1. ¿Kenijkatsa Mateo kinextik nelnelia motemachia moyolkuisej katli miktokej?

 SE Piltelpokatsi katli itoka Mateo, kipia se kokolistli tlen tlauel amo kuali uan miakpa kitektokej. Kema kipiayaya chikome xiuitl, panok se tlamantli tlen tlauel kinyolchikajki. Se tonali, ya uan ichampoyouaj kitlachilijtoyaj JW Broadcasting^®. Kema nechka tlamiskia kiitakej se uikatl kampa nesij se keskij toikniuaj kinseliaj ininchampoyouaj katli moyolkuij. b Kema tlanki nopa uikatl, Mateo kinnechkauik itatauaj, kinmaitskik uan kiniljuik: “¿Inkiitakej? Tlaj nimikis uelis nimoyolkuis. Uelis innechchiasej. Teipa kuali tiitstosej”. Ximoiljui kenijkatsa kiyolmatkej itatauaj kema kiitakej ininpilkone kuali tlaneltoka. Mateo nelnelia motemachia moyolkuisej katli miktokej.

2, 3. ¿Kenke moneki timoyoliljuisej kenijkatsa moyolkuisej katli miktokej?

² Moneki nochipa tijchijtosej kampeka timoyoliljuisej kenijkatsa moyolkuisej katli miktokej (Juan 5:28, 29). ¿Kenke moneki kiampa tijchiuasej? Pampa amo tijmatij tlake techpanos teipa. Uelis tlauel timokokosej o miktiuetsis se katli tlauel tikikneliaj (Ecl. 9:11; Sant. 4:13, 14). Tlaj timotemachiaj moyolkuisej katli miktokej, uelis techpaleuis ma tikijiyouikaj nopa tlamantli (1 Tes. 4:13). Biblia kiijtoua toTata Jehová tlauel kuali techixmati uan tlauel techiknelia (Luc. 12:7). Kema Jehová techyolkuis, kichiuas sampa ma tijnextikaj nopa kuajkuali tlamantli tlen nama tijnextiaj uan kichiuas  ma tikilnamikikaj tlen tipanotokej, yeka moneki tlauel kuali techixmatis. Jehová tlauel techiknelia, yeka kineki nochipa ma tiitstokaj. Uan maske timikisej, ya techyolkuis.

³ Ipan ni tlamachtili tikitasej kenke uelis timotemachisej nelnelia moyolkuisej katli miktokej. Nojkia, techpaleuis nojua tlauel kuali ma titlaneltokakaj tlen kiijtoua nopa texto tlen ika moyakana ni tlamachtili: “Moikni sampa moyolkuis” (Juan 11:23). Uan nojkia tikitasej tlake uelis techpaleuis uan kiampa nojua tlauel timotemachisej nelnelia moyolkuisej katli miktokej.

4. ¿Tlake techpaleuis ma timotemachikaj nelnelia mochiuas tlen techtenkauilijtokej? Xikijto se neskayotl.

⁴ Uelis timotemachisej ipan tlen techtenkauilijtokej, tlaj katli kitenkajtok nesi nelia kineki techmakas se tlenijki uan ueli kichiua. Ma timoiljuikaj se chikauak ajakatl kisojsolok tochaj, uan se touampo techiljuia techpaleuis kikualchijchiuas. Tijmatij ya amo istlakati uan kineki techpaleuis. Nojkia tijmatij ya kuali kalchiua uan kipia tlen ika tekitis, yeka timotemachiaj kena techpaleuis uan kichiuas tlen kiijtok. Uajka, ¿nelia uelis moyolkuisej katli miktokej kej kiijtojtok toTeotsij? ¿Nelnelia kineki kinyolkuis katli miktokej uan uelis kichiuas?

5, 6. ¿Kenke timotemachiaj Jehová nelia kineki kinyolkuis katli miktokej?

⁵ ¿Nelnelia kineki Jehová kinyolkuis katli miktokej? Kena. Ya kichijki se keskij itekipanojkauaj ma kiijkuilokaj ipan Biblia kinyolkuis katli miktokej (Is. 26:19; Os. 13:14; Apoc. 20:11-13). Uan kema toTeotsij kitenkaua se tlamantli, nelia kichiua (Jos. 23:14). Jehová nelia kineki kinyolkuis katli miktokej. ¿Kenke kiampa tikijtouaj?

⁶ Ma timoiljuikaj ipan tlen kiijtok Job. Ya motemachiyaya tlaj mikiskia, Jehová sampa kinekiskia kiitas (Job 14:14, 15, TNM). Jehová sampa kineki kinitas nochi itekipanojkauaj katli ya mijkej. Kineki kinyolkuis, kineki kuali ma itstokaj uan ma yolpakikaj. Uan, ¿tlake kichiuas Jehová ika maseualmej katli mijkej uan amo kema kiixmatkej? Nojkia kineki kinyolkuis (Hech. 24:15). Kineki nojkia ma mouampojchiuakaj iuaya uan ma itstokaj nochipa ipan Tlaltipaktli (Juan 3:16). Nochi ni kinextia Jehová nelnelia kineki kinyolkuis katli miktokej.

