1. ¿Kenke Jehová pejki tlachijchiua?

MASKE Jehová miak xiuitl iselti itstoya uan amo tleno kipolok, ya kinekiyaya sekinok nojkia ma yolpakikaj. Yeka, pampa tlauel teiknelia pejki kichijchiua nochi tlamantli (Sal. 36:9; 1 Juan 4:19).

2. ¿Kenijkatsa kiyolmatkej Jesús uan iluikaeuanij kema Jehová kichijchijki sekinok tlamantli?

² Achtoui, Jehová kichijchijki iachtouiKone Jesús. Teipa, Jesús kipaleuik iTata kema kichijchijki “nochi tlamantli tlen ueli tikitaj uan nojkia kinchijchijki nochi tlen axueli tikinitaj” (Col. 1:16). Jesús tlauel yolpajki kema kipaleuik iTata (Prov. 8:30, TNM). Nojkia, iluikaeuanij yolpajkej kema kiitakej Jehová uan Jesús kichijchijkej Tlaltipaktli uan iluikaktli. ¿Tlake kichijkej iluikaeuanij? Biblia kiijtoua “tsajtsiyayaj ika pakilistli” uan kiueyichiuayayaj Jehová, uan nojua kiampa kichijkej kema kinchijchijki maseualmej (Job 38:7; Prov. 8:31). Nochi tlen Jehová kichijchijtok kinextia tlaiknelili uan tlalnamikilistli (Sal. 104:24; Rom. 1:20).

3. Kej kiijtoua 1 Corintios 15:21, 22, ¿kenijkatsa techpaleuia pampa Cristo motemaktilik?

³ Jehová kinekiyaya maseualmej ma itstokaj ipan se yejyektsi Tlaltipaktli. Uan kema Adán uan Eva kiijixnamijkej ininTata, Jehová, ipan nochi Tlaltipaktli pejki tlajtlakoli uan mikilistli (Rom. 5:12). ¿Tlake kichijki Jehová? Nima kiijtok kenijkatsa kinmakixtiskia maseualmej (Gén. 3:15). Jehová kiijtok temaktiliskia inemilis iKone uan kiampa techmakixtiskia  tlen tlajtlakoli uan mikilistli. Kiampa sejse maseuali ueliskia kitlapejpenis tlaj kitekipanos uan tlaj kinekis kipias “yolistli yankuik para nochipa” (Juan 3:16; Rom. 6:23; xijpoua 1 Corintios 15:21, 22).

4. ¿Tlake tikitasej ipan ni tlamachtili?

⁴ Kema tijkakij toTeotsij kinyolkuis katli miktokej uelis timotlatsintokiaj ni tlamantli: ¿Kenijkatsa moyolkuisej? ¿Nima tikinixmatisej tochampoyouaj katli moyolkuisej? ¿Kenke kema moyolkuisej tlauel tiyolpakisej? ¿Kenijkatsa pampa moyolkuisej katli miktokej techpaleuia ma tijpatiitakaj Jehová tlauel teiknelia, tlauel tlalnamiki uan kipia iyolo? Ma tikitakaj.

5. ¿Kenke amo moneki timoiljuisej katli miktokej moyolkuisej ipan san se tonali?

⁵ Pampa Jesús motemaktilik, Jehová kinyolkuis tlauel miakej maseualmej. Maske nochi moyolkuisej, amo mochiuas san ipan se tonali. ¿Kenke? Pampa tlaj ipan san se tonali nochi moyolkuiskiaj, amo mochiuas kej Jehová kipaktia. “Yajaya kineki ma onka tlaseuilistli”, yeka kineki ma mochiua kej kinamiki (1 Cor. 14:33). Jehová kinextik tlalnamiki uan kipia iyolo kema iuaya Jesús, yolik kichijchijtiajkej Tlaltipaktli kampa itstoskiaj maseualmej. Kema Jesús tekichijtos ipan nopa Mil Xiuitl, nojkia kinextis ni kuajkuali tlamantli, uan kinpaleuis katli momanauisej ipan Armagedón ma kikualchijchiuakaj Tlaltipaktli, kampa kinselisej katli moyolkuisej.

