1. ¿Tlake eli nopa paraíso espiritual, uan tlake kinamiki timosentlalisej tijchiuasej?

 IPAN ni tonali, miakej maseualmej itstokej kampa tlauel tlayejyektsi uan nopaya kichiuaj tlen kuali. Nochi kuali mouikaj ininuaya sekinok uan mosentlalijtokej nochipa itstosej nopaya. Uan kinekij sekinok nojkia ma itstokaj ininuaya. ¿Kanke eli kampa tlauel tlayejyektsi? Ipan paraíso espiritual. a

2. ¿Kenke timosentlachiliaj pampa onka se paraíso espiritual?

² Maske ipan ni tonali maseualmej tlauel mokualankaitaj, uan kichiuaj miak tlamantli tlen amo kuali, Jehová kichijtok ma tiitstokaj kampa nochi kuali tijyolmatij (1 Juan 5:19; Apoc. 12:12). Ya kimati kenijkatsa Satanás uan nochi tlen kinauatia, kichiua tlauel ma titlaijiyouikaj. Jehová tlauel techiknelia, yeka kichijtok ma tiitstokaj kampa uelis tijtekipanojtosej ika pakilistli. Biblia kiijtoua ipan paraíso espiritual uelis timomanauisej uan eli “keja se xochimili tlen nochipa kiatekijtokej” (Is. 4:6; 58:11). Maske tiitstokej ipan itlamia tonali tlen tlauel ouij, Jehová kichiua ma tiyolpakikaj uan amo ma timajmauikaj  ipan paraíso espiritual (Is. 54:14; 2 Tim. 3:1).

3. ¿Kenijkatsa moaxitik uejkajkia tlen kiijtoua Isaías capítulo 65?

³ Ipan Isaías capítulo 65, Jehová kiijtok kenijkatsa itstoskiaj ipan paraíso espiritual. Tlen kiijkuilok teokamanalojketl Isaías, achtoui moaxitik ipan xiuitl 537 a.u.J. Ipan nopa tonali, judíos katli moyolkuepkej kiskej Babilonia uan tlakuepilijkej ininaltepe. Jehová kinpaleuik uan kinteochijki, yeka uelki kikualchijchiuaj Jerusalén pampa sosolijtoya, uan sampa kichijkej ma eli se yejyektsi altepetl. Nojkia kikualchijchijkej teokali, kampa sampa ueliskiaj kiueyichiuasej Jehová kej kinamiki ipan Israel (Is. 51:11; Zac. 8:3).

4. ¿Kenijkatsa moaxitijtok tlen kiijtoua Isaías capítulo 65 ipan ni tonali?

⁴ Ipan ni tonali sampa moaxitia tlen kiijkuilok Isaías. Pejki moaxitia ipan 1919, kema toTeotsij itekipanojkauaj kiskej tlen Ueyi Babilonia. Desde nopa tonali, nopa paraíso espiritual moueyilijtok ipan nochi Tlaltipaktli. Ika miak pakilistli, katli tlajtolmoyauaj pejkej kichiuaj miak tlanechikoli. Miakej tlakamej uan siuamej katli achtouia tlauel mosisiniyayaj uan auilnemiyayaj, pejkej kuali tlaneltokaj uan pejkej kinextiaj ininnemilis “tlen yankuik sanse kej Dios kineki” (Efes. 4:24, TNM). Maske miak tlamantli tlen Isaías kiijtok moaxitis kema moyankuilis Tlaltipaktli, nama ya tijselijtokej se keski tlateochiualistli. Ma tikitakaj tlake tlateochiualistli tijseliaj pampa tiitstokej ipan paraíso espiritual uan kenke moneki tijchiuasej kampeka nochipa tiitstosej nopaya.

TLATEOCHIUALISTLI TLEN TIJSELIAJ

5. Kej kiijtoua Isaías 65:13, ¿tlake tlateochiualistli tijpiaj pampa tiitstokej ipan paraíso espiritual?

⁵ Tijpiaj miak tlakualistli uan kuali tiitstokej. Isaías kinextik kenijkatsa eli ininnemilis katli itstokej ipan paraíso espiritual uan katli amo (xijpoua Isaías 65:13). Jehová kinmaka itekipanojkauaj nochi tlen kinpaleuia kuali ma tlaneltokakaj. Kejuak techmakatok miak tlakualistli uan atl pampa techmaka ichikaualis, iTlajtol uan miak tlamachtili tlen techpaleuia kuali ma titlaneltokakaj uan ma tiyolpakikaj (nojkia xikita Apocalipsis 22:17). Uan katli amo itstokej ipan paraíso espiritual, kejuak mayanaj, amikij uan pinauaj. Inijuantij amo kipiaj tlen kinpaleuia kuali ma tlaneltokakaj (Amós 8:11).

