TLAMACHTILI 34
Nochi tijpiaj se tekitl ipan tlanechikoli
“Se tlakatl kipia san se itlakayo, pero itlakayo kipia miak partes uan nochi nopa miak partes kipia iteki uan sansejko mochiua itlakayo. Uan keja nopa nojkia eltok ika itlakayo Cristo” (1 COR. 12:12).
UIKATL 101 Sansejko ma tijtekipanokaj toTeotsij
TLEN MOIXTOMAS *
1. ¿Tlake tlateochiualistli tijpiaj?
TIITSTOSEJ ipan Jehová itlanechikol eli se ueyi tlateochiualistli. Pampa kema tijueyichiuaj Jehová ininuaya toikniuaj tijpiaj tlaseuilistli uan tlauel tiyolpakij. Uelis timotlatsintokijtok: “¿Tlake tekitl nijpia ipan tlanechikoli?”.
2. ¿Tlake neskayotl kitekiuik Pablo ipan nopa amatlajkuiloli tlen kiijkuilok?
2 Ipan se keski amatlajkuiloli tlen apóstol Pablo kiijkuilok, kitekiuik se keski neskayotl kampa techmachtia tlen tikitasej ipan ni tlamachtili. Kiijtok, tlanechikoli eli kejuak itlakayo se maseuali, uan nochi toikniuaj elij kejuak sejse tlamantli tlen se maseuali itlakayo (Rom. 12:4-8; 1 Cor. 12:12-27; Efes. 4:16).
3. ¿Ipan ni tlamachtili tlake eyi tlamantli tikitasej?
3 Ipan ni tlamachtili tikitasej eyi tlamantli tlen techmachtia nopa neskayotl tlen Pablo kitekiuik. Se, tikitasej sejse tlen tojuantij tijpiaj se tekitl ipan Jehová tlanechikoli. * Ome, tikitasej tlake uelis tijchiuasej tlaj tijmatij ouij tikitasej tlake tekitl tijpiaj ipan tlanechikoli. Uan eyi, tikitasej kenke moneki timosentlalijtosej tijchiuasej nopa tekitl tlen Jehová techmakatok.
NOCHI TIJPIAJ SE TEKITL IPAN TLANECHIKOLI
4. ¿Tlake techmachtia tlen kiijtoua Romanos 12:4, 5?
4 ¿Tlake achtoui tlamantli tijyekouaj tlen nopa neskayotl tlen kitekiuik Pablo? Sejse tlen tojuantij tijpiaj se tekitl ipan Jehová itlanechikol. Pablo kiijtok: “Keja ipan itlakayo se tlakatl onka miak partes, uan sejse parte kipia iteki, keja nopa nojkia eltok ika tojuantij tlen tijneltokaj Cristo. Tojuantij timiakej, pero sansejko timochiuaj tiitlakayo Cristo. Uan sejse parte iaxka nochi sekinok partes” (Rom. 12:4, 5). ¿Tlake kinejki kiijtos Pablo? Maske nochi tojuantij amo tijpiaj sanse tekitl ipan tlanechikoli, Jehová tlauel techpatiita.
Maske ipan tlanechikoli amo tijpiaj sanse tekitl, Jehová techpatiita. (Xikita párrafos 5-12). *
5. ¿Tlake “regalos tlen yajatili” techmakatok Jehová?
5 Kema tikijtouaj se akajya kipia se tekitl ipan tlanechikoli, uelis nima timoiljuiaj kineki kiijtos katli techyakanaj (1 Tes. 5:12; Heb. 13:17). Nopa nelia, Jehová kitekimakatok Cristo ma kintlali ipan tlanechikoli toikniuaj katli elij kejuak “regalos tlen yajatili” (Efes. 4:8). Ni “regalos tlen yajatili” elij Katli kinyakanaj Jehová itlajtoltemakauaj uan katli kinpaleuiaj, Katli kiyakanaj Betel, toikniuaj katli tepaxalouaj chijchikuasej metstli, katli kinmachtiaj sekinok, ueuejtlakamej uan tlapaleuianij. Ni toikniuaj kintlapejpenijtokej ika toTeotsij itonal uan kiampa uelis kinmokuitlauisej uan kinyolchikauasej itekipanojkauaj Jehová (1 Ped. 5:2, 3).
