1, 2. 1) ¿Kenke maseualmej kintekipachouayaya itstosej kejuak ilpitokej? 2) ¿Ajkia kiijtok Pablo kichiua ma tiitstokaj kejuak timajkajtokej?

KATLI itstoyaj kampa Roma tlanauatiyaya tlauel kinpaktiyaya ma mochiua tlen inintlanauatil kiijtouayaya, ma mochiua tlen xitlauak uan ma kinkauakaj kichiuasej tlen kinekiyayaj. Inijuantij uelkej kiampa itstoyaj pampa tlauel kinchiualtiyayaj sekinok maseualmej ma tekitikaj. Ipan se keski xiuitl uelis se 30% katli nopaya itstoyaj kinchiualtiyayaj ma tekitikaj. Nopa maseualmej tlauel kintekipachouayaya pampa kejuak ilpitoyaj uan amo kinkauayayaj ma kichiuakaj tlen inijuantij kinekiyayaj. Uan miakej Cristo itokilijkauaj nojkia kiampa itstoyaj.

² Maske apóstol Pablo miakpa kiijtok kenijkatsa kejuak timajkajtoskiaj, ya amo kinekiyaya ma moiljuikaj ueliskia kipatlasej se keski tlamantli o kintekipatlasej tekichiuanij. Pablo uan sekinok Cristo itokilijkauaj kinekiyayaj kinpaleuisej maseualmej ma kimatikaj nopa kuali tlamachtili tlen toTeotsij iTlanauatijkayo uan ma kiitakaj kenijkatsa tlauel ipati Jesús imikilis. Pablo kiniljuik toikniuaj ajkia kichiuayaya ma tiitstokaj  kejuak timajkajtokej. Kema ika ompa kintlajkuiljuilik katli itstoyaj ipan Corinto, xitlauak kiniljuik: “Kema itonal toueyiteko [Jehová] mokaua ipan iyolo se tlakatl, nopa tlakatl [...] ya majkajtok” (2 Cor. 3:17).

3, 4. 1) ¿Tlake kiijtojtoya Pablo kema ayamo kiijkuilojtoya 2 Corintios 3:17? 2) ¿Tlake moneki tijchiuasej tlaj tijnekij tiitstosej kejuak timajkajtokej?

³ Ipan nopa amatlajkuiloli, Pablo kiijtojtoya tlen kipanok Moisés kema temok tlen tepetl Sinaí, kema itstoya iuaya se Jehová iiluikaejka. Moisés iixayak tlauiyaya. Kema israeleuanij kiitakej, tlauel momajmatijkej, uan yeka moixtsajki ika se yoyomitl (Éx. 34:29, 30, 33; 2 Cor. 3:7, 13). Pablo kiixtonki kema se akajya “kiselia toueyiteko” Jehová, kejuak moixtlapoua (2 Cor. 3:16). ¿Tlake kinejki kiijtos?

⁴ Kej tikitakej ipan achtoui tlamachtili, san Jehová ueli kichiua nochi pampa amo tleno kitsakuilia. Yeka kampa ya itstok uan eltok itonal, nochi kejuak majkajtokej. Tlaj tijnekij nojkia kiampa tiitstosej, uajka moneki ‘tijselisej’ Jehová, nopa kiijtosneki kuali timouampojchiuasej iuaya. Israeleuanij katli yauiyayaj ipan uaktok tlali, amo kiitakej kej kinamikiyaya se keski tlamantli. Kejuak se yoyomitl kiixtsaktoya inintlalnamikilis uan ininyolo. Inijuantij kichiuayayaj san tlen inijuantij kinekiyayaj (Heb. 3:8-10).

5. 1) ¿Kenijkatsa techmajkaualtia Jehová itonal? 2) ¿Kenijkatsa tijmatij se akajya uelis kiyolmatis kejuak kimajkajtokej maske kitsaktokej? 3) ¿Tlake tijnankilisej ipan ni tlamachtili?

⁵ Jehová techmaka itonal, uan nopa nelia kichiua ma tiitstokaj timajkajtokej. Jehová itonal techmajkaualtia tlen tlajtlakoli uan mikilistli, uan nojkia tlen religiones katli amo melauak uan tlen momajtokej kichiuaj maseualmej. Yon se maseuali amo ueliskia kichiuas ni (Rom. 6:23; 8:2). ¡Tlauel tiyolpakij pampa kejuak techmajkajtokej! Uan maske sekij kintsaktokej o kinchiualtiaj ma tekitikaj, nojkia kiampa kiyolmatij (Gén. 39:20-23). Kej nopa kipanok tosiuaikni Nancy Yuen uan toikni Harold King. Miak xiuitl kintsajkej pampa kineltokakej toTeotsij. Uelis tikitasej tlen kinpanok ipan JW Broadcasting (VIDEOS > TLEN KINPANOTOK TOIKNIUAJ UAN TLEN KINTLAJTLANILIJTOKEJ > KIPIAJ TLAOUIJKAYOTL). Ma tijnankilikaj ni ome tlajtlanili: ¿Kenijkatsa tijnextiaj tijpatiitaj tiitstosej kejuak timajkajtokej? ¿Tlake uelis tijchiuasej tlaj tijnekij timonejnemiltisej kej kinamiki pampa timajkajtokej?