6. Kej kiijtoua Joel 2:21-24, ¿tlake tlakualistli kiijtok Jehová kimakaskia ialtepe? ¿Tlake kiixnextia nopa tlakualistli uan kenijkatsa techpaleuia?

⁶ Teokamanalojketl Joel kiijtok Jehová kimakaskia ialtepe se keski tlamantli tlen tlauel kitekiuiyayaj ipan nopa tonali, kej trigo, vino uan aceite de oliva (Joel 2:21-24). Joel kinejki kiijtos, Jehová kinmakaskia tlen ika mopanoltiskiaj uan nojkia tlamachtili tlen kinpaleuiskia kuali ma tlaneltokakaj. ¿Uan kenijkatsa Jehová techmaka tlen moneki ipan ni tonali? Techmakatok Biblia, amatlajkuiloli, jw.org, tlanechikoli uan uejueyi tlanechikoli. Nochi ni tlamantli mojmostla techpaleuia, yeka kuali titlaneltokaj uan kuali tijyolmatij.

7. ¿Kenke tlauel kuali tijyolmatij? (Isaías 65:14).

⁷ Tlauel tiyolpakij uan kuali tijyolmatij. Nochi katli tijtekipanouaj Jehová tlauel tiyolpakij pampa tijpatiitaj nochi tlen techmakatok (xijpoua Isaías 65:14). Nojkia kiampa tijyolmatij pampa ipan Biblia tijpantiaj tlamachtili tlen melauak uan tlen Jehová techtenkauilijtok tlauel techyolchikaua. Nojkia, timotemachiaj teipa kuali tiitstosej pampa Jesús techmakixtik. Tlauel tiyolpakij kema tikamanaltij ininuaya toikniuaj tlen nopa tlamantli (Sal. 34:8; 133:1-3).

8. ¿Tlake ome tlamantli tijnextiaj katli tiitstokej ipan paraíso espiritual?

 ⁸ Katli tiitstokej ipan paraíso espiritual tijnextiaj ome tlamantli tlen tlauel pankisa: nochi kuali timouikaj uan timoikneliaj. Nopa tlaiknelijkayotl kejuak “techilpia sansejko”, uan techpaleuia ma timoiljuikaj kenijkatsa tiitstosej ipan yankuik Tlaltipaktli, pampa nopaya más kuali timouikasej uan tlauel timoiknelisej (Col. 3:14). Se tosiuaikni kiijtoua tlake kiyolmatki kema kinixmatki Jehová itlajtoltemakauaj. Ya kiijtoua: “Na amo nijmatiyaya kenijkatsa niyolpakis, yon niyolpakiyaya ininuaya nochampoyouaj. Nikitak Jehová itlajtoltemakauaj nelia moikneliaj, nopa amo kema nikitstoya”. Nochi katli nelnelia kinekij yolpakisej uan kuali kiyolmatisej, moneki itstosej ipan paraíso espiritual. Maske maseualmej techtlaijiljuiaj, Jehová kuali techita uan nochi katli kiueyichiuaj nojkia (Is. 65:15).

9. ¿Tlake panos ika tlen techyolkokoua? (Isaías 65:16, 17).

⁹ Tijpiaj tlaseuilistli ipan toyolo. Isaías 65:14 kiijtoua katli amo kinekij itstosej ipan paraíso espiritual, chokasej uan tlauel mokuesosej pampa ayok tleno uelis kichiuasej. Pero, ¿kenijkatsa itstosej katli kitekipanouaj Jehová? Ya kiijtoua: “Ayokmo kiilnamikisej tlen achtouia kinyolkokouayaya; uan na ayokmo nikitas” (xijpoua Isaías 65:16, 17 b). Jehová kitlamiltis tlen techtlaijiyouiltia uan ayokmo techyolkokos tlen nama techpano.

10. ¿Kenke eli se tlateochiualistli tiitstosej ipan Jehová itlanechikol? (Nojkia xikita tlaixkopinkayotl).

¹⁰ Uan ipan ni tonali tijpiaj tlaseuilistli ipan toyolo kema tiauij tlanechikoli. Kema tiitstokej nopaya tikilkauaj nochi tlen techtekipachoua. Titlapaleuisej kuali ma timouikakaj ipan paraíso espiritual tlaj tijnextisej nopa kuajkuali tlamantli tlen ichikaualis Dios techpaleuia ma tijnextikaj, kej tlaiknelili, pakilistli, tlaseuilistli, tlaj titechiuilisej tlen kuali uan tlaj tiyolyamanikej (Gál. 5:22, 23). ¡Tlauel tiyolpakij pampa tiitstokej ipan Jehová itlanechikol! Tlaj amo timouejkatlaliaj tlen paraíso espiritual, uelis tikitasej kenijkatsa Jehová kichiuas “se yankuik iluikaktli uan se yankuik Tlaltipaktli”.

