan kampa uelis miakpa titlanankilisej. Teipa tikitasej kenijkatsa uelis timoyolchikauasej ipan se tlanechikoli tlen ueyi, kampa miakej toikniuaj kinekij tlanankilisej. Uan nojkia tikitasej kenijkatsa uelis tikinyolchikauasej toikniuaj ika tlen tikijtosej kema titlanankilisej.

5. ¿Kenijkatsa uelis titlapaleuisej ipan se tlanechikoli kampa amo itstokej miakej toikniuaj?

⁵ Ipan se tlanechikoli tlen amo ueyi, amo itstokej miakej katli uelis tlanankilisej kema se toikni kiyakana se tlamachtili. Kemantika nopa toikni moneki kichias se akajya ma momatlanana. Ni uelis kichiuas amo nima ma tlami tlanechikoli. Uan nopa tlanechikoli uelis amo teyolchikauas. Uajka, ¿tlake uelis tijchiuasej? Ma tijchiuakaj kampeka miakpa titlanankilisej. Kiampa tikinyolchikauasej sekinok nojkia ma tlanankilikaj.

6, 7. ¿Tlake mitspaleuis amo tlauel ximajmaui kema titlanankilis?

⁶ Miakej toikniuaj tlauel kimakasij tlanankilisej. Tlaj kiampa mitspano, ¿tlake uelis tijchiuas? Xijtemo tlamachtili tlen mitspaleuis amo tlauel ximajmaui uan tlen mitspaleuis xikinyolchikaua sekinok ika tlen tikijtos.

⁷ Tlauel mitspaleuis tlaj tikitas se keski tlamachtili tlen kistok ipan Tlen Tematiltia. b Nopa tlamachtili kiijtoua tlauel mitspaleuis tlaj kuali timokualchijchiuas (Prov. 21:5). Kuali ximomachti se tlamachtili, kiampa amo ouij tijmatis timomatlananas. Nojkia tlauel mitspaleuis tlaj amo tikijtos miak tlamantli kema titlanankilis (Prov. 15:23; 17:27). Amo xikijto miak tlamantli, kiampa amo tlauel timajmauis uan toikniuaj nima kikuamachilisej tlen tikijtos. Xikijto san se keski tlajtoli uan ma kisa ipan moyolo, kiampa toikniuaj kiitasej kuali timokualchijchijki uan kuali tijkuamachilia nopa tlamachtili.

8. ¿Tlake kiyolmati Jehová kema kiita tijchiuaj kampeka titlanankilisej?

⁸ ¿Tlake uelis tijchiuas tlaj san titlanankilia se o ompa pampa nojua timajmaui maske ya tijchijki tlen kiijtoua nopa tlamachtili? Xikilnamiki Jehová tlauel kipatiita pampa tijchiua kampeka titlanankilis (Luc. 21:1-4). Maske tlauel kipatiita, ya amo kineki xijchiua tlen amo tiueli (Filip. 4:5). Uajka, achtoui xikita keski imiaka uelis titlanankilis, xitlanankili uan xikiljui Jehová ma mitspaleui amo tlauel timajmauis. Achtoui uelis timosentlalis titlanankilis sempatsi maske amo tikijtos miak tlamantli.

9. ¿Tlake ueliskia panos ipan se tlanechikoli kampa itstokej miakej toikniuaj?

⁹ Tlaj ipan motlanechikol itstokej miakej toikniuaj, uelis mitspano seyok tlamantli. Uelis kemantika amo titlanankilia pampa miakej kinekij tlanankilisej. Ma tikitakaj tlen kipanok Daniela. c Ya tlauel kipaktia tlanankilis ipan tlanechikoli pampa moiljuia kiampa kiueyichiua Jehová, kinyolchikaua toikniuaj uan kipaleuia ma kitsontekontlali tlen Biblia tlamachtia. Uan kema pejki tlatekipanoua ipan se tlanechikoli tlen ueyi, ayokmo uelki tlauel tlanankilia o kemantika amo tlanankiliyaya. Ya kiijtoua: “Tlauel nimotetsopayaya. Nijyolmatiyaya ayokmo nijpiayaya se tekitl ipan tlanechikoli. Kema timomatlanana uan amo mitsiljuiaj xitlanankili, uelis timoiljuis nopa toikni amo kineki xitlanankili”.

10. ¿Tlake ueliskia tijchiuas uan kiampa uelis titlanankilis?

