1. ¿Tlake kineki Jehová ma tijchiuakaj?

 KATLI mosenkajtokej tlauel yolpakij kema tlakati se ininpilkone, maske tlauel yolpakij amo nochipa kinekij ma eli se pilkonetsi, uan tlaj kiitaskiaj amo moskaltia motekipachoskiaj. Jehová nojkia tlauel yolpaki kema kiita kejuak peua timoskaltiaj pampa kuali titlaneltokatiauij. Pero amo kineki nochipa ma tielikaj kejuak tikonetsitsij ipan totlaneltokilis (1 Cor. 3:1). Jehová kineki nochi Cristo itokilijkauaj ma tielikaj kej tlakamej katli ya uejueyij uan kuali tlaneltokaj (1 Cor. 14:20).

2. ¿Tlake tlajtlanili tijnankilisej ipan ni tlamachtili?

² Ipan ni tlamachtili tijnankilisej ni tlajtlanili: ¿Tlake kiijtosneki tielisej kej tlakamej katli ya uejueyij uan kuali tlaneltokaj? ¿Kenke moneki tijchiuasej kampeka nojua kuali titlaneltokasej? ¿Kenke moneki timomachtisej tlamachtili tlen ouij? Uan, ¿kenke amo kinamiki timoiljuisej ayokmo moneki tijchiuasej kampeka kuali titlaneltokasej?

¿TLAKE KIIJTOSNEKI TIELISEJ KEJ TLAKAMEJ KATLI YA UEJUEYIJ?

3. ¿Tlake kiijtosneki tielis se Cristo itokilijka katli ya ueyi?

³ Kema Biblia kiijtoua se Cristo itokilijka moneki elis kej se tlakatl katli ya ueyi uan tlalnamiki, amo kineki kiijtos moneki kipias miak xiuitl. Nopa tlajtoli griego katli “ya uejueyij”, nojkia kiijtosneki “motlantok”, “senkistok kuali” uan “asitok” (1 Cor. 2:6). a Uajka, tielij Cristo itokilijkauaj katli ya uejueyij, kema más kuali titlaneltokaj. Uajka, kema se akajya ya kuali  tlaneltoka, ¿ayokmo moneki kichiuas kampeka? Amo, moneki nochipa tijchijtosej kampeka nojua kuali titlaneltokasej (1 Tim. 4:15). Pero, ¿kenijkatsa uelis tijmatisej tlaj se toikni kuali tlaneltoka maske ya ueyi o nojua telpokatl?

4. ¿Kenijkatsa elij Cristo itokilijkauaj katli kuali tlaneltokaj?

⁴ Cristo itokilijkauaj katli kuali tlaneltokaj, kichiuaj nochi tlen Jehová kinnauatia uan amo san tlen inijuantij kinekij. Maske elij tlajtlakolejkej uan mokuapolouaj kichiuaj kampeka monejnemiltisej uan moiljuisej kej Jehová kipaktia. Kinextiaj kuajkuali tlamantli ipan ininnemilis uan kichiuaj kampeka moiljuisej kej Jehová (Efes. 4:22-24). Kuali kitlapejpeniaj tlen kichiuasej pampa moyakanaj ika Jehová itlanauatiljuaj uan ika textos tlen eltok ipan Biblia, yeka amo moneki kipiasej se ueyi lista kampa kiijtos tlake moneki kichiuasej. Nojkia kema kitlapejpeniaj se tlamantli kichiuaj kampeka kiampa kichiuasej (1 Cor. 9:26, 27).

5. ¿Tlake uelis kinpanos katli amo kuali tlaneltokaj? (Efesios 4:14, 15).

⁵ Cristo itokilijkauaj katli amo kuali tlaneltokaj, uelis nima kineltokasej tlen kiijtouaj katli tlakajkayauaj. O kineltokasej tlen maseualmej uan tlen apóstatas kiijtouaj (xijpoua Efesios 4:14, 15). b Uelis tekokoliaj, mokualaniaj ininuaya sekinok, nima moyolkokouaj uan kichiuaj tlen kinyoltilana (1 Cor. 3:3).

6. ¿Tlake neskayotl techpaleuia ma tijkuamachilikaj kenijkatsa ika yolik uelis kuali titlaneltokasej? (Nojkia xikita tlaixkopinkayomej).