6. Kej kiijtoua Hechos 24:15, ¿ajkia inijuantij nojkia moyolkuisej?

⁶ Katli momanauisej ipan Armagedón kichiuasej se tlamantli tlen tlauel ipati: kinmachtisej katli moyolkuisej nopa kuali tlamachtili tlen toTeotsij iTlanauatijkayo uan itlanauatiljuaj. ¿Kenke? Pampa miakej  maseualmej katli moyolkuisej, Biblia kintokaxtia “axkuajkualmej” o katli amo kema kiixmatkej Jehová (xijpoua Hechos 24:15). Inijuantij monekis kipatlasej miak tlamantli tlaj kinekisej ma kinpaleui Cristo imikilis. Yeka, onkas tlauel miak tekitl pampa monekis tikinmachtisej tlauel miakej maseualmej katli amo kiixmatij Jehová. ¿Tijmachtisej sejse maseuali kej ipan ni tonali titlamachtiaj? ¿Itstosej ipan se tlanechikoli uan tikinnextilisej kenijkatsa kinmachtisej katli teipa moyolkuisej? Ni tlamantli tijmatisej ipan nopa tonali. Maske ni tlamantli amo tijmatij, timotemachiaj kema tlamis Mil Xiuitl tlen Jesús iTlanauatijkayo, Tlaltipaktli “temitos ika tlakamej tlen kiixmatij toTeko” (Is. 11:9). Ipan nopa Mil Xiuitl tlauel timotekiuijtosej uan tlauel tiyolpaktosej.

7. ¿Kenke monekis kipiasej ininyolo toTeotsij itekipanojkauaj kema kinmachtisej katli moyolkuisej?

⁷ Ipan nopa Mil Xiuitl, Jehová itekipanojkauaj monekis kipatlasej se keski tlamantli uan kiampa kiyolpakiltisej. Yeka, monekis kipiasej ininyolo kema kinmachtisej katli moyolkuisej pampa inijuantij nojua kichijtosej kampeka ayokmo kichiuasej tlen momajtoyaj kichiuaj uan kichiuasej tlen Jehová kipaktia (1 Ped. 3:8). Kiampa kema kiitasej toTeotsij itekipanojkauaj amo moueyimatij uan nojkia kej inijuantij kichiuaj kampeka kipatlasej ininnemilis uan kiyolpakiltisej Jehová, kinpaleuis nojkia ma kinekikaj kiueyichiuasej (Filip. 2:12).

8. ¿Kenke tikijtouaj katli kinselisej uelis kinixmatisej katli moyolkuisej?

⁸ Onka miak tlamantli tlen techpaleuia tijmatisej kenijkatsa tikinixmatisej katli moyolkuisej. Ipan Biblia kinextia kenijkatsa moyolkuikej se keski maseualmej. ToTeotsij sampa kiampa kichiuas, kinyolkuis kej ipa nesiyayaj, kej kamanaltiyayaj uan kipiasej inintlalnamikilis kej kipixtoyaj kema ayamo mikiyayaj. Nojkia, ma tikilnamikikaj Jesús kiijtok kema se akajya miki kejuak kochtok uan kema moyolkuisej elis kej kema isateua se akajya (Mat. 9:18, 24; Juan 11:11-13). Kema se akajya kochi uan isateua, itos, kej nesi uan tlen moiljuia amo mopatla. Ma timoiljuikaj tlen kipanok Lázaro. Kema Jesús kiyolkuik kipixtoya naui tonali ika miktoya uan uelis itlakayo peuayaya nempoliui. Marta uan María nima kiixmatkej ininikni, uan ya nojkia nima kinixmatki (Juan 11:38-44; 12:1, 2).

9. ¿Kenke katli moyolkuisej amo nima elisej xitlauakej?

⁹ Jehová kiijtoua kema Cristo tlanauatis maseualmej “ayok kiijtosej para mokokouaj” (Is. 33:24; Rom. 6:7). Yeka, maske toTeotsij kinyolkuis katli miktokej uan kipiasej kuali inintlakayo, nopa amo kiijtosneki san ipan se tonali elisej xitlauakej. ¿Kenke? Pampa tlaj nima elisej xitlauakej, ininchampoyouaj amo kinixmatisej. Kej panotias nopa Mil Xiuitl, nochi maseualmej yolik mochijtiasej xitlauakej. Kema tlamis nopa Mil Xiuitl, Jesús sampa kimaktilis iTata nopa Tlanauatijkayotl. Ipan nopa tonali mochijtos tlen toTeotsij uejkajkia mosentlalijtoya kichiuas, uan maseualmej ayokmo kipiasej tlajtlakoli (1 Cor. 15:24-28; Apoc. 20:1-3).

10. ¿Tlake tijyolmatisej pampa moyolkuisej katli tikinikneliaj?

¹⁰ Ma timoiljuikaj kenijkatsa elis nopa tonali kema moyolkuisej katli tlauel tikinikneliaj.  Uelis tichokasej pampa tlauel tiyolpakisej o tijuikatisej Jehová pampa tijnekisej tijtlaskamatisej. Maske amo tijmatij tlake tijchiuasej, timotemachiaj tlauel tikiknelisej toTata Jehová uan iKone Jesús pampa kinyolkuikej katli tikinikneliaj.

