TLAMACHTILI 15
¿Tlake techmachtia nopa milagros tlen Jesús kichijki?
“Inkimatij kejatsa Jesucristo kampa ueli tepaleuijtinenki uan kejatsa kinchikajki tlen tlaijiyouiyayaj” (HECH. 10:38).
UIKATL 13 Ma tijchiuakaj kej Cristo
TLEN MOIXTOMAS a
1. ¿Kema kichijki Jesús nopa achtoui milagro?
MA TIMOILJUIKAJ tlake panok ipan xiuitl 29. Jesús pejtoya tlajtolmoyaua. Ya, inana María uan itokilijkauaj yajkej Caná pampa nopaya mosiuajtiyaya se akajya. Nopa altepetl mokauayaya ika ajko tlen Nazaret. María eliyaya ininuampo ininteixmatkauaj katli mosenkauayayaj, yeka nojkia tlapaleuijtinemiyaya ipan nopa iljuitl. Teipa tlanki nopa vino uan nopa ueliskia kichiuas ma kinpinajtikaj katli mosenkauayayaj. b Kiampa panok pampa uelis miakej asikej ipan nopa iljuitl. María nima yajki kampa Jesús, uan kiiljuik: “Ayok kipiaj xokomekaatl” (Juan 2:1-3). ¿Tlake kichijki Jesús? Kichijki se milagro pampa nopa atl kikuepki vino (Juan 2:9, 10).
2, 3. 1) ¿Kenijkatsa Jesús kitekiuik ichikaualis? 2) ¿Kenijkatsa techpaleuis tlaj timomachtisej nopa milagros tlen Jesús kichijki?
2 Jesús kichijki sekinok milagros kema tlajtolmoyajki. c Kitekiuik ichikaualis uan kiampa kinpaleuik tlauel miakej maseualmej. Se tonali, kintlamak se 5,000 tlakamej uan seyok tonali kintlamak se 4,000. Tlaj tikinpouaskiaj siuamej uan konemej katli nojkia itstoyaj nopaya, uelis eliskiaj kipano 27,000 maseualmej katli tlakuajkej (Mat. 14:15-21; 15:32-38). Ipan nopa tonali, Jesús nojkia kinchikajki katli mokokouayayaj (Mat. 14:14; 15:30, 31). Uelis nopa maseualmej tlauel mosentlachilijkej kema kiitakej Jesús kintlamakayaya nopa maseualmej uan nojkia kinchikauayaya.
3 Tlaj timomachtisej nopa milagros tlen Jesús kichijki, uelis tijyekosej miak tlamantli. Ipan ni tlamachtili tikitasej se keski tlamantli tlen techpaleuis nojua kuali ma titlaneltokakaj. Nojkia tikitasej kenijkatsa Jesús amo moueyimatki uan tlauel tetlasojtlak kema kichijki ni milagros uan kenijkatsa nojkia uelis tijchiuasej kej ya.
TLEN TECHMACHTIA NOPA MILAGROS TLEN JEHOVÁ UAN JESÚS
4. ¿Ajkia inijuantij uelis tlauel kuali tikinixmatisej kema timomachtiaj nopa milagros tlen Jesús kichijki?
4 Nopa milagros tlen Jesús kichijki amo san techmachtia kenijkatsa eli ya, nojkia techmachtia kenijkatsa eli iTata pampa ya kimakak chikaualistli uan yeka uelki kichiua nopa milagros. Hechos 10:38 kiijtoua: “Toteko kialtik [o kitlapejpenik Jesús] para kitekitlalis, uan kimakak Itonal uan miak chikaualistli. Inkimatij kejatsa Jesucristo kampa ueli tepaleuijtinenki uan kejatsa kinchikajki tlen tlaijiyouiyayaj ika iajakauaj Axkualtlakatl”. Uan kej ya tijmatij, ika nopa milagros Jesús kinextik tlake kiyolmati uan tlake moiljuia iTata (Juan 14:9). Ma tikitakaj eyi tlamantli tlen techmachtia nopa uejueyi tlamantli tlen Jesús kichijki pampa nopa techpaleuis kuali ma titlaneltokakaj.