7, 8. ¿Kenke timotemachiaj Jehová ueli kinyolkui katli miktokej?

⁷ ¿Nelnelia Jehová ueli kinyolkui katli miktokej? Kena. Ipan Apocalipsis 1:8 kiijtok: “Na niitstok Tlen Nijpia Nochi Chikaualistli”. Ya ueli kintsontlamiltia nochi ikualankaitakauaj, uan kiampa kichiuas ika mikilistli (1 Cor. 15:26). Ni tlamantli tlauel techyolchikaua. Ma tikitakaj tlen kipanok tosiuaikni Emma Arnold. Ya uan ichampoyouaj kiixnamijkej miak tlaouijkayotl kema mochijki nopa Ompa Ueyi Tlauilankayotl. Kema kiyolchikajki ikone pampa nazis kinmiktijkej miakej katli kinikneliyayaj, kiiljuik: “Tlaj maseualmej nochipa mikiskiaj uan amo kema moyolkuiskiaj. Uajka mikilistli kitlaniskia toTeotsij”. Tijmatij san Jehová kipia tlauel miak chikaualistli uan amo aka seyok. Ya techmakatok tonemilis, yeka uelis kichiuas sampa ma itstokaj katli miktokej.

⁸ Nojkia, timotemachiaj Jehová nelnelia kinyolkuis katli miktokej pampa amo tleno kiilkaua. Biblia kiijtoua ya kimati inintoka nochi sitlalimej (Is. 40:26). Uajka, kinilnamiki nochi katli miktokej (Job 14:13; Luc. 20:37, 38). Nojkia, kuali kiilnamiki kenijkatsa eliyayaj katli kinyolkuis, kenijkatsa  eliyaya inintlachialis, kej itstoyaj uan tlen kichijkej.

9. ¿Kenke timotemachiaj nelnelia moyolkuisej katli miktokej?

⁹ Kej ya tikitstokej, uelis timotemachisej moyolkuisej katli miktokej, pampa Jehová kineki kichiuas nopa tlamantli uan kipia chikaualistli tlen ika uelis kichiuas. Nojkia timotemachiaj pampa uejkajkia kinyolkuik se keskij maseualmej. Uejkajkia, Jehová kinmakak chikaualistli se keskij itekipanojkauaj uan nojkia Jesús, uan kiampa kinyolkuikej katli ya miktoyaj. Ma tikitakaj Juan capítulo 11 kampa kiijtoua Jesús kiyolkuik se akajya.

10. ¿Tlake panok kema Jesús tlajtolmoyauayaya seyok nali tlen Jordán, uan tlake kichijki? (Juan 11:1-3).

¹⁰ (Xijpoua Juan 11:1-3). Jesús kinpiayaya se keskij iuampoyouaj ipan Betania: Lázaro uan isiuaikniuaj, María uan Marta (Luc. 10:38-42). Itlamia xiuitl 32, Lázaro pejki mokokoua uan isiuaikniuaj tlauel motekipachojkej, teipa tlatitlankej ma kiiljuitij Jesús. Ya itstoya seyok nali tlen ueyatl Jordán, monekiyaya nejnemis ome tonali uan kiampa asiskia kampa itstoyaj (Juan 10:40). Lázaro amo kiijiyouik nopa kokolistli uan mijki kema kimatiltijkej Jesús. Maske Jesús kimatki iuampo ya miktoya, nojua mokajki ome tonali kampa itstoya uan teipa tlakuepilik Betania. Yeka kema asito, Lázaro ya kipiayaya naui tonali miktoya. Kiampa kichijki pampa kinekiyaya kinpaleuis iuampoyouaj uan kiueyichiuas toTeotsij (Juan 11:4, 6, 11, 17).

11. ¿Kenijkatsa ni tlapoualistli techpaleuis ma tikinpaleuikaj touampoyouaj?

¹¹ ¿Tlake techmachtia ni tlapoualistli? María uan Marta san tlatitlankej ma kiiljuitij Jesús iuampo mokokouayaya uan amo ma kinotsatij (Juan 11:3). Kema Lázaro mijki, Jesús ueltoskia kiyolkuis maske uejka itstoya. Ya amo kiampa kichijki pampa kinekiyaya kinyolchikauas María uan Marta, yeka yajki Betania. ¿Tijpia se mouampo katli kineki mitspaleuis maske amo tijtlajtlania? Tlaj kena, uajka ya mitspaleuis “kema onka tlaouijkayotl” (Prov. 17:17). Tlaj tijchiuaj kej Jesús, uelis tikinpaleuisej touampoyouaj. Sampa ma tikitakaj nopa tlapoualistli uan ma tikitakaj tlake panok teipa.

