1, 2. ¿Kenke Jesús tlauel mokuesouayaya?

KEMA nechka kimiktiskiaj, Jesús tlauel mokuesouayaya pampa kimatiyaya tlauel kitlaijiyouiltiskiaj ikualankaitakauaj kema kimiktiskiaj. Nojkia, tlauel mokuesouayaya pampa amo kinekiyaya kichiuas tlen toTeotsij amo kipaktia, pampa tlauel kiikneliyaya. Kimatiyaya tlaj amo kitlauelkauaskia toTeotsij maske tlauel tlaijiyouiskia, kiuejkapantlaliskia itoka. Nojkia, kinikneliyaya maseualmej uan kimatiyaya san ueliskia timotemachisej tiitstosej nochipa tlaj amo kitlauelkauaskia toTeotsij.

² Maske tlauel mokuesojtoya, Jesús kipixtoya tlaseuilistli. Ya kiniljuijtoya itokilijkauaj: “Niinmechkauilijteua tlaseuilistli ipan inmoyolo” (Juan 14:27). Jesús kipixtoya nopa tlaseuilistli tlen toTeotsij temaka, nopa kiijtosneki kuali kiyolmatiyaya pampa kuali mouampojchijtoya iuaya Jehová. Jesús kipixtoya nopa tlaseuilistli ipan iyolo uan ipan itlalnamikilis (Filip. 4:6, 7).

3. ¿Tlake tikitasej ipan ni tlamachtili?

³ Maske tojuantij amo monekis tikijiyouisej tlen Jesús kipanok, kena tijpiasej tlaouijkayotl pampa tielij itokilijkauaj (Mat. 16:24, 25; Juan 15:20). Uan kemantika, kej ya kipanok, uelis nojkia timokuesosej. ¿Tlake techpaleuis amo tlauel ma timokuesokaj uan ma tijpiakaj tlaseuilistli? Ipan ni tlamachtili tikitasej eyi tlamantli tlen Jesús kichijki kema tlajtolmoyajki uan kenijkatsa uelis tijchiuasej kej ya kema tijpiasej tlaouijkayotl.

4. Kej kiijtoua 1 Tesalonicenses 5:17, ¿kenijkatsa Jesús miakpa momaijtok kema nechka kimiktiskiaj?

⁴ (Xijpoua 1 Tesalonicenses 5:17). Ipan nopa tonali kema mijki, Jesús miakpa momaijtok. Kema kinmachtik itokilijkauaj kenijkatsa kinamikiyaya kiilnamikisej imikilis, achtoui kichijki se tlamaijtoli uan teipa kipanolti nopa pantsi, teipa sampa momaijtok kema kipanoltik xokomekaatl (1 Cor. 11:23-25). Nojkia, momaijtok ininuaya itokilijkauaj kema kistejkej ipan nopa kali kampa kichijkej nopa Pascua (Juan 17:1-26). Kema asitoj ipan tepetl Olivos, Jesús miakpa momaijtok (Mat. 26:36-39, 42, 44). Uan nopa tlajtoli tlen kiijtok kema nechka mikiskia eli se tlamaijtoli tlen kichiuilik iTata (Luc. 23:46). Kej ya tikitakej, kema nechka kimiktiskiaj, Jesús nochipa momaijtok pampa kinekiyaya iTata ma kipaleui.

5. ¿Kenke Jesús itokilijkauaj majmajkej?

⁵ Jesús kiijiyouik nochi tlen kipanok pampa nochipa momaijtok. Itokilijkauaj amo kiampa kichijkej, yeka amo kiijiyouijkej tlen kiixnamijkej (Mat. 26:40, 41, 43, 45, 56). Ni tlamantli techmachtia tlaj nochipa timomaijtosej kej Jesús kichijki nojkia amo tijtlauelkauasej Jehová. Uan, ¿tlake moneki titlajtlanisej kema timomaijtosej?

6. ¿Kenke tlaj kuali titlaneltokaj techpaleuis ma tijpiakaj tlaseuilistli?