5. ¿Kenke Jesús kichijki milagros? (Mateo 20:30-34).
5 Se. Jesús uan iTata tlauel techikneliaj. Kema Jesús itstoya ipan Tlaltipaktli kinextik tlauel kinikneliyaya maseualmej, yeka kitekiuik ichikaualis uan kiampa kinchikajki miakej maseualmej. Se tonali, omej tlakamej katli amo tlachiayayaj kitlajtlanijkej ma kinpaleui (xijpoua Mateo 20:30-34). Ni tlapoualistli kiijtoua “Jesús kintlasojtlak” uan kichijki sampa ma tlachiakaj. Kema nikaj kiijtoua “Jesús kintlasojtlak”, kiijtosneki tlauel kiyolkokok kema kinitak uan kiniknelik, yeka kinejki kinpaleuis. Nojkia kintlamakak tlauel miakej maseualmej uan kichikajki se leproso (Mat. 15:32; Mar. 1:41). Yeka timotemachiaj Jehová, katli “techtlasojtla miak”, uan iKone tlauel techikneliaj, uan tlauel kinyolkokoua kema techitaj titlaijiyouiaj (Luc. 1:78; 1 Ped. 5:7). Inijuantij kinekij kitsontlamiltisej nochi tlen techtlaijiyouiltia.
6. ¿Tlake tlamantli toTeotsij kimakatok Jesús?
6 Ome. ToTeotsij kimakatok chikaualistli Jesús, yeka uelis kitsontlamiltis nochi tlen techtlaijiyouiltia. Maske tojuantij amo ueli tijsenkauaj se keski kuesoli, ika tlen Jesús kichijki kinextik ya kena ueli. Ya uelis kitsontlamiltis nopa tlajtlakoli tlen kichiua ma timokokokaj uan ma timikikaj (Mat. 9:1-6; Rom. 5:12, 18, 19). Nopa milagros tlen kichijki, kinextik ya uelis kitsontlamiltis “tlen ueli kokolistli” uan kinyolkuis katli miktokej (Mat. 4:23; Juan 11:43, 44). Nojkia, uelis kitsakuilis uejueyi ajakatl uan kintlanis amo kuali ajakamej (Mar. 4:37-39; Luc. 8:2). Tlauel techyolchikaua pampa tikitaj Jehová kimakatok miak chikaualistli iKone.
7, 8. 1) ¿Ipan tlake uelis timotemachisej pampa Jesús kichijki nopa milagros? 2) ¿Tlake mitspaktiskia tikitas kema toTeotsij kikualtlalis nochi tlen onka?
7 Eyi. Uelis timotemachisej tijselisej miak tlateochiualistli kema tekichiuas toTeotsij iTlanauatijkayo. Nopa milagros tlen Jesús kichijki kema itstoya ipan Tlaltipaktli, kinextik tlen kichiuas kema tlanauatis ipan toTeotsij iTlanauatijkayo. Ma timoiljuikaj kenijkatsa tiitstosej kema Jesucristo tlanauatis ipan Tlaltipaktli. Ya kitsontlamiltis nochi tlakuajkualojkayotl uan kokolistli, yeka nochi tlauel kuali tiitstosej (Is. 33:24; 35:5, 6; Apoc. 21:3, 4). Ayokmo kema titlaijiyouisej pampa timokokouaj o pampa techtlasojsoljuilik se tlenijki (Is. 25:6; Mar. 4:41). Nojkia tlauel tiyolpakisej kema moyolkuisej katli tikinikneliaj (Juan 5:28, 29). ¿Tlake tlauel mitspaktiskia tikitas kema toTeotsij kiyankuilis nochi tlen onka?
8 Kema Jesús kichijki nopa milagros kinextik amo moueyimati uan tetlasojtla. Ma tikitakaj ome tlapoualistli kampa kinextik ni ome tlamantli. Achtoui ma tikitakaj tlen kichijki ipan Caná kampa mosenkajkej.
