1. ¿Tlake moneki tijchiuasej nochi Cristo itokilijkauaj?

¿TIJNEKISKIAJ tikalakisej kampa motlalouaj tlaj tijmatij tlauel ouij? ¿Uan tlaj timokokouaj o tlauel tisiajtokej? Amo timotlaloskiaj. Maske timoiljuiaj amo tiuelisej, Pablo kiijtok nochi Cristo itokilijkauaj kejuak timotlalouaj (Heb. 12:1). Tlaj tiueuejtixtokej o amo, o tlaj amo tlauel tijpiaj miak chikaualistli, nochi moneki timotlalojtosej uan tikijiyouisej, kiampa uelis titlatlanisej uan tijselisej tlen Jehová kiijtojtok techmakas (Mat. 24:13).

2. ¿Kenke Pablo uelki kiijtok tlen ijkuilijtok ipan 2 Timoteo 4:7, 8?

² Pablo uelki kiijtok nopa pampa ya nojkia motlalojtoya uan kitlamiltijtoya (xijpoua 2 Timoteo 4:7, 8). Uan, ¿kenke kiijtok kejuak timotlalouaj?

3. ¿Tlake kinejki kiijtos Pablo kema kiijtok kejuak timotlalouaj?

³ Kema Pablo kinekiyaya kuali ma kikuamachilikaj se keski tlamachtili tlen tlauel ipati, kineskayotiyaya ika tlen kichiuayayaj maseualmej ipan Grecia kema mauiltiyayaj (1 Cor. 9:25-27; 2 Tim. 2:5). Miakpa kiijtok inemilis se Cristo itokilijka eliyaya sanse ika tlen kichiuayaya se motlalojketl (1 Cor. 9:24; Gál. 2:2; Filip. 2:16). Se maseuali peua kejuak motlaloua kema motemaktilia ika Jehová uan moatsonpoliuiltia (1 Ped. 3:21). Uan tlatlanis kema Jehová kimakas tlen kitlanki: nopa nemilistli tlen axkema tlamis (Mat. 25:31-34, 46; 2 Tim. 4:8).

4. ¿Tlake tikitasej ipan ni tlamachtili?

⁴ Miak tlamantli tlen kichiua se motlalojketl eli sanse ika tlen kichiua ipan inemilis se Cristo itokilijka. Ma tikitakaj eyi tlamantli. Se, moneki amo tichikokisasej ipan toojui. Ome, moneki timosentlalisej tiasitij kampa titlatlanisej. Uan eyi, moneki nojua timotlalojtosej maske tijpantisej tlaouijkayotl.

5. ¿Kanke kinamiki timotlalojtosej, uan kenke?

⁵ Tlaj katli motlalouaj kinekij tlatlanisej, moneki kitokilisej nopa ojtli tlen kitlalijtokej katli kintlanejkej ma motlalokaj. Tojuantij nojkia kiampa moneki tijchiuasej, tlaj tijnekij tijtlanisej nopa nemilistli tlen axkema tlamis, kinamiki timotlalojtosej xitlauak ipan toojui, ni kiijtosneki timonejnemiltisej kej Jehová kineki ma monejnemiltikaj Cristo itokilijkauaj (Hech. 20:24; 1 Ped. 2:21). Satanás uan katli kipaleuiaj kinekij ma tichikokisakaj uan ma timonejnemiltikaj kej inijuantij (1 Ped. 4:4). Inijuantij tlauel techpinajtiaj uan kiijtouaj tlauel kuali tlaj timonejnemiltisej kej inijuantij pampa amo tleno kintsakuilia. Maske kiijtouaj nopa, san mokajkayauaj (2 Ped. 2:19).

6. ¿Tlake techmachtia tlen kipanok Brian?

