1. ¿Tlake tijnekij tijchiuasej toTeotsij itekipanojkauaj, uan kenke? (Xikita tlaixkopinkayotl ipan ipantsajka).

JESUCRISTO kinnauatik itokilijkauaj: “Xiakaj ipan nochi tlaltinij uan xikinmachtikaj tlakamej ma elikaj nomomachtijkauaj” (Mat. 28:19). Nochi katli tijtekipanouaj toTeotsij ika nochi toyolo, tijnekij tijchiuasej nopa tekitl tlen techmakatok (2 Tim. 4:5). San nopa tekitl nelia tlauel ipati uan tlen tlauel moneki nimantsi tijchiuasej. Maske tijmatij nopa, kemantika uelis amo tiuelij tijchiuaj nochi kej tojuantij tijnekiskiaj.

2. ¿Tlake tlamantli kichiua ma tijmatikaj ouij titlajtolmoyauasej?

² Onka sekinok tekitl tlen tlauel ipati kampa tijtekiuiaj miak tonali uan tochikaualis. Uelis moneki titekitisej miak horas uan kiampa tijpiasej tlen ika tikinmokuitlauisej tochampoyouaj. O uelis moneki tijmokuitlauisej se tlen tochampoyouaj, timokokouaj, timokuesouaj miak tonali o ya tiueuentsitsij. ¿Kenijkatsa uelis tikixnamikisej ni tlaouijkayotl uan nojkia titlajtolmoyajtosej?

3. ¿Tlake kinextia tlen Jesús kiijtok ipan Mateo 13:23?

³ Amo kinamiki timokuesosej tlaj se keski tlamantli tlen tikixnamikij kichiua amo ma tijtekipanokaj Jehová kej tojuantij tijnekiskiaj. Jesús kimajtoya amo nochi tiueliskiaj tijchiuasej sanse tlamantli kej sekinok (xijpoua Mateo 13:23). Tlaj tijchiuasej kampeka kuali tijtekipanosej Jehová, ya tlauel kipatiitas nochi tlen tijchiuasej (Heb. 6:10-12). Nojkia, uelis timoiljuisej kena uelis tijchiuasej sekinok tlamantli kema tijtekipanosej Jehová. Ipan ni tlamachtili tikitasej tlake uelis tijchiuasej uan kiampa tikachtouitlalisej ipan tonemilis nopa tekitl, tiyolpakisej san ika tlen tijpiaj uan kuali titlajtolmoyauasej  uan titlamachtisej. Achtoui ma tikixtomakaj tlake kiijtosneki senkistok tijchijtosej nopa tekitl tlen toTeotsij techmakatok.

4. ¿Tlake kiijtosneki senkistok tijchiuasej nopa tekitl tlen techmakatokej?

⁴ Senkistok tijchiuasej nopa tekitl kiijtosneki nochipa tijchijtosej kampeka titlajtolmoyauasej uan titlamachtisej. Maske tijchiuaj nopa, Jehová amo san kipatiita keski horas titlatekipanojkej, ya kitlachilia kenke tijchiuaj. Tlaj nelia tikikneliaj toTeotsij uan tikinikneliaj maseualmej, uajka ika nochi toyolo tijchiuasej kampeka titlajtolmoyauasej uan titlamachtisej * (Mar. 12:30, 31; Col. 3:23). Nopa kiijtosneki tijchiuasej nochi tlen tiyajatisej. Tlaj tikitaj kej se tlateochiualistli titlajtolmoyauasej, uajka tijchiuasej kampeka tikinmatiltisej miakej maseualmej nopa kuali tlamachtili.

5, 6. Ika se neskayotl xikixtoma kenijkatsa se akajya kinextia kiachtouitlalia tlajtolmoyaualistli.

⁵ Ma timoiljuikaj se telpokatl tlauel kipaktia kitsotsonas guitarra, uan kema ueli, nochipa tlatsotsona. Teipa kitekimakaj kampa tlakualnamakaj uan kiiljuiaj sábado uan domingo ma tlatsotsona. Tlen kitlani amo kiaxilia, yeka ipan semana nojkia tekiti kampa tlanamakaj. Maske miak tonali san tlanamakatok, ya tlauel kipaktia tlatsotsonas. Kineki nojua kiyekos kuali tlatsotsonas uan teipa san ya nopa kichiuas. Yeka, nochipa kema ueli, tlatsotsona maske san se kentsi.