11. ¿Kenijkatsa moneki tijyolmatisej pampa tiitstokej ipan paraíso espiritual? (Isaías 65:18, 19).

 ¹¹ Tijtlaskamatij tlen tijpiaj uan tiyolpakij. Isaías kiijtoua tlake tlamantli kichiua ma tiyolpakikaj. Dios kichijtok ma onka nopa paraíso espiritual (xijpoua Isaías 65:18, 19). Yeka, Jehová techtekiuia para tikinpaleuisej maseualmej ma kisakaj tlen religiones tlen amo melauak, tlen elij kej uaktok tlali uan ma kalakikaj ipan itlanechikol kampa kuali kiyolmatisej. Tlauel tiyolpakij pampa tiitstokej ipan Jehová itlanechikol uan tijnekij tikiniljuisej sekinok tlake tlateochiualistli tijpiaj (Jer. 31:12).

12. ¿Kenijkatsa tijyolmatij kema tijpouaj tlen Jehová kitenkajtok ipan Isaías 65:20-24, uan kenke kiampa tijyolmatij?

¹² Katli tiitstokej ipan paraíso espiritual tlauel tiyolpakij uan tijtlaskamatiliaj Jehová pampa kitenkajtok teipa kuali tiitstosej. Ximoiljui nochi tlen uelis tikitas uan tijchiuas ipan yankuik Tlaltipaktli. Biblia kiijtoua: “Nopano ayok kema mikisej konetsitsij tlen sanok ontlakatij. Uan nochi tlen kiaxitijtosej cien xiuitl, ayok kinitasej keja ueuentsitsij”. Nojkia kiijtoua: “Kema se tlakatl kichijchiuas ichaj, yajaya itstos ipan ichaj para nochipa, [ . . . ] kitokasej xokomekamili, uan inijuantij kikuasej itlajka”. Uan “axtekitisej para tlakuasej ininkualankaitakauaj” pampa Dios kinteochiuas. Jehová kiijtoua nelnelia tiyolpakisej, amo timajmauisej uan kuali tijyolmatisej. Ya technankilis “hasta kema noja aya” tijtsajtsiliaj, kimatis tlake techpoloua uan techmakas nochi tlen monekis (Is. 65:20-24; Sal. 145:16).

13. ¿Kenijkatsa Isaías 65:25 kinextia tlake tlamantli kipatlatokej katli kitekipanouaj Jehová?

¹³ Kuali timouikaj uan amo timajmauij. Ichikaualis Dios kinpaleuijtok miakej maseualmej ma kipatlakaj ininnemilis pampa maske achtouia tlauel mosisiniyayaj, nama ayokmo kiampa elij (xijpoua Isaías 65:25). Kichijtokej kampeka ayokmo kichiuasej kej achtouia (Rom. 12:2; Efes. 4:22-24). ToTeotsij itekipanojkauaj titlajtlakolejkej uan yeka timokuapolouaj. Pero Jehová ueltok kichiua ma tiitstokaj sansejko maske kampa ueli tieuaj, techpaleuijtok ma timoiknelikaj uan kuali ma timouikakaj (Tito 2:11). ¡San Jehová ueltok kichiua kiampa ma tiitstokaj!

14. ¿Kenijkatsa moaxitik Isaías 65:25 ika tlen kipanok se toikni?

¹⁴ Se akajya kena uelis kipatlas inemilis. Tlen kipanok se toikni, kiampa kinextia. Kema kipixtoya 20 xiuitl tlauel mosisiniyaya, auilnemiyaya uan miakpa kitsajkej pampa kiichtekiyaya carros uan sekinok tlamantli. Nochipa kinekiyaya moteuis ininuaya sekinok. Kema pejki momachtia Biblia uan yajki tlanechikoli, kiitak kipantijtoya se tlamantli tlen tlauel kipaleuiskia ipan inemilis: nopa paraíso espiritual. Kema ya moatsonpoliuiltijtoya, miakpa moiljuiyaya kenijkatsa moaxitik ipan inemilis tlen kiijtoua Isaías 65:25. Maske achtouia tlauel mosisiniyaya kej se león, nama eliyaya maxojtsi kej se pilborregojtsi.

15. ¿Kenke tijnekij tikinpaleuisej sekinok maseualmej nojkia ma itstokaj ipan paraíso espiritual, uan kenijkatsa uelis tikinpaleuisej?

