¿Kenke moneki ma tekichiua toTeotsij iTlanauatijkayo?
Kema nopa Tlachijchijketl, katli itoka Jehová, kinyolitik achtoui maseualmej, san ya tlanauatiyaya uan kichiuayaya ika tlaiknelili. Yeka, kinchijchiuilik nopa yejyektsi xochimili Edén kampa ueliskiaj itstosej uan kampa onkaskia tlen kikuasej. Uan kinmakak se tekitl tlen kinpaktiskia (Génesis 1:28, 29; 2:8, 15). Tlaj kikajtoskiaj toTeotsij ma kinnauati, nochi tiitstoskiaj ika pakilistli.
Nopa achtoui maseualmej amo kinejkej toTeotsij ma kinnauati.
Biblia kiijtoua se iluikaejketl katli kiiljuiaj Satanás, nopa Diablo, tlaijixnamijki uan kiijtok toTeotsij amo kinamiki tlanauatis. Kiijtok maseualmej kena yolpakiskiaj tlaj toTeotsij amo kinnauatiskia. Nopa achtoui maseualmej, Adán uan Eva, kipaleuijkej Satanás uan kiijixnamijkej toTeotsij (Génesis 3:1-6; Apocalipsis 12:9).
Kema Adán uan Eva kiijixnamijkej Jehová uan ayokmo kinejkej ma kinnauati, ayokmo kinkajkej ma itstokaj ipan nopa Xochimili, uan nama mokokoskiaj uan mikiskiaj (Génesis 3:17-19). Pampa tlaijixnamijkej, ininkoneuaj nojkia kinpanoskia kej inijuantij. Biblia kiijtoua “tlajtlakoli pejki ipan Tlaltipaktli” pampa Adán tlajtlakolchijki, “uan pampa pejki tlajtlakoli, nojkia pejki [mikilistli]” (Romanos 5:12). Uan nopa tlajtlakoli nojkia kipeualtik seyok kuesoli: “Tlakamej tlauel kipiaj chikaualistli para mochiuilisej tlen axkuali se ika seyok” (Eclesiastés 8:9). Ni kiijtosneki kema maseualmej ininselti monauatiaj, kampa ueli onka miak kuesoli.
MASEUALMEJ PEJKEJ TLANAUATIAJ
Nimrod kiijixnamijki Jehová.
Biblia kiijtoua nopa achtoui tlanauatijketl motokaxtik Nimrod, uan ya tlauel kiijixnamijki toTeotsij itlanauatilis. Ipan nopa tonali, tlanauatianij pejkej kintlaijiyouiltiaj maseualmej. Yeka, se 3,000 xiuitl teipa, tlanauatijketl Salomón kiijtok: “Nikinitak tlakamej tlen chokaj pampa sekinok kintlaijiyouiltiaj uan [...] axaki kinpaleuia pampa tlen kintlaijiyouiltiaj kipiaj miak chikaualistli” (Eclesiastés 4:1).
Ni tonali nojkia kiampa panotok. Ipan 2009, katli tlatekipanouaj ipan Naciones Unidas kiijtouaj nojua momiakilijtiauij maseualmej katli moiljuiaj “onka miak tlaijiyouilistli uan pano tlen amo kuali” pampa tekichiuanij amo kuali tlanauatiaj.
MONEKI KINTEKIPATLASEJ
Moneki tikinpiasej tekichiuanij katli kuali tlanauatisej. Uan toTeotsij ya nopa techtenkauilijtok techmakas.
Maske kichijtokej kampeka kuali tlanauatisej, amo ueltokej kisenkauaj nochi kuesoli tlen tijpiaj.
ToTeotsij kikualtlalijtok se tlanauatijkayotl tlen kintekipatlas nochi tlanauatianij, uan san itlanauatilis “uejkauas para nochipa” (Daniel 2:44). Ya nopa eli nopa Tlanauatijkayotl katli tlauel miakej maseualmej tlajtlanij kema kiompauiaj nopa tlamaijtoli tlen itoka padrenuestro (Mateo 6:9, 10). ToTeotsij amo tlanauatis ipan iTlanauatijkayo, pampa kitekimakatok se katli achtouia elki se maseuali. ¿Ajkia kitekimakatok kej Tlanauatijketl?
Tlen nojkia mitspaktis tikitas
TLEN BIBLIA KINANKILIA
¿ToTeotsij iTlanauatijkayo eltok ipan toyolo?
Ipan sekij Biblias kiijtoua: “ToTeko tlanauatia ipan ininyolo tlakamej”. ¿Tlake kiijtosneki ni tlajtoli?