⁶ Tlaj se akajya kinekis kitokilis Satanás iojui, nimantsi kiitas nopaya itstos kejuak ilpitok uan amo majkajtok (Rom. 6:16). Ma tikitakaj tlen kipanok Brian. Kema nojua okichpil, itatauaj kimachtijkej monekiyaya monejnemiltis kej Biblia tetlajtolmaka. Kema motelpokachijki, moiljuik amo yolpakiskia tlaj kiampa kichiuaskia. Yeka, pejki monejnemiltia kej maseualmej katli kichiuaj tlen Satanás kineki. Brian kiijtoua: “Amo kema nimoiljuik tlaj nijchiuaskia san tlen na nijnekiyaya kichiuaskia kejuak ma nechilpikaj”. Brian momatki kitekiuia drogas, tlauel tlaiyaya uan siuanemiyaya. Ya nojua kiijtoua: “Kej panotiajki xiuitl, pejki nijtekiuia drogas tlen tlauel tetlanauiyaya uan nijmatki kejuak nechilpik pampa amo ueliyaya nijkaua. Tlauel nimomatki nijtekiuia, yeka pejki nijnamaka drogas uan kiampa nikixtlauaskia tlen na nijtekiuiskia”. Teipa, kinejki monejnemiltis kej Jehová tlanauatia. Kipatlak inemilis, uan ipan 2001, moatsonpoliuiltik. Nama kena yolpaki pampa motlaloua ipan nopa ojtli tlen kinamiki. *

7. Kej kiijtoua Mateo 7:13, 14, ¿tlake ome ojtli eltok?

⁷ Tlauel moneki kuali tijtlapejpenisej tlake ojtli tijtokilisej. Satanás kineki ayokmo ma timotlalokaj ipan nopa “ojtli tlen amo patlauak” tlen “teuika kampa nemilistli”. Ya kineki ma tiakaj ipan nopa ojtli tlen patlauak kampa miakej maseualmej yauij. Nopaya amo onka tlaouijkayotl pampa teuika “kampa tetsontlamiltiaj” (xijpoua Mateo 7:13, 14 *). Tlaj  amo tijnekij yon se tlamantli ma techkixti tlen nopa ojtli kampa timotlalouaj, moneki timotemachisej ipan Jehová uan tijtlakakilisej tlen techiljuia.

8. ¿Tlake kichiua se motlalojketl kema motepotlamia uan uetsi?

⁸ Katli motlalouaj nochipa tlachixtiauij kampa yauij, kiampa amo motepotlamiaj. Maske kiampa kichiuaj, kemantika uelis moikxiostouisej o uelis seyok motlalojketl kitepotlamiltis. Kema uetsij, sampa moketsaj uan nojua motlalouaj. Amo mosentlaliaj ipan nopa tlamantli tlen ika motepotlamijkej, inijuantij mosentlaliaj tlatlanisej uan kiselisej tlen kinmakasej.

9. ¿Tlake uelis tijchiuas tlaj timotepotlamis?

⁹ Kema tijtekipanos toTeotsij, nojkia kejuak timotepotlamis, uelis pampa tikijtos o tijchiuas se tlamantli tlen amo kinamiki, o pampa se toikni mitsyolkokos. Kiampa pano pampa nochi titlajtlakolejkej uan nochi timotlalojtokej ipan ojtli pitsaktsi tlen teuika kampa nemilistli. Yeka, kemantika kejuak timotakanis ininuaya sekinok. Pablo kiijtok kemantika onkas se keski tlamantli tlen kichiuas xikualani iuaya se toikni (Col. 3:13). Amo ximosentlali ipan tlen mitstepotlamilti, ximosentlali ipan tlen tijselis. Tlaj tiuetsi, ximotlanana uan nojua ximotlalo. Amo san xiixtapachijto yon ximoiljuijto kenke mitspanok nopa, pampa nopa amo mitspaleuis titlatlanis yon tijselis tlen tijchia. Uan nojkia, uelis tikintsakuilis katli nojkia kichiuaj kampeka motlalosej ipan nopa ojtli tlen teuika kampa nemilistli.

10. ¿Tlake kinamiki tijchiuasej uan kiampa amo tikintsakuilisej sekinok?

