¿TIJNEKISKIA tijpias se tekitl ipan tlanechikoli tlen namantsi amo tijpia? Uelis tijnekiskia tijpias nopa tekitl tlen seyok toikni kipia o se tekitl tlen achtouia tijpixtoya. Uelis amo tiueli tijchiua tlen tijnekiskia pampa nojua titelpokatl o ya tiueuejtixtok, pampa timokokoua, amo tijpia tomij o pampa moneki tikinmokuitlauis mochampoyouaj. O uelis tijkajki nopa tekitl tlen tijchijtoya ipan miak xiuitl pampa mopatlak se keski tlamantli ipan toTeotsij itlanechikol. Ni o sekinok tlamantli kichiuas ximoiljui amo tijtekipanoua Jehová kej ta tijnekiskia. Nochi timotekipachouaj kema kiampa techpano. ¿Tlake techpaleuis amo tlauel ma timotekipachokaj, amo ma timoyolkokokaj yon ma tikualanikaj? ¿Tlake techpaleuis nojua ma tiyolpaktokaj?

Tlauel techpaleuis tlen kichijki Juan teAtsonpoliuiltijketl. Maske toTeotsij kimakak miak uejueyi tekitl, uelis amo kema moiljuik kenijkatsa mopatlaskia inemilis. Amo kema moiljuik tlaj uejkauaskia kitsaktosej, kipano nopa xiuitl tlen tlajtolmoyajki. Maske kiampa kipanok, ya nochipa yolpajki. ¿Tlake kipaleuik? ¿Uan tlake techpaleuis tojuantij nojkia ma tiyolpakikaj maske amo mochiuas tlen tojuantij tijnekiskiaj?

Ipan abril, xiuitl 29, Juan kichijki tlen Jehová kinauatik uan pejki kinmatiltia maseualmej nechka asiskia Mesías. Ya kiijtouayaya: “Ximoyolpatlakaj uan xijkauakaj tlen axkuali inkichiuaj para uelis inkalakisej kampa tlanauatia toTeko tlen itstok ipan iluikak” (Mat. 3:2; Luc. 1:12-17). Miakej kuali kitlakakilijkej. Uan miakej maseualmej katli uejka euayayaj ualajkej pampa kinekiyayaj kitlakakilisej, uan miakej moyolkuepkej uan moatsonpoliuiltijkej. Juan nojkia amo majmajki kiniljuis katli tlayakanayayaj ipan religión toTeotsij kitlatsakuiltiskia tlaj amo moyolkuepayayaj (Mat. 3:5-12). Uan kichijki se tlamantli tlen tlauel ipati ipan iteki kema kiatsonpoliuiltik Jesús, ipan octubre, xiuitl 29. Ipan nopa tonali pejki kiniljuia maseualmej ma kitokilikaj Jesús, nopa Mesías katli kichixtoyaj (Juan 1:32-37).

Pampa Juan kichijki miak tekitl tlen tlauel ipati, Jesús kiijtok tlen ya: “Axaka seyok tlen tlakajtok ipan ni Tlaltipaktli tlen más ueyi iixtla toTeko [kej] Juan [teAtsonpoliuiltijketl]” (Mat. 11:11). Juan tlauel kipatiitak nochi tlen kichijki kema kitekipanok Jehová uan yolpajki pampa kiselik miak tlateochiualistli. Sanse kej ya, ipan ni tonali nojkia  itstokej miakej toikniuaj katli kiselijtokej miak tlateochiualistli pampa kitekipanojtokej Jehová ika nochi ininyolo. Kiampa kipanotok toikni Terry, katli senkistok tlatekipanojtok iuaya isiua Sandra kipano 50 xiuitl. Ya kiijtoua: “Nijselijtok miak yejyektsitsij tekitl. Nitlatekipanojtok kej precursor, ipan kali Betel, precursor especial, superintendente de circuito uan distrito, uan nama sampa nitlatekipanojtok kej precursor especial”. Maske nochi tlauel tiyolpakij kema tijpiaj se tekitl ipan toTeotsij itlanechikol, tlen kipanok Juan technextilis amo tiyolpakij san pampa techtekimakatokej. Uan nojkia technextilis moneki tijchiuasej kampeka tlaj tijnekij nochipa tiyolpaktosej.

