1. ¿Tlake kiita Jehová ipan sejse itekipanojkauaj?

TLAUEL tiyolpakij tijmatisej Jehová yolpaki ipan sejse itekipanojkauaj (Sal. 149:4). Jehová kiita nopa kuajkuali tlamantli tlen tijnextia, tlen tiuelij tijchiuaj uan mouampojchiua touaya. Yeka, tlaj amo tijtlauelkauaj, ya nojkia amo kema techtlauelkauas (Juan 6:44).

2. ¿Kenke miakej toikniuaj kimatij ouij kineltokasej Jehová kiniknelia?

² Uelis se akajya kiijtos, maske nijmati Jehová kiniknelia itekipanojkauaj, ¿kenijkatsa nijmati Jehová nelia nechiknelia na? ¿Kenke miakej kiampa moiljuiaj? Oksana, * katli ouij kej kiiskaltijkej kiijtok: “Kema nimoatsonpoliuiltik uan nimochijki precursora, tlauel niyolpajki uan kema nikaxitik 15 xiuitl ayokmo kiampa nijyolmatki pampa pejki nikilnamiki tlamantli tlen amo kuali tlen nechpanotoya uan nopa nechyolkokouayaya. Nimoiljuik Jehová amo kuali nechitayaya uan yeka amo kinamikiyaya ma nechikneli”. Seyok precursora katli itoka Yua, katli nojkia ouij kej kiiskaltijkej, kiijtok: “Maske nimoatsonpoliuiltik pampa nijnekiyaya nijyolpakiltis Jehová, nimoiljuiyaya ya amo kema nechikneliskia”.

3. ¿Tlake tlajtlanili tijnankilisej ipan ni tlamachtili?

³ Tojuantij tijmatij tikikneliaj Jehová, kej nopa omej tosiuaikniuaj. Maske kiampa timoiljuiaj, uelis ouij tijmatij timoiljuisej Jehová techiknelia. Ipan ni tlamachtili tijnankilisej ome tlajtlanili: ¿Kenke moneki timotemachisej Jehová  nelnelia techiknelia? Uan, ¿tlake tijchiuasej kema amo kuali tijyolmatij?

4. ¿Kenke moneki timotemachisej Jehová techiknelia?

⁴ Tlaj timotemachiaj Jehová techiknelia, techpaleuis tijtekipanosej ika pakilistli maske tijpiasej tlaouijkayotl. Ma tikilnamikikaj tlaj amo timotemachiaj ya techiknelia, uajka amo tijpiasej chikaualistli (Prov. 24:10). Uan tlaj tlauel timokuesouaj, uan timoiljuiaj Jehová amo techiknelia, amo uelis tikijiyouisej nopa ‘lemenkuatlamintli’ tlen techmajkauilis Satanás (Efes. 6:16).

5. ¿Tlake kinpanotok se keskij toikniuaj pampa moiljuiaj Jehová amo kiniknelia?

⁵ Miakej toikniuaj moiljuiaj Jehová amo kinpatiita, uan yeka ayokmo kuali tlaneltokaj. Se ueuejtlakatl katli itoka James kiijtoua: “Maske nitlatekipanouayaya Betel uan nitlajtolmoyauayaya ipan seyok tlajtoli, kemantika nimoiljuiyaya tlaj Jehová nelia kiselia nochi tlen nijchiuayaya. Nojkia, nimoiljuiyaya tlaj nelia nechkakiyaya kema nimomaijtouayaya”. Eva, katli tlatekipanouayaya kej precursora kiijtok: “Amo kinamiki nochipa timoiljuijtos Jehová amo mitsiknelia, pampa ayokmo tijtekipanos ika nochi moyolo uan amo tiyolpakis kema tijtekipanojtos”. Michael katli tlatekipanoua kej precursor uan ueuejtlakatl, kiijtok: “Tlaj timoiljuis Jehová amo kitekipachoua tlen mitspano, uelis yolik timouejkatlalijtias”.

6. ¿Tlake uelis tijchiuasej kema amo kuali tijyolmatij?