6. ¿Kenijkatsa israeleuanij kinextijkej amo kipatiitayayaj itstosej majkajtokej?

⁶ Kema se akajya techmaka se tlenijki tlen tlauel patiyo, nelia tlauel tijtlaskamatiliaj. Kema Jehová kinkixtik israeleuanij tlen Egipto, kejuak kinmakak se tlenijki, pampa nama ueliskiaj itstosej majkajtokej. ¿Tlake kichijkej israeleuanij? Kema panok se keski metstli, tlauel kinejkej kikuasej uan kiisej tlen kipixtoyaj ipan Egipto, uan ayokmo kinpaktik tlen Jehová kinmakayaya. Tlauel tlaijixnamijkej uan kinejkej tlakuepilisej Egipto. Inijuantij tlauel kipatiitayayaj nopa michij, pepinos, sandías, cebollas, ajos uan sekinok tlakualistli, uan amo kipatiitakej itstosej majkajtokej uan kiampa kiueyichiuasej Jehová. Nama tijkuamachiliaj kenke Jehová tlauel kualanki ininuaya (Núm. 11:5, 6, 10; 14:3, 4). Ni techmachtia se tlamantli tlen tlauel ipati.

7. 1) ¿Kenijkatsa Pablo nojkia kichijki tlen kiijtok ipan 2 Corintios 6:1? 2) ¿Kenijkatsa uelis tijchiuasej kej Pablo?

 ⁷ Pablo kinyololinik Cristo itokilijkauaj uan kiniljuik nochipa ma kipatiitakaj itstosej majkajtokej, pampa Jehová kinmakixtijtoya ika iKone Jesucristo (xijpoua 2 Corintios 6:1). Pablo tlauel amo kuali kiyolmatiyaya pampa tlajtlakoli uan mikilistli kejuak kiilpijtoya. Yeka, kichijki tlen tetlajtolmakak uan kiijtok: “Tlaskamati toTeko Dios [ika] toueyiTeko Jesucristo”. ¿Kenke kiampa kiijtok? Ya kiixtonki: “Ichikaualis itonal toTeko tlen temaka yolistli yankuik tlen mochiua san se ika Cristo Jesús, ya nechtojtonki tlen ichikaualis tlajtlakoli uan mikistli” (Rom. 7:24, 25; 8:2). Tojuantij nojkia moneki tijpatiitasej pampa Jehová kejuak techmajkaualtijtok tlen tlajtlakoli uan mikilistli. Pampa techmakixtik, nama ueli tijtekipanouaj Jehová ika nochi toyolo uan kuali tiitstokej iixpa (Sal. 40:8).

8, 9. 1) ¿Tlake tetlajtolmakak Pedro? 2) ¿Tlake tikixnamikij ipan ni tonali?

⁸ Amo san moneki tijtlaskamatilisej toTeotsij, nojkia moneki timonejnemiltisej kej kinamiki, kiampa tijnextisej tijpatiitaj tiitstosej timajkajtokej. Apóstol Pedro kiijtok amo kema ma timoiljuikaj uelis tijchiuasej tlen techyoltilana san pampa tiitstokej timajkajtokej (xijpoua 1 Pedro 2:16). Ni kichiua ma tikilnamikikaj tlen israeleuanij kinpanok ipan uaktok tlali. Uan ipan ni tonali nelia tlauel moneki tijchiuasej tlen tetlajtolmaka ni texto. Satanás uan nochi katli kinnauatia kinekij techyoltilanasej ika yoyomitl, tlakualistli uan tlaili, tlen ika timoyolpakiltisej uan sekinok tlamantli. Uan pampa kinekij ma tijkouakaj se tlenijki maske amo moneki, kintlapejpeniaj maseualmej katli yejyektsitsij pampa kinekij techyoltilanasej. Tlaj amo timomokuitlauiaj, uelis tijchiuasej tlen amo kinamiki.