⁶ Uelis tikiljuisej Jehová ma techpaleui kuali titlaneltokasej (Luc. 17:5; Juan 14:1). Moneki kuali titlaneltokasej pampa Satanás kineki kinyejyekos nochi itokilijkauaj Jesús (Luc. 22:31). Tlaj kuali titlaneltokasej, techpaleuis ma tijpiakaj tlaseuilistli maske tikixnamikisej miak kuesoli. ¿Kenke kiampa tikijtouaj? Pampa kema ayokmo tiuelij tijsenkauaj se kuesoli,  tijkauiliaj imako Jehová uan kiampa tijnextiaj kuali titlaneltokaj. Timotemachiaj Jehová kuali kimati kenijkatsa kisenkauas nopa kuesoli, uan kema tijchiuaj nopa, techpaleuia ma tijpiakaj tlaseuilistli ipan totlalnamikilis uan ipan toyolo (1 Ped. 5:6, 7).

7. ¿Tlake techmachtia tlen kipanok Robert?

⁷ Tlamaijtoli techpaleuis tijpiasej tlaseuilistli maske tikixnamikisej miak tlaouijkayotl. Ma tikitakaj tlen kipanok Robert, se ueuejtlakatl tlen kipia kipano 80 xiuitl. Ya kiijtoua tlake kipaleuia kipias tlaseuilistli: “Ipan nochi xiuitl tlen panotok, tlen kiijtoua Filipenses 4:6, 7 nechpaleuijtok nikixnamikis miak tlaouijkayotl. Kemantika amo nijpiayaya tomij uan nojkia ayokmo nielki ni ueuejtlakatl”. Robert kiijtoua: “Nimomaijtoua kema peua nimokuesoua. Nikita kema tlauel nimomaijtoua uan nikiljuia Jehová tlen nijyolmati, nechpaleuia nojua ma nijpia tlaseuilistli”.

8. Kej kiijtoua Juan 8:29, ¿kenke Jesús kipixki tlaseuilistli?

⁸ (Xijpoua Juan 8:29). Maske kitlaijiyouiltijkej, Jesús kipixki tlaseuilistli pampa kimatiyaya kiyolpakiltiyaya Jehová. Jesús nochipa kineltokak iTata maske tlauel ouij tlen kipanok. Nojkia, tlauel kiikneliyaya Jehová, yeka ipan nochi inemilis mosentlalik kitekipanos. Kema ayamo ualayaya ipan Tlaltipaktli, Jesús kipaleuik iTata kema kichijchijki nochi tlen onka uan elki “se kuali tekitiketl” (Prov. 8:30, TNM). Uan kema ualajki ipan Tlaltipaktli, tlamachtik ika miak pakilistli tlen melauak tlen toTeotsij (Mat. 6:9; Juan 5:17). Tlajtolmoyaualistli kichijki tlauel ma yolpaki (Juan 4:34-36).

9. ¿Kenijkatsa kema timosentlaliaj titlajtolmoyauasej techpaleuia ma tijpiakaj tlaseuilistli?

 ⁹ Tijneltokaj Jehová sanse kej Jesús kichijki kema nochipa tijchiuaj “nochi nopa tekitl” tlen toTeotsij techmakatok (1 Cor. 15:58). Cristo itokilijka katli mosentlalijtok tlajtolmoyauas amo mosentlalia ipan ikuesoljuaj (Hech. 18:5). Kiampa pano pampa maseualmej katli tikinpantiaj ipan tlajtolmoyaualistli kipiaj miak kuesoli ipan ininnemilis. Uan kema peuaj kiikneliaj Jehová uan kichiuaj tlen kiyekouaj, mopatla ininnemilis uan tlauel yolpakij. Kema tikitaj nopa, timotemachiaj Jehová techmokuitlauis, uan nopa tlamantli techpaleuia ma tijpiakaj tlaseuilistli. Kiampa kiitstok se tosiuaikni katli nochipa kichijtok kampeka amo mokuesos miak tonali uan amo moiljuis amo tleno ipati yon san tlapik nochi tlen kichiua. Ya kiijtoua: “Kema tlauel nitlajtolmoyaua nechpaleuia kuali ma nijyolmati uan ma niyolpaki. Nimoiljuia kiampa nijyolmati pampa nijmati niitstok Jehová inechka”.

10. ¿Tlake tijyekouaj tlen kiijtoua Brenda?