⁶ Tlen kiijtojkej toikniuaj techpaleuia ma tikitakaj amo kinamiki timoiljuisej Jehová amo techiknelia. ¿Tlake tijchiuasej tlaj kemantika amo kuali tijyolmatij? Moneki tijchiuasej kampeka amo kiampa timoiljuisej. Uan tikiljuisej Jehová ma techmaka tlayolseuilistli uan ma kimokuitlaui toyolo uan totlalnamikilis, kiampa ayokmo timotekipachosej (Sal. 139:23; Filip. 4:6, 7). Ma tikilnamikikaj miakej toikniuaj nojkia kichiuaj kampeka ayokmo moiljuisej amo ininpati. Uan nojkia ma tikilnamikikaj se keskij toTeotsij itekipanojkauaj katli uejkajkia itstoyaj, nojkia kiampa kiyolmatkej. Ma tikitakaj tlake tijyekouaj tlen kipanok apóstol Pablo.

7. ¿Tlake kuesoli kipixtoya Pablo?

⁷ Tlaj tijpiaj miak tekitl ipan tlanechikoli, uelis tijmatisej amo ueli tijtlamiltiaj. Pablo nojkia kiampa kiyolmatki. Ya kiijtok motekipachouayaya amo san ipan se tlanechikoli, ya motekipachouayaya ipan nochi tlanechikolmej (2 Cor. 11:23-28). Nojkia uelis timokuesouaj pampa tijpiaj se kokolistli tlen amo kipia pajtli. Pablo nojkia mokuesouayaya pampa kipixtoya “keja se uitstli” ipan itlakayo, uelis pampa mokokouayaya (2 Cor. 12:7-10). ¿Timokuesouaj pampa kemantika timokuapolouaj? Pablo nojkia kiampa kiyolmatki, ya kiijtok: “Nechpaktia nijchiuas nopa tlen kuali tlen kiijtouaj itlanauatiljuaj toTeko, pero nochipa ipan na onka tlajtlakoli tlen kiteuia tlen kuali nijneki nijchiuas ipan notlalnamikilis” (Rom. 7:21-24).

8. ¿Tlake kipaleuik Pablo nojua ma kitekipano Jehová maske kiixnamikiyaya tlaouijkayotl?

⁸ Maske Pablo kiixnamijki miak tlaouijkayotl, nochipa kitekipanok Jehová. ¿Tlake kipaleuik? Maske mokuapolouayaya, ya kineltokayaya Jesús techmakixtik ika imikilis. Nojkia, Pablo kimatiyaya Jesús kiijtojtoya nochi tlen kineltokasej, kipiasej nemilistli tlen axkema tlamis (Juan 3:16; Rom. 6:23). Pablo kuali tlaneltokayaya ipan nopa tlaxtlauili. Uan kimatiyaya tlaj timokuapolouaj uan nelia timoyolkuepaj, Jehová techtlapojpoljuis (Sal. 86:5).

9. ¿Tlake techmachtia tlen kiijtok Pablo ipan Gálatas 2:20?

⁹ Pablo motemachiyaya toTeotsij tlauel kiikneliyaya pampa kititlantoya iKone ma techmakixtiki. Ma tikitakaj tlen kiijtoua kampa tlami Gálatas 2:20 (xijpoua). Pablo kiijtok: “Ikone toTeko [...] nechiknelik uan motemaktilik uan mijki nopampa na”. Pablo amo moiljuiyaya Jehová amo kiikneliyaya, ya amo kema moiljuik: “Maske nijmati Jehová kiniknelia nochi toikniuaj, ¿nojkia nechiknelia?”. Ya kiniljuik toikniuaj katli euayayaj Roma: “ToTeko technextili para nelia miak techiknelia pampa Cristo mijki ipampa nochi tojuantij kema noja tieliyayaj titlajtlakolchiuanij” (Rom. 5:8). Ma tikilnamikikaj Jehová tlauel techiknelia.

10. ¿Tlake techmachtia tlen kiijtoua Romanos 8:38, 39?

¹⁰ (Xijpoua Romanos 8:38, 39). Pablo kimatiyaya Jehová tlauel teiknelia. Yeka, kiijtok: “Axtleno ueli techiyokakauas  tlen iteiknelijkayo toTeko”. Ya, kimajtoya Jehová kipixki ueyi iyolo ika israeleuanij uan nojkia kiampa kinextik ika ya. Pablo kejuak kiijtok: “Jehová kititlanki iKone ma nechmakixtiki. Yeka amo kinamiki nimoiljuis ya amo nechiknelia” (Rom. 8:32).