⁶ Sanse kej nopa telpokatl, uelis tojuantij nojkia amo tiuelij miak titlajtolmoyauaj maske tijnekiskiaj san ya nopa tijchiuasej, pampa san ya nopa tlauel techpaktia tijchiuasej. Tijchiuaj kampeka nojua kuali titlajtolmoyauasej o titlamachtisej uan kiampa asis ipan ininyolo maseualmej nopa kuali tlamachtili. Uan pampa tlauel timotekiuijtokej, uelis timoiljuiaj kenijkatsa uelis tikachtouitlalisej tlajtolmoyaualistli.

7, 8. ¿Kenijkatsa uelis tikitasej tlajtolmoyaualistli sanse kej Jesús kiitayaya?

⁷ Jesús tlauel kipatiitayaya tlamachtis tlen toTeotsij iTlanauatijkayo. Uan tlen kichijki techpaleuia nojkia ma tijchiuakaj kej ya (Juan 4:34, 35). Tlauel uejka yajki pampa kinekiyaya maseualmej ma kimatikaj nopa kuali tlamachtili. Tlajtolmoyajki kajkalpa uan kampa nemiyayaj miakej. Tlauel kipatiitayaya tlajtolmoyauas.

⁸ Tijnekij tijchiuasej kej Jesús uan yeka kampa ueli uan kema tiuelij tijtemoliaj kenijkatsa tikinkamanaljuisej sekinok tlen toTeotsij iTlanauatijkayo. Tijkauaj tlen techpaktia pampa tijnekij senkistok tijchiuasej nopa tekitl (Mar. 6:31-34; 1 Ped. 2:21). Sekij toikniuaj tlatekipanouaj kej precursores especiales, precursores regulares o auxiliares. Uan sekinok kiyekojtokej seyok tlajtoli uan yajtokej kampa monekij tlajtolmoyauanij. Uan tlauel miakej tlajtolmoyauanij nojkia tlatekipanouaj, kichiuaj kampeka tlajtolmoyauasej uan tlamachtisej. Tlaj tijchiuaj se tlen ni tlamantli, Jehová amo kema techtlajtlanis ma tijchiuakaj se tlamantli tlen amo tiuelisej. Ya kineki ma techpakti tijmoyauasej “nopa kuali tlajtoli tlen onpano yejyektsi” katli techmakatok Jehová, toTeotsij katli tlauel yolpaktok (1 Tim. 1:11; Deut. 30:11).

9. 1) ¿Kenijkatsa Pablo kiachtouitlalik tlajtolmoyaualistli maske monekiyaya tekitis? 2) Kej kiijtoua Hechos 28:16, 30, 31, ¿kenijkatsa kiitayaya Pablo tlajtolmoyaualistli?

⁹ Apóstol Pablo nojkia tlauel kipatiitayaya tlajtolmoyauas. Ipan altepetl Corinto, kema ika ompa yajtoya tlajtolmoyaua, pejki kichijchiua yoyonkali pampa amo kipixtoya tomij. Maske monejki tekitis, ya amo mosentlalik san ipan nopa tlamantli. Tekitik pampa monekiyaya kipias tlen ika mopanoltis uan nojua tlajtolmoyauas, kiampa toikniuaj amo monekiskia kimakasej tlen ika mopanoltis (2 Cor. 11:7). Maske monekiyaya tekitis, Pablo mosentlalik tlauel tlajtolmoyauas, uan sejse sábado kiampa kichiuayaya. Kema mopatlak inemilis, nojua tlauel “tepouilik itlajtol toTeko mojmostla. Kiniljuiyaya israelitajmej ika chikaualistli para Jesús nelia itstoya nopa Cristo tlen toTeko kititlanki” (Hech. 18:3-5; 2 Cor. 11:9). Teipa, kema itstoya Roma pampa ome xiuitl kitsaktoyaj ipan ichaj, ya kiniljuiyaya tlen toTeotsij iTlajtol maseualmej katli yauiyayaj kipaxalouaj uan kiijkuilouayaya amatlajkuiloli (xijpoua Hechos 28:16, 30, 31). Mosentlalijtoya yon se tlamantli ma kitsakuili tlajtolmoyauas. Kiijkuilok: “Pampa toTeko [...] techmakatok ni yejyektsi tekitl [...,] axkema tijkauasej” (2 Cor. 4:1). Sanse kej Pablo, tojuantij nojkia uelis timosentlalisej tlauel titlajtolmoyauasej maske moneki tijtemosej tlen ika timopanoltisej.

