1. ¿Tlake moneki kichiuasej omej maseualmej tlaj kinekij mouampojchiuasej?

KEMA omej maseualmej kinekij kuali mouampojchiuasej, moneki nochipa itstosej sansejko, kiijtosej tlen moiljuiaj, tlen kiyolmatij uan tlen kinpanotok. Uan uelis timoiljuiaj amo kema tiuelisej timouampojchiuasej iuaya Jesús. Ma tikitakaj kenke.

2. ¿Tlake achtoui tlamantli ueliskia kichiuas ma tikouijmatikaj timouampojchiuasej iuaya Jesús?

² Se, amo tiuelij tikitaj Jesús. Ipan achtoui siglo, miakej Cristo itokilijkauaj nojkia kiampa kinpanok. Yeka, apóstol Pedro kiniljuik: “Inkiikneliaj Jesucristo yonke axkema inkiitstokej. Uan inkineltokaj yonke axueli inkiitaj ama” (1 Ped. 1:8). Uajka, kena uelis timouampojchiuasej iuaya maske amo tikitstokej.

3. ¿Tlake nopa ompa tlamantli?

³ Ome, amo tiuelij tikamanaltij iuaya Jesús. Kema timomaijtouaj, tikamanaltij iuaya Jehová. Maske kema timomaijtouaj tijtekiuiaj Jesús itoka, amo yaya tijnojnotsaj. Jesús amo kineki ya ma tijnojnotsakaj, pampa kema timomaijtouaj nojkia titlaueyichiuaj, uan ya kineki san Jehová ma tijueyichiuakaj (Mat. 4:10). Maske amo tijnojnotsaj Jesús, kena uelis tikiknelisej.

4. 1) ¿Tlake nopa expa tlamantli? 2) ¿Tlake tikitasej ipan ni tlamachtili?

 ⁴ Eyi, amo tiitstokej iuaya Jesús pampa ya itstok iluikak. Maske amo tiitstokej iuaya, kena uelis tikixmatisej. Ipan ni tlamachtili tikitasej naui tlamantli tlen techpaleuis ma timouampojchiuakaj iuaya. Achtoui ma tikitakaj kenke tlauel ipati timouampojchiuasej iuaya Jesús.

5. ¿Kenke moneki timouampojchiuasej iuaya Jesús? (Nojkia xikita nopa recuadros “ Timouampojchiuaj ika Jehová tlaj timouampojchiuaj ika Jesús” uan “ Ma tikitakaj Jesús kej kinamiki”).

⁵ Moneki timouampojchiuasej iuaya Jesús tlaj tijnekij timouampojchiuasej iuaya Jehová. ¿Kenke kiampa tikijtouaj? Ma tikitakaj ome tlamantli. Se, Jesús kiniljuik itokilijkauaj: “NoTata nojkia inmechiknelia pampa innechiknelijtokej” (Juan 16:27). Uan nojkia kiijtok: “Axaka uelis asis kampa itstok noTata [...] tlaj axnechneltoka” (Juan 14:6). Tijnekis timouampojchiuas iuaya Jehová uan amo timouampojchiuas iuaya Jesús, eliskia kejuak tijnekis tikalakis ipan se kali uan amo tijtekiuis kaltemitl. Jesús nojkia kiijtok se neskayotl: “Na niitstok nopa kuapuerta kampa tlakamej uelis kalakisej” (Juan 10:7). Ome, Jesús kuali kinextik nopa kuajkuali tlamantli kej iTata. Kiniljuik itokilijkauaj: “Yajaya tlen nechitstok, ya kiitstok noTata” (Juan 14:9). Yeka, tlaj tijnekij tikixmatisej Jehová, moneki tikixmatisej Jesús. Kema nojua kuali tikixmatij Jesús, techpaleuia nojua tlauel tikiknelisej. Uan kema kiampa tijchiuaj, techpaleuia tikiknelisej iTata.

6. ¿Tlake seyok tlamantli kinextia moneki timouampojchiuasej iuaya Jesús?

⁶ Moneki timouampojchiuasej iuaya Jesús tlaj tijnekij Jehová ma technankili  kema timomaijtouaj. Ni amo kiijtosneki san tijtekiuisej Jesús itoka kema tlami timomaijtouaj. Moneki kuali tijkuamachilisej kenijkatsa Jehová kitekiuia iKone Jesús uan kiampa technankilia kema timomaijtouaj. Jesús kiniljuik itokilijkauaj: “Nochi tlamantli tlen inkitlajtlanisej noTata ipan notoka, niinmechchiuilis pampa na niiKone” (Juan 14:13). Maske san Jehová kikaki uan technankilia kema timomaijtouaj, ya kitekimaka iKone Jesús ma kichiua tlen ya kinauatia (Mat. 28:18). Maske Jehová kineki nima technankilis kema timomaijtouaj, achtoui kiita tlaj tijchijtokej tlen Jesús tlamachtik, kej kema kiijtok ni: “Intla inkintlapojpoljuisej tlakamej tlen inmechixpanotokej, uajka inmoTata tlen itstok nepa iluikak inmechtlapojpoljuis inmotlaixpanoljuaj nojkia. Pero intla axinkintlapojpoljuiaj tlakamej tlen inmechixpanoj, uajka inmoTata axinmechtlapojpoljuis inmotlaixpanoljuaj” (Mat. 6:14, 15). Uajka, tlauel moneki tijnextisej tikinikneliaj sekinok kej Jehová uan Jesús kichiuaj.

