1, 2. Xikijto ika se neskayotl kenijkatsa uelis tinemisej kej Jesús.

XIMOILJUI tia tikuajkuauiti iuaya se akajya katli kuali tlaixmati, uan teipa mitskajteua. Ta amo timomajmatia pampa timoketstiaj kampa tlaxiuipostejtiajki.

² Maske ipan ni tonali tiitstokej kampa maseualmej kichiuaj tlen amo kuali, Jehová nochipa techyakana. Uan ni kichiua ika Jesús, kiampa tojuantij uelis tijtokilisej kampa ya yaui (1 Ped. 2:21). Apóstol Pedro kiijtok Jesús eli kej nopa maseuali katli techyakantia kema tikuajkuauitij. Nama, ¿tlake kiijtosneki tijtokilisej? ¿Kenke moneki tijchiuasej? Uan, ¿kenijkatsa tijchiuasej?

3. ¿Tlake kiijtosneki tinejnemis sanse kej se akajya?

³ Ipan Biblia kema kiijtoua “nejnenki” kiijtosneki tlen kichijki se akajya ipan inemilis (Gén. 6:9; Prov. 4:26). Tlen kichiua se maseuali eli kej kema se akajya nestia kampa moketski. Yeka kema tojuantij tijchiuaj tlen se akajya kichiua, kejuak tinejnentiauij kampa ya nejnenki.

4. ¿Tlake kiijtosneki tinemisej sanse kej Jesús?

⁴ Kema tikijtouaj tinemisej kej Jesús, kineki kiijtos tijchiuasej kej ya kichijki. Ipan nopa texto kampa mokixtijtok ni tlamachtili, apóstol Pedro kiijtok kenijkatsa Jesús  kinextik uelis tikijiyouisej tlen techpano. Nojkia, onka sekinok tlamantli tlen Jesús kichijki tlen nojkia tlauel techpaleuia (1 Ped. 2:18-25). Nochi tlen Jesús kiijtok uan kichijki uelis techpaleuis.

5. Xikixtoma kenke uelis tinemisej sanse kej Jesús maske tielij titlajtlakolejkej.

⁵ Nochi tielij titlajtlakolejkej. Kema Pedro kiijtok tinejnemisej sanse kej Jesús, amo kinejki kiijtos amo kema timokuapolosej. Apóstol Juan kiijtok moneki tijchiuasej kampeka tijchiuasej sanse kej Jesús. Yeka, kema tijchiuaj kampeka kiampa tijchiuasej, nojkia tinejnemij “keja yaja nejnenki” (1 Juan 2:6).

6, 7. ¿Kenke kema tijchiuaj sanse kej Jesús techpaleuia ma tijnechkauikaj Jehová?

⁶ Kema tinemij sanse kej Jesús, timonechkauiaj ika Jehová. ¿Kenke? Se. Jesús kinextik kenijkatsa uelis timonejnemiltisej uan kiampa tijyolpakiltisej Jehová (Juan 8:29). Yeka, tlaj timonejnemiltiaj sanse kej Jesús, tijyolpakiltisej Jehová uan timotemachisej ya monechkauis touaya pampa kuali timouampojchijtosej (Sant. 4:8).

⁷ Ome. Jesús kichijki sanse kej Jehová yeka uelki kiijtok: “Yajaya tlen nechitstok, ya kiitstok noTata” (Juan 14:9). Tlaj tijnekij tijchiuasej kej Jehová, uajka moneki tijnextisej nopa kuajkuali tlamantli kej Jesús kinextik. Ya kiniknelik maseualmej katli kipiayayaj lepra, kiyolmatki tlen kiyolmatiyaya se siuatl katli tlauel mokokouayaya, nojkia kintlasojtlak nopa maseualmej katli mijkej ininchampoyouaj (Mar. 1:40, 41; 5:25-34; Juan 11:33-35). Tlaj tojuantij tijchiuaj kampeka tijchiuasej sanse kej Jehová, techpaleuis ma tijnechkauikaj.

