1. ¿Tlake tijnekiskiaj ma kichiuakaj tochampoyouaj?

TOSIUAIKNI Pauline * kiijtoua: “Kema nimomachtik tlen melauak, nimantsi nijnejki nochi nochampoyouaj ma itstokaj nouaya ipan Xochimili. Uan nojua tlauel nijnekiyaya noueue Wayne uan tookichpil ma kitekipanokaj Jehová nouaya”. Tlaj se keskij tlen tochampoyouaj ayamo kiixmatij yon kiikneliaj toTeotsij, uelis nojkia tijyolmatij kej Pauline.

2. ¿Tlake tlajtlanili tijnankilisej ipan ni tlamachtili?

² Maske amo uelis tikinchiualtisej tochampoyouaj ma kitekipanokaj toTeotsij, kena uelis tikinpaleuisej ma kinekikaj kitlakakilisej tlen Biblia tlamachtia (2 Tim. 3:14, 15). ¿Kenke kinamiki tikinkamanaljuisej tochampoyouaj? ¿Kenke moneki tijkuamachilisej tlen kiyolmatij? ¿Tlake uelis tijchiuasej uan kiampa nojkia ma kiiknelikaj Jehová kej tojuantij? ¿Uan kenijkatsa uelis techpaleuisej toikniuaj tlen tlanechikoli?

3. Kej kiijtoua 2 Pedro 3:9, ¿kenke tlauel ipati ma tikinkamanaljuikaj tochampoyouaj tlen toTeotsij?

³ Jehová nechka kintsontlamiltis nochi katli Satanás kinnauatia uan momanauisej san katli kena kinekij “itstosej para nochipa” (Hech. 13:48). Yeka, maske tisiauij uan tijtekiuiaj miak tonali, tijchiuaj kampeka tikinkamanaljuisej nochi maseualmej. Uan nojua tlauel kiampa tijchiuaj ika tochampoyouaj pampa tijnekiskiaj nojkia ma kitekipanokaj Jehová. ToTeotsij Jehová, katli tlauel techiknelia, ‘kineki nochi ma moyolpatlakaj’ pampa “axkineki yon se ma poliui” (xijpoua 2 Pedro 3:9).

4. ¿Tlake amo kinamiki tijchiuasej kema tikinkamanaljuisej tochampoyouaj?

 ⁴ Moneki tijmajtosej uelis tikiljuisej se akajya nopa kuali tlamachtili ika tlatlepanitakayotl o san tijyolkokosej. Uelis kema tikinkamanaljuiaj maseualmej, tijchiuaj ika yamanik tlajtoli, uan kema tikinnojnotsaj tochampoyouaj, chikauak o san kej ueli tikiniljuiaj.

5. ¿Tlake moneki tikilnamikisej kema tikinkamanaljuisej tochampoyouaj?

⁵ Kema tikilnamikij kenijkatsa achtoui tijkamanaljuijkej se tlen tochampoyouaj, uelis timoyolkokouaj pampa amo kuali tijnojnotskej o amo tijchijkej ika tlatlepanitakayotl, uan timoiljuiaj ueltoskia tijtemolisej kenijkatsa kuali tijkamanaljuijtoskiaj. Apóstol Pablo kintlajtolmakak toikniuaj: “Xikinkamauikaj ika yamanik uan ika yejyektsi, pero melauak. Uan ximoiljuikaj kejatsa moneki inkinankilisej sejse tlakatl kema inmechtlajtlanisej” (Col. 4:5, 6). Kinamiki tikilnamiktosej ni tlamantli kema tikamanaltisej ininuaya tochampoyouaj. Tlaj amo kiampa tijchiuaskiaj, uelis tijchiuasej ayokmo ma kinekikaj kitlakakilisej nopa kuali tlamachtili tlen toTeotsij.

6, 7. Xikijto ika se neskayotl kenke se akajya moneki kinextis kikuamachilia tlen kiyolmati iueue o isiua katli amo kitekipanoua Jehová.

