1-3. 1) ¿Tlake moneki kichiuasej nochi telpokamej? Xikijto se neskayotl. (Xikita nopa achtoui tlaixkopinkayotl). 2) ¿Tlake kinpaleuis telpokamej kuali ma kitlapejpenikaj tlake kichiuasej?

XIMOILJUI mitstlanejtokej tias kanajya, uan moneki tias ipan se autobús pampa tlauel uejka mokaua. Kema tiasi kampa asij o kisaj autobuses, tikita tlauel temitok. Maske itstokej miakej maseualmej uan onka miak autobuses, ta amo timotekipachoua pampa kuali tijmajtok kanke tijneki tias. Yeka xitlauak tia kampa moketstok nopa autobús tlen mitsuikas, uan amo titlejko ipan seyok.

² Tlen tijchiuas ipan monemilis eli sanse kej kema tia uejka tipaxaloua, uan telpokamej elij kej nopa miakej maseualmej katli mochiaj kampa asij o kisaj autobuses. Uelis kemantika achi mitstekipachoua tlake tijchiuas ipan monemilis. Yeka, tlaj kuali tijmajtos tlake tijneki ipan monemilis, amo ouij tijtlapejpenis tlake tijchiuas.

³ Ni tlamachtili kinyololinis telpokamej ma mosentlalikaj kiyolpakiltisej Jehová. Ni kiijtosneki moneki kikauasej toTeotsij ma kinyakana kampa momachtiaj, ipan ininteki uan ika  ininchampoyouaj. Nojkia kiijtosneki moneki kichiuasej kampeka tlauel kitekipanosej Jehová. Nopa telpokamej katli mosentlaliaj tlauel tlatekipanosej, uelis motemachisej Jehová tlauel kinteochiuas uan nochi tlen kichiuasej kuali kisas (xijpoua Proverbios 16:3).

4. ¿Tlake tikixtomasej ipan ni tlamachtili?

⁴ Ipan ni tlamachtili tikitasej eyi tlamantli tlen mitspaleuis tijmatis kenke tlauel kuali tlaj tijtlapejpenis tijtekipanos toTeotsij. Nopa achtoui ome tlamantli kiixtoma kenijkatsa tlaj timosentlalis tlauel tijtekipanos Jehová mitspaleuis kuali ximouampojchiua iuaya. Uan nopa expa tlamantli kiixtoma kenijkatsa tlaj tijtekipanos toTeotsij kema nojua titelpokatl, tijselis miak tlateochiualistli.

5. ¿Tlake tijnextis tlaj timosentlalis tlauel tijtekipanos Jehová?

⁵ ¿Kenke moneki timosentlalis tlauel tijtekipanos Jehová? Achtoui, pampa kiampa tijnextilis tlauel tijtlaskamatilia itlaiknelijkayo uan pampa mitsmakatok miak tlamantli. Se toTeotsij itekipanojka kiijkuilok: “Nelia kuali para timitsueyichiuasej”. Uan nojkia kiijtok: “Ta nelia titechchiuilijtok miak tlamantli tlen kuali, uan tinechchiuilijtok ma nipaki” (Sal. 92:1, 4). Telpokatl, ximoiljui ipan nochi nopa tlamantli tlen Jehová mitsmakatok: kikajtok xikixmati ya uan tlen melauak, mitsmakatok monemilis, Biblia, kikajtok xiitsto ipan tlanechikoli uan nojkia mitstenkauilijtok kuali tiitstos teipa. Tlaj tlauel tijpatiitas tijtekipanos, amo san tijnextis tlauel tijtlaskamatilia, nojkia kuali timouampojchiuas iuaya.

6. 1) ¿Kenijkatsa mitspaleuis kuali ximouampojchiua iuaya Jehová tlaj timosentlalis tlauel tijtekipanos? 2) ¿Tlake uelis mosentlalisej kichiuasej konemej?