6. Kej kiijtoua 1 Tesalonicenses 2:6-8, ¿tlake kichiuaj toikniuaj katli kintlapejpenijtokej?
6 Toikniuaj kintlapejpenijtokej ika toTeotsij itonal uan kiampa uelij kichiuaj nopa tekitl tlen Jehová kinmaka. Kej tomax, toikxi uan sekinok tlamantli tlen tijpiaj kichiua miak tlamantli tlen kipaleuia totlakayo, toikniuaj katli kintekimakatokej, ika tlen kichiuaj kinpaleuiaj toikniuaj ipan tlanechikoli. Inijuantij nochipa kichiuaj kampeka kinyolchikauasej uan kinpaleuisej toikniuaj, uan amo kinekij ma kinuejkapantlalikaj (xijpoua 1 Tesalonicenses 2:6-8). Tijtlaskamatiliaj Jehová pampa ipan tlanechikoli itstokej toikniuaj katli kuali tlaneltokaj uan motekipachouaj ipan tlen sekinok kiyolmatij.
7. ¿Tlake tlateochiualistli kiselijtokej toikniuaj precursores uan misioneros?
7 Ipan miak altepemej itstokej toikniuaj katli senkistok tlajtolmoyauaj, kiampa kinpaleuiaj sekinok ma mochiuakaj Cristo itokilijkauaj, yeka uelis ipan totlanechikol itstokej misioneros, precursores especiales o precursores regulares. Maske nochi ni toikniuaj amo tlauel tlapijpiaj, Jehová tlauel kinteochijtok (Mar. 10:29, 30). ¡Tlauel tiyolpakij pampa ipan totlanechikol itstokej toikniuaj katli senkistok tlatekipanouaj!
8. ¿Kenke Jehová kinpatiita nochi katli tlajtolmoyauaj?
8 Uajka, ¿san ni toikniuaj katli kintekimakatokej uan katli senkistok tlatekipanouaj kipiaj se tekitl ipan tlanechikoli? Amo, pampa Jehová kinpatiita sejse toikniuaj uan ipan tlanechikoli nojkia tlauel kinpatiitaj (Rom. 10:15; 1 Cor. 3:6-9). Tlauel tikinpatiitaj toikniuaj pampa sansejko tijnekij tikinpaleuisej maseualmej ma elikaj Cristo itokilijkauaj (Mat. 28:19, 20, TNM; 1 Tim. 2:4). Nochi toikniuaj katli moatsonpoliuiltijtokej uan katli amo, kichiuaj kampeka kiachtouitlalisej ipan ininnemilis tlajtolmoyaualistli (Mat. 24:14).
9. ¿Kenke tlauel tikinpatiitaj tosiuaikniuaj?
9 Nojkia, Jehová tlauel kinpatiita tosiuaikniuaj ipan tlanechikoli. Ya tlauel kinpatiita tosiuaikniuaj katli monamiktijtokej, tenamej, katli ayokmo kipiaj ininueue uan tosiuaikniuaj katli amo monamiktijtokej uan kuali kitekipanouaj. Ipan Biblia kiijtoua miakej siuamej kiyolpakiltijkej toTeotsij pampa kinextijkej tlalnamikij, kuali tlaneltokakej, yolpajkej, amo majmajkej, temakakej tlen kipiaj uan kichijkej tlen kuali (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Ipan totlanechikol itstokej tosiuaikniuaj katli kinextiaj ni kuajkuali tlamantli. ¡Tlauel tijtlaskamatiliaj Jehová pampa itstokej touaya!
10. ¿Kenke tlauel tikinpatiitaj toikniuaj katli ya uejueyij?
10 Ipan totlanechikol nojkia itstokej toikniuaj katli ya uejueyij. Sekij kipiaj miak xiuitl kitekipanojtokej Jehová uan amo kema kitlauelkajtokej, uan sekij uelis namanok kiixmatkej. Nochi ni toikniuaj kichiuaj se ueyi kampeka pampa ya uejueyij uan ayokmo uelij kichiuaj miak tlamantli ipan tlanechikoli, nojkia ayokmo uelij tlauel tlajtolmoyauaj. Maske kiampa itstokej, kichiuaj kampeka tlajtolmoyauasej, kinmachtisej sekinok kuali ma kichiuakaj ininteki uan kinyolchikauasej toikniuaj. Uan nochi tlen inijuantij kimatij tlauel techpaleuia. Yeka, Jehová tlauel kinpatiita uan tojuantij nojkia tikinpatiitaj (Prov. 16:31).
11, 12. ¿Kenijkatsa mitsyolchikaua tlen kichiuaj telpokamej ipan motlanechikol?