¹⁰ ¿Nojkia mitspanotok kej Daniela? Tlaj kiampa mitspano, uelis timoiljuia ayokmo timomatlananas uan san titlakakis. Maske kiampa timoiljuia, nojua xijchijto kampeka timomatlananas. ¿Tlake uelis tijchiuas uan kiampa uelis titlanankilis? Xikita miak párrafos kampa uelis titlanankilis. Kiampa tlaj amo titlanankilis kampa peua nopa tlamachtili, uelis teipa kena titlanankilis. Kema timomachtis pilamochtsi Tlen Tematiltia, ximoiljui kenijkatsa nopa párrafos mouika ika nopa tlamachtili. Kiampa uelis titlanankilis kema tijnekis. Nojkia, uelis timokualchijchiuas ipan párrafos kampa moixtoma tlamachtili tlen tlauel ouij (1 Cor. 2:10). Ipan nopa párrafos amo miakej momatlananaj pampa eli ouij. ¿Uan tlake uelis tijchiuas tlaj amo ueli titlanankilia maske ya tijchijki nochi ni tlamantli? Kema ayamo peua tlanechikoli uelis tikamanaltis iuaya nopa toikni katli kiyakanas se tlamachtili uan xikiljui tlake tlajtlanili mitspaktiskia tijnankilis.

11. Kej kiijtoua Filipenses 2:4, ¿tlake moneki tijchiuasej?

¹¹ (Xijpoua Filipenses 2:4). ToTeotsij itonal kiyakanki Pablo ma kiniljui Cristo itokilijkauaj  nojkia ma moiljuikaj ipan sekinok. ¿Kenijkatsa uelis tijchiuasej tlen kiijtok Pablo ipan tlanechikoli? Ma tikilnamiktokaj sekinok nojkia kinekij tlanankilisej.

12. ¿Tlake moneki tijchiuasej tlaj tijnekij tikinyolchikauasej toikniuaj ipan tlanechikoli? (Nojkia xikita tlaixkopinkayotl).

¹² Ma tikitakaj se tlamantli tlen uelis techpaleuis tijkuamachilisej tlen Pablo kiijtok. Kema tiitstokej ininuaya touampoyouaj amo nochipa san tojuantij tikamanaltij. Nojkia tijkauaj ma kamanaltikaj. Uan ipan tlanechikoli nojkia kiampa tijchiuaj. Tijnekij nochi toikniuaj ma tlanankilikaj. Uajka, tlauel tikinyolchikauasej tlaj tijkauaj nojkia ma tlanankilikaj (1 Cor. 10:24). Ma tikitakaj tlake uelis tijchiuasej tlaj tijnekij nochi ma tlanankilikaj.

13. ¿Tlake uelis tijchiuasej uan kiampa tikinkauasej sekinok nojkia ma tlanankilikaj?

¹³ Kema titlanankilisej amo ma tikijtokaj miak tlamantli. Tlaj kiampa tijchiuasej, sekinok toikniuaj nojkia uelis tlanankilisej. Ueuejtlakamej uan sekinok toikniuaj katli miak xiuitl kitekipanojtokej Jehová, uelis kinmachtisej sekinok nojkia kiampa ma kichiuakaj. Kema titlanankilisej amo kinamiki tiuejkauasej uan tikijtosej miak tlamantli. Tlaj tikijtouaj miak tlamantli tlen kiijtoua se párrafo, sekinok ayokmo uelis tlanankilisej. Se neskayotl, ipan ni párrafo kiijtoua ome tlamantli tlen uelis tijchiuasej: amo ma tiuejkauakaj kema titlanankiliaj uan amo ma tikijtokaj miak tlamantli. Tlaj ta achtoui mitskauilisej xitlanankili ipan ni párrafo, uelis tikijtos san se tlamantli.

14. ¿Tlake nojkia moneki timoiljuisej kema tikitasej keski imiaka timomatlananasej? (Nojkia xikita tlaixkopinkayotl).

¹⁴ Kema timoiljuis keski imiaka timomatlananas, nojkia ximoiljui ipan toikniuaj. Tlaj miakpa timomatlananaj, uelis nopa toikni katli kiyakana nopa tlamachtili kimatis tijtetsopaj uan kejuak tijchiualtisej ma techkaua  titlanankilisej maske sekinok ayamo tlanankiliaj. Uan uelis sekinok moiljuisej ayokmo kinamiki kichiuasej kampeka tlanankilisej (Ecl. 3:7).