⁶ Nojkia, tlaj tlauel tijtekipanos Jehová, ya tlauel kipatiitas nopa kuali tlamantli tlen tijchiuas. Uan nopa nojkia mitspaleuis kuali ximouampojchiua iuaya. Apóstol Pablo kiijtok: “ToTeko Dios nochipa kichiua tlen xitlauak. Yajaya axkiilkauas nopa tekitl tlen inkichijtokej pampa inkiikneliaj” (Heb. 6:10). Amo ximoiljui amo tiuelis timosentlalis tijchiuas se keski tlamantli san pampa nojua tikonetl. Ximoiljui ipan tlen kichijkej ni konemej. Christine kipixtoya matlaktli xiuitl kema mosentlalik kipouas tlen kinpanotoya toikniuaj ipan ininnemilis. Toby kipiayaya 12 xiuitl kema mosentlalik kipouas nochi Biblia uan teipa moatsonpoliuiltis. Maxim kipiayaya 11 xiuitl uan iikni Noemi matlaktli kema mosentlalijkej moatsonpoliuiltisej. Uan nojkia mosentlalijkej kichiuasej tlen kinpaleuiskia ma tlatekipanokaj ipan Betel kema moskaltiskiaj. Kipepechojkej se solicitud ipan ininchaj, kiampa amo kiilkauaskiaj tlen kinekiyayaj kichiuasej. Ximotlajtlani: “¿Onka se tlamantli tlen ueliskia nimosentlalis nijchiuas?” (xijpoua Filipenses 1:10, 11).

7, 8. 1) ¿Kenijkatsa mitspaleuis tlaj kuali tijmajtok tlake tijneki tijchiuas ipan monemilis? 2) ¿Kenke se ichpokatl amo kinejki momachtis ipan universidad?

⁷ Ma tikitakaj nopa expa tlamantli tlen mitspaleuis tijmatis kenke moneki timosentlalis tijtekipanos Jehová. Kema titelpokatl, moneki tijtlapejpenis tlaj timomachtis escuela, kanke titekitis uan sekinok tlamantli tlen nojkia ipati. Kema tijtlapejpenia tijchiuas se tlamantli, eli kejuak tiasiskia ipan se ojmaxal kampa monekis tijtlapejpenis tlake ojtli tijtokilis. Tlaj kuali tijmajtok kanke tia, amo timokuapolos. Nojkia, tlaj kuali tijmajtok tlake tijneki tijchiuas ipan monemilis, mitspaleuis amo ouij tijmatis tijtlapejpenis tlake tijchiuas. Proverbios 21:5 kiijtoua: “Aki achtoui moiljuia ika miak cuidado kejatsa kichiuas se tlamantli kipantis para kisas kuali iteki”. Tlaj nima timoiljuia tlake tijneki tijchiuas ipan monemilis uan tijchiua kampeka tikaxitis tlen timosentlalijtok, nima tijselis  miak tlateochiualistli. Ya nopa kichijki se ichpokatl tlen itoka Damaris kema monejki kitlapejpenis se tlamantli tlen tlauel ipati.

⁸ Damaris tlauel kuali momachtiyaya ipan escuela, uan kiiljuijkej kimakaskiaj se beca tlen ika momachtiskia Derecho ipan universidad. Maske kitenkauilijkej nopa, ya kinejki tekitis ipan se banco. ¿Kenke? Ya kiijtoua: “Na ipa nijnektoya nielis precursora. Yeka nijtemok se tekitl kampa san nitekitiskia se keski tonali. Maske nijtlaniskia miak tomij tlaj nimomachtijtoskia Derecho, uelis amo kema nijpantijtoskia se tekitl kampa san nitekitiskia se keski tonali”. Nama, Damaris ya tlatekipanojtok 20 xiuitl kej precursora. ¿Moyolkokoua pampa kitlapejpenik nopa kema eliyaya ichpokatl? Yon se kentsi. Ya kiijtoua: “Kampa nitekiti, nikinnamiki nopa abogados katli kichiuaj nopa tekitl tlen na nijchiuaskia tlaj nimomachtijtoskia Derecho. Miakej amo kinpaktia ininteki. Na amo kiampa nijyolmati pampa na nijtlapejpenik nielis precursora uan nijtekipanoua Jehová ika miak pakilistli”.