11 Nama, ma timoiljuikaj ipan tlen kinpano telpokamej. Pampa Satanás kinauatia ni Tlaltipaktli uan maseualmej moyakanaj ika itlalnamikilis, telpokamej kiixnamikij miak kuesoli (1 Juan 5:19). Yeka, tlauel techyolchikauaj kema tlanankiliaj ipan tlanechikoli, tlajtolmoyauaj uan kema amo majmauij kiniljuisej sekinok tlen kineltokaj. Yeka, ¡tlauel tikinpatiitaj ipan tlanechikoli! (Sal. 8:2).
12 Sekij telpokamej ouij kimatij moiljuisej tlaj nelnelia kichiuaj se kuali tekitl ipan tlanechikoli. ¿Tlake techpaleuis tikitasej sejse tlen tojuantij nelia tijpiaj se tekitl ipan tlanechikoli? Ma tikitakaj.
MA TIKITAKAJ TLAKE TEKITL TIJPIAJ IPAN TLANECHIKOLI
13, 14. ¿Kenke miakej toikniuaj moiljuiaj amo ininpati ipan tlanechikoli?
13 Nopa ompa tlamantli tlen techmachtia nopa neskayotl tlen Pablo kiijtok techpaleuia tikitasej tlen miakej toikniuaj kinpano, pampa moiljuiaj amo ininpati ipan tlanechikoli. Pablo kiijkuilok: “Uan ¿tlake panos intla se iikxi se tlakatl ueliskia kamatiskia uan kiijtoskia: ‘Na axniima ni tlakatl, uajka axnise parte tlen itlakayo?’. Tlen kiijtoskia ya ni axtleno kipatlaskia pampa iikxi nopa tlakatl noja mokauaskia se parte ipan itlakayo. Uan nojkia axtleno mopatlas intla se inakas kiijtoskia: ‘Na axniiixtiyol ni tlakatl yeka axnise parte tlen itlakayo’” (1 Cor. 12:15, 16). ¿Tlake techmachtia tlen Pablo kiijtok?
14 Tlaj nochipa tijtlachiliaj ininteki sekinok ika tlen tijchiuaj, uelis ouij tikitasej tojuantij nojkia tijchiuaj se kuali tekitl. Sekij toikniuaj kuali tlamachtiaj, kuali kiyakanaj se tekitl uan sekij kimatij kenijkatsa teyolchikauasej. Yeka, uelis timoiljuisej amo uelis tijchiuasej se keski tekitl kej inijuantij. Tlaj kiampa timoiljuiaj tijnextiaj amo timoueyimatij uan tijmatij amo nochi uelis tijchiuasej (Filip. 2:3). Maske uelis tikitasej tlen kichiuaj sekinok, tlaj nochipa timosentlalijtokej ipan ni tlamantli, uelis kichiuas ayokmo ma tiyolpakikaj. Kej Pablo kiijtok, uelis timoiljuisej amo tleno tijchiuaj ipan tlanechikoli. ¿Tlake techpaleuis amo kiampa ma timoiljuikaj?
15. Kej kiijtoua 1 Corintios 12:4-11, ¿tlake moneki timoiljuisej tlaj tiuelij tijchiuaj se tlamantli?
15 Ma timoiljuikaj ipan Cristo itokilijkauaj tlen achtoui siglo, maske Jehová kichijki ika itonal ma kichiuakaj uejueyi tlamantli, amo nochi kichiuayayaj sanse tlamantli (xijpoua 1 Corintios 12:4-11). Maske amo san se tekitl kipiayayaj o amo nochi ueliyayaj kichiua se tlamantli, Jehová tlauel kinpatiitak. Ipan ni tonali tojuantij amo ueli tijchiuaj uejueyi tlamantli, maske kiampa pano, Jehová amo kipatlatok kej moiljuia. Ya techpatiita maske amo nochi tiuelij tijchiuaj se tlamantli.
16. ¿Tlake tlamantli tlen Pablo kiijtok moneki tijchiuasej?
16 Moneki tijchiuasej kampeka amo tijtlachilisej ininteki sekinok ika tlen tijchiuaj. Ma tijchiuakaj tlen kiijkuilok Pablo: “Moneki sejse tojuantij ma timotekitlachilikaj para tikitasej intla iixpa toTeko kuali timonejnemiltiaj o axtle. Uan intla kuali tonemilis, uajka ma tipakikaj, pero axaka ma paki san pampa kichijtok tlen achi kuali kej se iikni tlen tlajtlakolchijtok” (Gál. 6:4).