Juan teAtsonpoliuiltijketl nochipa yolpaktoya pampa kitlaskamatiyaya toTeotsij nochi tekitl tlen kimakatoya. Kema ya kiatsonpoliuiltijtoya Jesús, Juan ayokmo kinpixki miakej itokilijkauaj uan Jesús itokilijkauaj tlauel momiakiliyayaj. Kema kiampa panok, Juan itokilijkauaj motekipachojkej, uan yeka kiiljuijkej: “Ama nochi tlakamej yauij kampa ya” (Juan 3:26). Uan ya kinnankilik: “Kema onka se nenamiktili, nopa ichpokatl yaui kampa nopa mosiuajtijketl, pero iuampo nopa mosiuajtijketl kikaki kema kinotsa nopa ichpokatl ma uala, uan nelia paki nojkia. Na niitstok keja iuampo nopa mosiuajtijketl. Na ninelpaki pampa tlakamej yauij iuaya Jesús” (Juan 3:29). Juan amo kualanki iuaya Jesús uan amo moiljuik kitekikixtiliyaya, uan nojkia amo moiljuik iteki amo tleno ipati san pampa Jesús kichiuayaya se tekitl tlen tlauel ipati. Juan nojkia tlauel yolpajki pampa kiitayaya kej se tlateochiualistli elis “iuampo nopa mosiuajtijketl”.

Tlen Juan moiljuiyaya kipaleuik ma yolpaki ipan nopa tekitl tlen kipixtoya maske kiixnamijki tlaouijkayotl. Ya kitlapejpenijtoyaj elis nazareo ipan nochi inemilis, yeka amo kema ueliskia kiijis vino (Luc. 1:15). Jesús kiijtok se keski tlamantli tlen inemilis: “Ualajki Juan uan mosajki uan axkiijik xokomekaatl”. Jesús uan itokilijkauaj amo eliyayaj nazareos, yeka uelkej kikuajkej uan kiikej tlen kinejkej (Mat. 11:18, 19). Uan maske Juan amo kema kichijki uejueyi tlamantli, ya kimajtoya Jesús itokilijkauaj kena ueliyayaj kichiuaj nopa, uan sekij eliyayaj katli achtouia ya kitokiliyayaj (Mat. 10:1; Juan 10:41). Juan amo mosentlalik ipan tlamantli tlen amo ueliyaya kichiua, mosentlalik ipan nopa tekitl tlen Jehová kimakatoya.

Tlaj tojuantij nojkia tijpatiitaj nopa tekitl tlen namantsi tijchiuaj ipan toTeotsij itlanechikol, uajka nochipa tiyolpaktosej. Terry, katli tikijtojkej achtoui, kiijtoua: “San nimosentlalik ipan sejse tekitl tlen nechmakayayaj”. Kema monejneuilia ipan nochi tlen kichijtok kema senkistok tlatekipanojtok, kiijtoua: “Amo nimoyolkuepa yon se kentsi. San nikilnamiki nochi tlen kuali nechpanotok”.

Tlauel tiyolpakisej tlaj nochipa timoiljuisej kenke ipati nochi tlen tijchiuaj ipan toTeotsij itlanechikol: pampa “sansejko titekitij iuaya toTeko” (1 Cor. 3:9). Ma timoiljuikaj ipan se neskayotl. Se tlen tochampoyouaj techmakak se tlamantli tlen uejkajkia kipixtok. Tlaj kuali tijmokuitlauisej uan nochipa tijpojpouasej, nochipa kuali nesis maske panos miak xiuitl. Nojkia kiampa pano kema tijtekipanouaj Jehová. Tlaj timoyoliljuisej kenijkatsa eli se ueyi tlateochiualistli tijtekipanojtosej, uajka amo kema timoiljuisej ipan tlamantli tlen kichiuas ayokmo ma tiyolpakikaj. Amo ma timoiljuikaj tlen tojuantij tijchiuaj amo eli sanse ika tlen sekinok kichiuaj, yon ma timoiljuikaj nopa tekitl tlen tojuantij tijchiuaj amo tlauel ipati kej nopa tekitl tlen sekinok kichiuaj (Gál. 6:4).

Maske uelis Juan kimajtoya iteki amo uejkauaskia, amo kema moiljuik kenijkatsa nimantsi tlamiskia (Juan 3:30). Ipan xiuitl 30, kema panotoya chikuasej metstli kiatsonpoliuiltijtoya Jesús, tlanauatijketl Herodes tlanauatik ma kitsakuakaj. Maske kitsajkej, nojua kichijki kampeka tlajtolmoyauas (Mar. 6:17-20). ¿Tlake kipaleuik ma yolpaki maske mopatlak miak tlamantli ipan inemilis? Mosentlalik ipan tlen Jehová kipatiitayaya.