KINEXTIK AMO MOUEYIMATI
9. ¿Kenke Jesús kichijki se milagro kema mosenkajkej ipan Caná? (Juan 2:6-10).
9 (Xijpoua Juan 2:6-10). Kema tlanki vino kampa mosenkauayayaj, ¿monekiyaya Jesús kichiuas nopa atl ma mokuepa vino? Amo. Yon se tlajtolpanextili kiijtouayaya Jesús monekiyaya kichiuas nopa tlamantli. Maske amo kiijtouayaya, ximoiljui tlake tijyolmatiskia tlaj kiampa panoskia kema timosenkaua. Jesús moiljuik tlauel mopinauaskiaj katli mosenkajkej uan ininchampoyouaj, yeka kintlasojtlak uan kinpaleuik. Kichijki nopa milagro kej kiijtoua kampa peua ni tlamachtili. Kichijki se 390 litros atl ma mokuepa vino. ¿Kenke kichijki tlauel miak vino? Pampa ueliskia kitekiuisej seyok tonali o uelis teipa kinamakaskiaj katli mosenkajkej. Uelis tlauel kitlaskamatkej tlen Jesús kichijki.
Amo ma timoueyimatikaj ika tlen tijchiuaj sanse kej Jesús kichijki. (Xikita párrafos 10, 11). e
10. Xikijto se keski tlamantli tlen pankisa ipan Juan capítulo 2 (nojkia xikita tlaixkopinkayotl).
10 Ma tikitakaj se keski tlamantli tlen tlauel pankisa ipan Juan capítulo 2. ¿Ajkia kitemitik nopa komitl ika atl? Amo elki Jesús. Ya kinnauatik nopa tlatekipanouanij ma kichiuakaj nopa tekitl (versículos 6, 7). Uan, ¿ajkia kiuikilik se kentsi vino nopa tlakatl katli kiyakanayaya nopa iljuitl? Nojkia amo elki Jesús. Ya kiniljuik nopa tlatekipanouanij ma kiuikilikaj (versículo 8). Uan kej ya tijmatij Jesús amo kiniljuik katli itstoyaj nopaya: “Xijyekokaj ni ajuiyak vino tlen nijchijki”.
11. ¿Tlake techmachtia ni milagro tlen Jesús kichijki?
11 Tlen Jesús kichijki techmachtia ya amo moueyimati. Amo kinejki ma kiueyichiuakaj maske kichijki nopa atl ma mokuepa vino. Jesús amo kema kiijtojtinemiyaya nochi tlen kichiuayaya uan nochipa kiijtok iTata kipaleuiyaya ma kichiua nopa milagros (Juan 5:19, 30; 8:28). Tlaj tijchiuaj kej Jesús, amo timoueyimatisej uan amo tikijtojtinemisej nochi tlen tijchijtokej. Maske tijpiaj se keski tekitl ipan Jehová itlanechikol amo ma tikijtojtinemikaj, san ma tijueyichiuakaj Jehová (Jer. 9:23, 24). San ya kinamiki tijueyichiuasej pampa amo kema uelis tijchiuasej toselti se tlamantli (1 Cor. 1:26-31).
12. ¿Kenijkatsa uelis tijnextisej nojkia amo timoueyimatij kej Jesús kichijki? Xikijto se neskayotl.
12 Ma tikitakaj kenijkatsa nojkia uelis tijchiuasej kej Jesús. Ma timoiljuikaj se ueuejtlakatl nochipa kipaleuijtinemi se telpokatl katli eli tlapaleuijketl ma mokualchijchiua pampa kipanoltis se tlamachtili. Nopa ueuejtlakatl tlauel kuali kipaleuik nopa telpokatl. Yeka katli kikajkej nopa tlamachtili, tlauel kinpaktik. Kema tlami nopa tlanechikoli, se toikni kiiljuia nopa ueuejtlakatl: “Tlauel kuali tlamachtik ni toikni”. Ximoiljui nopa ueuejtlakatl kiijtoua: “Kuali tlamachtik pampa nijpaleuik”. O ximoiljui nopa ueuejtlakatl amo moueyimati uan kiijtoua: “Kena, tlauel niyolpaki pampa kuali kichijki”. Se akajya katli amo moueyimati amo kiijtojtinemi kenijkatsa kinpaleuia sekinok pampa kimati Jehová kiita tlen kichijki uan kipatiita (nojkia xikita Mateo 6:2-4; Heb. 13:16). Jehová tlauel yolpaki kema kiita tijchiuaj kampeka amo timoueyimatisej kej Jesús kichijki (1 Ped. 5:6).