11. Kej kiijtok Jesús ipan Juan 5:28, 29, ¿tlake tlateochiualistli kiselisej katli kichiuasej tlen toTeotsij kineki?

¹¹ Nojkia, ma timoiljuikaj katli moyolkuisej tlauel yolpakisej pampa ayokmo kichiuasej tlen momajtoyaj kichiuaj uan kichiuasej kampeka monejnemiltisej kej Jehová kineki. Katli kipatlasej ininnemilis “itstosej para nochipa” uan katli amo kichiuasej toTeotsij itlanauatiljuaj kintsontlamiltisej, uan kiampa onkas tlaseuilistli (xijpoua Juan 5:28, 29; Is. 65:20).

12. ¿Kenijkatsa Jehová kinteochiuas nochi katli itstosej ipan Tlaltipaktli?

¹² Kema toTeotsij iTlanauatijkayo tekichijtos, nochi itekipanojkauaj kiitasej kenijkatsa moaxitia Proverbios 10:22, kampa kiijtoua: “Kema toTeko kiteochiuas se tlakatl, yajaya moricojchiuas ika tlen nelia ipati”. ToTeotsij itonal kinpaleuis kuali ma tlaneltokakaj, kiampa kipiasej kuajkuali tlamantli kej Cristo uan elisej xitlauakej (Juan 13:15-17; Efes. 4:23, 24). Kej panotias tonali kinextisej kuajkuali tlamantli uan kipiasej chikaualistli. ¡Nelia tlauel yolpakisej! (Job 33:25). Nama, ¿kenijkatsa techpaleuia kema timoyoliljuiaj teipa moyolkuisej katli miktokej?

13. Kej kiijtoua Salmo 139:1-4, ¿kenijkatsa kema moyolkuisej katli miktokej kinextia Jehová kuali techixmati?

¹³ Kej tikitstokej, kema Jehová kinyolkuis katli miktokej sampa kipiasej inintlalnamikilis uan elisej sanse kej kema ayamo mikiyayaj. Pampa Jehová tlauel techiknelia, nochipa techmokuitlauia uan yeka kimati tlake timoiljuiaj, tlake tijyolmatij, tlake tikijtouaj uan tlake tijchiuaj. Yeka, tlaj timikisej Jehová amo ouij kimatis sampa techyolkuis kej tieliyayaj. Tlanauatijketl David kimajtoya Jehová tlauel kuali techixmati (xijpoua Salmo 139:1-4). ¿Kenijkatsa tijyolmatij pampa Jehová tlauel techiknelia?

14. ¿Kenijkatsa kinamiki tijyolmatisej pampa tijmatij Jehová kuali techixmati?

¹⁴ Kema tikilnamikij Jehová kuali techixmati techpaleuia amo ma timotekipachokaj. ¿Kenke? Pampa ya tlauel techiknelia uan techpatiita sejse tlen tojuantij. Nojkia, kimati nochi tlen techpanotok. ¡Nelia tlauel techyolchikaua tijmatisej ni tlamantli! Amo kema ma timoiljuikaj tiitstokej toselti, pampa Jehová nochipa itstok touaya uan kineki techpaleuis (2 Crón. 16:9).

15. ¿Kenijkatsa kinextia Jehová tlauel tlalnamiki pampa techtenkauilijtok moyolkuisej katli miktokej?

¹⁵ Miakej maseualmej kimakasij mikisej, yeka uelis kintlaijiyouiltiaj o kinkajkayauaj ininuampoyouaj.Tojuantij amo tikinmakasij katli kinekij techmiktisej, pampa tijmatij tlaj techmiktisej Jehová sampa techyolkuis (Apoc. 2:10). Tijmatij yon se tlamantli uelis kichiuas ayokmo ma timouampojchijtokaj ika Jehová (Rom. 8:35-39). Jehová kinextijtok tlauel tlalnamiki pampa techtenkauilijtok kinyolkuis katli miktokej. Nopa techpaleuia amo ma tijmakasikaj mikilistli uan nojua ma timotemachikaj ipan Jehová.

16. ¿Tlake moneki timotlatsintokisej, uan tlake kinextis ika tlen titlanankilisej?