¹⁰ Tlaj amo tijnekij tikintsakuilisej toikniuaj kampa motlalouaj, kemantika uelis tijkauasej ma kichiuakaj se keski tlamantli tlen inijuantij kiitaj kuali uan amo tikinchiualtisej ma kichiuakaj san tlen tojuantij techpaktia (Rom. 14:13, 19-21; 1 Cor. 8:9, 13). Katli motlalouaj kichiuaj kampeka motlanisej pampa san inijuantij kinekij tlatlanisej. Amo kintekipachoua tlen sekinok kinpano. Yeka, uelis kitemoliaj kenijkatsa motlayakanaltisej. Tojuantij amo kiampa tijchiuaj, pampa amo tijnekij timotlanisej  ika toikniuaj (Gál. 5:26; 6:4). Tijnekij tikinpaleuisej sekinok nojkia ma tlatlanikaj uan nojkia ma kiselikaj nemilistli. Yeka, tijchiuaj kampeka tijneltokasej tlen Pablo kiijtok uan amo tijchiuasej san tlen tojuantij tijnekij; moneki timoiljuisej “tlen kinpaleuis sekinok” (Filip. 2:4).

11. ¿Ipan tlake mosentlaliaj katli motlalouaj, uan kenke kiampa kichiuaj?

¹¹ Katli motlalouaj amo san tlachixtiauij kampa motlalojtiauij, nojkia mosentlaliaj asitij kampa tlatlanisej. Maske ayamo kiitaj kampa asitij, moiljuiaj kenijkatsa kiixkotonaj kampa tlami nopa ojtli uan kiseliaj tlen kitlankej. Ni kinpaleuia nojua ma motlalojtokaj.

12. ¿Tlake kiijtojtok Jehová?

¹² Jehová tlauel techiknelia, yeka temachtli kiijtojtok tlaj tijtlamiltisej tlen tijpeualtijkej, tijtlanisej nopa nemilistli tlen axkema tlamis: sekij iluikak uan sekij ipan Tlaltipaktli. Biblia technextilia kenijkatsa elis nopa nemilistli tlen tijtlanisej. Nopa techpaleuia ma timoiljuikaj kenijkatsa tiitstosej teipa. Tlaj nojua tlauel timosentlalisej ipan tlen tijchiaj, uajka nojkia timosentlalisej amo timotepotlamisej ika tlamantli tlen ueliskia kichiuas amo ma tiasitij kampa titlatlanisej.

13. ¿Tlake tlamantli tlen tlauel kuali tijpiaj tojuantij?

¹³ Uejkajkia, ipan Grecia, katli motlalouayayaj monekiyaya kiijiyouisej pampa kiixnamikiyayaj tlaouijkayotl, kej kema tlauel siauiyayaj uan tlakayokuajkualoyayaj. Inijuantij monekiyaya motemachisej ipan ininchikaualis uan nojkia pampa kimajtoyaj kuali mokualchijchijtoyaj. Sanse kej inijuantij, tojuantij nojkia techkualchijchiuaj uan kiampa tiuelij kejuak timotlalojtokej. Uan nojkia tijpiaj se kuali tlamantli tlen ika timopaleuiaj: nochipa tijpiaj chikaualistli pampa Jehová techmaka. Tlaj timotemachiaj ipan Jehová, ya kiijtojtok kuali techkualchijchiuas uan techpaleuis ma tikijiyouikaj nochi (1 Ped. 5:10).

14. ¿Kenijkatsa techpaleuia 2 Corintios 12:9, 10 ma tikixnamikikaj tlaouijkayotl?