¹⁵ Kampa peua Isaías 65:13 kiijtoua: “NiinmoTEKO Tlen Más Nijpia Tlanauatili kej ni nikijtoua”. Uan kampa tlami versículo 25 kiijtoua: “Kej ni nikijtoua na niinmoTEKO”. Jehová nochipa kichiua tlen kitenkaua (Is. 55:10, 11). Nama ya tiitstokej ipan paraíso espiritual. Jehová kichijtok ma tiitstokaj sansejko ininuaya toikniuaj katli elij kej tochampoyouaj, yeka kuali tijyolmatij uan amo timajmauij maske nama onka miak tlasisinijkayotl (Sal. 72:7). Nopa kichiua  ma tijnekikaj tikinpaleuisej sekinok maseualmej nojkia ma itstokaj touaya ipan paraíso espiritual. ¿Kenijkatsa uelis tikinpaleuisej? Kema tikinmachtiaj (Mat. 28:19, 20).

¿KENIJKATSA UELIS TIKINYOLTILANASEJ MASEUALMEJ?

16. ¿Tlake tlamantli uelis kichiuas maseualmej ma kinekikaj itstosej ipan paraíso espiritual?

¹⁶ Nochi uelis tijchiuasej kampeka kuali timouikasej uan kiampa sekinok maseualmej nojkia kinekisej itstosej ipan paraíso espiritual. ¿Kenijkatsa? Kema tijchiuaj kej Jehová. Ya amo kinchiualtia maseualmej ma kitekipanokaj, ya kinyoltilana ika tlaiknelili (Juan 6:44; Jer. 31:3, TNM). Katli peuaj kiixmatij Jehová uan kipiaj kuali ininyolo, kinyoltilana nopa kuajkuali tlamantli tlen ya kinextia. ¿Tlake kuajkuali tlamantli moneki tijnextisej uan kiampa sekinok nojkia kinekisej itstosej ipan paraíso espiritual?

17. ¿Tlake uelis tijchiuasej uan kiampa sekinok nojkia kinekisej itstosej ipan paraíso espiritual?

¹⁷ Tlaj tikinikneliaj toikniuaj uan tikinchiuiliaj tlen kuali, sekinok maseualmej nojkia kinekisej itstosej ipan paraíso espiritual. Tijnekij katli yauij tlanechikoli nojkia ma kiijtokaj sanse kej maseualmej tlen Corinto, katli uelis kema yajkej tlanechikoli, kiijtojkej: “Nelia Toteko itstok inmouaya” (1 Cor. 14:24, 25; Zac. 8:23). Yeka, tlauel moneki ma tijchiuakaj tlen kiijtoua ni texto: “Xiitstokaj ika tlaseuilistli se ika seyok” (1 Tes. 5:13, TNM).

18. ¿Tlake uelis kinyoltilanas maseualmej?

¹⁸ Nojkia, moneki tijchiuasej kampeka tikinitasej toikniuaj kej Jehová kinita. Yeka, timosentlaliaj ipan nopa kuajkuali tlamantli tlen kinextiaj uan amo ipan tlen amo kuali, pampa teipa ayokmo elisej tlajtlakolejkej. Tlaiknelili techpaleuis ma tijchiuakaj tlen kiijtoua ni texto: “Ximochiuilikaj tlen kuali se ika seyok.  Ximotlasojtlakaj uan ximotlapojpoljuikaj se ika seyok” (Efes. 4:32). Nochi katli kinekij ma kiniknelikaj, kinekisej itstosej ipan paraíso espiritual. c

AMO MA TIKISAKAJ TLEN PARAÍSO ESPIRITUAL

19. 1) ¿Tlake kiijtojkej se keskij katli tlakuepilijkej ipan paraíso espiritual? (Xikita nopa recuadro “ Maske mouejkatlalijkej, sampa tlakuepilijkej”). 2) ¿Tlake moneki timosentlalijtosej tijchiuasej? (Nojkia xikita tlaixkopinkayotl).

¹⁹ ¡Tlauel tiyolpakij pampa tiitstokej ipan paraíso espiritual! Nama tlauel yejyektsi eli uan tlauel momiakilijtokej Jehová itekipanojkauaj. Nochipa ma tijtlaskamatilikaj Jehová pampa kichijtok nopaya ma tiitstokaj. Nochi katli kinekisej kuali itstosej, yolpakisej, kipiasej tlaseuilistli ipan ininyolo uan amo majmauisej, moneki itstosej ipan paraíso espiritual uan amo kema mouejkatlalisej. Pero moneki timomokuitlauisej, pampa Satanás kineki techkajkayauas uan kineki ayokmo ma tiitstokaj nopaya (1 Ped. 5:8; Apoc. 12:9). Amo ma tijkauakaj ma techkajkayaua. Ma tijchiuakaj kampeka nochipa ma nesi yejyektsi nopa paraíso espiritual, ma elto tlatsejtseloltik uan kuali ma timouikakaj.