8. Xikijto kenke kema tijchiuaj sanse kej Jesús techpaleuia tijtlanisej Tlaltipaktli.

 ⁸ Tlaj tinemij sanse kej Jesús amo tijchiuasej tlen maseualmej kichiuaj. Kema Jesús nechka kimiktiskiaj uelki kiijtok: “Nijtlantok ni Tlaltipaktli” (Juan 16:33). Jesús kiampa kiijtok pampa amo mosentlalik ipan tlen onkayaya ipan Tlaltipaktli uan amo kichijki yon moiljuik kej maseualmej monejnemiltiyayaj. Nojkia, nochipa kiilnamiktoya kenke ualajtoya ipan Tlaltipaktli: pampa kinejki kiuejkapantlalis Jehová itoka uan nojkia kinextis san ya kinamiki tlanauatis. ¿Kenijkatsa techpaleuia? Kema amo timonejnemiltiaj o amo tijchiuaj kej maseualmej kichiuaj. Yeka, tlaj tijchiuaj sanse kej Jehová uan Jesús, techpaleuis tijtlanisej Tlaltipaktli (1 Juan 5:5).

9. ¿Tlake uelis tijchiuasej uan kiampa tijpiasej nemilistli tlen axkema tlamis?

⁹ Tlaj tinemij sanse kej Jesús uelis tijpiasej nemilistli tlen axkema tlamis. Se telpokatl katli tlauel tlatominpiayaya kitlatsintoki Jesús tlake monekiyaya kichiuas uan kiampa kipias nemilistli tlen axkema tlamis. Jesús kiiljuik: “Xiuala uan xinechtokili” (Mat. 19:16-21). Jesús kiniljuik se keskij judíos katli amo kineltokayayaj tlaj ya eliyaya Mesías: ‘Notokilijkauaj nechtosmachiliaj uan nikinixmati uan inijuantij, kena, nechtokiliaj. Inijuantij kipiasej nemilistli tlen axkema tlamis’ (Juan 10:24-29). Nicodemo, se katli kitekimakatoyaj ipan nopa ueyi tlasentilistli kinejki kimatis tlen Jesús tlamachtiyaya. Jesús kiiljuik tlaj tlaneltoka uelis kipias nemilistli tlen axkema tlamis (Juan 3:16). Tlaj tojuantij titlaneltokaj ipan Jesús uan tijchiuaj tlen ya kichijki uan tlen kiijtok, techpaleuis tijpiasej nemilistli tlen axkema tlamis (Mat. 7:14).

10. Kej kiijtoua Juan 17:3, ¿tlake moneki tijchiuasej uan kiampa kuali tikixmatisej Jesús?

¹⁰ Tlaj tijnekij tijchiuasej sanse kej Jesús, achtoui moneki kuali tikixmatisej (xijpoua Juan 17:3). Nojkia, moneki tijchiuasej kampeka tijmatisej tlen ya moiljuia, tlen tlanauatia uan kuali tikixmatisej nopa kuajkuali tlamantli tlen ya kinextik. Yeka, tlaj tijpiaj miak xiuitl tijtekipanojtokej Jehová o amo, nochi moneki tijchiuasej kampeka nojua tikinixmatisej Jehová uan Jesús.

11. ¿Tlake moixtoma ipan Mateo, Marcos, Lucas uan Juan?

¹¹ Jehová tlauel techiknelia, yeka techmakatok nopa naui amochtli kampa kamanalti tlen Jesús: Mateo, Marcos, Lucas  uan Juan. Nopaya techpaleuia ma tijmatikaj tlen Jesús kichijki kema itstoya ipan Tlaltipaktli. Nojkia, techpaleuia tijmatisej tlen Jesús kiijtok, tlen kichijki uan tlen kiyolmatki. Ipan nopa naui amochtli techpaleuia tikitasej tlake kichijki Jesús kema kitlaijiyouiltijkej (Heb. 12:3). Tlaj timoyoliljuiaj ipan nopa naui amochtli, techpaleuis kuali ma tikixmatikaj Jesús, kiampa uelis tijchiuasej uan timoketstiasej kampa ya moketstiajki.

12. ¿Tlake uelis tijchiuasej uan kiampa techpaleuis nopa naui amochtli?