Kema Juan kitsaktoyaj, kiiljuijkej nochi tlen Jesús kichiuayaya ipan tlajtolmoyaualistli (Mat. 11:2; Luc. 7:18). Maske kimatiyaya Jesús eliyaya nopa Mesías, uelis motlajtlaniyaya tlaj ya nelia kiaxitiskia nochi tlen toTeotsij iTlajtol kiijtojtoya kichiuaskia Mesías. Kimajtoya Mesías eliskia tlanauatijketl, yeka uelis motlajtlaniyaya tlaj Jesús nima peuaskia tlanauatis. ¿Kikixtiskia tlen nopa tlatsaktli? Juan tlauel kinekiyaya  kuali kikuamachilis tlake kichiuaskia Jesús, yeka kintitlanki omej itokilijkauaj “ma yakaj kitlajtlanitij intla nelia yajaya nopa Cristo tlen toTeko Dios kiijtok ualaskia o moneki noja kichiasej ma uala [seyok]” (Luc. 7:19). Kema mokuepkej, Juan kuali kintlakakilik kema kiiljuijkej nochi nopa uejueyi tlamantli tlen Jesús kichijtoya, uan nojkia kuali kitlakakilik tlen Jesús kiniljuik ma kiiljuikaj: “Tlen itstoyaj popoyotsitsij, ama tlachiaj. Uan tlen itstoyaj metskuachotikej, ama nejnemij kuali. Inijuantij tlen palaniyaya inintlakayo ika nopa kokolistli tlen itoka lepra mochikajtokej, uan inijuantij tlen axtlakakiyayaj, ama tlakakijya. Tlakamej tlen miktoyaj moyolkuitokejya uan tlen teikneltsitsij kikakij itlajtol toTeko” (Luc. 7:20-22).

Tlen kiiljuijkej uelis tlauel kiyolchikajki. Kiampa kimatki Jesús kiaxitiyaya nochi tlajtolpanextili tlen kamanaltiyaya tlen Mesías. Maske Jesús amo kikixtiskia, Juan kimajtoya amo san tlapik nochi tlen ya kichijtoya. Maske mopatlatoya inemilis, miak tlamantli kipaleuiyaya nojua tlauel ma yolpaki.

Tlaj tijchiuasej kej Juan uan timosentlalisej ipan tlen toTeotsij kipatiita, uajka tikijiyouisej nochi ika pakilistli uan nochipa tijpiasej toyolo (Col. 1:9-11). Kiampa tijchiuasej tlaj tijpouasej Biblia uan timoyoliljuisej ipan tlen tijpouaj, pampa techilnamikilis amo san tlapik nochi tlen tijchiuaj kema tijtekipanouaj Jehová (1 Cor. 15:58). Sandra, katli tikijtojkej achtoui, kiijtok: “Pampa mojmostla nijpoua se capítulo tlen Biblia, nechpaleuijtok nojua ma nimonechkaui ika Jehová uan san ma nimosentlali ipan ya, uan amo nimosentlalia ipan na”. Nojkia, tlaj tikitasej nochi tlen toikniuaj kichiuaj ipan nochi Tlaltipaktli kema kitekipanouaj Jehová, amo timosentlalisej ipan tlen tojuantij techpano uan san timosentlalisej ipan tlen Jehová kichiua. Sandra nojua kiijtoua: “Nochi tlen kisa sejse metstli ipan JW Broadcasting, techpaleuia nochi ma timosentikapaleuikaj ipan toTeotsij itlanechikol uan nochipa ma tiyolpaktokaj ipan nopa tekitl tlen techmakatokej”.

Maske Juan amo uejkajki kichijki nopa tekitl tlen kimakakej, ya nochipa kichijki ika “itlalnamikilis uan ichikaualis [...] teokamanalojketl Elías”. Uan sanse kej Elías, Juan nojkia “elki se tlakatl keja tojuantij” (Luc. 1:17; Sant. 5:17). Tlaj tijtlaskamatij nochi tlen tijchiuaj uan timosentlaliaj ipan tlen toTeotsij kipatiita kej kichijki Juan, techpaleuis nochipa ma tiyolpaktokaj kema tijpaleuijtosej toTeotsij iTlanauatijkayo maske tikixnamikisej miak tlaouijkayotl.