Nopa texto ipan hebreo uelis motlajtolkuepas ika ome tlajtoli tlen amo sanse kiijtosneki. Nama ma tikitakaj tlake mitspaleuis tijkuamachilis ajkia inijuantij kinnamiki ni texto:

1. Xijpoua nochi capítulo 144. Ipan nopa Traducción del Nuevo Mundo de las Santas Escrituras ika inglés, xiuitl 2013, ipan versículo 12 motekiuia nopa tlajtoli then (“uajka”). Kiampa tijkuamachiliaj nopa kuajkuali tlamantli tlen moijtoua ipan versículos 12-14, kiselisej katli xitlauakej, katli ipan versículo 11 kiiljuiaj toTeotsij ma kinmakixti tlen ininkualankaitakauaj. Tlen mopatlak nojkia nesi ipan versículo 15. Kema ipan nopa versículo ompa moijtoua “nelia pakij”, nama kuali kakisti, uan tijkuamachiliaj nopa altepetl tlen nelia paki uan nopa ‘altepetl tlen kipia Jehová kej ininTeotsij’, eli sanse.

2. Sanse ika sekinok textos kampa kiijtoua tlake tlateochiualistli kiseliskiaj toTeotsij itekipanojkauaj. Nama, ipan Salmo 144, tikitaj kenijkatsa David motemachiyaya Jehová kinmakixtiskia israeleuanij tlen ikualankaitakauaj uan kichiuaskia ma yolpakikaj uan kuali ma itstokaj (Lev. 26:9, 10; Deut. 7:13; Sal. 128:1-6). Se neskayotl, Deuteronomio 28:4 kiijtoua: “Tlateochiualmej elisej nochi inmokoneuaj, uan nochi tlen inkipixkasej, uan nochi ininkoneuaj inmouakaxjuaj, inmoborregojuaj uan nochi sekinok inmotlapialjuaj”. Kema Salomón, ikone David, tlanauatik ipan Israel tlauel kuali itstoyaj uan yolpaktoyaj. Uan se keski tlamantli tlen mochijki ipan nopa tlanauatijkayotl, kiixnextik tlen mochiuaskia ipan toTeotsij iTlanauatijkayo, kampa tlanauatis Mesías.

Uajka, nopa Salmo 144 xitlauak kiijtoua tlake tlamantli kiselisej toTeotsij itekipanojkauaj: kichixtokej toTeotsij ma kintsontlamilti katli axkualmej, ma onka tlaseuilistli ipan Tlaltipaktli uan nochi kuali ma itstokaj (Sal. 37:10, 11).