¿Tijmajtoya?
¿Kenke se keskij itlateuijkauaj David amo eliyayaj israeleuanij?
SE Keskij itlateuijkauaj David amo eliyayaj israeleuanij, kej “Selec tlen euayaya altepetl Amón”, “Urías tlen eliyaya se heteo tlakatl” uan “Itma tlen euayaya altepetl Moab” (1 Crón. 11:39, 41, 46). a Nojkia itstoyaj keretitas, peletitas uan guititas (2 Sam. 15:18, TNM). Uelis nopa keretitas uan peletitas eliyayaj ininuikaljuaj filisteos (Ezeq. 25:16). Nopa guititas elij katli euayayaj altepetl Filistea tlen tlali Gat (Jos. 13:2, 3; 1 Sam. 6:17, 18).
¿Kenke David kikajki katli amo eliyayaj israeleuanij ma elikaj itlateuijkauaj? Pampa motemachiyaya amo kema kitlauelkauaskiaj ya yon Jehová. Nopa diccionario The New Interpreter’s Dictionary of the Bible kiijtoua nopa keretitas uan peletitas “amo kitlauelkajkej David kema kiixnamijki tlaouijkayotl kema ya tlanauatijtoya”. ¿Kenke kiampa tikijtouaj? Pampa kema nochi israeleuanij kitlauelkajkej David uan kitokilijkej Seba, katli kinekiyaya kitekikixtilis David, nopa keretitas uan peletitas kipaleuijkej David uan kitsontlamiltijkej Seba uan katli kitokilijkej (2 Sam. 20:1, 2, 7). Se tonali kema Adonías, ikone David, kinejki kitekikixtilis itata, nopa keretitas uan peletitas amo kitlauelkajkej David uan kipaleuijkej Salomón ma eli tlanauatijketl pampa kimatiyayaj Jehová kitlapejpenijtoya (1 Rey. 1:24-27, 38, 39).
Seyok tlakatl katli amo eliyaya israelejketl uan amo kema kitlauelkajki David elki Itai katli euayaya Gat. Ya uan 600 tlakamej kipaleuijkej kema seyok ikone David, katli itoka Absalón, kiixnamijki uan kinejki israeleuanij ma kitekitlalikaj kej tlanauatijketl. David kiiljuik Itai amo monekiyaya yas tlateuiti pampa ya amo eliyaya israelejketl. Pero Itai kinankilik: “Na nijtestigojketsa Toteko Dios, para kampa ueli ta tias, na nias mouaya, yonke nimikis mouaya o noja niitstos” (2 Sam. 15:6, 18-21).
Itai amo kema kitlauelkajki David, nopa tlanauatijketl katli Jehová kitlapejpenijtoya.
Maske nopa keretitas, peletitas uan guititas amo eliyayaj israeleuanij, kimatiyayaj Jehová eli Dios katli melauak uan kitlepanitayayaj David pampa kimatiyayaj toTeotsij kitlapejpenijtoya. David tlauel kuali kiyolmatki pampa ni tlakamej amo kema kitlauelkajkej.
a Nopa tlanauatili tlen ijkuilijtok ipan Deuteronomio 23:3-6 kiijtouayaya yon se amonita o moabita tlakatl ueliskia itstos ininuaya israeleuanij. Uelis ni kiijtosneki amo ueliskiaj elisej kej se israelejketl pampa amo kiseliskiaj se keski tlamantli tlen inijuantij kipiayayaj. Pero amo kiijtouayaya amo ueliskiaj mouikasej yon mochantisej nopaya. Ipan amochtli Perspicacia para comprender las Escrituras, xijtemo kampa kiijtoua “Ammonitas” uan teipa xijtemo kampa kiijtoua “Se casan con israelitas”.