9. ¿Kenke moneki tikinyolchikauasej telpokamej?

⁹ Ipan nochi Tlaltipaktli, itstokej tlauel miakej telpokamej katli uelis tikinyolchikauasej pampa kitekipanouaj Jehová ika nochi ininyolo uan pampa kichiuaj kampeka nojua tlauel tlatekipanosej ipan tlanechikoli. Uan nojkia kichiuaj sekinok tlamantli tlen kinpaktia. Kikauaj Jehová ma kinyakana kampa momachtiaj, ipan ininteki uan ika ininchampoyouaj. Tlanauatijketl Salomón kiijtok moneki timotemachisej ipan Jehová. Uan nojkia kiijtok: “Ximotemachi ipan [Jehová] ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak” (Prov. 3:5, 6). Jehová tlauel kinpatiita nochi telpokamej katli kitekipanouaj. Tlauel kiniknelia, yeka kinmokuitlauia, kinyakana uan kinteochiua.

10. 1) ¿Kenke moneki tlauel tijpatiitas titlajtolmoyauas? 2) ¿Tlake mitspaleuis kuali xitlajtolmoyaua?

¹⁰ Telpokatl, tlaj tijneki tijyolpakiltis Jehová, moneki tlauel tijpatiitas titlajtolmoyauas. Jesús tlamachtik moneki tijchiuasej nopa tekitl kema kiijtok: “Pero achtoui moneki tlakamej teixtomilisej itlajtol toTeko ipan nochi tlaltinij” (Mar. 13:10). Yeka, moneki timosentlalis tlauel titlajtolmoyauas. ¿Ueliskia tijchiuas kampeka nojua tlauel titlajtolmoyauas o timochiuas tiprecursor? Uan tlaj amo tlauel mitspaktia titlajtolmoyauas, ¿tlake ueliskia tijchiuas? Uan ¿tlake mitspaleuis kuali xitlamachti tlen toTeotsij? Xijchiua ni tlamantli tlen tlauel ipati: kuali ximokualchijchiua uan nochipa xikiniljui sekinok tlen tijmati. Tlaj kiampa tijchiuas, teipa tlauel mitspaktis titlajtolmoyauas.

11, 12. 1) ¿Tlake kinpaleuis telpokamej ma mokualchijchijtokaj kema monekis ma tlajtolmoyauakaj? 2) ¿Tlake kichijki se telpokatl uan kiampa uelki tlamachtia tlen Jehová ipan escuela?

¹¹ Achtoui, kuali ximoiljui tlake titlanankiliskia tlaj katli ininuaya timomachtia mitstlajtlaniliskiaj se tlamantli, kej: “¿Kenke titlaneltoka ipan toTeotsij?”. Ipan jw.org onka tlamachtili tlen mitspaleuis kuali xitlanankili kema mitstlajtlanilisej se tlenijki. Xikalaki ipan nopa tlaxeloli ENSEÑANZAS BÍBLICAS > JÓVENES > PONLO POR ESCRITO. Nopaya onka se amatl tlen itoka “¿Qué razones tengo para creer en Dios?”. Nopa amatl mitspaleuis tijmatis tlake ueliskia titlanankilis. Nojkia kipia textos tlen uelis tijtekiuis, kej Hebreos 3:4, Romanos 1:20 uan Salmo 139:14. Ipan nopa tlaxeloli uelis tijpantis sekinok amatl tlen mitspaleuis xijnankili sekinok tlajtlanili (xijpoua 1 Pedro 3:15).