¹² Tlaj tijnekij ma techpaleui nopa naui amochtli, amo kinamiki san tijpouasej. Moneki tijkixtisej tonali uan kiampa kuali timomachtisej uan timoyoliljuisej tlen nopaya kiijtoua (nojkia xikita Josué 1:8). Ma tikitakaj ome tlamantli tlen techpaleuis ma timoyoliljuikaj ipan tlen kiijtoua Mateo, Marcos, Lucas uan Juan. Nojkia, tikitasej kenijkatsa uelis tijchiuasej ipan tonemilis.

13. ¿Tlake uelis techpaleuis kuali timoyoliljuisej ipan se tlapoualistli tlen nopa naui amochtli?

¹³ Se, kema tijpouaj nopa naui tlapoualistli moneki timonejneuilisej. Yeka, kejuak ma tijkakikaj, ma timonejneuilikaj uan kejuak ma tikijnekuikaj tlen panoyaya ipan nopa tonali. Nojkia, uelis techpaleuis sekinok amochtli tlen tijpiaj, tlen achtoui uan teipa moijkuilok tlen nopa tlapoualistli tlen tijpouaj. Nojkia uelis tijtemosej sekinok tlamachtili, uelis tlen kichiuayayaj maseualmej, tlen onkayaya ipan nopa altepetl, uan tlen achtoui uan tlen teipa panok. Tlaj tijpouaj se tlen nopa naui amochtli, ma tikitakaj tlake kiijtoua nopa sekinok pampa uelis katli kiijkuilok nopa amochtli amo kiijtok se keski tlamantli tlen Jesús kichijki.

14, 15. ¿Tlake techpaleuis uan kiampa tijchiuasej tlen kiijtoua nopa naui amochtli?

¹⁴ Ome, tijchiuasej tlen kiijtoua nopa tlapoualistli (Juan 13:17). Kema ya  timomachtijtosej se tlapoualistli, ma timotlatsintokikaj: “¿Tlake techmachtia? ¿Kenijkatsa uelis tijtekiuisej uan kiampa tikinpaleuisej sekinok?”. Nojkia, ma timoiljuikaj ajkia ueliskia kipaleuis, uan teipa uelis tikiljuisej tlen tijyekojtokej kema tijpojkej se tlapoualistli.

¹⁵ Ma tikitakaj kenijkatsa ueliskia tijchiuasej ni ome tlamantli. Tikitasej nopa tlapoualistli tlen nopa kaualtoaui katli Jesús kiitak ipan nopa teokali.

16. Xikixtoma tlen kiijtoua Marcos 12:41.

¹⁶ Ma timonejneuilikaj ipan nopa tlapoualistli (xijpoua Marcos 12:41). Ma timoiljuikaj tiitstokej ipan nisán 11, xiuitl 33. Kema nechka kimiktiskiaj Jesús, ya tlamachtijtoya ipan teokali. Judíos katli tlayakanayayaj ipan nopa religión tlauel kualantoyaj, yeka kichiuiliyayaj miak tlajtlanili pampa moiljuiyayaj amo ueliskia kinnankilis (Mar. 11:27-33; 12:13-34). Jesús yajki kampa siuamej ininkalte. Nopaya eltoya kampa kitemayayaj tomij. Jesús moseuito nechka nopaya uan kinitak kenijkatsa maseualmej kitlaliyayaj inintomij. Nojkia, kinitayaya katli tlatominpiayayaj kitlaliyayaj miak tomij. Jesús itstoya nechka, yeka ueliyaya kikaki kema kitlaliyayaj inintomij.

17. Kej kiijtoua Marcos 12:42, ¿tlake kichijki nopa siuatl?

¹⁷ (Xijpoua Marcos 12:42). Teipa, Jesús kiitak “se kaualtoaui tlen nelteikneltsi” (Luc. 21:2). Ni siuatl ouij kej itstoya pampa amo kipiayaya miak tomij tlen ika mopanoltiskia. Maske kiampa itstoya, ya monechkauik kampa eltoya nopa pilkuakajontsi uan kitlalik nopa tomij. Kema kitlalik nopa omej piltomintsitsij, amo chikauak kakistik pampa ya nojkia amo kinekiyaya sekinok ma kiitakaj. Jesús kena kimatki tlen nopa kaualtoaui kitlalijtoya, eliyaya ome leptones. Nopa tomij tlen kitlalik, amo kipiayaya miak ipati pampa amo kiaxiliskia kikouasej yon se piltototsi.