⁶ Tijkuamachilisej tlen kiyolmatij. Pauline, katli tikijtojkej achtouia, kiijtoua: “Achtoui, san nijnekiyaya nikamanaltis iuaya noueue tlen Biblia uan tlen toTeotsij. Ayokmo tikamanaltiyayaj tlen sekinok tlamantli”. Maske toikni kiampa kichiuayaya, Wayne amo kimatiyaya miak tlamantli tlen Biblia uan amo kikuamachiliyaya tlen isiua kiixtomiliyaya. Moiljuiyaya isiua san ireligión tlauel kipatiitayaya. Uan motekipachouayaya, pampa  moiljuiyaya mokalakijtoya ininuaya maseualmej katli kichiuaj tlen amo kuali uan uelis san kikajkayauayayaj.

⁷ Pauline kiijtoua miak tonali ipan se semana, nochi tiotlak itstoya ininuaya toikniuaj pampa tlajtolmoyauayaya ininuaya uan yauiyaya ininchaj. Ya kiijtoua: “Kemantika, kema Wayne asiyaya, kalijtik tlatsitsikatoya uan pejki kiyolmati iselti itstoya”. Wayne kitemouayaya isiua uan ikone. Ya amo kinixmatiyaya ajkia inijuantij eliyayaj nopa maseualmej katli ininuaya mouikayaya isiua uan moiljuik Pauline san kinpatiitayaya iuampoyouaj uan amo ya. Yeka, kiiljuik kikauaskia. ¿Timoiljuia kenijkatsa Pauline ueltoskia kinextis kikuamachilia tlen iueue kiyolmatiyaya?

8. Kej kiijtoua 1 Pedro 3:1, 2, ¿tlake kiitaj tochampoyouaj?

⁸ Nochipa kuali ma timonejnemiltikaj. Miakpa, tochampoyouaj kinpaktia kej timonejnemiltiaj uan amo tlen tikijtouaj o kej tikamanaltij (xijpoua 1 Pedro 3:1, 2). Kej panotiajki tonali, Pauline kiitak nelia ni tlamantli. Ya kiijtoua: “Maske nijmajtoya Wayne techikneliyaya uan amo nelia kinekiyaya nechkauas, tlen nechiljuik nechpaleuik ma nijkuamachili monekiyaya nijchiuas se keski tlamantli kej Jehová kineki. Amo kinamikiyaya tlauel nikamanaltis, san monekiyaya ma kiita kenijkatsa kuali nimonejnemiltiyaya”. Yeka, ayokmo kichiualtik iueue ma kitlakakili tlamachtili tlen Biblia uan pejki kamanalti iuaya iueue nochi tlen kinpanoyaya sejse tonali. Wayne kiitak isiua eliyaya yolyamanik uan ikone kuali monejnemiltiyaya (Prov. 31:18, 27, 28). Kema kiitak kenijkatsa Biblia kinpaleuijtoya ichampoyouaj, nojkia kinejki kimatis tlen toTeotsij iTlajtol.

9. ¿Kenke tlauel moneki nojua ma tijchijtokaj kampeka tikinpaleuisej tochampoyouaj?

 ⁹ Nojua ma tijchijtokaj kampeka tikinpaleuisej. Tlen Jehová kichiua tlauel techpaleuia. Ya nochipa kitejtemolia kenijkatsa kinpaleuis maseualmej ma kitlakakilikaj nopa kuali tlamachtili uan ma momakixtikaj (Jer. 44:4). Pablo kiiljuik Timoteo nojua ma kinpaleuijto sekinok uan kiampa ueliskia momanauis uan nojkia katli kitlakakiliskiaj (1 Tim. 4:16). Tojuantij tlauel tikinikneliaj tochampoyouaj, yeka tijnekij nojkia ma kiixmatikaj tlen Biblia tlamachtia. Pauline uelki kinpaleuik ichampoyouaj ika tlen kiijtok uan ika tlen kichijki. Nama tlauel yolpaki pampa ya iuaya iueue kitekipanouaj Jehová kej precursores, uan Wayne eli ueuejtlakatl.

10. ¿Kenke moneki ma tijpiakaj toyolo?

