1. Kej kiijtoua Efesios 6:10-13, ¿kenijkatsa Jehová kinextia techiknelia uan kitekipachoua tlen techpano?

JEHOVÁ kinextia techiknelia uan kitekipachoua tlen techpano, yeka techpaleuia ma tikintlanikaj tokualankaitakauaj. Uan katli tlauel kinekij techteuisej elij Satanás uan iajakauaj. Jehová techiljuia kenijkatsa elij uan techmaka tlen moneki tlen ika uelis tikinteuisej (xijpoua Efesios 6:10-13). Tlaj tijkauaj ma techpaleui uan timotemachiaj ipan ya ika nochi toyolo, uelis tijtlanisej Diablo. Uelis timotemachisej kej apóstol Pablo, katli kiijtok: “ToTeko itstok nechka tojuantij para techpaleuis, uan yeka axaka uelis touaya motlalis” (Rom. 8:31).

2. ¿Tlake tikitasej ipan ni tlamachtili?

² Katli tijtokiliaj Cristo amo tijnekij tijmatisej miak tlamantli tlen Satanás uan iajakauaj. Tojuantij san timosentlaliaj tijyekosej tlen Jehová uan tijtekipanosej (Sal. 25:5). Maske amo tijnekij tikixmatisej, kena moneki tijmatisej tlake kichiua uan kiampa amo techkajkayauas (2 Cor. 2:11). Ipan ni tlamachtili tikitasej ika tlake tlamantli Satanás uan iajakauaj kinkajkayauaj maseualmej. Uan nojkia tikitasej tlake uelis tijchiuasej uan kiampa titlatlanisej.

3, 4. 1) ¿Tlake kiijtouaj tetlajchiuianij? 2) ¿Momiakilijtok tlen kichiuaj tetlajchiuianij?

³ Satanás uan iajakauaj tlauel kitekiuiaj se tlamantli tlen ika kinkajkayauaj maseualmej: tetlajchiuianij. Katli tetlajchiuiaj kiijtouaj inijuantij kiixmatij uan kichiuaj tlen sekinok amo kiixmatij yon uelij kichiuaj. Sekij kiijtouaj uelis kimatisej tlake  panos teipa pampa tlamatij o kitekiuiaj astrología. Sekinok tlachiuaj kejuak kamanaltij ininuaya mijkatsitsij. Uan sekij kitekiuiaj magia uan kintlajchiuiaj sekinok maseualmej. *

⁴ Ipan nochi Tlaltipaktli itstokej katli tetlajchiuiaj. Kema ipan 18 altepemej tlen Latinoamérica uan el Caribe kintlajtlanijkej se keski tlamantli, nechka nochi kiijtojkej kineltokayayaj magia uan kiijtojkej kena itstoyaj katli tetlajchiuiyayaj, uan uelis sanse imiaka maseualmej katli kiijtojkej kena ueliskia tikamanaltisej ininuaya mijkatsitsij. Uan ipan sekinok 18 altepemej tlen África, tlajko tlen nochi maseualmej katli kintlajtlanijkej kiijtojkej kena kineltokayayaj se akajya ueliskia kitlajchiuis seyok. Maske kampa ueli tiitstokej, moneki nochipa timomokuitlauisej, pampa Satanás kineki kinkajkayauas nochi maseualmej (Apoc. [Rev.] 12:9).

5. ¿Kenijkatsa kiita Jehová tlen kichiuaj tetlajchiuianij?

⁵ Jehová yaya ‘nopa Dios tlen temachtli’ o tlen kiijtoua katli melauak (Sal. 31:5). Yeka, tlauel kikualankaita tlen tetlajchiuianij kichiuaj uan nochi tlen amo kuali ajakamej kitekiuiaj. Ya kiniljuik israeleuanij: “Axkema xijtenkauakaj se inmokone para tlakajkaualistli, niyon amo xijchiuakaj se inmokone ma pano ipan tlitl. Axkema xiakaj ika se tlen tetonalita, o tlen teiljuia tlen onkas teipa, o tlen tlamati, niyon ika se tlen tetlajchiuia. Axkema xiakaj ika se tlen teuiuichiua, niyon tlen tekiti ika magia, niyon tlen kinnojnotsa ajakamej o tlen miktokej. ToTeko Dios tlauel kinkualankaita tlen kichiuaj nochi ni tlamantli, niyon axkineki kinitas” (Deut. 18:10-12). Maske nama ayokmo timoyakanaj ika tlen kiijtoua nopa Tlanauatili tlen Jehová kinmakak israeleuanij, tijmatij ya nojua tlauel amo kipaktia tlen kichiuaj tetlajchiuianij (Mal. 3:6).