17. ¿Kenijkatsa techpaleuia tlen Pablo kiijtok?
17 Tlaj tijchiuaj tlen Pablo kiijtok uan tijtlachiliaj tlen tojuantij tijchiuaj, techpaleuis tikitasej tlen tiuelij tijchiuaj. Ma timoiljuikaj ipan ni tlamantli, uelis se ueuejtlakatl ouij kimati tlamachtis kema itstok tlaixpa, maske kiampa kipano ya tlauel kuali tlajtolmoyaua. O uelis amo kuali kiyakana se tlenijki kej sekinok ueuejtlakamej, maske amo ueli, kema toikniuaj kipiaj se kuesoli, kiiljuiaj nopa ueuejtlakatl ma kinpaleui, pampa kimatij tlauel teiknelia. O nojkia pampa kuali teselia (Heb. 13:2, 16). Yeka, kema tijmatij tlake tlamantli kena tiuelij tijchiuaj, techpaleuia ma tiyolpakikaj ika nopa tekitl tlen tijchiuaj ipan tlanechikoli. Tlaj kiampa tijchiuaj, techpaleuis amo ma tikinkualankaitakaj toikniuaj katli uelij kichiuaj sekinok tlamantli.
18. ¿Tlake uelis tijchiuasej uan kiampa kuali titlamachtisej?
18 Tlaj ipan tlanechikoli techtekimakatokej o amo, nochi moneki tijchiuasej kampeka nojua kuali titlajtolmoyauasej uan kuali tikinmachtisej maseualmej. Uan Jehová techmachtia ika itlanechikol. Ma timoiljuikaj ipan sejse semana, ipan tlanechikoli techmachtiaj kenijkatsa kuali titlajtolmoyauasej. ¿Tijpatiitaj tlen Jehová kichiua?
19. ¿Tlake uelis tijchiuasej uan kiampa uelis tiasej Kampa kinmachtiaj tlajtolmoyauanij?
19 Nojkia Jehová techmachtia Kampa kinmachtiaj tlajtolmoyauanij nopaya uelis yasej toikniuaj uan tosiuaikniuaj katli senkistok tlatekipanouaj uan kipiaj 23 xiuitl uan katli nojua kipiaj 65 xiuitl. ¿Timoiljuiaj uelis amo kema tiasej ipan ni escuela? Tlaj kiampa timoiljuiaj, ma tikijkuilokaj kenke tijnekiskiaj tiasej uan amo ma tikijkuilokaj tlake techtsakuilia. Teipa ma timoiljuikaj tlake tlamantli uelis tijchiuasej uan kiampa uelis tiasej Kampa kinmachtiaj tlajtolmoyauanij. Jehová uan tlen tojuantij tijchiuasej, techpaleuis ma tijchiuakaj tlen timosentlalijtoyaj.
XIKINPALEUI TOIKNIUAJ IKA TLEN TIUELI TIJCHIUA
20. ¿Tlake techmachtia Romanos 12:6-8?
20 Nopa expa tlamantli tlen Pablo techmachtia ijkuilijtok ipan Romanos 12:6-8 (xijpoua). Pablo sampa kiijtoua ipan tlanechikoli amo tijchiuaj sanse tlamantli kej sekinok. Yeka, nojkia kiijtoua ika tlen tiuelij tijchiuaj, ma tijtekiuikaj uan kiampa tikinyolchikauasej uan tikinpaleuisej toikniuaj.
21, 22. ¿Tlake techmachtia tlen kinpanok Robert uan Felice?
21 Ma tikitakaj tlen kipanok se ueuejtlakatl, timoiljuisej itoka Robert. Kema tlatekipanouayaya ipan seyok altepetl, kitlanejkej ma tlatekipanoti ipan kali Betel tlen eltok ipan ialtepe. Maske kiiljuijkej amo kipatlatoyaj pampa kichijki tlen amo kuali, ya kiijtok: “Miak metstli, nimoiljuiyaya tlen amo kinamiki. Nimoiljuiyaya amo niipa o amo nopati. Kemantika nijnekiyaya nijkauas noteki ipan Betel”. ¿Tlake kipaleuik sampa ma kipakti iteki? Se ueuejtlakatl kiilnamikilik tlen Jehová techmachtia ipan se tekitl tlen achtouia techmakatoya, techpaleuia nojua tlauel kuali ma titlatekipanokaj ipan nopa tekitl tlen nama tijpiaj. Robert kikuamachilik ayokmo kinamikiyaya kitemos tlen achtouia kichiuayaya uan monekiyaya mosentlalis ipan tlen nama kinamikiyaya kichiuas.