¹⁶ Tlaj tokualankaitakauaj kinekisej techmiktisej, ¿timotemachisej Jehová nelia  techyolkuis? Tlaj tijnekij tijmatisej, ma timotlatsintokikaj: “¿Ika tlen nijtlapejpenia nijchiuas kinextia nimotemachia ipan Jehová?” (Luc. 16:10). “¿Kej nimonejnemiltia kinextia nimotemachia Jehová nechmakas tlen moneki pampa nikachtouitlalia iTlanauatijkayo?” (Mat. 6:31-33). Tlaj titlanankilisej kena, uelis tikixnamikisej sekinok kuesoli tlen tijpiasej (Prov. 3:5, 6).

17. 1) ¿Kenijkatsa pampa moyolkuisej katli miktokej kinextia Jehová kipia iyolo? 2) ¿Kenijkatsa uelis tijtlaskamatisej Jehová pampa kipia iyolo?

¹⁷ Jehová kiixtlalijtok se tonali uan se hora kema tlamis nochi tlen amo kuali (Mat. 24:36). Maske kinekiskia nima kinyolkuis katli miktokej, Jehová kipia iyolo uan yeka amo kichiuas kema ayamo asi nopa tonali (Job 14:14, 15, TNM). Ya kichiuas nopa tlamantli kema kinamiki (Juan 5:28). Tlauel tijtlaskamatij pampa Jehová kipia iyolo. Yeka, ipan ni tonali miakej maseualmej uelij moyolkuepaj sanse kej tojuantij (2 Ped. 3:9). Jehová kineki miakej maseualmej ma itstokaj ipan Xochimili. Yeka, tlaj tijpatiitaj pampa Jehová kipia iyolo, moneki tijchiuasej kampeka tikintemosej maseualmej katli kipiaj kuali ininyolo kiampa “itstosej para nochipa”, uan ma tikinpaleuikaj kitekipanosej toTeotsij (Hech. 13:48). Kiampa nojkia kinpaleuis pampa Jehová kipia iyolo.

18. ¿Kenke moneki tijpiasej toyolo ika sekinok?

¹⁸ Jehová kipias iyolo kema yolik timochijtiasej tixitlauakej ipan nopa Mil Xiuitl. Pampa nojua titlajtlakolchiuanij, Jehová kineki techtlapojpoljuis. Yeka, ma tijchiuakaj kej Jehová, ma tikitakaj kuajkuali tlamantli tlen kinextiaj sekinok uan ma tijpiakaj toyolo. Ma tikitakaj tlen kipanok se tosiuaikni. Iueue pejki tlauel motekipachoua miak tonali uan ayokmo yajki tlanechikoli. Tosiuaikni kiijtoua: “Tlauel nechyolkokok. Tlen timoiljuijtoyaj tijchiuasej ayokmo tijchijkej”. Maske kiampa kipanok, tosiuaikni nojua kiiknelik iueue uan kipixki iyolo. Motemachik ipan Jehová uan kiijiyouik tlen kipanok. Tosiuaikni kichijki kej Jehová uan amo mosentlalik ipan nopa kuesoli, ya kiitak kuajkuali tlamantli tlen iueue kinextia. Nojkia kiijtok: “Noueue kinextia kuajkuali tlamantli uan kichijtok kampeka ayokmo tlauel motekipachos”. Yeka, tlauel ipati tijpiasej toyolo  ininuaya tochampoyouaj uan toikniuaj kema kipiaj tlaouijkayotl.

19. ¿Tlake moneki timosentlalisej tijchiuasej?

¹⁹ Jesús uan iluikaeuanij tlauel yolpajkej kema Jehová kichijchijki Tlaltipaktli. Ma timoiljuikaj kenijkatsa nelnelia tlauel yolpakisej kema kiitasej ipan Tlaltipaktli itstosej maseualmej xitlauakej katli kiikneliaj uan kitekipanouaj Jehová. Nojkia, ma timoiljuikaj kenijkatsa tlauel yolpakisej katli tekichiuasej iuaya Cristo kema kiitasej maseualmej kinpaleuia tlen inijuantij kichiuaj (Apoc. 4:4, 9-11; 5:9, 10). Nojkia, ma timoiljuikaj kema ayokmo timochokilisej uan tlauel tiyolpakisej, kema ayokmo onkas kokolistli, kuesoli yon mikilistli (Apoc. 21:4). Maske ayamo moaxitia, nojua ma tijnextikaj titeikneliaj, tijpiaj tlalnamikilistli uan tijpiaj toyolo ika sekinok kej Jehová kinextia. Tlaj kiampa tijchiuasej, tikijiyouisej kema tijpiasej tlaouijkayotl (Sant. 1:2-4). Tlauel tijtlaskamatij Jehová pampa kitenkajtok kinyolkuis “tlakamej tlen ya miktokej” (Hech. 24:15).