6. 1) ¿Kenijkatsa Satanás kinchiuilia maseualmej tlen amo kuali? 2) Kej kiijtoua Eclesiastés 9:5, ¿tlake kinpano katli mikij?

⁶ Jehová techiljuia amo kuali ma tikitakaj tlen kichiuaj tetlajchiuianij pampa kimati Satanás kinchiuilia maseualmej tlen amo kuali ika nopa tlamantli, kej kema kinkajkayaua uan kiniljuia katli mijkej nojua yoltokej (xijpoua Eclesiastés 9:5). Nojkia kinmajmatia maseualmej ika nopa tlamantli uan kinuejkatlalia tlen toTeotsij. Satanás kineki maseualmej ma motemachikaj ipan amo kuali ajakamej uan amo ipan Jehová.

7. ¿Tlake techiljuijtok Jehová?

⁷ Kej tikijtojkej, Jehová techiljuia tlake kichiuaj Satanás uan iajakauaj uan kiampa amo techkajkayauasej. Ma tikitakaj se keski tlamantli tlen uelis tijchiuasej uan kiampa tikintlanisej.

8. 1) ¿Tlake techpaleuis ma tikintlanikaj amo kuali ajakamej? 2) ¿Tlake kiijtoua Salmo 146:4 ika katli ya mijkej?

⁸ Ma tijpouakaj Biblia uan ma timoyoliljuikaj ipan tlen tijpouaj. San ni tlamantli nelia tlauel techpaleuia amo ma tijneltokakaj nopa istlakatili tlen kimoyauaj amo kuali ajakamej. ToTeotsij iTlajtol eli kej se espada katli kuali tlatentili tlen kitsakuilia nopa istlakatili tlen Satanás kimoyaua (Efes. 6:17). Nopaya techiljuia katli miktokej amo uelij kinnojnotsaj  katli yoltokej (xijpoua Salmo 146:4). Uan nojkia techiljuia san Jehová kuali kimati tlen panos teipa (Is. 45:21; 46:10). Tlaj nochipa tijpouasej uan timoyoliljuisej ipan tlen tijpouaj, uajka amo tijneltokasej uan tijkualankaitasej nopa istlakatili tlen ajakamej kimoyauaj.

9. ¿Tlake tlamantli tlen tetlajchiuianij kichiuaj amo tijnekij tijchiuasej yon se kentsi?

⁹ Amo ma tijchiuakaj yon se tlamantli tlen tetlajchiuianij kichiuaj. Cristo itokilijkauaj amo tiauij tikinitaj tetlajchiuianij yon tijnekij tikamanaltisej ininuaya mijkatsitsij. Kej tikitakej ipan tlamachtili 16, amo tijchiuaj tlen sekinok momajtokej kichiuaj kema se akajya miki pampa moiljuiaj nojua itstokej kanajya. Yon amo tijnekij tijmatisej tlen panos teipa ika tlamatinij o astrología (Is. 8:19). Amo tijnekij tijchiuasej yon se tlen nopa tlamantli. Tijmatij uelis techpanos tlen amo kuali pampa technechkauis iuaya Satanás uan iajakauaj.

10, 11. 1) ¿Tlake kichijkej se keskij éfesoeuanij kema kimatkej tlen melauak? 2) Kej kiijtoua 1 Corintios 10:21, ¿kenke moneki tijchiuasej kej inijuantij, uan kenijkatsa uelis tijchiuasej?

¹⁰ Ma tijtlauisokaj o ma tijtlatikaj tlen ininaxka amo kuali ajakamej. Ipan achtoui siglo, miakej maseualmej tlen euayayaj Éfeso tlauel tetlajchiuiyayaj. Kema inijuantij kimatkej tlen melauak, nimantsi kichijkej se keski tlamantli. Biblia kiijtoua miakej “tetlajchiuianij [...] kiualikakej ininamatlapoual uan kitlatijkej iniixtla nochi tlakamej” (Hech. 19:19). Ni kinextia kichijkej kampeka kintlanisej amo kuali ajakamej. Maske nopa amochtli tlen kinpaleuiyaya ma kitekiuikaj magia tlauel patiyo eliyaya, inijuantij kitlatijkej nochi uan amo moiljuijkej tenemaktisej o kinamakasej. Kinekiyayaj kichiuasej tlen Jehová kipaktia uan amo mosentlalijkej keski ipati eliyaya nopa amochtli tlen kipixtoyaj.