⁹ Tlen Pedro tetlajtolmakak nojkia techpaleuia ipan sekinok tlamantli tlen tlauel ipati, kej toteki uan tlake timomachtisej. Miakej telpokamej kintetsopaj tlauel ma momachtikaj uan kiampa uelis kalakisej ipan se kuali universidad. Kinekij ma moiljuikaj tlaj tlauel momachtisej kinpaleuis ma kipiakaj se kuali tekitl uan kitlanisej miak tomij. Uan kinnextiliaj keski kitlanij katli momachtijkej ipan se universidad uan katli amo. Nochi ni uelis kinyoltilanas telpokamej, katli moneki kitlapejpenisej tlake kichiuasej ipan ininnemilis. ¿Tlake moneki kiilnamikisej inijuantij uan inintatauaj?

10. ¿Tlake moneki tikilnamikisej kema tijtlapejpenisej tlake tijchiuasej?

¹⁰ Sekij moiljuiaj, tlaj inintlalnamikilis amo kinyolkokoua, uelis kitlapejpenisej tlen inijuantij kinekisej, pampa kiijtouaj sejse maseuali iselti moneki kitlapejpenis tlake kichiuas. Uelis moiljuiaj tlen Pablo kiniljuik tlen tlakualistli katli itstoyaj ipan Corinto: “¿[Kenke] seyok tlakatl kiijtos axnijchiua tlen kuali uan moyolkokos kema nijchiua se [tlenijki?]” (1 Cor. 10:29). Maske toselti moneki tijtlapejpenisej tlake timomachtisej o ipan tlake titekitisej, moneki tikilnamikisej maske timajkajtokej, amo uelis tijchiuasej nochi tlamantli. Uan nojkia moneki tijmajtosej ika tlen tijtlapejpenisej tijchiuasej, uelis techpanos tlen kuali o tlen amo kuali. Yeka Pablo kiijtok: “Niyon se tlanauatili axtechtsakuilia [...], pero sekij tlamantli axtechpaleuia ma tijneltokilikaj toTeko” (1 Cor. 10:23). Ni techpaleuia ma tijmatikaj amo tlauel ipati tlen tojuantij tijnekij tijchiuasej o techpaktia kema tijtlapejpenisej se tlenijki.

11. ¿Kenke toTeotsij techmajkaualtijtok?

¹¹ Kema Pedro kiijtok moneki timonejnemiltisej kej kinamiki, nojkia kiijtok pampa timajkajtokej, ueliskia tijtlapejpenisej “[tij]tekipanosej toTeko”. Jehová techmajkaualtik tlen tlajtlakoli uan mikilistli pampa kineki ma timosentlalikaj tijtekipanosej ipan nochi tonemilis.

12. ¿Tlake techmachtia tlen kichijkej Noé uan ichampoyouaj?

¹² Tlaj tijnekij tijnextisej nelia tijpatiitaj tiitstosej timajkajtokej uan ayokmo tijnekij sampa tijchiuasej tlen techyoltilana o san tlen tojuantij tijnekij, uajka moneki timosentlalisej tlauel tijtekipanojtosej Jehová (Gál. 5:16). Ma tikinilnamikikaj Noé uan ichampoyouaj. Maske miakej tlauel momekatiyayaj uan mosisiniyayaj, inijuantij amo kichijkej tlen kinyoltilanayaya yon tlen maseualmej kichiuayayaj. ¿Tlake kinpaleuik? Mosentlalijkej kichiuasej nochi tlen Jehová kinnauatijtoya: kichijchiuasej se ueyi akali, kisentilisej tlakualistli tlen kitekiuiskiaj inijuantij uan tlapialmej, uan kiniljuisej maseualmej kintsontlamiltiskiaj katli amo kualmej. Biblia kiijtoua: “Noé kichijki nochi keja toTeko Dios kiiljuijtoya” (Gén. 6:22). Pampa kiampa kichijkej, Noé uan ichampoyouaj momakixtijkej (Heb. 11:7).

13. ¿Tlake technauatijtokej ma tijchiuakaj?

¹³ ¿Tlake technauatijtok Jehová ipan ni tonali? Ya technauatijtok ma titlajtolmoyauakaj (xijpoua Lucas 4:18, 19). Ipan ni tonali, Satanás kinixtsaktok tlauel miakej maseualmej, uan kejuak kinilpijtok ika religiones tlen amo melauak, ika tomij uan ika nochi tlen kipiaj (2 Cor. 4:4). Tojuantij uelis tijchiuasej kej Jesús uan tikinpaleuisej ma kiixmatikaj uan ma kitekipanokaj Jehová, toTeotsij katli temajkaualtia (Mat. 28:19, 20, TNM). Ni tekitl ouij tijchiuasej, pampa tikixnamikisej miak tlaouijkayotl. Ipan se keski altepemej, maseualmej amo kinekij techtlakakilisej uan kinekij techchiuilisej  tlen amo kuali. Yeka, nochi kinamiki timotlajtlanisej: “¿Uelis nojua tlauel nitlapaleuis ipan tlajtolmoyaualistli?”.