22 Nojkia kiampa kipanok toikni Felice Epíscopo. Ya uan isiuaj kiskej tlen Galaad ipan 1956 uan ipan Bolivia kipaxalojkej tlanechikoli. Ipan 1964 kipixkej se ininkone. Felice kiijtoua: “Tlauel ouij tijmatkej tijkauasej tlen tijchiuayayaj. Maske tepinajti nikijtos, se xiuitl san nimokuesouayaya. Jehová nechpaleuik, yeka uelki nijpatlak tlen nimoiljuiyaya uan nimosentlalik kuali nijchiuas nopa yankuik tekitl tlen nijpixtoya: nikiskaltis nokone”. ¿Techpanotok kej Robert o Felice? ¿Timokuesouaj pampa ayokmo tijpiaj nopa tekitl ipan toTeotsij itlanechikol kej achtouia tijpixtoyaj? Tlaj kena, uajka tlauel techpaleuis ma tiyolpakikaj tlaj timosentlalisej ipan tlen nama tiuelij tijchiuaj kema tijtekipanouaj Jehová uan kema tikinpaleuiaj toikniuaj. Nochipa ma timotekiuijtokaj uan ma tikinpaleuikaj toikniuaj ika tlen tiuelij tijchiuaj. Kiampa tlauel tiyolpakisej, pampa tikinyolchikauasej toikniuaj tlen totlanechikol.
23. 1) ¿Kenijkatsa techpaleuis tlaj tijkixtiaj tonali? 2) ¿Tlake tikitasej ipan seyok tlamachtili?
23 Jehová techpatiita sejse tlen tojuantij. Ya kineki nojua ma tielikaj iuampoyouaj. Tlaj tijkixtiaj tonali uan timoyoliljuiaj kenijkatsa tikinyolchikauasej toikniuaj uan tijchiuaj, techpaleuis tikitasej tlake tekitl tijpiaj ipan tlanechikoli. Nama ma timotlajtlanikaj: ¿Kenijkatsa tikinitaj toikniuaj? ¿Kenijkatsa uelis tijnextisej tikinpatiitaj? Ipan nopa seyok tlamachtili tijnankilisej ni tlajtlanili.
UIKATL 24 Ma titlejkokaj ipan itepe Jehová
^ párr. 5 Maske nochi tijnekij Jehová ma techpatiita, kemantika uelis timotlatsintokisej tlake uelis tijchiuasej uan kiampa uelis techtekiuis ipan itlanechikol. Ipan ni tlamachtili tikitasej ipan tlanechikoli nochi tijpiaj se tekitl.
^ párr. 3 TLEN TLAUEL IPATI: Kema tikijtouaj tijpiaj se tekitl ipan Jehová itlanechikol, tijnekij tikijtosej tlen uelis tijchiuasej ipan tlanechikoli uan kiampa tikinyolchikauasej toikniuaj. Ni uelis tijchiuasej maske amo tieuaj ipan sanse altepetl, tlaj titlatominpiaj o amo, tlaj tikamanaltij seyok tlajtoli o tlaj tiixtlamatij o amo.
^ párr. 62 TLEN NESI IPAN TLAIXKOPINKAYOMEJ: Eyi tlaixkopinkayomej kampa nesi tlake pano kema nechka peuas tlanechikoli, kema mochijtok uan kema tlami. Tlaixkopinkayotl 1: Se ueuejtlakatl kuali kiselia se maseuali, se telpokatl kiita kuali ma kakisti kampa kitlaliaj uikatl uan se tosiuaikni kamanalti iuaya se tosiuaikni katli ya ueyi. Tlaixkopinkayotl 2: Telpokamej uan katli ya uejueyij momatlananaj pampa kinekij tlanankilisej ipan Tlen Tematiltia. Tlaixkopinkayotl 3: Se toikni iuaya isiua tlapojpouaj kampa mosentiliaj. Se tosiuaikni kipaleuia isiuapil ma kitlali tomij ipan se pilkuakajontsi. Se telpokatl tlapaleuia kampa temakaj pilamochtsitsij. Se toikni kiyolchikaua se tosiuaikni katli ya ueyi.
