Jesús ikualankaitakauaj tlauel kiijilnamijkej ya uan itokilijkauaj pampa kiijtouayayaj amo momajtekiyayaj kej inijuantij. Nopa tlanauatili tlen kimakakej Moisés kiijtouayaya kema se akajya kipiaskia lepra, kiitskiskia se maseuali o se tlapiali katli ya miktok o kema se siuatl esotemoyaya, uajka kejuak sokiyo itstoskia uan amo ueliskia kiueyichiuas toTeotsij. Kema se akajya kiampa itstoskia, nopa Tlanauatili kiijtouayaya monekiyaya temakas se tlakajkaualistli uan mopajpakas o maltis (Lev., caps. 11-15; Núm., cap. 19).

Katli tlayakanayayaj ipan religión judía kitlalijkej sekinok tlanauatili. Se amochtli kiijtoua inijuantij kimiakilijkej nopa tlanauatili uan kiijtojkej miak tlamantli tlen ika se maseuali kejuak itstoskia sokiyo, uan nojkia kiijtojkej miak tlamantli tlen ueliskia kichiuas uan kiampa kejuak mopajpakaskiaj. Nojkia kiijtojkej tlake tlamantli ueliskia kejuak mosokiuis uan tlake amo kema mosokiuiskia. Uan kiijtojkej se keski tlamantli tlen maseualmej monekiyaya kichiuasej uan kiampa kejuak ayokmo itstosej sokiyojkej.

Jesús ikualankaitakauaj kiiljuijkej: “¿[Kenke] momomachtijkauaj axkitokiliaj inintlamachtil touejkapantatauaj? Yajuantij tlakuaj yonke axmomajtekijtokej keja kiijtoua nopa tlanauatili” (Mar. 7:5). ¿Tlake kinekiyayaj kiijtosej kema kiijtojkej “axmomajtekijtokej”? Nopa tlakamej kitlalijtoyaj se tlanauatili tlen kiijtouayaya monekiyaya kichiuasej miak tlamantli ika atl kema momajtekiskiaj uan teipa ueliskia tlakuasej. Nopa amochtli tlen tikijtojkej achtoui, nojkia kiijtoua katli tlayakanayayaj ipan religión judía miakpa mokualaniyayaj pampa amo nochi sanse kiijtouayayaj tlake tlamantli ueliskia kitekiuisej kema momajtekisej, kenijkatsa kinamikiyaya eltoskia nopa atl, ajkia kinmaatekiskia uan tlaj monekiyaya nochi ininma kixolonisej o san se kentsi.

¿Kenijkatsa kiitayaya Jesús nopa tlanauatili tlen san maseualmej kitlalijkej? Ya kiniljuik: “¡Inkipiaj ome inmoxayak! Melauak nopa tlajtoli tlen toTeko kimakak [...] Isaías ma kiijkuilo tlen inmojuantij kampa toTeko kiijtok: ‘Ni tlakamej kiijtouaj nechtlepanitaj, pero axneli. Ipan ininyolo axkema nechilnamikij. Uajka san tlapik nechueyichiuaj, pampa tlamachtiaj inintlajtol tlakamej [...]’. Inmojuantij nojkia inkitlauelkajtokej itlanauatil toTeko para inkitokilisej inintlamachtil tlakamej” (Mar. 7:6-8).