¹⁰ Ma tijpiakaj toyolo. Kema peua timonejnemiltiaj kej toTeotsij tlanauatia, tochampoyouaj amo nima momatij ika tlen tojuantij tijneltokaj uan tlen tijchiuaj. Kiitaj ayokmo tijchiuaj iljuitl tlen inijuantij kichiuaj ipan ininreligión uan ayokmo timokalakiaj ipan política. Uan uelis sekij achtoui kualanij touaya (Mat. 10:35, 36). Maske kiampa panos, amo ma timoiljuikaj amo kema moyolpatlasej. Tlaj ayokmo tijchiuasej kampeka tikinpaleuisej ma kikuamachilikaj tlen tijneltokaj, kiijtosneki tikintlajtolsenkajkej uan tikijtojkej amo kinamiki itstosej nochipa. Jehová kitekimakatok Jesús ma kintlajtolsenkaua maseualmej uan amo tojuantij (Juan 5:22). Tlaj tijpiaj toyolo, uelis teipa tochampoyouaj kena kinekisej kitlakakilisej tlen Biblia tlamachtia (xikita recuadro “ Ma tijtekiuikaj kampa titlamachtiaj tlen eltok ipan Internet”).

11-13. ¿Tlake techmachtia tlen kichijki Alice ika itatauaj?

¹¹ Tikijtosej tlen tijneltokaj ika kuali tlajtoli (Prov. 15:2). Ma tikitakaj tlen kipanok Alice. Ya kiixmatki Jehová kema ayokmo itstoya ininuaya itatauaj, katli amo tlaneltokayayaj ipan toTeotsij uan tlauel mokalakiyayaj ipan política. Moiljuik monekiyaya kiniljuis itatauaj nochi nopa kuali tlamantli tlen ya momachtiyaya. Alice kiijtoua: “Tlaj amo nima tikiniljuis mochampoyouaj tlen tijneltoka uan tlen tijchiua, teipa nojua tlauel kualanisej”. Yeka, Alice kintlajkuiljuiliyaya itatauaj kampa kintlajtlaniyaya kenijkatsa kiitayayaj se keski tlamantli tlen uala ipan Biblia, kej nopa tlaiknelili. Ya kuali moiljuik tlake tlamantli kinpaktiskia (1 Cor. 13:1-13). Nojkia kintlaskamatiliyaya pampa kiiskaltijkej uan kimokuitlauijkej, uan kintitlaniliyaya se keski tlamantli. Uan kema kinpaxalouayaya, kichiuayaya kampeka kipaleuis inana ika tekitl tlen kipixtoya ichaj. Achtoui, itatauaj amo kinpaktik kema kiniljuik tlen nama kineltokayaya.

¹² Kema itstoya ininuaya itatauaj, Alice nochipa kipouayaya Biblia. Nopa kipaleuik inana ma kiita kenijkatsa iichpoka tlauel kipatiitayaya Biblia. Nojkia, itata kinejki momachtis se kentsi tlen Biblia kiijtoua pampa kinekiyaya kikuamachilis tlake moiljuiyaya iichpoka uan nojkia pampa kinekiyaya kiitas tlake tlamantli amo melauak kiijtouayaya Biblia. Alice kiijtoua: “Nijnemaktik se Biblia uan nopaya nikijkuiljuilik se keski tlamantli”. ¿Tlake panok teipa? Itata kiitak tlen Biblia tlamachtia nelia eli melauak, uan tlauel kipaktik tlen kipojki.

¹³ Moneki tikijtosej tlen tijneltokaj ika tlatlepanitakayotl, uan nojkia moneki xitlauak uan temachtli tikijtosej maske tikixnamikisej tlaouijkayotl (1 Cor. 4:12). Alice monejki kiijiyouis kema inana pejki tlauel kualani iuaya. Alice kiijtoua: “Kema nimoatsonpoliuiltik, nonana kiijtok na amo nikikneliyaya”. ¿Tlake kichijki? Ya kiijtoua: “Amo nimajmajki nikamanaltis iuaya tlen nopa tlamantli. Ika miak tlatlepanitakayotl nikiljuik nimosentlalijtoya  nielis se tlen Jehová itlajtoltemakauaj uan amo nijpatlaskia tlen nijtlapejpenijtoya nijchiuas. Uan nikiljuik na tlauel nikikneliyaya. Tiomej tichokakej, uan teipa nijtlakualchiuilik. Pampa nijchijki nopa, nonana pejki kiita kenijkatsa Biblia nechpaleuijtoya kuali ma nimonejnemilti”.

14. ¿Kenke amo kinamiki tijpatlasej tlen tijtlapejpenijkej tijchiuasej maske tochampoyouaj techtetsopasej?