7. ¿Tlake moneki tijchiuasej tlaj tijnekij Jesús imikilis ma techpaleui?

⁷ Jesús imikilis kinpaleuis san katli kuali mouampojchijtokej iuaya. ¿Kenijkatsa tijmatij nopa? Jesús kiijtok mikiskia “ipampa iuampoyouaj” (Juan 15:13). ToTeotsij itekipanojkauaj katli itstoyaj kema nojua ayamo ualayaya Jesús ipan Tlaltipaktli, moneki kiixmatisej uan kiiknelisej. Kema Abraham, Sara, Moisés uan Rahab moyolkuisej, moneki mouampojchiuasej iuaya Jesús, kiampa kiselisej nopa nemilistli tlen axkema tlamis (Juan 17:3; Hech. 24:15; Heb. 11:8-12, 24-26, 31).

8, 9. Kej kiijtoua Juan 15:4, 5, ¿tlake uelis tijchiuasej tlaj timouampojchiuasej iuaya Jesús, uan kenke tlauel ipati?

⁸ Tijpiaj se ueyi tlateochiualistli pampa titlatekipanouaj iuaya Jesús kema titlajtolmoyauaj uan titlamachtiaj nopa kuali tlamachtili. Kema Jesús itstoya ipan Tlaltipaktli, tlamachtik tlen melauak tlen toTeotsij. Uan kema tlakuepilik iluikak, pejki kiyakana tlanechikoli uan nojua kiampa kichijtok ipan ni tonali. Jesús kiita uan kipatiita kema tijchiuaj kampeka tikinpaleuisej sekinok ma kiixmatikaj ya uan iTata. Uan nopa tekitl ueli tijchiuaj pampa Jehová uan Jesús techpaleuiaj (xijpoua Juan 15:4, 5).

⁹ Biblia kiijtoua moneki tikiknelisej Jesús tlaj tijnekij tijyolpakiltisej Jehová. Yeka, ma tikitakaj naui tlamantli tlen techpaleuis timouampojchiuasej iuaya Jesús.

10. ¿Tlake achtoui tlamantli techpaleuis ma timouampojchiuakaj iuaya Jesús?

¹⁰ Se, ma tikixmatikaj Jesús. Tlaj tijnekij tikixmatisej Jesús, moneki tijpouasej nopa naui amochtli: Mateo, Marcos, Lucas uan Juan. Kema timoyoliljuisej kenijkatsa eliyaya Jesús uan tikitasej kenijkatsa tlauel kiniknelik maseualmej, techpaleuis nojua ma tikiknelikaj uan ma tijtlepanitakaj. Maske Jesús eliyaya ininTeko itokilijkauaj, ya amo kema kinitak kej tlatekipanouanij. Kinitayaya kej iuampoyouaj, yeka kiniljuik tlen moiljuiyaya uan tlen kiyolmatiyaya (Juan 15:15). Nojkia, motekipachouayaya ika tlen kinpanoyaya uan mochokiliyaya ininuaya (Juan 11:32-36). Ikualankaitakauaj nojkia kiitakej kenijkatsa mouampojchiuayaya ininuaya katli kitlakakiliyayaj (Mat. 11:19). Tlaj tijchiuaj sanse kej ya kichijki, techpaleuis kuali ma timouikakaj ininuaya sekinok, tlauel tiyolpakisej uan nojua tikiknelisej Jesús uan tijtlepanitasej.

11. ¿Tlake ompa tlamantli techpaleuis ma timouampojchiuakaj iuaya Jesús, uan kenke tlauel ipati?

 ¹¹ Ome, ma tijpiakaj itlalnamikilis uan ma tijchiuakaj kej Jesús. Kema kuali tikixmatij uan timoiljuiaj kej ya, techpaleuia nojua kuali timouikasej iuaya (1 Cor. 2:16). ¿Kenijkatsa uelis tijchiuasej kej ya? Ma timoiljuikaj ipan ni tlamantli, ya tlauel kipatiitayaya kinpaleuis sekinok uan amo kichiuayaya san tlen ya kinekiyaya (Mat. 20:28; Rom. 15:1-3). Pampa kiampa kichiuayaya, nochipa kinpaleuik sekinok uan kintlapojpoljuiyaya. Amo nima moyolkokouayaya kema se akajya kitlaijiljuiyaya (Juan 1:46, 47). Uan kema se akajya mokuapolouayaya, amo san ya nopa kiilnamiktoya (1 Tim. 1:12-14). Yeka, tlauel ipati tijchiuasej kej Jesús, katli kiijtok: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:35). Yeka, ma timotlatsintokikaj: “¿Nijchiua kampeka nochipa kuali nimouikas ininuaya toikniuaj kej Jesús kichijki?”.