 ¹² Nojkia ueliskia tikiniljuis katli ininuaya timomachtia ma kitlachilikaj jw.org ipan Internet. Se telpokatl tlen itoka Luca kichijki nopa kema kampa momachtia kamanaltiyayaj tlen miak religiones. Luca kiitak ipan nopa amochtli kiijtouayayaj miak tlamantli tlen Jehová itlajtoltemakauaj. Maske achi majmauiyaya, kiiljuik itlamachtijka tlaj ueliskia kiixtomas kenke tlen kiijtouayaya nopa amochtli amo eliyaya melauak. Kiixtonki tlen kineltokayaya uan kinnextilik jw.org. Teipa, inintlamachtijka kinkauilik se tarea; ma kitlachilikaj nopa video Ximomanaui maske amo titemakilis. Luca tlauel yolpakiyaya pampa uelki kiniljuik sekinok tlen Jehová.

13. ¿Kenke moneki nochipa tijchiuas tlen timosentlalijtok maske tikixnamikis tlaouijkayotl?

¹³ Maske tikixnamikis se keski tlaouijkayotl, nojua xijchijto kampeka tijchiuas tlen timosentlalijtok (2 Tim. 4:2). Katharina kiampa kichijki. Kema kipixtoya 17 xiuitl mosentlalik kinmachtis tlen Jehová nochi katli ininuaya tekitiyaya. Se katli iuaya tekitiyaya miakpa kitlaijiljuik pampa tlajtolmoyauayaya. Tlen Katharina kichiuayaya tlauel kipaleuik Hans, se telpokatl katli iuaya tekitiyaya, yeka pejki momachtia Biblia uan moatsonpoliuiltik. Katharina amo kimatki tlake panok pampa mochantito sejkanok. Kema panok 13 xiuitl, itstoya ipan tlanechikoli ika ichampoyouaj, uan kiitak katli tlamachtiskia eliyaya Hans. Tlauel kuali tlen Katharina kichijki pampa nochipa mosentlalik kinmachtis katli ininuaya tekitiyaya.

14, 15. 1) ¿Tlake moneki tijchiuas tlaj sekinok mitsiljuiaj xijchiua kej inijuantij? 2) ¿Tlake mitspaleuis amo tijchiuas kej sekinok?

¹⁴ Tlen timomachtijkej, mitsyololinijtok ximosentlali tijyolpakiltis Jehová uan tlauel tijtekipanos. Uelis sekinok telpokamej nochipa san moiljuijtokej kenijkatsa moyolpakiltisej uan kinekij nojkia xijchiua kej inijuantij. Yeka, moneki tijnextis tlaj nelia timosentlalijtok tijtekipanos Jehová ika nochi moyolo. Amo xijkaua sekinok ma mitstsakuilikaj tijchiuas tlen timosentlalijtok. Sampa ximoiljui ipan nopa neskayotl kampa tikijtojkej tiitstok kampa kisaj autobuses. Amo titlejkoskia ipan tlen ueli autobús san pampa katli nopaya itstokej nesi moyolpakiltiaj.

 ¹⁵ ¿Tlake mitspaleuis amo tijchiuas tlen sekinok mitsiljuiaj? Tlauel mitspaleuis tlaj amo tiitstos kampa ueliskia mitsyoltilanas se tlamantli (Prov. 22:3). Ximoiljui tlake mitspanoskia tlaj tijchiuaskia tlen amo kuali (Gál. 6:7). Uan nojkia tlauel mitspaleuis tlaj tikilnamiktos nojkia moneki ma mitspaleuikaj. Tlaj amo timoueyimatis, kuali tikintlakakilis motatauaj uan sekinok toikniuaj kema mitstlajtolmakasej (xijpoua 1 Pedro 5:5, 6).