14, 15. ¿Tlake mosentlalijtokej kichiuasej miakej Jehová itekipanojkauaj? (Xikita nopa achtoui tlaixkopinkayotl).

¹⁴ Tlauel tiyolpakij pampa tikitaj kenijkatsa miakej Jehová itlajtoltemakauaj kikauaj miak tlamantli pampa kinekij mosentlalisej senkistok tlatekipanosej. Kiampa kichiuaj pampa kikuamachiliaj nechka asis itlamia nochi (1 Cor. 9:19, 23). Sekij nojua tlatekipanouaj ipan inintlanechikol, uan sekinok yauij kampa monekij tlajtolmoyauanij. Ipan makuili xiuitl tlen panotok, kipano 250,000 toikniuaj nojkia kinejkej senkistok tlatekipanosej. Yeka, ipan ni tonali itstokej kipano se millón cien mil toikniuaj katli tlatekipanouaj kej precursores regulares. ¡Inijuantij kinextiaj nelia tlauel kipatiitaj itstosej majkajtokej! (Sal. 110:3).

¹⁵ ¿Tlake kinpaleuijtok nopa toikniuaj kiampa ma kichiuakaj? Ma tikitakaj tlen kinpaleuik John uan Judith. Ipan 30 xiuitl tlen panotok, tlatekipanojtokej ipan miak uejueyi altepemej. Ipan 1977, kema pejki nopa escuela Kampa kinmachtiaj precursores, kiniljuiyayaj toikniuaj ma yakaj kampa monekiyayaj tlajtolmoyauanij. John kiijtoua miakpa kipatlak iteki, uan kiampa ueliskia kichiuas tlen mosentlalijtoya. Teipa yajkej ipan seyok ueyi altepetl. Nopaya kiitakej kenijkatsa pampa momaijtouayayaj uan motemachiyayaj ipan Jehová, kinpaleuik ma kiixnamikikaj tlaouijkayotl, kej kiyekosej se yankuik tlajtoli o momatisej itstosej kej katli nopaya itstoyaj o kampa tlauel tlatotonia o tlaseseya. ¿Tlake moiljuiaj inijuantij tlen nochi nopa xiuitl tlen tlatekipanojtokej? John kiijtoua: “Nitlatekipanojtok ipan se tekitl tlen tlauel kuali. Nijmati Jehová nelia itstok, sanse kej se tetata katli tlauel teiknelia. Nama kena kuali nijkuamachilia tlen kiijtoua Santiago 4:8: ‘Ximonechkauikaj kampa toTeko uan yajaya inmechnechkauis’. Nijmajtoya nijpantik tlen tlauel nijnekiyaya: niitstos ika pakilistli uan kuali nijyolmatis ika tlen nijchiuas”.

16. ¿Kenijkatsa miakej kinextijtokej kipatiitaj itstosej majkajtokej?

¹⁶ Maske sekij amo uelij miak xiuitl senkistok tlatekipanouaj, kena tlapaleuiaj kema mochijchiua kali kampa timosentiliaj. Kema kichijchijkej nopa yankuik Kali Betel ipan Warwick (Nueva York), se 27,000 toikniuaj tlapaleuijkej. Sekij tlapaleuijkej ome semanas, sekinok se keski metstli, uan sekij kipano se xiuitl. Miakej kikajkej tlen kichiuayayaj, pampa kinejkej tlapaleuisej. Nochi inijuantij technextilijkej kenijkatsa uelis tijnextisej tijpatiitaj tiitstosej timajkajtokej uan tijueyichiuasej Jehová.

17. ¿Tlake tlateochiualistli kiselisej katli kipatiitaj itstosej majkajtokej?

¹⁷ Tlauel tijtlaskamatiliaj Jehová pampa techkajki ma tikixmatikaj, uan nojkia pampa techkaua ma tijtekipanokaj. Ika tlen tijtlapejpeniaj tijchiuasej, nochipa ma tijnextikaj tijpatiitaj tiitstosej timajkajtokej. Amo tijnekij san kej ueli timonejnemiltisej, tijnekij nochipa kuali tijtekipanojtosej toTeotsij. Tlaj kiampa tijchiuasej, uelis timotemachisej nelia tijselisej nopa tlateochiualistli tlen ya kitenkajtok: “Nochi tlen onka kichiaj, uan tlauel kinekij ma asi nopa tonali kema inijuantij nojkia itstosej keja tojuantij tlen tiikoneuaj toTeko. Uan nochi tiitstosej timalakantokej tlen nopa tlatelchiuali, uan nochi elis tlauel yejyektsi” (Rom. 8:21).