¹¹ ¿Kenijkatsa uelis tijchiuasej kej inijuantij?  Tlaj tijpiaj se tlamantli tlen kitekiuiaj tetlajchiuianij, kej amuletos, talismanes o sekinok tlamantli tlen kitekiuiaj pampa kinekij momanauisej tlen amo kuali ajakamej, kualtiaskia ma tijtsontlamiltikaj (xijpoua 1 Corintios 10:21).

12. ¿Tlake kinamiki timotlajtlanisej?

¹² Kuali ma tikitakaj ika tlake timoyolpakiltiaj. Ma timotlajtlanikaj: “¿Nijpoua amochtli, amatlajkuiloli o tlamachtili ipan Internet kampa kamanalti tlen kichiuaj tetlajchiuianij uan amo kuali ajakamej? ¿Kamanalti tlen nopa tlamantli nopa uikatl tlen nijtlakakilia, tlen nijmauisoua ipan televisión uan ipan películas uan tlen ika nimauiltia? ¿Nimoyolpakiltia ika tlen kichiuaj amo kuali ajakamej o tetlajchiuianij? ¿Nesij vampiros, zombis o sekinok tlamantli tlen amo kuali ajakamej kichiuaj? ¿Nesi kejuak amo kenijki tlaj se akajya tetlajchiuia o kitekiuia magia?”. Maske moneki timomokuitlauisej, moneki tikilnamikisej amo nochi eli tlen tetlajchiuianij kichiuaj. Kema tikitasej nochi ni tlamantli, ma tijchiuakaj kampeka amo timoyolpakiltisej ika yon se tlamantli tlen toTeotsij amo kipaktia. Tijnekij nochipa tijpiasej kuali totlalnamikilis iixpa Jehová (Hech. 24:16). *

13. ¿Tlake amo tijnekij tijchiuasej?

¹³ Amo ma tikijtojtinemikaj tlen kichiuaj amo kuali ajakamej. Moneki tijchiuasej kej Jesús kichijki (1 Ped. 2:21). Kema itstoya iluikak, kimatki miak tlamantli tlen Satanás uan iajakauaj. Uan kema ualajki ipan Tlaltipaktli amo kiijtojtinenki tlen inijuantij. Ya kinekiyaya tematiltis tlen Jehová uan amo tlen  Satanás. Sanse kej Jesús, amo tikijtojtinemij tlen kichiuaj amo kuali ajakamej. Tojuantij tlauel tiyolpakij pampa toyolo uan totlalnamikilis “temitok ika tlajtoli tlen yejyektsitsij”, ni kiijtosneki tijmatij tlen melauak (Sal. 45:1).

14, 15. 1) ¿Kenke amo kinamiki tikinmakasisej amo kuali ajakamej? 2) ¿Kenijkatsa tijmatij Jehová kinmokuitlauia itekipanojkauaj ipan ni tonali?

¹⁴ Amo ma tikinmakasikaj amo kuali ajakamej. Ipan ni Tlaltipaktli nochi uelis techpanos tlen amo kuali. Kema amo timoiljuiaj tlaj panos, techpano tlen amo kuali, techasi se kokolistli o uelis timikisej. Kema panos ni, amo kinamiki timoiljuisej amo kuali ajakamej techchiuilijkej nopa. Biblia kiijtoua nochi uelis techpanos tlen amo kuali ipan tlen ueli tonali (Ecl. 9:11). Nojkia, Jehová kinextijtok san ya kipia miak chikaualistli uan amo ajakamej. Ni tijmatij pampa ya amo kikajki Satanás ma kimikti Job (Job 2:6). Uan kema Moisés itstoya ipan Egipto, kinnextilik nopa sacerdotes katli tetlajchiuiyayaj san ya kipixtoya miak chikaualistli (Éx. 8:18; 9:11). Uan miak xiuitl teipa, Jehová kimakak Jesús chikaualistli uan ya kinkixtik Satanás uan iajakauaj tlen iluikak uan kititlanki ipan Tlaltipaktli. Uan nechka kintsakuas kampa amo tleno uelis kinchiuilisej maseualmej (Apoc. 12:9; 20:2, 3).