12. ¿Tlake tlamantli kiiljuijkej Marta, uan tlake kipaleuik ma motemachi Jesús nelia kichiuaskia tlen kiijtojtoya? (Juan 11:23-26).

¹² (Xijpoua Juan 11:23-26). Kema Marta kimatki Jesús itstoya nechka Betania, nima yajki kiitato. Ya kiiljuik: “NoTeko, intla tiualajtoskia kema mokokouayaya, noikni axmiktoskia” (Juan 11:21). Maske Jesús ueltoskia kichikauas Lázaro, amo nima kichijki pampa kinekiyaya kichiuas se milagro. Jesús kiiljuik Marta: “Moikni sampa moyolkuis”. Nojkia kiiljuik sekinok tlamantli pampa kinekiyaya ma motemachi ipan tlen kiiljuik: “Na tlen nikinyolitia tlakamej tlen miktokej uan sampa nikinmaka yolistli”. ToTeotsij kimakatok chikaualistli Jesús, uan yeka uelis kinyolkuis katli  miktokej. Ya ipa kiyolkuitoya se siuapil katli kiuikayaya se keski horas miktoya, uan nojkia kiyolkuik se telpokatl ipan nopa tonali kema mijki (Luc. 7:11-15; 8:49-55). Maske kiampa kichijtoya, ¿ueliskia kiyolkuis se akajya katli ya kipiayaya naui tonali miktoya uan ya nempoliuiyaya itlakayo?

13. Kej kiijtoua Juan 11:32-35, ¿tlake kichijki Jesús kema kinitak María uan nopa sekinok chokayayaj? (Nojkia xikita nopa tlaixkopinkayotl).

¹³ (Xijpoua Juan 11:32-35). Ma timoiljuikaj ipan tlen panok. María, nopa seyok isiuaikni Lázaro, kinechkauia Jesús uan nojkia kiiljuia kej Marta: “NoTeko, noikni axmiktoskia intla tiualajtoskia kema mokokouayaya”. Ya uan nopa sekinok tlauel moyolkokojtoyaj. Kema Jesús kinitak uan kikajki mochokiliyayaj, ya nojkia tlauel mokuesok. Tlauel kinikneliyaya iuampoyouaj, yeka nojkia pejki choka. Ya kikuamachilia kenijkatsa tijyolmatij kema miki se akajya katli tlauel tikikneliaj, yeka kinejki kinpaleuis iuampoyouaj.

14. ¿Tlake techmachtia tlen Jehová kema Jesús nojkia chokak?

¹⁴ Tlen kichijki Jesús kema kiitak María chokayaya, kinextia Jehová tlauel teiknelia. ¿Kenke kiampa tikijtouaj? Pampa kej tikitakej ipan tlamachtili 15, Jesús kinextia moiljuia uan kiyolmati sanse kej iTata (Juan 12:45). Uajka, kema tijpouaj Jesús chokak kema kinitak iuampoyouaj tlaijiyouiyayaj, techmachtia Jehová nojkia moyolkokoua kema kiita timochokiliaj pampa titlaijiyouiaj (Sal. 56:8). Kema tijmatij ni tlamantli, techyololinia ma timonechkauikaj ika Jehová.

15. Kej kiijtoua Juan 11:41-44, ¿tlake panok kampa kikajtoyaj itlakayo Lázaro? (Nojkia xikita nopa tlaixkopinkayotl).

¹⁵ (Xijpoua Juan 11:41-44). Jesús asito kampa kikajtoyaj itlakayo Lázaro uan tlanauatik ma kiijkuinikaj nopa tetl tlen ika kintsaktoyaj. Marta kiiljuik uelis ya pejki poteui. Jesús kinankilik: “¿Axnimitsiljuijtok, intla tijneltokas, nimitsnextilis iueyitilis Toteko?” (Juan 11:39, 40). Teipa Jesús ajkotlachixki uan momaijtok. Kinejki kiueyichiuas Jehová ika tlen kichiuaskia. Uan teipa chikauak  kiijtok: “Lázaro, xikisa”. Uan Lázaro kisako. Jesús kichijki se tlamantli tlen miakej moiljuiyayaj amo ueliskia kichiuas (xikita nopa nota de estudio tlen Juan 11:17, TNM).

16. ¿Kenijkatsa techpaleuia Juan capítulo 11 ma timotemachikaj nelnelia moyolkuisej katli miktokej?

