1. ¿Tlake timotlajtlaniaj kema tikitaj nochi tlen Jehová kichijchijtok?

KEMA timoyoliljuiaj ipan nochi tlamantli tlen Jehová kichijchijtok, kichiua ma tijyolmatikaj kej David, ya kiijtok: “Kema nikita iluikaktli tlen tijsenkajki, uan nopa metstli uan sitlalimej tlen tikinchijchijki, nimoyoliljuia: ‘¿Ajkeya tojuantij titlakamej para ta timokuatotonia uan timoiljuia tlen tojuantij?’ ” (Sal. 8:3, 4). Uelis kej David, nojkia tijyolmatij amo tlauel topati kej sekinok tlamantli tlen Jehová kichijchijtok, kej sitlalimej. Yeka timosentlachiliaj pampa Jehová tlauel techpatiita. Ipan ni tlamachtili tikitasej kenijkatsa Jehová amo san kinchijchijki Adán uan Eva, ya kinitak kejuak ichampoyouaj.

2. ¿Tlake mosentlalijtoya Jehová kinmakas Adán uan Eva?

² Ipan Tlaltipaktli Jehová achtoui kinchijchijki Adán uan Eva uan elkej kej ikoneuaj. Ya tlauel kinikneliyaya uan kinekiyaya ma momiakilikaj, yeka kiniljuik: “Xikinpiakaj miakej inmokoneuaj para inijuantij itstosej kampa ueli ipan nochi Tlaltipaktli para ma tlanauatikaj” (Gén. 1:28). Jehová kinekiyaya ma kinpiakaj ininkoneuaj uan ma kimokuitlauikaj Tlaltipaktli. Tlaj Adán uan Eva kineltokatoskiaj Jehová uan kichijtoskiaj tlen ya kineki, nochipa eliskiaj kej ichampoyouaj uan tojuantij nojkia.

3. ¿Kenke tikijtouaj Jehová kinuejkapantlalik Adán uan Eva?

³ Kema Jehová kinselik Adán uan Eva kej ininchampoyouaj, kinextik tlauel kinpatiitayaya. Yeka, David kiijtok ni tlamantli kema kiitak kenijkatsa toTeotsij techchijchijtok: “Titechchijtok titlakamej más tiuejueyij moixpa que nochi sekinok. Titechmakatok toueyitilis moixpa” (Sal. 8:5). Maske Jehová amo techmakak sanse chikaualistli uan tlalnamikilistli kej iluikaeuanij, ya nojkia tlauel techpatiita yeka techmakak se kentsi tlen kinextiaj iluikaeuanij  (Sal. 103:20). ¡Tlauel kuali tlen kichijki Jehová! Kema kinchijchijki Adán uan Eva, kinekiyaya tlauel kuali ma itstokaj.

4. ¿Tlake kinpanok Adán uan Eva, uan tlake tikitasej ipan ni tlamachtili?

 ⁴ Maske Jehová kinitayaya Adán uan Eva kej ichampoyouaj, inijuantij kipolojkej nopa tlateochiualistli. Ipan ni tlamachtili tikitasej nochi nopa amo kuali tlamantli tlen techpano pampa inijuantij amo kineltokakej Jehová. Ya amo kipatlatok tlen mosentlalijtok kichiuas: kineki nochi katli kineltokasej nochipa ma elikaj kej ikoneuaj. Achtoui ma tikitakaj kenijkatsa Jehová techuejkapantlalijtok ipan ni tonali. Teipa tikitasej tlake uelis tijchiuasej uan kiampa tijnextisej tijnekij ma techita kej ichampoyouaj. Uan nojkia tikitasej tlake tlateochiualistli kiselisej ipan Tlaltipaktli katli elisej kej ikoneuaj.

5. ¿Kenijkatsa uelis tijnextisej tijtlaskamatij Jehová pampa techchijchijki kej ya?

⁵ Jehová techuejkapantlalik kema techchijchijki kej itlachialis (Gén. 1:26, 27). Kiampa techchijchijki pampa kinekiyaya ma tijnextikaj nopa kuajkuali tlamantli kej ya kinextia, yeka titeikneliaj, titetlasojtlaj, amo titetlauelkauaj uan tijchiuaj tlen xitlauak (Sal. 86:15; 145:17). Kema tijchiuaj kampeka kiampa tijnextisej, tijueyichiuaj Jehová uan nojkia tijtlaskamatij (1 Ped. 1:14-16). Tlaj tijchiuaj tlen ya kipaktia, techpaleuis tlauel ma tiyolpakikaj. Uajka, ueli tijnextiaj nopa kuajkuali tlamantli tlen Jehová kineki ma kinextikaj ichampoyouaj pampa techchijchijki kej itlachialis.

6. ¿Kenijkatsa Jehová kinuejkapantlalik maseualmej kema kichijchijki Tlaltipaktli?