¹⁰ Ma timoiljuikaj tlen kipano se tosiuaikni katli itoka Brenda. Ya uan iichpoka kipiaj se kokolistli tlen itoka esclerosis múltiple. Brenda nemi ika se silla de ruedas uan amo ueli kichiua miak tlamantli. Ya kiijkuiloua amatlajkuiloli pampa kiampa tlajtolmoyaua, uan san kema ueli yaui tlajtolmoyaua kajkalpa. Brenda kiijtoua: “Kema nijkuamachilik ipan ni tonali amo nimochikauaskia, nechpaleuik san ma nimosentlali ipan tlajtolmoyaualistli. Kema nitlajtolmoyaua, nikilkaua nokuesoljuaj pampa nimoiljuia kenijkatsa nikinpaleuis maseualmej katli nikinpantia kampa titlajtolmoyauaj. Tlajtolmoyaualistli nojkia nechpaleuia nochipa ma nikilnamikto teipa nimochikauas”.

11-13. 1) ¿Kenijkatsa apóstoles uan sekinok itokilijkauaj kinextijkej nelia eliyayaj Jesús iuampoyouaj? 2) ¿Kenijkatsa Jesús itokilijkauaj kinextijkej nelia eliyayaj iuampoyouaj?

¹¹ Kema Jesús tlajtolmoyajki, kipanok miak tlamantli tlen ouij. Itokilijkauaj kinextijkej nelia eliyayaj iuampoyouaj, kej kiijtoua Proverbios 18:24: “Itstokej touampoyouaj tlen más techikneliaj que toikniuaj”. Jesús tlauel kinikneliyaya. Ma tikilnamikikaj ipan nopa tonali yon se tlen Jesús iikniuaj tlaneltokayaya ipan ya (Juan 7:3-5). Uan se tonali, iuikaljuaj kiiljuijkej “molokojchijto[ya]” (Mar. 3:21). Itokilijkauaj amo kiampa kichijkej. Kema nechka mikiskia, Jesús kiniljuik: “Inmojuantij [...] inmokajtokej nouaya kema nipanotok tlaouijkayotl” (Luc. 22:28).

¹² Maske kemantika itokilijkauaj amo kichijkej kej kiniljuik uan mokuapolojkej, Jesús amo san ya nopa kiitayaya, ya nochipa kiitak kenijkatsa inijuantij tlauel kuali tlaneltokayayaj ipan ya (Mat. 26:40; Mar. 10:13, 14; Juan 6:66-69). Ipan nopa youali kema nechka kimiktiskiaj, Jesús kiniljuik itokilijkauaj katli amo kitlauelkajtoyaj: “Niinmechnotsas innouampoyouaj, pampa nochi tlen noTata nechiljuijtok nojkia niinmechiljuijtok” (Juan 15:15). Kej tikitaj, iuampoyouaj tlauel kiyolchikajkej pampa kipaleuijkej ipan tlajtolmoyaualistli, uan nopa kichijki tlauel ma yolpaki (Luc. 10:17, 21).

¹³ Amo san itokilijkauaj eliyayaj iuampoyouaj, Jesús nojkia kinpixki sekinok iuampoyouaj katli kipaleuijkej ipan tlajtolmoyaualistli uan ipan sekinok tlamantli. Sekij kitlanejkej ma tlakuati ininchaj (Luc. 10:38-42; Juan 12:1, 2). Uan sekij yajkej tlajtolmoyauaj iuaya uan “kimakayayaj inintomij para kipaleuisej [...] ika tlen monekiyaya” (Luc. 8:3).  ¿Kenke Jesús kipixki kuali iuampoyouaj? Pampa ya kinextik eliyaya kuali ininuampo. Nochipa kinpaleuik uan amo kinchiualtik ma kichiuakaj tlen amo yajatiyayaj. Maske ya amo tlajtlakole eliyaya uan inijuantij kena, nochipa kintlaskamatilik pampa kipaleuijkej. Itokilijkauaj nelia kipaleuijkej ma kipia tlaseuilistli.

14, 15. 1) ¿Kenijkatsa uelis tikinpiasej kuali touampoyouaj? 2) ¿Kenijkatsa uelis techpaleuisej?