15. 1) ¿Kinamiki timoyolkokosej tlaj amo techiljuiaj ma titlanankilikaj? 2) ¿Tlake moneki kiilnamiktos toikni katli kiyakana se tlamachtili? (Xikita recuadro “ ¿Kenijkatsa uelis tijyakanas se tlamachtili kampa tlanankiliaj toikniuaj?”).

¹⁵ Kema miakej toikniuaj momatlananaj, uelis amo tlauel titlanankilisej o amo titlanankilisej. Maske nopa ueliskia kichiuas ma timokuesokaj, amo kinamiki kiampa tijyolmatisej (Ecl. 7:9).

16. ¿Kenijkatsa uelis tikinyolchikauasej katli tlanankilijkej?

¹⁶ Maske amo uelis titlanankilis, kena uelis kuali tikintlakakilis kema sekinok tlanankiliaj uan tikiniljuis kuali tlanankilijkej kema tlamis tlanechikoli. Uelis tlen tikiniljuis toikniuaj tlauel kinyolchikauas, sanse kej tlaj titlanankilijtoskia (Prov. 10:21). Kema tikiniljuiaj sekinok kuali tlanankilijkej, nojkia tikinyolchikauaj.

17. 1) ¿Tlake uelis kichiuasej tetajmej? 2) Kej nesi ipan video, ¿tlake naui tlamantli moneki tijchiuasej kema timokualchijchiuaj pampa tijnekij titlanankilisej? (Nojkia xikita nota).

¹⁷ ¿Tlake sekinok tlamantli nojkia uelis tijchiuasej uan kiampa timoyolchikauasej ipan tlanechikoli? Tlaj tikinpia mopilkoneuaj,  xikinpaleui ma tlanankilikaj kampa kena uelisej (Mat. 21:16). Kemantika ipan tlanechikoli moixtoma tlamachtili tlen ouij, kintlajtolmakaj katli mosenkajtokej o techiljuiaj amo ma timomekatikaj uan amo ma tiauilnemikaj. Maske ouij tlen moixtomas, uelis kena eltok se o ome párrafos kampa konemej uelis tlanankilisej. Tetajmej nojkia uelis kinixtomilisej ininkoneuaj kenke kemantika amo kiniljuisej ma tlanankilikaj maske momatlananasej. Tlaj kiampa kichiuasej, konemej amo moyolkokosej kema kiiljuisej seyok ma tlanankili (1 Tim. 6:18). d

18. ¿Tlake uelis tijchiuasej uan kiampa toikniuaj amo mosentlalisej ipan tojuantij? (Proverbios 27:2).

¹⁸ Nochi uelis tikitasej tlake tikijtosej ipan tlanechikoli, kiampa tijueyichiuasej Jehová uan tikinyolchikauasej toikniuaj (Prov. 25:11). Maske kemantika uelis tikijtosej tlen techpanotok, amo kinamiki tijchiuasej toikniuaj ma mosentlalikaj ipan tojuantij (xijpoua Proverbios 27:2; 2 Cor. 10:18). Moneki timosentlalisej ipan Jehová, ipan iTlajtol uan ipan tlen kichiua itlanechikol (Apoc. 4:11). Uan tlaj ipan se párrafo techiljuiaj ma tikijtokaj tlen techpanotok, uelis kiampa tijchiuasej. Ipan párrafo 19 uelis tikijtos tlen tijyolmati.

19. 1) ¿Kenijkatsa techpaleuis tlaj ipan tlanechikoli amo timoiljuiaj san ipan tojuantij? (Romanos 1:11, 12). 2) ¿Kenke tlauel mitspaktia titlanankilis?

¹⁹ Maske amo onka se tlanauatili kampa kiijtoua kenijkatsa moneki titlanankilisej, nochi moneki tijchiuasej kampeka tikinyolchikauasej sekinok ika tlen tikijtosej. Uajka, se keskij toikniuaj moneki kichiuasej kampeka nojua tlauel tlanankilisej uan sekij moneki amo moyolkokosej kema amo kiniljuiaj ma tlanankilikaj uan yolpakisej pampa sekij kena uelij tlanankiliaj. Tlaj ipan tlanechikoli amo timoiljuiaj san ipan tojuantij uelis tikinyolchikauasej sekinok (xijpoua Romanos 1:11, 12).