⁶ Kej ya tikitakej Biblia kiijtoua kema se akajya kuali tlaneltokatia eli sanse kej kema se akajya moskaltijtia. Onka miak tlamantli tlen se konetl amo kimati, yeka moneki ma kimokuitlaui se katli ya ueyi. Se neskayotl, kema se tenaj kiixkotona se calle o carretera ika ipilsiuapil, moneki kimaitskis. Pero kema nopa siuapil moskaltijtias uelis inana kikauas iselti ma kiixkotona pero nojua kiilnamikilis moneki tlajtlachias. Kiampa kema nopa ichpokatl ya motlantos, iselti uelis momokuitlauis. Nojkia kiampa pano ika totlaneltokilis. Katli amo kuali tlaneltokaj moneki sekinok katli kuali tlaneltokaj ma kinpaleuikaj  kuali kitlapejpenisej tlen kichiuasej uan kiampa amo kiixpanosej Jehová. Pero katli kuali tlaneltokaj ininselti moyoliljuiaj ipan textos tlen kinpaleuia ma kikuamachilikaj kenijkatsa Jehová kiita se tlamantli uan kiampa kuali kitlapejpeniaj tlen kichiuasej.

7. ¿Katli kuali tlaneltokaj, nojkia moneki sekinok ma kinpaleuikaj?

⁷ Kemantika, katli kuali tlaneltokaj nojkia kiniljuiaj sekinok ma kinpaleuikaj. Pero se katli amo kuali tlaneltoka uelis nochipa kineki sekinok ma kiiljuikaj tlen moneki kichiuas. Uan se katli kuali tlaneltoka kikaua ma kipaleuikaj toikniuaj katli miak xiuitl kitekipanojtokej Jehová uan kuali tlaneltokaj, pero nochipa kiilnamiki “sejse tlen tojuantij moneki kiuikas itlamamal” (Gál. 6:5, TNM).

8. ¿Kenke tikijtouaj amo nochi Cristo itokilijkauaj katli kuali tlaneltokaj elij sanse?

⁸ Amo nochi maseualmej sanse tielij. Uan Cristo itokilijkauaj katli kuali tlaneltokaj nojkia amo sanse kuajkuali tlamantli kinextiaj. Sekij tlauel tlalnamikij, sekij amo majmauij, sekij kinpaktia temakasej tlen kipiaj uan sekij nima kikuamachiliaj tlen sekinok kiyolmatij. Uelis omej toikniuaj katli kuali tlaneltokaj amo sanse kitlapejpenisej tlen kichiuasej, pampa inintlalnamikilis kinkauilis kiampa ma kichiuakaj. Pero yon se kiixpano tlen Biblia kiijtoua. Yeka, yon se tlen inijuantij kiijtoua amo kuali tlen kitlapejpenik nopa seyok, uan omej kichiuaj kampeka kuali mouikasej (Rom. 14:10; 1 Cor. 1:10).

¿TLAKE MONEKI TIJCHIUASEJ PARA KUALI TITLANELTOKASEJ?

9. ¿Kenke tikijtouaj amo aka uelis kuali tlaneltokas san pampa miak xiuitl kitekipanojtok Jehová?

⁹ Se konetl iselti moskaltijtia uan tijmatij teipa motlamis. Pero amo kiampa pano ika totlaneltokilis, pampa maske panotia tonali, amo kiijtosneki ya kuali titlaneltokasej. Ma timoiljuikaj ipan toikniuaj tlen Corinto, inijuantij kiselijkej nopa kuali tlamachtili, moatsonpoliuiltijkej, toTeotsij kinmakak ichikaualis uan kiyekojkej miak tlamantli tlen apóstol Pablo kinmachtik (Hech. 18:8-11). Pero maske ya panotoya se keski xiuitl kema moatsonpoliuiltijtoyaj, miakej tlen inijuantij ayamo kuali tlaneltokayayaj (1 Cor. 3:2). ¿Tlake uelis tijchiuasej uan kiampa amo techpanos kej inijuantij?

10. ¿Tlake moneki tijchiuasej para kuali titlaneltokasej? (Judas 20).

¹⁰ Tlaj tijnekij kuali titlaneltokasej, achtoui moneki tijnekisej kiampa tijchiuasej. Katli kinekij elisej kej konemej, amo kema kuali tlaneltokasej (Prov. 1:22). Amo tijnekij tielisej kej se katli ya ueyi uan nojua kineki itatauaj ma kiiljuikaj tlen moneki kichiuas. Tojuantij moneki tijchiuasej kampeka kuali titlaneltokatiasej (xijpoua Judas 20). Tlaj tijchijtok kampeka kuali titlaneltokas, xikiljui Jehová ma mitspaleui uan kiampa tijnekis tijchiuas tlen ya kineki uan ma mitsmaka chikaualistli para kiampa tijchiuas (Filip. 2:13).

11. ¿Tlake techmakatok Jehová para kuali titlaneltokasej? (Efesios 4:11-13).