10, 11. ¿Kenijkatsa uelis senkistok titlajtolmoyauasej maske timokokouaj?

¹⁰ Tlaj amo tiuelij titlajtolmoyauaj kej tijnekiskiaj pampa ya tiueuejtixtokej o pampa timokokouaj, uelis tijchiuasej sekinok tlamantli. Toikniuaj tlen achtoui siglo kampa ueli tlajtolmoyauayayaj. Inijuantij tlajtolmoyauayayaj kampa kinpantiyayaj maseualmej: kajkalpa, kampa nemiyayaj miakej uan ipan ojojtli (Hech. 17:17; 20:20). ¿Uan tlaj ayokmo kuali tinejnemij? Uajka uelis timoseuisej kampa panoj miakej uan nopaya tikinkamanaljuisej. Nojkia uelis titlajtolmoyauasej ipan teléfono, ika amatlajkuiloli uan kampa tijpantisej se akajya. Sekij toikniuaj katli ayokmo uelij tlajtolmoyauaj kej achtouia  tlauel yolpakij kema kichiuaj se tlen ni tlamantli.

¹¹ Uajka maske timokokouaj, kena uelis tijchiuasej nopa tekitl tlen techmakatokej. Sampa ma tikitakaj tlen Pablo kichijki. Ya kiijtok: “Nochi niueli nijchiua ika nopa chikaualistli tlen Cristo nechmaka” (Filip. 4:13). Ya monejki kipias nopa chikaualistli kema kipixki se kokolistli. Ya kiniljuik galaciaeuanij: “Kema achtoui niajki niinmechiljuito itlajtol toTeko, eltoya pampa nimokokouayaya” (Gál. 4:13). Tlaj timokokouaj, tojuantij nojkia uelis tikiniljuisej tlen toTeotsij iTlanauatijkayo katli tekitij kampa timopajtiaj, kej tepajtianij, enfermeros uan sekinok katli nopaya tekitij. Miakej tlen nopa maseualmej amo tikinpantiaj ininchaj pampa tonaya tekitij.

12. ¿Tlake kiijtosneki tijpiasej “kuali toixteyol”?

¹² Jesús kiijtok: “Toixteyol eltok keja se tlauili ipan totlakayo uan intla kuali toixteyol, nochi totlakayo kipia tlauili uan tijmatij tlen kuali para tijchiuasej” (Mat. 6:22). ¿Tlake kiijtosneki nopa tlajtoli “kuali toixteyol”? Kiijtosneki moneki timosentlalisej tijchiuasej san setsi tlamantli, uan amo tijkauasej sekinok tlamantli ma techtsakuili. Jesús kiampa kichijki pampa nochipa mosentlalik tlajtolmoyauas, uan kinmachtik itokilijkauaj nojkia ma mosentlalikaj kitekipanosej Jehová uan ma kimoyauakaj nopa kuali tlamachtili tlen toTeotsij iTlanauatijkayo. Tijchiuaj kej Jesús kema timosentlaliaj titlajtolmoyauasej uan tijchiuaj tlen kiijtok: “Achtoui  xijtemokaj para inkalakisej ipan itlanauatilis toTeko uan para inkipiasej se yolistli tlen xitlauak iixtla” (Mat. 6:33).

13. ¿Tlake techpaleuis ma timosentlalikaj titlajtolmoyauasej?

¹³ Uelis tijnextisej timosentlalijtokej ipan tlajtolmoyaualistli tlaj tijpatlasej se keski tlamantli ipan tonemilis, kiampa uelis tikinpaleuisej sekinok maseualmej ma kiixmatikaj Jehová uan ma kiiknelikaj. * ¿Ueliskia tijpatlasej se keski tlamantli ipan toteki uan kiampa titlajtolmoyauasej ipan semana? ¿Ueliskia ayokmo tlauel timoyolpakiltisej ika se keski tlamantli tlen kichiua ma timotonalpolokaj?

14. ¿Tlake kinpaleuik se toikni iuaya isiua ma mosentlalikaj nojua tlauel tlajtolmoyauasej?