KINEXTIK TETLASOJTLA
13. ¿Tlake tlamantli kiitak Jesús kema asito altepetl Naín uan tlake kichijki? (Lucas 7:11-15).
13 (Xijpoua Lucas 7:11-15). Ipan xiuitl 31, Jesús yajki Naín. Nopa altepetl mokauayaya nechka tlen Sunem kampa Eliseo kiyolkuik iokichpil se siuatl katli miktoya iueue (2 Rey. 4:32-37). Kema Jesús kalajtiauiyaya ipan nopa altepetl, kinpantik miakej maseualmej kiuikayayaj se mijkatsi. Tlauel tekueso tlen panotoya pampa mijki ikone se toaui katli ayokmo kipiayaya iueue. Miakej maseualmej yauiyayaj iuaya nopa toaui. Jesús kiniljuik ma moketsakaj uan kiyolkuik nopa mijkatsi. Nopa piltelpokatsi elki katli achtoui kiyolkuik kej kiijtoua nopa Evangelios.
Ma tikintlasojtlakaj katli mokuesouaj pampa mijki se katli tlauel kiikneliaj sanse kej Jesús kichijki. (Xikita párrafos 14-16).
14. Xikijto se keski tlamantli tlen techmachtia Lucas capítulo 7 (nojkia xikita tlaixkopinkayotl).
14 Ma tikitakaj se keski tlamantli tlen techmachtia Lucas capítulo 7. Nopaya kiijtoua tlake tlamantli panotiajki. Jesús achtoui kiitak nopa toaui uan teipa kitlasojtlak (versículo 13). Uelis kiitak tlauel chokayaya kema kiuikayayaj ikone. Tlen Jesús kiitak tlauel kiyolkokok, yeka amo san kitlasojtlak nopa siuatl, nojkia kipaleuik. Uelis kiiljuik ika miak tlaiknelili: “Amo xichoka”. Jesús amo san kiyolchikajki, nojkia kiyolkuik ikone uan “kimaktilik” (versículos 14, 15).
15. ¿Tlake techmachtia ni milagro tlen Jesús kichijki?
15 Tlen Jesús kichijki techmachtia moneki tikintlasojtlasej katli mokuesouaj pampa mijki se katli tlauel kiikneliaj. Maske amo ueli tikinyolkuij katli miktokej kej Jesús kichijki, kena uelis tikinyolchikauasej katli mokuesouaj pampa ixpolijki se katli tlauel kiikneliaj. Achtoui moneki tikitasej kenijkatsa itstok nopa maseuali, teipa tijyolchikauasej uan tijpaleuisej ika se keski tlamantli (Prov. 17:17; 2 Cor. 1:3, 4; 1 Ped. 3:8). d Maske amo uelis tikinpaleuisej ika nochi tlamantli, tlaj tijchiuaj kampeka kena uelis tikinyolchikauasej.
16. ¿Tlake techmachtia tlen kiijtoua ni párrafo? (Xikita nopa tlaixkopinkayotl kampa kiixnextia tlen panok).
16 Ma tikitakaj tlake panok ipan se tlanechikoli. Kema uikayayaj, se tosiuaikni pejki choka. Ni tosiuaikni chokayaya pampa namanok miktoya isiuapil. Se tosiuaikni katli kiitak uan kimatiyaya tlen kipanotoya, nima yajki kinajnauato uan uikak iuaya. Nopa tosiuaikni katli kiyolchikajkej, kiijtoua nopa kichijki nojua tlauel ma kinikneli toikniuaj. Tlauel yolpajki pampa yajki tlanechikoli. Ya kiijtoua: “Nijmatiyaya ipan tlanechikoli ueliskia nechyolchikauasej”. Jehová kiita uan kipatiita kema tijchiuaj kampeka tikinyolchikauasej katli moyolkokouaj pampa mijki se katli tlauel kiikneliaj o pampa kinpanok sekinok tlamantli (Sal. 34:18).