¹¹ Jehová techpaleuia kuali ma titlaneltokakaj. Techmakatok ueuejtlakamej uan toikniuaj katli techmachtiaj para “tiitstosej tiuejueyij tlakamej ipan Cristo. Uan [ . . . ] timoskaltijtiasej hasta tijpiasej se nemilistli keja Cristo kipia” (xijpoua Efesios 4:11-13). Nojkia techmaka ichikaualis, tlen techpaleuia ma tijpiakaj “itlalnamikilis Cristo” (1 Cor. 2:14-16). Nojkia kichijki ma moijkuilo nopa naui Evangelios tlen techpaleuia ma tijmatikaj nochi tlen Jesús kichijki kema itstoya ipan Tlaltipaktli. Tlaj timoiljuiaj, tikamanaltij uan  tijchiuaj ipan tonemilis kej Jesús, techpaleuis kuali ma titlaneltokakaj.

TLAUEL IPATI TIMOMACHTISEJ TLAMACHTILI TLEN OUIJ

12. ¿Tlake eli nopa tlamachtili tlen amo ouij tlen Cristo?

¹² Tlaj tijnekij kuali titlaneltokasej, amo san moneki tijmajtosej nopa tlamachtili tlen amo ouij tlen Jesús. Se keski tlen nopa tlamachtili eli: timoyolkuepas, titlaneltokas, timoatsonpoliuiltis uan tijneltokas moyolkuisej katli miktokej (Heb. 6:1, 2). Nochi Cristo itokilijkauaj moneki kikuamachilisej ni tlamachtili. Yeka, apóstol Pedro kiijtok ni tlamantli kema tlajtolmoyajki ipan Pentecostés (Hech. 2:32-35, 38). Para tielisej Cristo itokilijkauaj moneki tijneltokasej ni tlamachtili. Yeka, Pablo kiijtok tlaj amo tijneltokaj moyolkuisej katli miktokej, kiijtosneki amo titlaneltokaj (1 Cor. 15:12-14). Pero amo san moneki tijmajtosej ni tlamachtili.

13. Kej kiijtoua Hebreos 5:14, ¿tlake moneki tijchiuasej tlaj tijnekij ma techpaleui nopa tlamachtili tlen ouij? (Nojkia xikita tlaixkopinkayomej).

¹³ Pero nojkia tijpiaj tlamachtili tlen ouij. Nopa tlamachtili tlen ouij amo kiijtosneki san timomachtisej Jehová itlanauatiljuaj, nojkia timomachtisej textos tlen techpaleuia ma tijkuamachilikaj kenijkatsa moiljuia Jehová. Tlaj tijnekij ma techpaleui nopa tlamachtili, moneki timomachtisej Biblia, timoyoliljuisej uan tijchiuasej kampeka tijchiuasej ipan tonemilis tlen timomachtiaj. Nopa techpaleuis ma tijtlapejpenikaj tlen kiyolpakiltis Jehová (xijpoua Hebreos 5:14). c

14. ¿Kenijkatsa Pablo kinpaleuik kuali ma tlaneltokakaj toikniuaj tlen Corinto?

¹⁴ Cristo itokilijkauaj katli amo kuali tlaneltokaj kimatij ouij kitlapejpenisej se tlamantli tlaj ipan Biblia amo kiijtoua tlake moneki kichiuasej. Kema kiampa pano, sekij uelis moiljuisej uelis kichiuasej tlen inijuantij kinekisej uan sekij uelis kiijtosej ma kitlalikaj se tlanauatili maske amo moneki. Se neskayotl, Cristo itokilijkauaj tlen Corinto kiiljuijkej Pablo ma kiijto tlaj ueliskia kikuasej nopa tlakualistli tlen kitlaliyayaj ininixpa teotsitsij. Pablo amo kiniljuik tlake monekiyaya kichiuasej, ya  kinixtomilik sejse moneki kitlapejpenis tlen itlalnamikilis kikauas ma kichiua. Kiniljuik se keski textos tlen kinpaleuiskia ma kitlapejpenikaj tlen amo kiyolkokoskia inintlalnamikilis yon tlen sekinok (1 Cor. 8:4, 7-9). Kiampa kinpaleuik kuali ma tlaneltokakaj uan kuali ma kitekiuikaj inintlalnamikilis, kiampa kuali kitlapejpeniskiaj tlen kichiuaskiaj, uan amo kinkauaskiaj sekinok ma kitlapejpenikaj tlen kichiuasej o kitemojtinemiskiaj se tlanauatili.

15. ¿Kenijkatsa Pablo kinpaleuik Hebreos nojua kuali ma tlaneltokakaj?