12. ¿Tlake expa tlamantli techpaleuis ma timouampojchiuakaj iuaya Jesús, uan kenijkatsa tijchiuaj?

¹² Eyi, ma tikinpaleuikaj Cristo iikniuaj. Kema tikinpaleuiaj toikniuaj katli kintlapejpenijtokej, Jesús kiita kejuak ya tijpaleuiaj (Mat. 25:34-40). Uan ni tijchiuaj kema tikinpaleuiaj tijmoyauasej nopa kuali tlamachtili tlen toTeotsij iTlanauatijkayo uan kema tikinpaleuiaj sekinok ma mochiuakaj itokilijkauaj (Mat. 28:19, 20; Hech. 10:42). Pampa nopa “sekinok tlakamej” katli motemachiaj itstosej ipan Tlaltipaktli kinpaleuiaj Cristo iikniuaj, ipan ni tonali tlajtolmoyauaj ipan nochi Tlaltipaktli (Juan 10:16). Tlaj timotemachiaj tiitstosej ipan Tlaltipaktli, kema titlajtolmoyauaj tijnextiaj tikinikneliaj katli kintlapejpenijtokej yasej iluikak uan nojkia Jesús.

13. ¿Kenijkatsa uelis tijchiuasej tlen Jesús kiijtok ipan Lucas 16:9?

¹³ Nojkia timouampojchiuaj iuaya Jehová uan Jesús kema titemakaj tomij tlen motekiuia ipan tlajtolmoyaualistli tlen mochiua ipan nochi Tlaltipaktli (xijpoua Lucas 16:9). Kema titemakaj nopa tomij tlen motekiuia kema titlajtolmoyauaj, titlapaleuiaj ma momoyaua nopa kuali tlamachtili ipan pilaltepetsitsij tlen eltok uejka, kema kichijchiuaj uan kema kikualchijchiuaj kali kampa titlaueyichiuaj uan kema toikniuaj kintlasojsoljuilia se tlenijki. Nojkia, uelis titemakasej tomij kampa timosentiliaj uan kiampa uelis tikinpaleuisej toikniuaj katli kipiaj tlaouijkayotl (Prov. 19:17). Kema tijchiuaj ni tlamantli, tijnextiaj tikinpaleuiaj Cristo iikniuaj.

14. Kej kiijtoua Efesios 4:15, 16 ¿tlake najpa tlamantli techpaleuis ma timouampojchiuakaj iuaya Jesús?

¹⁴ Naui, titlapaleuiaj kema mopatla se keski tlamantli ipan tlanechikoli. Kema tikinpaleuiaj ueuejtlakamej katli Jesús kintekimakatok, techpaleuia nojua kuali ma timouampojchijtokaj iuaya (xijpoua Efesios 4:15, 16). Ma timoiljuikaj ipan ni tlamantli: Jehová itlanechikol kineki kuali ma motekiui nopa kali kampa timosentiliaj, yeka se keski tlanechikoli kinsansejkotilijtokej uan nojkia kipatlatokej kampa tlajtolmoyauaj. Pampa kiampa kichijtokej, tlapaleuijtok amo ma motekiui miak tomij. Uan pampa mopatlatok se keski tlamantli, se keskij toikniuaj moneki momatisej. Uelis nopa toikniuaj miak xiuitl monechikojtoyaj ipan nopa tlanechikoli uan kuali mouikayayaj ininuaya sekinok toikniuaj. Nama, kiniljuiktokej ma yakaj ipan seyok tlanechikoli. Jesús  tlauel yolpaki kema kiita toikniuaj tlapaleuiaj kema mopatla se keski tlamantli ipan tlanechikoli.

15. ¿Kenke teipa nojua kuali timouampojchiuasej iuaya Jesús?

¹⁵ Katli kintlapejpenijtokej itstosej iluikak motemachiaj itstosej nochipa iuaya Jesús uan tlanauatisej iuaya ipan toTeotsij iTlanauatijkayo. Inijuantij kiitasej, itstosej iuaya uan kamanaltisej iuaya (Juan 14:2, 3). Uan katli itstosej ipan Tlaltipaktli nojkia kiitasej kenijkatsa Jesús tlauel kiniknelia uan kinmokuitlauia. Maske amo kiitasej Jesús, inijuantij nojua tlauel kuali mouampojchiuasej iuaya, kema Jehová uan Jesús kinmakasej nopa nemilistli tlen axkema tlamis (Is. 9:6, 7).

16. ¿Tlake tlateochiualistli tijseliaj pampa timouampojchijtokej iuaya Jesús?

¹⁶ Kema timouampojchiuaj iuaya Jesús tijseliaj miak tlateochiualistli. Ma timoiljuikaj kenijkatsa kinextijtok tlauel techiknelia uan techpaleuia. Nojkia, teipa uelis tijpiasej se nemilistli tlen axkema tlamis. Uan pampa tlauel kuali timouampojchijtokej iuaya, techpaleuis nojkia kuali ma timouampojchiuakaj iuaya Jehová. ¡Nelia se ueyi tlateochiualistli timouampojchiuasej iuaya Jesús!