SE XIUIJTLAYA, ipan nochi Tlaltipaktli miakej Jehová itlajtoltemakauaj kintekimakakej kej ueuejtlakamej uan tlapaleuianij. Tlaj ta nojkia mitstekimakakej kej ueuejtlakatl o tlapaleuijketl, uelis nelia tlauel tiyolpaki.

Uan amo kenijki tlaj nojkia achi timajmaui. Jason, se toikni telpokatl katli tlatekipanoua kej ueuejtlakatl, kiijtoua: “Kema nechtekimakakej kej ueuejtlakatl, nimoiljuik amo niueliskia nijchiuas nopa tekitl”. Moisés uan Jeremías nojkia moiljuijkej amo ueliskiaj kichiuasej tlen Jehová kinnauatijtoya (Éx. 4:10; Jer. 1:6). ¿Nojkia kiampa tijyolmati? ¿Tlake mitspaleuis amo kiampa xijyolmati uan nojua kuali xijchijtia moteki? Ma tikitakaj tlake kuali tlamantli kichijki se Cristo itokilijka katli itstoya ipan achtoui siglo: Timoteo (Hech 16:1-3).

Uelis Timoteo kipixtoya se 20 xiuitl kema Pablo kitlanejki ma tlatekipano kej misionero. Timoteo nojua eliyaya telpokatl, yeka uelis achi majmauiyaya uan amo kimatiyaya kenijkatsa kichiuas se keski tekitl ipan tlanechikoli (1 Tim. 4:11, 12; 2 Tim. 1:1, 2, 7). Maske kiampa kiyolmatiyaya, kema panok miak xiuitl, Pablo kiniljuik toikniuaj tlen Filipos: “Intla ipakilis toueyiTeko Jesús, nijneki [...] nijtitlanis Timoteo ma inmechitati. [...] Pampa axaka seyok kipia se iyolo keja Timoteo” (Filip. 2:19, 20).

¿Tlake kipaleuik Timoteo kuali ma tlatekipano kej ueuejtlakatl? Ma tikitakaj chikuasej tlamantli tlen Timoteo kichijki uan tlen kinpaleuis katli kintekimakatokej ipan tlanechikoli.

1. Kitekipachouayaya tlen kinpanoyaya sekinok. Pablo kiniljuik toikniuaj tlen Filipos: “[Timoteo] motekipachoua inmopampa” (Filip. 2:20). Timoteo nelia kitekipachouayaya tlen kinpanoyaya sekinok. Kinekiyaya kinpaleuis kuali ma tlaneltokakaj uan mosentlalijtoya kichiuas nochi tlen ueliskia uan kiampa kinpaleuis.

Amo xijchiua kej se katli kinemiltia se autobús, katli san kitekipachoua nima asis kampa kichixtokej uan amo kitekipachoua tlen kinpano maseualmej. William, se toikni katli kipano 20 xiuitl tlatekipanojtok kej ueuejtlakatl, kiniljuia ni tlamantli nochi katli kipiaj se tekitl ipan tlanechikoli: “Xikinikneli toikniuaj. Ximosentlali ipan tlen kinpoloua toikniuaj uan amo xijchiua se tlamantli san pampa ya nopa moteki”.

2. Kiachtouitlalik nopa tekitl tlen kiselijtoya. Pablo kiijtok Timoteo amo eliyaya sanse kej sekinok. Ya kiijtok: “Nochi sekinok tlen itstokej nikani san moiljuiaj tlen kuali para inijuantij. Axmoiljuiaj kejatsa uelis kipaleuisej iteki Cristo Jesús” (Filip. 2:21). Kema Pablo itstoya Roma, kiitak miakej Cristo itokilijkauaj san mosentlalijtoyaj kuali itstosej uan amo kichiuayayaj kampeka kuali kitekipanosej toTeotsij. Timoteo amo kiampa kichiuayaya. Tlaj monekiyaya tlapaleuili ipan tlajtolmoyaualistli, moiljuiyaya sanse kej tlajtolpanextijketl Isaías, katli kiijtok: “Na nias. Na xinechtitlani” (Is. 6:8).

¿Tlake mitspaleuis kuali xijchiua moteki ipan tlanechikoli? Achtoui, moneki tikitas tlake tlamantli nelia tlauel ipati. Apóstol Pablo kiijtok: “Xijmatikaj kejatsa inkitlapejpenisej tlen nelia kuali” o tlen tlauel ipati (Filip. 1:10). Ximosentlali tlauel tijpatiitas nopa tlamantli tlen toTeotsij tlauel kipatiita. Uan nojkia xijpatla se keski tlamantli ipan monemilis. Amo xijchiua tlamantli tlen mitstonalpolos o tlen kichiuas tlauel xisiaui. Pablo kiiljuik Timoteo: “Xicholojteua kema se tlamantli mitsyoltilana para xijchiua keja telpokamej [...]. Xijtokili tlen xitlauak. Xijneltoka toTeko ika nochi moyolo, uan xikinikneli [maseualmej]” (2 Tim. 2:22).

3. Chikauak tlatekipanok. Pablo kiniljuik toikniuaj tlen Filipos: “Inmojuantij ya  inkiixmatij inemilis Timoteo pampa keja se okichpil tlen ika pakilistli kipaleuia itata, yajaya nechpaleuijtok para nikiniljuia tlakamej itlajtol toTeko” (Filip. 2:22). Timoteo amo tlatsiuiyaya. Ya uan Pablo tlauel chikauak kitekipanojkej toTeotsij uan nopa kinpaleuik kuali ma mouampojchiuakaj.