¹⁵ Nojkia tijyekouaj seyok tlamantli tlauel ipati kema tikita tlen Pablo kiijtok kema kintlajkuiljuilik Hebreos. Miakej ayokmo kichiuayaya kampeka kuali tlaneltokasej, yeka Pablo kiniljuik: “Initstokej keja konemej tlen ya moneki tlakuasej, pero nojua kinekij leche” (Heb. 5:12). Amo kiseliyayaj nopa yankuik tlamachtili tlen Jehová kinmakayaya ipan tlanechikoli (Prov. 4:18). Se neskayotl, miakej Cristo itokilijkauaj katli eliyayaj judíos, nojua kinekiyayaj ma mochiua tlen kiijtouayaya iTlanauatil Moisés, maske ya panotoya se 30 xiuitl ika motemaktilijtoyaj Jesús (Rom. 10:4; Tito 1:10). Ya panotoya miak xiuitl uan monekiyaya kikuamachilijtoskiaj nopa tlamachtili. Pablo kinekiyaya kinpaleuis ma kikuamachilikaj tlamachtili tlen ouij, tlen Dios kichijki ma kiijkuilo. Nopa tlamachtili kinpaleuiskia ma kikuamachilikaj kej nama kiueyichiuaskiaj Jehová eliyaya más kuali, kinpaleuiskia amo ma majmauikaj uan nojua ma tlajtolmoyauakaj maske judíos kintlatsakuiltiskiaj (Heb. 10:19-23).

NOJUA XIJCHIUA KAMPEKA KUALI TITLANELTOKAS

16. ¿Tlake moneki tijchiuasej maske ya kuali titlaneltokaj?

¹⁶ Amo san moneki kuali titlaneltokasej, moneki tijchiuasej kampeka nochipa kiampa tijchijtosej. Yeka, amo kinamiki timoiljuisej ya kuali titlaneltokaj (1 Cor. 10:12). Moneki ajachika ma tikitakaj tlaj nojua kuali titlaneltokatiauij (2 Cor. 13:5).

17. ¿Kenijkatsa amatlajkuiloli Colosenses techmachtia moneki nochipa kuali titlaneltokatosej?

¹⁷ Ipan nopa amatlajkuiloli tlen Pablo kintitlanilik toikniuaj tlen Colosas, kiijtok moneki  kuali titlaneltokasej uan nochipa kiampa tijchijtosej. Maske inijuantij ya kuali tlaneltokayayaj, Pablo kiniljuik monekiyaya momokuitlauisej, kiampa amo moiljuiskiaj kej sekinok maseualmej (Col. 2:6-10). Uan Epafras katli kuali kinixmatiyaya toikniuaj tlen Colosas, nochipa kitlajtlaniyaya Jehová ma kinpaleui kuali ma tlaneltokatokaj (Col. 4:12). ¿Tlake techmachtia? Tikitaj Pablo uan Epafras kuali kimatiyayaj uelis kuali titlaneltokasej tlaj tijchiuaj kampeka uan tlaj tijkauaj Jehová ma techpaleui. Inijuantij kinekiyayaj toikniuaj tlen Colosas kuali ma tlaneltokatokaj maske kiixnamikiyayaj tlaouijkayotl.

18. ¿Tlake ueliskia kipanos se toikni katli kuali tlaneltoka? (Nojkia xikita tlaixkopinkayotl).

¹⁸ Pablo kiniljuik toikniuaj hebreos, maske se akajya kuali tlaneltoka, teipa uelis ayokmo kuali tlaneltokas uan Jehová ayokmo kuali kiitas. Uelis mochiuas tlauel yoltetik, ayokmo moyolkuepas uan Jehová ayokmo uelis kitlapojpoljuis. Pero hebreos amo tlauel mouejkatlalijtoyaj tlen Jehová (Heb. 6:4-9, TNM). Uan ipan ni tonali, ¿tlake pano ika katli ayokmo kitekipanouaj Jehová o ika katli kinkixtijtokej tlen tlanechikoli pero teipa moyolkuepaj? Katli amo moueyimatij uan moyolkuepaj, kinextiaj amo eli kej nopa maseualmej tlen Pablo kiijtok. Pero kema sampa tlakuepiliaj, moneki kikauasej Jehová ma kinpaleui (Ezeq. 34:15, 16). Yeka, ueuejtlakamej uelis kiiljuisej se toikni katli kuali tlaneltoka, ma kinpaleui sampa kuali ma mouampojchiuakaj iuaya Jehová.

19. ¿Tlake kinamiki timosentlalisej tijchiuasej?

¹⁹ Tlaj ta tijchijtok kampeka kuali titlaneltokas, nojua kiampa xijchijto. Nojua ximomachti nopa tlamachtili tlen ouij uan xijchiua kampeka mojmostla timoiljuis kej Jehová moiljuia. Uan tlaj ya kuali titlaneltoka, xijchiua kampeka nochipa kiampa tijchijtos.