¹⁶ Nopa tlapoualistli tlen Juan capítulo 11, techpaleuia nojua tlauel ma timotemachikaj nelnelia moyolkuisej katli miktokej. Ma tikilnamikikaj tlen Jesús kiiljuik Marta: “Moikni sampa moyolkuis” (Juan 11:23). Sanse kej iTata, Jesús kineki uan uelis kinyolkuis katli miktokej. Kema mochokilik, kinextik kineki kitsontlamiltis mikilistli uan ayokmo ma mokuesokaj maseualmej kema miki se akajya. Kema kiyolkuik Lázaro, Jesús kinextik uelis kinyolkuis katli miktokej. Nojkia ma timoiljuikaj ipan tlen kiiljuik Marta: “¿Axnimitsiljuijtok, intla tijneltokas, nimitsnextilis iueyitilis Toteko?” (Juan 11:40). Tlen tikitstokej techpaleuia ma timotemachikaj toTeotsij nelia kinyolkuis katli miktokej. Uajka, ¿tlake uelis tijchiuasej uan kiampa nojua tlauel timotemachisej nelia moyolkuisej katli miktokej?

17. ¿Tlake moneki tijchiuasej kema tijpouaj ipan Biblia moyolkuikej se keskij?

¹⁷ Ma tijpouakaj kampa kiijtoua moyolkuikej se keskij uan ma timoyoliljuikaj. Biblia kiijtoua moyolkuikej chikueyij maseualmej. c ¿Uelis tijchiuasej kampeka kuali timomachtisej sejse tlen ni tlapoualistli? Kema tijpouaj, ma timoiljuikaj nelnelia itstoyaj nopa tlakamej, siuamej uan konemej. Ma tikitakaj kenijkatsa techpaleuia, uan ma timoiljuikaj kenijkatsa nopa tlapoualistli kinextia toTeotsij nelia kineki uan ueli kinyolkui katli miktokej. Uan nojkia ma timoyoliljuikaj kenijkatsa kema Jesús moyolkuik. Miakej maseualmej kena kiitakej moyolkuik Jesús, uan nopa techpaleuia ma timotemachikaj nelnelia moyolkuisej  katli miktokej (1 Cor. 15:3-6, 20-22).

18. ¿Kenijkatsa uelis tijtekiuisej uikatl tlen kiijtoua moyolkuisej katli miktokej? (Xikita nota).

¹⁸ Xijkaki uikatl tlen kiijtoua moyolkuisej katli miktokej (Efes. 5:19). d Nopa uikatl techpaleuia ma timotemachikaj nelnelia moyolkuisej katli miktokej. Yeka, tlauel techpaleuis tlaj tijkakisej, tiuikasej uan tikijtosej tlake techpaktia kema timomachtisej ininuaya tochampoyouaj. Ma tijtsontekontlalikaj ni uikatl uan ma tijkauakaj ma asi ipan toyolo. Tlaj kiampa tijchiuasej, Jehová techpaleuis ma tikilnamikikaj tlen kiijtoua kema tikixnamikisej se tlaouijkayotl o kema mikis se katli tlauel tikikneliaj. Nopa uikatl tlauel techyolchikauas uan techpaleuis.

19. ¿Ipan tlake uelis timoyoliljuisej? (Xikita recuadro “ ¿Tlake tikintlajtlaniskia?”).

¹⁹ Ma timoyoliljuikaj. Jehová kichijtok ma timoiljuikaj tiitstokej ipan yankuik Tlaltipaktli. Se tosiuaikni kiijtoua: “Tlauel nimoyoliljuia ya niitstok ipan yankuik Tlaltipaktli, yeka kejuak ueli nikijnekui xochitl tlen onka nopaya”. Ma timoiljuikaj kenijkatsa tijyolmatisej kema tikinixmatisej sekinok toTeotsij itekipanojkauaj katli uejkajkia itstoyaj. ¿Ajkia tlauel tijneki tikixmatis? ¿Tlake mitspaktiskia tijtlajtlanis? Nojkia ximoiljui kenijkatsa tikinselis kema moyolkuisej katli tlauel tikiniknelia. Ximoiljui tlake tikiniljuis, kenijkatsa chikauak tikinnajnauas uan tlauel tiyolpakis kema sampa tikinitas.

20. ¿Tlake moneki timosentlalijtosej tijchiuasej?

²⁰ Tlauel tijtlaskamatiliaj Jehová pampa kiijtojtok moyolkuisej katli miktokej. Timotemachiaj nelnelia kichiuas ni tlamantli pampa kineki uan ueli kichiua. Kejuak techiljuia: “Katli tikiniknelia moyolkuisej”. Ma tijchiuakaj kampeka nojua tlauel timotemachisej ipan tlen kiijtojtok. Tlaj kiampa tijchiuasej, nojua tlauel timonechkauisej ika Jehová, katli kiijtojtok kichiuas ni tlamantli.