11. ¿Kenke Pablo motemachiyaya Jehová kiikneliyaya maske uejkajkia kichijtoya tlen amo kuali kej kiijtoua 1 Timoteo 1:12-15?

¹¹ (Xijpoua 1 Timoteo 1:12-15). Uelis Pablo moyolkokouayaya pampa kiilnamikiyaya tlen uejkajkia kichijtoya. Ya kiijtok kichijtoya miak tlamantli tlen amo kuali. Kema ayamo eliyaya Cristo itokilijka kintlatsakuiltiyaya toikniuaj, kintsajki uan kikajki ma kinmiktikaj se keskij (Hech. 26:10, 11). Nama ximoiljui ipan ni tlamantli: ¿kenijkatsa kiyolmatiyaya Pablo kema kiixmatiyaya ininkone katli kinmiktijtoya? Ya tlauel moyolkokouayaya uan kimatiyaya ayokmo ueliskia kipatlas tlen kichijtoya. Pablo motemachiyaya Jesús nelia kimakixtijtoya, yeka kiijkuilok: “Pampa ueyi iyolo noka na, toTeko nechmakak tekitl para nielis niitlayolmelajka” (1 Cor. 15:3, 10). ¿Tlake tijyekouaj? Moneki timotemachisej Jesús mijki uan kiampa techmakixtik sejse tlen tojuantij, uan nama ueli timouampojchiuaj iuaya Jehová (Hech. 3:19). Jehová kiita tlen nama tijchiuaj uan tlen tijchiuasej teipa, uan amo mosentlalia ipan tlen tijchijkej uejkajkia, maske uelis ya tijtekipanouayayaj o amo (Is. 1:18).

12. Kej kiijtoua 1 Juan 3:19, 20, ¿tlake techpaleuis tlaj tijyolmatij amo topati uan timoiljuiaj amo kinamiki ma techiknelikaj?

¹² Kemantika uelis timoiljuisej amo topati o amo tiipamej, uan yeka amo kinamiki ma techiknelikaj (xijpoua 1 Juan 3:19, 20). Yeka, uelis timoiljuisej Jesús imikilis  amo uelis techtlapojpoljuis. Kema kiampa tijyolmatisej, ma tikilnamikikaj Jehová eli “más tlen nopa tlen toyolo techiljuia”. Tlaj kemantika timoiljuiaj Jehová amo techiknelia yon techtlapojpoljuia, nochipa ma tikilnamiktokaj ya tlauel techiknelia uan techtlapojpoljuia. Uan nochipa ma tijchiuakaj kampeka kiampa timoiljuisej. ¿Tlake techpaleuis? Mojmostla ma tijpouakaj Biblia, ma timomaijtokaj uan ma tiitstokaj ininuaya toikniuaj. Ma tikitakaj kenijkatsa ni eyi tlamantli techpaleuis.

13. ¿Kenijkatsa techpaleuia nochipa timomachtisej Biblia? (Xikita recuadro “ ¿Kenijkatsa kinpaleuijtok Biblia?”).

¹³ Mojmostla ma tijpouakaj Biblia. Tlaj kiampa tijchiuaj tikitasej nopa kuajkuali tlamantli tlen Jehová kinextia, uan timotemachisej ya techiknelia. Tlaj timoyoliljuiaj ipan tlen tijpouaj, techpaleuis ma tikitakaj se keski tlamantli kej kinamiki uan ma tijyakanakaj totlalnamikilis uan toyolo (2 Tim. 3:16). Se ueuejtlakatl katli itoka Kevin, uan kichiua kampeka amo tlauel mokuesojtos, kiijtoua: “Kema nijpoua uan nimoyoliljuia tlen kiijtoua Salmo 103, nechpaleuia ma nikita se keski tlamantli kej kinamiki, uan ma nimotemachi Jehová nechiknelia”. Eva katli tikijtojkej ipan párrafo 5, kiijtoua: “Ika tiotlak nochipa nijchiua kampeka nimoyoliljuis kenijkatsa Jehová kiita se keski tlamantli, nopa nechpaleuia ma nijpia tlaseuilistli uan kuali ma nijyolmati”.