¹⁴ Pablo monejki kiijiyouis miak tlaouijkayotl. Miakpa kitlaijiljuijkej uan kitlatsakuiltijkej, uan nojkia kemantika kimatiyaya amo kipiayaya chikaualistli uan kiijiyouiyaya ipan itlakayo se kokolistli katli eliyaya “keja se uitstli” (2 Cor. 12:7). Ya amo moiljuik ayokmo motlaloskia pampa kipixtoya nopa kuesoli. Ya moiljuik ipan nopa tlaouijkayotl monekiyaya kinextis nelia motemachiyaya ipan Jehová (xijpoua 2 Corintios 12:9, 10). Uan yeka, Jehová nochipa kipaleuik.

15. ¿Tlake tijyolmatisej tlaj tijchiuasej kej Pablo?

¹⁵ Sanse kej Pablo, uelis tojuantij nojkia techtlaijiljuiaj o techtlatsakuiltiaj pampa tijtekipanouaj toTeotsij. Nojkia, uelis timokokouaj o tlauel tikuatitokej. Maske techpano ni, tlaj tijchiuasej kej ya, uajka ipan sejse kuesoli uelis tijyolmatisej kenijkatsa Jehová tlauel techiknelia uan techpaleuia.

16. ¿Tlake uelis kichiuasej katli mokokouaj?

¹⁶ ¿Uan tlake uelis kichiuasej katli amo uelij meuaj pampa mokokouaj, katli amo uelij nejnemij, katli tlankuaxkuajkualoj o katli amo kuali tlachiaj? ¿Uelis motlalosej ininuaya telpokamej uan ininuaya katli elij tejtetikej? Kena uelisej. Miakej toikniuaj katli ya uejueyij uan katli mokokouaj kichiuaj kampeka kitlamiltisej tlen kipeualtijkej. Nojua motlalouaj pampa Jehová kinmaka chikaualistli. Kitlakakiliaj tlanechikoli ipan teléfono o kiitaj ipan Internet. Nojkia kintemouaj katli uelis mochiuasej Cristo itokilijkauaj kema kinkamanaljuiaj ininuikaljuaj, tepajtianij uan katli kinmokuitlauiaj.

17. ¿Kenijkatsa kinita Jehová katli ayokmo uelij kichiuaj miak tlamantli?

 ¹⁷ Amo kema ma timoyolkaxanikaj san pampa amo tiuelij tijchiuaj miak tlamantli yon ma timoiljuikaj ayokmo timotlalosej ipan nopa ojtli tlen teuika kampa nemilistli. Jehová techiknelia pampa timotemachiaj ipan ya uan pampa kiitstok kenijkatsa miak xiuitl tijtekipanojtokej. Kema techpano ni, tlauel moneki ma techpaleui uan ya amo kema techtlauelkauas (Sal. 9:10). Ya nojua technechkauis. Ma tikitakaj tlake kiijtoua se tosiuaikni katli tlauel mokokoua: “Pampa nojua tlauel nimokokoua, ayokmo nelniueli nikamanalti ininuaya sekinok. Maske nechpano ni, na nijmati tlaj nijchiua kampeka, maske uelis amo miak nijchiuas, Jehová tlauel yolpaki. Uan nopa kichiua nojkia ma niyolpaki”. Kema achi tiyolkaxanisej o timokuesosej, ma tikilnamikikaj Jehová itstok touaya. Ma timoiljuikaj tlen kipanok Pablo uan kenijkatsa tlauel teyolchikaua tlen kiijtok: “Kena, nipaki pampa axnitetik [...], pampa kema axnijpia fuerza, ya nechchiua nitetik” (2 Cor. 12:10).

18. ¿Tlake kuesoli tlen tlauel ouij kiixnamikij sekij?

¹⁸ Sekij toikniuaj nojkia kiixnamikij seyok tlaouijkayotl. Inijuantij kipiaj kuesoli tlen sekinok amo uelij kiitaj uan uelis amo kikuamachiliskiaj: kej kema tlauel mokuesouaj miak tonali o se tlenijki tlauel kintetsopa. ¿Kenke tlauel ouij tlen kinpano? Ma timoiljuikaj ipan ni tlamantli: kema se akajya moajkolposteki o amo ueli nejnemi, nochi kiitaj uan kinekij kipaleuisej. Uan se akajya katli iyoltipa tlaijiyouia o ipan itlalnamikilis tlauel kikuesoua se tlamantli, sekinok amo uelij kiitaj. Maske amo nesi, ya nojkia tlauel tlaijiyouia kej se akajya katli moomiyoposteki. Uan maske tlauel moneki, sekinok amo kinextiaj kinikneliaj yon kinpaleuiaj.