Ipan ni tonali onka miak tekitl tlen uelis tijchiuas ipan Jehová itlanechikol. Tlaj tijchiuas nopa tekitl, mitspaleuis tlauel xiyolpaki uan kuali ximouika ininuaya toikniuaj. Pablo kiijtok: “Nochipa xijchiuakaj nochi nopa tekitl tlen toueyiTeko inmechmaka xijchiuakaj para ya” (1 Cor. 15:58).

4. Kichijki tlen momachtik. Pablo kiiljuik Timoteo: “Ta Timoteo, tijtokilijtok tlen nitlamachtia uan tlen na nijchiua. Tijmati tlen nijneki nijchiuas ipan nonejnemilis uan kejatsa nijneltoka toTeko. Tikitstok kejatsa nikijiyouijtok nochi tlen nechpanotiualajtok. Tijmati niteiknelia uan nijpia noyolo ika sekinok” (2 Tim. 3:10). Timoteo kichijki nochi tlen kimachtijkej, uan nopa kipaleuik ma kiseli sekinok tekitl ipan tlanechikoli (1 Cor. 4:17).

¿Itstok se toikni katli mitsmachtia kenijkatsa tijchiuas moteki ipan tlanechikoli? Tlaj amo, ¿uelis tijtemos se katli mitspaleuis? Tom, katli miak xiuitl tlatekipanojtok kej ueuejtlakatl, kiijtoua: “Se toikni katli miak xiuitl tlatekipanojtoya kej ueuejtlakatl kinejki nechpaleuis uan mochijki notlamachtijka. Nochipa nikiljuiyaya ma nechtlajtolmaka uan na nijchiuayaya tlen nechiljuiyaya. Nopa nechpaleuik amo ma nimajmaui nijchiuas noteki”.

5. Kichijki kampeka nojua kuali tlatekipanos. Pablo kiiljuik Timoteo: “Xijtekiui moyolis uan mochikaualis para más timokualchijchiuas ipan toTeko” (1 Tim. 4:7). Maske se atleta kipia se katli kimachtia kenijkatsa mokualchijchiuas, ya iselti nojkia moneki mokualchijchiuas. Pablo kiiljuik Timoteo: “Xijpoua iTlajtol toTeko para nochi kikakisej. Xikinmachti tlen kiijtosneki. [...] Ika nochi moyolo xijchijtinemi nochi ni tlamantli tlen nimitsiljuijtok. San ya nopa xijmati para nochi tlaneltokanij kiitasej para mojmostla tijchiua más kuali iteki toTeko” (1 Tim. 4:13-15).

Ta nojkia moneki tijchiuas kampeka nojua kuali titlatekipanos. Amo ximoiljui ayokmo moneki tijyekos sekinok tlamantli. Xijchiua kampeka tijmatis tlake yajyankuik tlamantli mochiua ipan Jehová itlanechikol. Nojkia, tlauel ximomokuitlaui. Amo ximoiljui pampa ya uejkajtok titlatekipanoua kej ueuejtlakatl uelis tijsenkauas tlen ueli kuesoli maske amo tlauel timomachtis. Xijchiua kej kitlajtolmakakej Timoteo kema kiiljuijkej: “Ximotlachili para san tlen xitlauak tijchiuas uan para san tlen kuali titlamachtis” (1 Tim. 4:16).

6. Kikajki toTeotsij itonal ma kiyakana. Kema Pablo kiilnamijki kenijkatsa tlatekipanojtoya Timoteo, kiijtok: “Ika itlapaleuil itonal toTeko tlen mokaua ipan toyolo, xijmokuitlaui nopa kuali tlajtoli tlen toTeko kikajtok momako, uan axaka xijkauili ma kipatla” (2 Tim. 1:14). Tlaj Timoteo kinekiyaya kimokuitlauis iteki, monekiyaya kikauas toTeotsij itonal ma kiyakana.

Donald, katli uejkajtok tlatekipanoua kej ueuejtlakatl, kiijtoua: “Toikniuaj katli kintekimakatokej ipan tlanechikoli moneki kichiuasej kampeka nojua kuali mouikasej iuaya toTeotsij. Katli kichiuaj nopa, kinpaleuia amo ma siauikaj. Tlaj kiiljuisej toTeotsij ma kinmaka itonal uan kichiuaj kampeka kinextisej nopa kuajkuali tlamantli ipan ininnemilis, toikniuaj kinitasej kej se tlateochiualistli” (Sal. 84:7; 1 Ped. 4:11).

Tlauel tiyolpakij kema tikitaj kenijkatsa miakej toikniuaj katli kintekimakatokej ipan tlanechikoli, kej ta, kichiuaj kampeka kuali kitekipanosej toTeotsij. Jason, katli tikijtojkej kampa peua ni tlamachtili, kiijtoua: “Ipan nochi nopa tonali tlen nitlatekipanojtok kej ueuejtlakatl, nimomachtijtok miak tlamantli uan nama amo nimajmaui nijchiuas noteki ipan tlanechikoli. Tlauel niyolpaki ika ni tekitl tlen nijselijtok uan nikita kej se tlateochiualistli”.

Uan ta, ¿tijchiuas kampeka nojua kuali titlatekipanos ipan tlanechikoli? Ximosentlali tijchiuas kej Timoteo. Kej nopa tielis se tlateochiualistli ipan Jehová itlanechikol.