¹⁴ Katli elij kuali touampoyouaj techpaleuiaj amo ma tijtlauelkauakaj Jehová. Uan tlaj tijnekij tikinpiasej touampoyouaj, moneki tojuantij tielisej kuali ininuampoyouaj sekinok (Mat. 7:12). Biblia kiijtoua ma tijchiuakaj kampeka tikinpaleuisej sekinok, uan nojua tlauel moneki tikinpaleuisej katli teikneltsitsij (Efes. 4:28). Ma timoiljuikaj ipan toikniuaj tlen tlanechikoli katli uelis tikinpaleuisej. ¿Itstok se toikni katli amo ueli kisa ichaj pampa ya ueyi o mokokoua? Uelis tiasej titlakouitij. Nojkia, tlaj se toikni ika ichampoyouaj amo kipiaj tlen ika mopanoltisej, uelis tikinmakasej tlakualistli. ¿Tijmatij kenijkatsa kuali tijtekiuisej jw.org^® uan aplicación JW Library^®? Tlaj kena, uelis tikinpaleuisej se keskij toikniuaj tlen totlanechikol nojkia kuali ma kitekiuikaj. Tlaj timosentlalisej tikinpaleuisej sekinok, techpaleuis ma tiyolpakikaj (Hech. 20:35).

¹⁵ Touampoyouaj techpaleuisej kema tijpiasej tlaouijkayotl uan nojkia techpaleuisej ma tijpiakaj tlaseuilistli. Sanse kej Eliú kuali kitlakakilik Job kema kiiljuik tlen kitekipachouayaya, touampoyouaj nojkia kuali techtlakakilisej uan kipiasej ininyolo kema tikiniljuisej  tlen techtekipachoua (Job 32:4). Maske amo moneki tijchiasej ma techiljuikaj tlake tijchiuasej, tlauel techpaleuis tlaj tikintlakakilisej kema techtlajtolmakasej ika tlen Biblia kiijtoua (Prov. 15:22). Uan kema tijpiasej tlaouijkayotl, ma tijchiuakaj kej tlanauatijketl David, katli amo moueyimatki uan kikajki ma kipaleuikaj iuampoyouaj (2 Sam. 17:27-29). Kema tikinpiaj kuali touampoyouaj, tikitaj kej se nemaktli tlen Jehová techmakatok (Sant. 1:17).

16. Kej kiijtoua Filipenses 4:6, 7, xikixtoma tlake techpaleuis ma tijpiakaj tlaseuilistli.

¹⁶ (Xijpoua Filipenses 4:6, 7). ¿Kenke Jehová techiljuia san uelis tijpiasej tlaseuilistli “ipan Cristo”? Pampa tlaj nochipa tijnekij tijpiasej tlaseuilistli ipan totlalnamikilis uan ipan toyolo, moneki tijkuamachilisej kenijkatsa ika tlen Jesús kichijki uelis moaxitis tlen Jehová mosentlalijtok kichiuas uan ma titlaneltokakaj ipan Jesús. Tlauel timoyolchikauaj kema tijmatij Jehová uelis techtlapojpoljuis totlajtlakoljuaj pampa Jesús motemaktilik (1 Juan 2:12). Uan tijmatij Jesús tekichiuas ipan toTeotsij iTlanauatijkayo uan kikualtlalis nochi tlen Satanás uan maseualmej techchiuilijtokej, uan nopa tlauel techyolchikaua (Is. 65:17; 1 Juan 3:8; Apoc. [Rev.] 21:3, 4). Nojkia, pampa tijmatij Jesús techpaleuia ipan nopa tekitl tlen techmakatok, kichiua amo ma timajmauikaj (Mat. 28:19, 20). Kej ya tikitakej, tlaj tijnekij tijpiasej tlaseuilistli, moneki ma timoyolchikauakaj, amo ma timajmauikaj uan ma timoiljuikaj ipan tlen tijchiaj.

17. 1) ¿Kenijkatsa uelis tijpiasej tlaseuilistli? 2) Kej kiijtoua Juan 16:33, ¿tlake uelis tijchiuasej?

¹⁷ ¿Tlake techpaleuis ma tijpiakaj tlaseuilistli kema tijpiasej miak kuesoli? Moneki tijchiuasej kej Jesús kichijki. Se: nochipa ma timomaijtokaj. Ome: ma tijchiuakaj tlen Jehová technauatia uan ma titlajtolmoyauakaj ika pakilistli maske tijpiasej miak tlaouijkayotl. Uan eyi: ma tijkauakaj ma techpaleuikaj touampoyouaj. Tlaj kiampa tijchiuasej, toTeotsij techpaleuis ma tijpiakaj tlaseuilistli ipan totlalnamikilis uan ipan toyolo. Uan kej Jesús kichijki, tojuantij nojkia uelis tikixnamikisej tlen ueli tlaouijkayotl (xijpoua Juan 16:33).