¹⁴ Ma tikitakaj tlen kichijki se ueuejtlakatl tlen itoka Elías iuaya isiua. Elías kiijtoua: “Maske amo ueliyaya titlatekipanouaj kej precursores, tijmatiyayaj monekiyaya tijchiuasej se tlamantli. Yeka, tijpatlakej se keski tlamantli tlen techpaleuik nojua tlauel ma titlajtolmoyauakaj: ayokmo tlauel titlakojkouayayaj, ayokmo tlauel timoyolpakiltiyayaj ika se keski tlamantli pampa tikitakej nopa techtonalpolouayaya uan nojkia tijpatlakej se keski tlamantli ipan toteki. Tlen tijchijkej techpaleuik ma titlajtolmoyauakaj ika tiotlak uan ma tikinmachtikaj ika Biblia sekinok maseualmej uan nojkia uelki titlajtolmoyauaj ompa ipan se semana sejse metstli. Tlauel tiyolpakiyayaj”.

15, 16. Kej kiijtoua 1 Timoteo 4:13, 15, ¿tlake techpaleuis nojua kuali ma titlajtolmoyauakaj uan kuali ma titlamachtikaj? (Nojkia xikita nopa recuadro “ Tlen techpaleuis ma timosentlalikaj titlajtolmoyauasej”).

¹⁵ Tlaj tijnekij timosentlalisej titlajtolmoyauasej,  moneki nojua kuali titlamachtisej. Se keskij ixtlamatinij kiniljuiaj nochipa ma momachtijtokaj uan kiampa uelis kimatisej uan kichiuasej sekinok tlamantli. Tojuantij nojkia moneki tijyekojtiasej kenijkatsa kuali titlamachtisej (Prov. 1:5; xijpoua 1 Timoteo 4:13, 15).

¹⁶ ¿Tlake techpaleuis nojua kuali ma titlamachtikaj? Moneki kuali tijtlakakilisej tlen moixtoma sejse semana ipan tlanechikoli Kej Timonejnemiltiaj uan Titlajtolmoyauaj. Tlen nopaya moixtoma techpaleuia nojua kuali ma titlamachtikaj. Kema nopa toikni katli kiyakana tlanechikoli kintlajtolmaka katli kipanoltiaj se tlamachtili, ma timoiljuikaj kenijkatsa techpaleuis tojuantij. Uan ma tijchiuakaj tlen tijyekojkej kema tikamanaltisej iuaya se akajya. Uelis tikiljuisej ma techpaleui nopa toikni katli kinyakana katli kisaj tlajtolmoyauaj o ma titlajtolmoyauakaj iuaya. Nojkia uelis techpaleuisej toikniuaj katli kuali tlajtolmoyauaj uan tlamachtiaj, precursores uan toikniuaj katli tepaxalouaj chijchikuasej metstli. Tlaj tijchiuasej ni tlamantli, tijmatisej kenijkatsa kuali tijtekiuisej amatlajkuiloli tlen tlauel tijtekiuiaj kema titlamachtiaj. Uan nojkia tlauel tiyolpakisej kema titlajtolmoyauasej uan titlamachtisej.

17. ¿Kenijkatsa tijyolmatij kema timosentlaliaj titlajtolmoyauasej?

¹⁷ Nelia se ueyi tlateochiualistli pampa Jehová techkaua ma titekitikaj iuaya (1 Cor. 3:9). Kema tijtlapejpeniaj “tlen nelia kuali” uan timosentlaliaj titlajtolmoyauasej, tijnextiaj tijtekipanouaj Jehová “ika pakilistli” (Filip. 1:10; Sal. 100:2). Katli tijtekipanouaj Jehová timotemachiaj ya techpaleuis ma tijchiuakaj tlen technauatijtok maske tijpiaj kuesoli o maske ayokmo tiuelij tijchiuaj se keski tlamantli (2 Cor. 4:1, 7; 6:4). Tlaj miak titlajtolmoyauaj o amo, tiyolpakij pampa tijtekipanouaj Jehová ika nochi toyolo (Gál. 6:4). Kema timosentlaliaj titlajtolmoyauasej, tijnextiaj tikikneliaj Jehová uan tikinikneliaj maseualmej. ¿Kenijkatsa techpaleuia kema tijchiuaj nopa? Biblia kiijtoua: “Intla kej ni tijchiuas, toTeko mitsmakixtis ta uan inijuantij tlen mitstlakakilisej” (1 Tim. 4:16).