Nopa amatlajkuiloli tlen kichijchiua Jehová itlanechikol amo monamaka, yeka miakej moiljuiaj uelis kiixkopinasej uan kitlalisej ipan Internet o ipan redes sociales. Katli kiampa kichiuaj, kiixpanoj tlen kiijtoua nopa Términos y Condiciones de Uso * tlen jw.org, uan nojkia kichijtokej ma tijpiakaj kuesoli. Nopaya kiijtoua amo aka kinamiki kikixtis ipan jw.org nopa tlaixkopinkayomej, amatlajkuiloli, marcas de producto, uikatl, videos o se tlamachtili uan kitlalis sejkanok ipan Internet (yon ipan redes sociales o kampa kitlaliaj tlaixkopinkayomej o videos). ¿Kenke amo kinamiki kichiuasej nopa?

Kipiaj derechos de autor. Nopa apóstatas uan sekinok katli techkualankaitaj kinekij kitlalisej ipan Internet nopa amatlajkuiloli tlen tijchijchiuaj pampa kinekij kinyoltilanasej Jehová itlajtoltemakauaj uan sekinok maseualmej. Uan nojkia kitlaliaj tlamachtili tlen uelis kinkuapolos (Sal. 26:4; Prov. 22:5). Sekinok maseualmej kitekiuijtokej nopa amatlajkuiloli tlen tijchijchiuaj uan nopa logotipo tlen jw.org uan kitlalijtokej kampa tlanamakaj, ipan tlamantli tlen kinamakaj uan nojkia ipan aplicaciones tlen motekiuia ipan teléfonos uan tabletas. Jehová itlanechikol kichijtok ma kitlepanitakaj nopa derechos de autor uan marcas de producto, pampa kiampa tlaj sekinok kitekiuisej maske amo kiniljuijtokej ma kitekiuikaj, uelis kinteljuisej ika tekichiuanij (Prov. 27:12). Tlaj Jehová itlanechikol kikauaskia se keskij maseualmej, maske nojkia Jehová itlajtoltemakauaj, ma kitlalikaj ipan Internet amatlajkuiloli o ma kitekiuikaj nopa logotipo tlen jw.org ipan tlamantli tlen kinamakaj, uelis tekichiuanij amo techpaleuiskiaj tlaj monekiskia tikinteljuisej katli techkualankaitaj o katli kitlanij tomij ika tlen tojuantij tijchiuaj.

Amo kuali tijkixtis amatlajkuiloli ipan Internet tlaj  amo eli ipan jw.org. Jehová kitekimakatok nopa “tlalnamijkatlatekipanojketl tlen nelia temachtli” ma techmaka nopa tlamachtili tlen tlauel moneki (Mat. 24:45). Nopa “tlalnamijkatlatekipanojketl” san techmachtia ipan www.pr418.com, tv.pr418.com, uan wol.pr418.com. Nojkia, san onka eyi aplicaciones katli kitekiuiaj: JW Language^®, JW Library^® uan JW Library Sign Language^®. Uelis timotemachisej ipan ni aplicaciones uan páginas tlen Internet, amo aka kinamaka se tlenijki uan amo onka yon se tlamantli tlen ika Satanás tlakajkayaua. Tlaj tikitaskiaj tlamachtili ipan sekinok aplicaciones o páginas tlen Internet katli amo kitekiuia nopa “tlalnamijkatlatekipanojketl”, ¿uelis timotemachisej amo tleno kipatilijtokej o amo kipia se tlamantli tlen ika uelis techkajkayauasej? (Sal. 18:26; 19:8).

Nojkia, tlaj se akajya kitlaliskia amatlajkuiloli ipan Internet kampa sekinok uelis kiijkuilosej tlen moiljuiaj, nopa apóstatas uan katli techkualankaitaj ueliskia kichiuasej sekinok ayokmo ma motemachikaj ipan Jehová itlanechikol. Sekij toikniuaj monajnankilijtokej ininuaya sekinok ipan Internet, uan kisokiuijtokej Jehová itoka. Ipan Internet amo kinamiki tikinmachtisej “nopa tlakamej tlen kikokoliaj [toTeotsij]” (2 Tim. 2:23-25; 1 Tim. 6:3-5). Nojkia, tikitstokej ipan redes sociales uan ipan Internet, sekinok kichijchijtokej páginas tlen kipia nopa tokajyotl tlen Jehová itlanechikol kitekiuia uan cuentas ika inintoka toikniuaj Katli kinyakanaj Jehová itlajtoltemakauaj. Toikniuaj Katli kinyakanaj Jehová itlajtoltemakauaj amo kipiaj se página ipan Internet uan amo kitekiuiaj yon se red social.

Kema tikiniljuiaj maseualmej ma kitlachilikaj jw.org tikinpaleuiaj ma kimatikaj nopa “kuali tlamachtili” (Mat. 24:14). Jehová itlanechikol nochipa kiyankuilijtia nopa tlamantli tlen ika titlajtolmoyauaj. Uan tijnekij nochi maseualmej ma kinpaleui. Yeka, kej kiijtoua nopa Condiciones de Uso, kena uelis tijtitlanilis se akajya ipan se correo se amatlajkuiloli o nopa vínculo kampa uelis kikixtis ipan jw,org. Kema tikiljuiaj se akajya katli kineki kimatis tlen melauak ma kitlachili kampa titlamachtiaj ipan Internet, kejuak tijpaleuiaj ma kiixmati nopa “tlalnamijkatlatekipanojketl tlen nelia temachtli”, katli toTeotsij kitlapejpenijtok ma techmaka nopa tlamachtili tlen tlauel moneki.