16. Xikijto se neskayotl tlen kinextia kenke tlauel techpaleuia kema amo timoueyimatij.

¹⁶ Ma tikitakaj tlen kichijki se telpokatl tlen itoka Christoph. Ya kinextik amo moueyimatiyaya uan kichijki tlen kitlajtolmakakej. Kema ya moatsonpoliuiltijtoya, pejki yaui ipan se gimnasio. Nopaya se keskij telpokamej kitlanejkej ma mauilti ininuaya. Christoph kiiljuik se ueuejtlakatl tlen kinekiyaya kichiuas, uan toikni kiiljuik kuali ma moiljui tlake ueliskia kipanos tlaj itstoskia ininuaya. Maske toikni kitlajtolmakak, Christoph kena kinejki kalakis kampa mauiltiyayaj nopa telpokamej. Teipa, kiitak amo kuali tlen kichiuayayaj nopa telpokamej pampa monekiyaya moteuis ininuaya sekinok. Monojnotski ininuaya se keskij ueuejtlakamej, uan inijuantij kitlajtolmakakej. Ya kiijtoua: “Jehová kintitlanki ueuejtlakamej ma nechtlajtolmakakaj. Maske amo nima nikintlakakilik, teipa nijchijki tlen nechiljuijkej”. ¿Nojkia tijnextia amo timoueyimati kema mitstlajtolmakaj?

17, 18. 1) ¿Kenijkatsa kineki Jehová ma itstokaj telpokamej? 2) ¿Tlake mitspaleuis xiyolpakto ika tlen tijtlapejpenis tijchiuas kema titelpokatl? Xikijto se neskayotl.

¹⁷ Jehová mitsiljuia: “Ta tlen titelpokatl, ximopakilismaka amantsi kema noja titelpokatlakatl” (Ecl. 11:9). Jehová kineki xiyolpaki. Ipan ni tlamachtili tikitakej, kenijkatsa tlaj timosentlalis tijtekipanos Jehová uan tlaj nochipa tijnekis tijyolpakiltis, mitspaleuis nelia xiyolpaki. Tlaj nima timosentlalis tijchiuas nopa tlamantli, nojkia nima tikitas kenijkatsa Jehová mitsyakana, mitsmokuitlauia uan mitsteochiua. Ximoyoliljui ipan tlen Biblia mitstlajtolmaka uan xijchiua tlen kiijtoua ni texto: “Xikilnamiki [Jehová] tlen mitschijchijki kema noja tiitstok titelpokatl” (Ecl. 12:1).

¹⁸ Amo nochipa tielis titelpokatl yon amo tijmatis kenijkatsa nimantsi tiueyias. Miakej katli ya uejueyij moyolkokouaj pampa amo kuali kitlapejpenijkej tlen kichiuaskiaj o pampa amo mosentlalijkej kichiuasej se tlamantli. Telpokamej katli nama mosentlalijtokej kitekipanosej Jehová nelia tlauel yolpakisej maske uejueyiasej. Kiampa kiyolmati Mirjana. Kema eliyaya ichpokatl, kuali mauiltiyaya uan kitlanejkej ma mauiltiti ipan nopa Juegos Olímpicos de Invierno. Ya amo kinejki yas, pampa kinejki senkistok kitekipanos toTeotsij. Ya panotok kipano 30 xiuitl, uan nojua tlatekipanoua kej precursora iuaya iueue. Ya kiijtoua: “Maske tijchiuaskia miakej ma mitsixmatikaj uan tijtlaniskia miak tomij, nopa amo uejkauaskia uan amo ipati. San tlauel ipati tlaj tijtekipanosej Jehová uan tikinpaleuisej sekinok ma kiixmatikaj”.

19. ¿Kenijkatsa mitspaleuis tlaj timosentlalis tlauel tijtekipanos Jehová?

¹⁹ Kinamiki ma tikintlaskamatilikaj uan ma tikinyolchikauakaj telpokamej katli mosentlalijtokej kitekipanosej Jehová maske kiixnamikij tlaouijkayotl. Kichiuaj kampeka kuali kitekipanosej Jehová, tlauel kipatiitaj tlajtolmoyauasej uan amo kikauaj yon se tlamantli ma kintsakuili kichiuasej tlen mosentlalijtokej. Telpokatl, uelis timotemachis amo san tlapik tlen tijchiua, uan nojkia uelis timotemachis toikniuaj tlauel mitsikneliaj. Uan tlaj tijchiuas kampeka ipan monemilis nochipa tijyolpakiltis Jehová, kuali kisas nochi tlen tijchiuas.