¹⁵ Ipan ni tonali tijmatij Jehová nelia kuali kinmokuitlauia itekipanojkauaj. Ma timoiljuikaj ipan ni tlamantli: titlajtolmoyauaj uan titlamachtiaj ipan nochi Tlaltipaktli (Mat. 28:19, 20). Kiampa tikinmatiltiaj maseualmej nochi tlen amo kuali katli Diablo kichiua. Tlaj ueliskia, ya kichiuaskia ayokmo ma titlajtolmoyauakaj. Ya amo ueli kichiua nopa, yeka amo kinamiki tikinmakasisej amo kuali ajakamej. Tijmatij “toTeko kintlachilijtok nochi tlakamej kampa ueli ipan Tlaltipaktli para kinnextilis iueyi chikaualis inijuantij tlen motemachiaj ipan ya ika nochi ininyolo” (2 Crón. 16:9). Tlaj amo tijtlauelkauaj Jehová, amo kuali ajakamej amo kema uelis techchiuilisej se tlenijki tlen nochipa uejkauas.

16, 17. Xikijto kenijkatsa tlen kipanok se akajya kinextia moneki amo timajmauisej tlaj tijnekij tikintlanisej amo kuali ajakamej.

¹⁶ Moneki amo timajmauisej tlaj tijnekij tikintlanisej amo kuali ajakamej, uan tlauel  moneki tijnextisej ni kema tochampoyouaj o touampoyouaj techtetsopaj pampa kinekij ma tijchiuakaj se tlenijki tlen inijuantij momajtokej kichiuaj. Kema panos ni, moneki tikilnamikisej Jehová kinteochiua katli amo majmauij. Ma tikitakaj tlen kipanok se toikni katli itoka Erica, katli eua altepetl Ghana. Kipixtoya 21 xiuitl kema pejki momachtia ika Biblia. Itata eliyaya tetlajchiuijketl, yeka nochi moiljuiyayaj kikuaskia nakatl tlen itata kinmaktiliyaya teotsitsij, kej momajtoyaj kichiuaj tetlajchiuianij. Kema amo kinejki kikuas nopa nakatl, iuikaljuaj kiijtojkej amo kintlepanitayaya teotsitsij uan moiljuiyayaj kitlatsakuiltiskiaj ika miak kokolistli.

¹⁷ Maske kichiualtijkej nojkia ma kichiua tlen inijuantij momajtokej, ya amo kinejki, yeka monejki kisteuas ichaj. Se keskij toikniuaj kiselijkej uan mokajki ininuaya. Kiampa, Jehová kiteochijki uan nama kinpixki sekinok ichampoyouaj (Mar. 10:29, 30). Maske iuikaljuaj ayokmo kinejkej kiitasej uan kitlatilijkej se keski tlamantli tlen kipixtoya, ya amo kitlauelkajki toTeotsij, moatsonpoliuiltik uan nama tlatekipanoua kej precursora. Amo kinmakasi amo kuali ajakamej. Uan kiijtoua tlen ichampoyouaj: “Mojmostla nijtlajtlania toTeotsij ma kinpaleui nojkia ma kiixmatikaj uan ma kimatikaj kenijkatsa tlauel yolpakij katli kitekipanouaj”.

18. ¿Tlake tlateochiualistli tijselisej tlaj timotemachisej ipan Jehová?

¹⁸ Maske amo nochi tikixnamikisej se tlaouijkayotl kej nopa toikni tlen tikijtojkej, kena moneki tikinteuisej amo kuali ajakamej uan timotemachisej ipan Jehová. ¿Tlake panos tlaj kiampa tijchiuasej? Tijselisej miak tlateochiualistli. Se: Satanás amo kema uelis techkajkayauas. Ome: Amo kema tijtlauelkauasej Jehová pampa amo tikinmakasisej amo kuali ajakamej. Uan eyi: nojua tlauel kuali timouikasej iuaya Jehová. Santiago kiijkuilok: “Ximoketsakaj keja intemachmej iixpa Axkualtlakatl uan amo xijchiuakaj tlen kineki xijchiuakaj, uan yajaya inmechtlalkauis. Ximonechkauikaj kampa toTeko uan yajaya inmechnechkauis” (Sant. 4:7, 8).