14. ¿Kenijkatsa techpaleuia tlamaijtoli?

¹⁴ Nochipa ma timomaijtokaj (1 Tes. 5:17). Tlaj tijnekij timouampojchiuasej iuaya se akajya, moneki nochipa timonojnotsasej. Nojkia kiampa pano ika Jehová. Kema tikiljuiaj tlen timoyoliljuiaj, tlen tijyolmatij uan tlen techtekipachoua, tijnextiaj timotemachiaj ipan ya uan tijmatij ya techiknelia (Sal. 94:17-19; 1 Juan 5:14, 15). Yua, katli tikijtojkej ipan párrafo ome, kiijtoua: “Kema nimomaijtoua amo san nikiljuia Jehová tlen nijchijki ipan nopa tonali, nijtlapoua noyolo uan nikiljuia nochi tlen nijyolmati. Uan amo nikita kej se katli tlayakana kampa tekitij. Nopa nechpaleuia ma nikita Jehová kej se tetaj katli nelia kiniknelia ikoneuaj” (xikita recuadro “¿Tijpojtok?”).

15. ¿Kenijkatsa Jehová kinextia motekipachoua ipan sejse itekipanojkauaj?

¹⁵ Ma tiitstokaj ininuaya toikniuaj. Inijuantij elij kej se nemaktli tlen Jehová techmakatok (Sant. 1:17). ToTata Jehová kinextia techiknelia pampa techmakatok toikniuaj katli eli kej tochampoyouaj uan nochipa techikneliaj (Prov. 17:17). Kema  Pablo kintlajkuiljuilik se keskij toikniuaj, kintokaxtik se keskij katli kipaleuijtoyaj uan kiijtok nelia kiyolchikajtoyaj (Col. 4:10, 11). Jesús nojkia kiyolchikajkej iluikaeuanij uan maseualmej, uan tlauel kitlaskamatki tlen kichijkej (Luc. 22:28, 43).

16. ¿Kenijkatsa techpaleuiaj toikniuaj nojua ma timouampojchiuakaj ika Jehová?

¹⁶ ¿Tikintemouaj uan tikiniljuiaj toikniuaj ma techpaleuikaj? Kema tikiljuiaj se toikni katli kuali tlaneltoka nochi tlen techtekipachoua, amo kiijtosneki amo kuali titlaneltokaj, kiampa tijchiuaj pampa tijmatij tlauel techpaleuis. James, katli tikijtojkej ipan párrafo 5, kiijtoua: “Tlauel nechpaleuijtok nimouampojchiuas ininuaya toikniuaj katli kuali tlaneltokaj pampa inijuantij nechtlakakiliaj kema amo kuali nijyolmati uan nechilnamikiliaj tlauel nechikneliaj. Inijuantij kichiuaj ma nikita Jehová tlauel nechiknelia, uan kitekipachoua tlen nechpano”. ¡Tlauel techpaleuis tlaj tikinpiaj kuali touampoyouaj ipan tlanechikoli!

17, 18. ¿Ajkia moneki tijtlakakilisej uan kenke?

¹⁷ Satanás amo kineki ma tijtekipanokaj Jehová ika pakilistli uan kineki ma tijchiuakaj tlen amo kuali. Nojkia kineki ma timoiljuikaj Jehová amo techiknelia uan ma timoiljuikaj amo kinamiki ma techmakixtikaj pampa titlajtlakolejkej. Kej tikitstokej, Jehová tlauel techiknelia yeka tlen Satanás kiijtoua eli san se istlakatili.

¹⁸ Jehová tlauel techiknelia uan kinpatiita sejse itekipanojkauaj. Tlaj tijchiuaj tlen techiljuiaj, ya uan Jesús nochipa techiknelijtosej (Juan 15:10). Yeka, amo ma tijneltokakaj tlen Satanás kiijtoua yon tlen toyolo techiljuia, kema kinekij kichiuasej ma timoiljuikaj Jehová amo techiknelia. Ma tijchiuakaj kampeka tikitasej nopa kuajkuali tlamantli tlen Jehová kiita ipan sejse tlen tojuantij. Nojkia, ma timotemachikaj Jehová yolpaki kema kinita itekipanojkauaj.