19. ¿Tlake techmachtia tlen kipanok Mefi Boset?

¹⁹ Tlaj amo tiuelij tijchiuaj miak tlamantli uan timoiljuiaj amo techkuamachiliaj, uajka tlen kipanok Mefi Boset tlauel techpaleuis (2 Sam. 4:4). Amo san tlaijiyouik pampa amo ueliyaya nejnemi, nojkia tlaijiyouik kema David amo xitlauak kitlajtolsenkajki uan kichiuili tlen amo kuali. Maske Mefi boset amo motemolik yon se tlen ni kuesoli, ya amo mosentlalik ipan tlen amo kuali kipanoyaya. Ya tlauel kipatiitayaya nochi tlen kuali katli kipanoyaya. Uan kitlaskamatiliyaya David pampa achtouia kinextik kitlasojtlayaya (2 Sam. 9:6-10). Yeka, kema amo kuali kitlajtolsenkajki, ya uelki kiitak sekinok tlamantli tlen panoyaya. Amo mokualankamakak pampa David mokuapolok yon kitlajtlakoltik  Jehová. Mosentlalik kipaleuis nopa tlanauatijketl tlen toTeotsij kitlalijtoya (2 Sam. 16:1-4; 19:24-30). Jehová kichijki ma moijkuilo ipan Biblia tlen kipanok nopa tlakatl pampa kimatiyaya techpaleuiskia (Rom. 15:4).

20. ¿Kenijkatsa kiyolmatij se keskij toikniuaj, uan ipan tlake uelis motemachisej?

²⁰ Sekij tlauel mokuesouaj uan yeka amo kuali kiyolmatij kema itstokej ininuaya sekinok. Maske uelis amo kinpaktia itstosej kampa itstokej miakej, inijuantij kichiuaj kampeka yasej tlanechikoli uan ipan uejueyi tlanechikolistli. Uan maske kiouijmatij kamanaltisej ininuaya katli amo kinixmatij, yauij tlajtolmoyauaj. Tlaj kiampa tijyolmatij, amo san tojuantij kiampa techpano. Moneki tikilnamikisej Jehová tlauel yolpaki kema kiita tijchiuaj kampeka ika nochi toyolo. Pampa nojua tijchijtokej tlen tiuelij, kinextia Jehová techteochiua uan techpaleuia ika ichikaualis * (Filip. 4:6, 7; 1 Ped. 5:7). Tlaj tijtekipanouaj Jehová maske techpano miak tlamantli, uelis timotemachisej ya tlauel yolpaki kema kiita nochi tlen tijchiuaj.

21. ¿Tlake uelis tijchiuasej pampa Jehová techpaleuijtos?

²¹ Kej tikitstokej, onka se keski tlamantli tlen amo sanse kichiuaj katli motlalouaj ika tlen Pablo kiijtok. Uejkajkia, san setsi tlatlaniyaya kema motlalouayayaj. Uan katli tielij Cristo itokilijkauaj nochi tijtlanisej nopa nemilistli tlen axkema tlamis tlaj amo kema tijtlauelkauasej toTeotsij (Juan 3:16). Uejkajkia, nochi motlalouanij monekiyaya itstosej tetikej, tlaj amo, uajka amo ueliskiaj tlatlanisej. Uan tojuantij nochi timotlalouaj maske sekij amo tiuelij tijchiuaj miak tlamantli (2 Cor. 4:16). Jehová nochipa techpaleuijtos, uan yeka uelis nojua timotlalojtosej uan tiasitij kampa titlatlanisej.