18. Kej kiijtoua Marcos 12:43, 44, ¿tlake kiijtok Jesús kema nopa siuatl kitlalik nopa ome piltomintsitsij?

¹⁸ (Xijpoua Marcos 12:43, 44). Jesús mosentlachilik kema kiitak nopa siuatl kitlalik nopa ome piltomintsitsij, yeka kiniljuik itokilijkauaj: “Nelia niinmechiljuia, ni kaualtoaui teikneltsi kitlalijtok más tlen nochi sekinok tlen kitlalijtokej tomij ipan nopa [pilkuakajontsi]”. Uan nojkia kiniljuik itokilijkauaj katli tlatominpiayayaj “kitemayayaj tlen san mokauayaya, pero yaja tlauel teikneltsi, kitenki nochi tlen iyojtsi kipixtoya”. Kema nopa siuatl kitlalik nopa ome piltomintsitsij, kinextik motemachiyaya Jehová nochipa kimokuitlauiskia (Sal. 26:3).

19. ¿Tlake techmachtia tlen Jesús kiijtok ika tlen kichijki nopa siuatl?

¹⁹ Tijchiuasej tlen timomachtiaj. Ma timotlatsintokikaj: “¿Tlake techmachtia tlen Jesús kiijtok ika tlen kichijki nopa siuatl?”. Ma timoiljuikaj, ya kinektoskia temakas miak tomij. Maske amo uelki kiampa kichiua, ya kichijki kampeka temakas tlen kipixtoya. Jesús kimatiyaya Jehová tlauel kiyolpakiltik tlen kichijki ni siuatl. Kej tikitaj, Jehová tlauel yolpaki kema tijchiuaj o tijmakaj se tlamantli ika nochi toyolo (Mat. 22:37; Col. 3:23). Nojkia, yolpaki kema tijkauaj tonali, totomij o tochikaualis, uan kiampa tiauij tlanechikoli o titlajtolmoyauaj.

20. ¿Kenijkatsa uelis tijtekiuisej tlen tijyekojkej ipan nopa tlapoualistli tlen nopa kaualtoaui?

 ²⁰ Ma timoiljuikaj kenijkatsa uelis tijtekiuisej nopa tlapoualistli tlen nopa siuatl kema monekis tikinyolchikauasej se keskij toikniuaj. Ma timoiljuikaj, ¿tikixmatij se tosiuaikni katli moyolkokoua pampa moiljuia ayokmo tlauel tlajtolmoyaua pampa uelis ya ueyi o uelis pampa mokokoua? ¿Tikixmatij se toikni katli kipia se kokolistli tlen tlauel ouij uan yeka moyolkokoua pampa ayokmo ueli yaui tlanechikoli? Tojuantij uelis tikinyolchikauasej ika tlen tikiniljuisej (Efes. 4:29). Ma tikinpouilikaj tlen nopa tlapoualistli tlen kichijki nopa siuatl uan ma tikinilnamikilikaj kenijkatsa Jehová yolpaki ika tlen inijuantij uelij kichiuaj (Prov. 15:23; 1 Tes. 5:11). Tlaj kiampa tijchiuaj, uajka tijnextisej kejuak timoketstiauij kampa Jesús moketstiajki.

21. ¿Tlake timosentlalijtok tijchiuas?

²¹ Tlauel tijtlaskamatij pampa ipan Mateo, Marcos, Lucas uan Juan kiijtoua tlen Jesús kichijki kema itstoya ipan Tlaltipaktli uan nojkia techpaleuia tijchiuasej kej ya kichijki. Tlauel techpaleuis nopa naui tlapoualistli tlaj timomachtisej toselti o ininuaya tochampoyouaj. Yeka, tlaj tijnekij ma techpaleui tlen nopaya kiijtoua, moneki tijchiuasej kampeka timonejneuilisej uan tikitasej kenijkatsa uelis tijchiuasej ipan tonemilis. Nojkia, moneki tikitasej tlake techmachtia tlen nopaya tijyekouaj, tijchiuasej kej Jesús kichijki uan tijkakisej tlen ya kiijtok. Ipan tlamachtili 15, tikitasej tlake uelis tijyekosej tlen Jesús kiijtok kema kikuapilojtoyaj.