TLAUEL TECHPALEUIS TLAJ KUALI TIMOMACHTIAJ
17. ¿Tlake tikitakej ipan ni tlamachtili?
17 Kema timomachtiaj nopa milagros tlen Jesús kichijki, techpaleuia nojua tlauel kuali ma titlaneltokakaj. Tlen kiijtoua nopa Evangelios, kinextia Jehová uan Jesús tlauel techikneliaj. Jesús kipia miak chikaualistli tlen ika uelis kitsontlamiltis tlen techtlaijiyouiltia uan techpaleuia ma timotemachikaj nechka tijselisej miak tlateochiualistli kema tekichiuas toTeotsij iTlanauatijkayo. Nojkia techpaleuia ma timoyoliljuikaj kenijkatsa uelis tijnextisej nopa kuajkuali tlamantli kej Jesús kichijki. Uajka, uelis timomachtis sekinok milagros tlen Jesús kichijki kema timomachtis ininuaya mochampoyouaj o kema timomachtis moselti. Ximoiljui tlake tlamantli mitsmachtia nopa tlapoualistli uan nojkia xikiniljui sekinok. Nopa mitspaleuis tijpias tlen ika tikamanaltis ininuaya sekinok (Rom. 1:11, 12).
18. ¿Tlake tikitasej ipan tlamachtili 16?
18 Kema Jesús nechka tlamiskia tlajtolmoyaua, kiyolkuik iuampo Lázaro. Amo kinyolkuik sanse kej nopa sekinok maseualmej pampa ya panotoya naui tonali miktoya. ¿Tlake techmachtia tlen kichijki? ¿Tlake uelis tijchiuasej uan kiampa nojua tlauel timotemachisej nelnelia moyolkuisej katli miktokej? Ni tikitasej ipan tlamachtili 16.
UIKATL 20 Jehová titechmakak moKone
a Jesús kichijki ayokmo tlauel ma tlaajaka, techikajki uan kinyolkuik se keskij maseualmej. Tlauel tiyolpakij kema tijpouaj tlen kichijki. Maske tlauel techpaktia, nojkia moneki tijyekosej se keski tlamantli. Ipan ni tlamachtili tikitasej se keski milagros tlen Jesús kichijki. Tikitasej tlake techmachtia tlen Jehová uan Jesús, uan nopa techpaleuis nojua kuali ma titlaneltokakaj. Nojkia, tikitasej tlake kuajkuali tlamantli moneki tijnextisej.
b Se katli tlauel momachtijtok Biblia, kiijtok: “Ika Oriente, maseualmej momajtoyaj temakasej miak tlamantli uan amo san pilkentsi tlakualistli. Uan kema mosenkauayayaj, monekiyaya onkas miak tlakualistli uan tlaili”.
c Ipan Mateo, Marcos, Lucas uan Juan kiijtoua kipano 30 milagros tlen Jesús kichijki, kemantika san ipan se tonali Jesús kichijki miak milagros. Se tonali, miakej maseualmej tlen se altepetl yajkej kiitatoj Jesús uan ya “kinchikajki miakej kokoyanij” (Mar. 1:32-34).
d Ipan Tlen Tematiltia mayo 2016 ipan tlamachtili “¿Kenijkatsa uelis titeyolchikauasej?”, uelis tikitas sekinok tlamantli tlen uelis tikijtos o tlen uelis tijchiuas.
e TLEN NESI IPAN TLAIXKOPINKAYOMEJ. Katli mosenkauaj uan katli yajtokej ipan nopa iljuitl, tlauel yolpakij kema kiijij vino uan Jesús san kintlachilia uan amo moueyimati.