¹⁴ Uelis tochampoyouaj amo nima kikuamachilisej kenijkatsa tlauel tijpatiitaj tijtekipanosej Jehová. Kema Alice kinejki tlatekipanos kej precursora uan amo tekitis ipan tlen itatauaj kiiljuijtoyaj ma momachti, inana sampa mochokilik. Alice amo kipatlak tlen kitlapejpenijtoya. Ya kiijtoua: “Tlaj tijpatlas tlen ya tijtlapejpenik tijchiuas, mochampoyouaj nojua mitstetsopasej ipan sekinok tlamantli. Uan tlaj ika tlaiknelili tikiniljuis ipan tlen timosentlalijtok tijchiuas, uelis sekij ayokmo tleno mitsiljuisej”. Kiampa kipanok Alice. Nama itatauaj nojkia elij precursores, uan itata tlatekipanoua kej ueuejtlakatl.

15. Kej kiijtoua Mateo 5:14-16 uan 1 Pedro 2:12, ¿kenijkatsa uelis kinpaleuis tochampoyouaj nochi tlen ‘kuali kichiuaj’ toikniuaj?

¹⁵ Jehová kinyoltilana maseualmej ika nochi tlen ‘kuali kichiuaj’ itekipanojkauaj (xijpoua Mateo 5:14-16; 1 Pedro 2:12). Tlaj moueue o mosiua amo kitekipanoua Jehová, ¿kinixmati toikniuaj tlen tlanechikoli? Pauline, katli tikijtojkej achtoui, kintlaneuiyaya toikniuaj ma yakaj ichaj uan kiampa Wayne kinixmatiskia. Ya kiilnamiki kenijkatsa se toikni kipaleuik kuali ma kinita toikniuaj. Wayne kiijtoua: “Se tonali amo yajki tekiti pampa ualajki  nechita uan sentik tijtlachilijkej ipan televisión kenijkatsa mauiltiyayaj. Nopa nechpaleuik ma nikita ya nojkia kichiuayaya se keski tlamantli kej tojuantij”.

16. ¿Kenke moneki tikintlaneuisej tochampoyouaj ma yakaj tlanechikoli?

¹⁶ Nojkia uelis tikinpaleuisej tochampoyouaj tlaj tikintlaneuisej ma yakaj touaya ipan tlanechikoli (1 Cor. 14:24, 25). Maske amo kema yajtoya ipan se tlanechikoli, Wayne yajki kema moilnamijki Cristo imikilis, pampa tlayoua ayokmo tekitiyaya uan pampa amo uejkaua nopa tlanechikoli. Ya kiijtoua: “Maske amo nochi nijkuamachilik tlen moixtonki, kena nikilnamiki kenijkatsa nechselijkej. Nechnechkauijkej uan chikauak nechmatlajpalojkej. Uan nikitak kichiuayayaj ika ininyolo”. Se toikni iuaya isiua tlauel kipaleuijtoyaj Pauline ika iokichpil, ipan tlanechikoli uan ipan tlajtolmoyaualistli. Yeka, kema Wayne kinejki kimatis tlen Pauline kineltokayaya, kiiljuik nopa toikni ma kimachti ika Biblia.

17. ¿Tlake amo kinamiki timotlajtlakoltisej, uan kenke moneki nochipa tijchijtosej kampeka tikinpaleuisej tochampoyouaj?

¹⁷ Tijnekiskiaj se tonali nochi tochampoyouaj ma kitekipanokaj Jehová. Uan maske tijchiuaj miak tlamantli pampa tijnekij tikinpaleuisej, uelis amo kema kitekipanosej toTeotsij. Tlaj kiampa panos, amo ma timoiljuikaj tojuantij totlajtlakol. Moneki tikilnamikisej tojuantij amo uelis tikinchiualtisej ma kineltokakaj tlen tojuantij tijneltokaj. Uan nochipa ma tikilnamiktokaj uelis tikinpaleuisej tlaj techitasej tiyolpaktokej pampa tijtekipanouaj Jehová. Ma tijtlajtlanikaj Jehová ma kinpaleui, ma tikiniljuikaj tlen tijneltokaj ika tlatlepanitakayotl uan nochipa ma tijchijtokaj kampeka tikinpaleuisej (Hech. 20:20). Ma timotemachikaj Jehová kiteochiuas nochi tlen tijchiuaj. Tlaj tochampoyouaj kinekisej techtlakakilisej, uajka uelis momanauisej.