⁶ Jehová tlauel kuali kichijchijki kampa tiitstosej. Kema ayamo kinchijchiuayaya Adán uan Eva, achtoui kikualchijchijki kampa itstoskiaj (Job 38:4-6; Jer. 10:12). Ya tlauel tetlasojtla uan kipaktia temakas tlen kipia, yeka tlauel kuali kichijchijki Tlaltipaktli uan kiampa tiitstoskiaj ika pakilistli (Sal. 104:14, 15, 24). Nojkia, kemantika moyoliljuiyaya ipan nochi tlamantli tlen kichijchijtoya, yeka “kiitak [tlauel] kuali” (Gén. 1:10, 12, 31). Kinuejkapantlalik maseualmej kema kichijki ma kipiakaj tekiuejkayotl ipan nochi tlamantli tlen kichijchijtok (Sal. 8:6). Jehová kineki kema kichijchiuas yankuik Tlaltipaktli, maseualmej nochipa ma kimokuitlauikaj tlen ya kichijchijki. Yeka, ¿nochipa tijtlaskamatij ika tlen nechka kichiuas?

7. ¿Kenijkatsa Josué 24:15 kinextia uelis tijtlapejpenisej tlen tijnekij tijchiuasej?

⁷ Jehová kikajtok ma tijtlapejpenikaj tlen tijnekij tijchiuasej. Yeka, uelis tikitasej tlake tlamantli tijnekij tijchiuasej ipan tonemilis (xijpoua Josué 24:15). Jehová tlauel yolpaki kema tijtlapejpeniaj tijtekipanosej (Sal. 84:11; Prov. 27:11). Onka miak tlamantli kampa uelis tijnextisej kuali tijtlapejpenijtokej tlen tijnekij tijchiuasej. Ma tikitakaj tlake uelis tijyekosej tlen Jesús kichijki.

8. Xikijto kenijkatsa Jesús kuali kitlapejpenik tlen kichiuas.

⁸ Jesús kiachtouitlalik kinpaleuis sekinok, uan tojuantij nojkia uelis kiampa tijchiuasej. Se tonali, ya uan itokilijkauaj tlauel siajtoyaj, yeka yajkej kampa ininselti itstoskiaj. Maske kiampa kinekiyayaj kichiuasej, amo uelkej pampa miakej maseualmej yajkej kampa itstoyaj pampa  kinekiyayaj kitlakakilisej tlen Jesús tlamachtiyaya. Jesús amo kualanki, ya kintlasojtlak uan “pejki kinmachtia miak tlamantli” (Mar. 6:30-34). Kema tijchiuaj kej Jesús uan tijtekiuiaj totomij uan tochikaualis kema tikinpaleuiaj sekinok, tijueyichiuaj Jehová (Mat. 5:14-16). Nojkia, tijnextiaj tijnekij tielisej Jehová ichampoyouaj.

9. ¿Tlake moneki kiilnamikisej tetajmej?

⁹ Jehová techchijtok ma tikinpiakaj tokoneuaj uan ma tikinpaleuikaj kiiknelisej uan kitekipanosej. Tlaj tikinpia mokoneuaj, ¿tijpatiita tlen Jehová mitsmakatok? Maske Jehová kinchijchijki iluikaeuanij ma kichiuakaj uejueyi tlamantli, amo kinchijki ma kinpiakaj ininkoneuaj. Yeka, tetajmej moneki tlauel kitlaskamatisej tlen Jehová kinmakatok. Ya kinkajtok konemej ininmako tetajmej, yeka moneki ma kinmokuitlauikaj uan ma kinmachtikaj (Efes. 6:4; Deut. 6:5-7; Sal. 127:3). Jehová kineki kinpaleuis tetajmej, yeka itlanechikol kichijchijtok pilamochtsitsij, videos, uikatl uan sekinok tlamachtili tlen elto ipan Internet. Ya uan Jesús tlauel kinikneliaj konemej (Luc. 18:15-17). Nojkia, Jehová kipatiita pampa tetajmej motemachiaj ipan ya uan kichiuaj kampeka kinmokuitlauisej ininkoneuaj. Tetajmej katli kiampa kichiuaj, kinpaleuiaj ininkoneuaj nochipa ma elikaj Jehová ichampoyouaj.

10, 11. ¿Tlake kichijtok Jehová pampa temaktilik iKone?

¹⁰ Jehová temaktilik iKone katli tlauel kiiknelia pampa kineki ma tielikaj kej ichampoyouaj. Kej tikitakej ipan  párrafo 4, Adán uan Eva ayokmo elkej Jehová ichampoyouaj, yeka tojuantij nojkia ayokmo tielij ichampoyouaj (Rom. 5:12). Adán uan Eva kitlapejpenijkej amo kitlepanitasej Jehová, yeka ayokmo kinamikiyaya ma elikaj ichampoyouaj. Uan, ¿tlake kinpanoskia ininkoneuaj? Jehová tlauel techiknelia, yeka kichijki se tlamantli uan kiampa katli kitlepanitaskiaj kinseliskia kej ichampoyouaj. ¿Kenijkatsa kichijki? Kema Jesús temaktilik inemilis uan kiampa techmakixtik (Juan 3:16; Rom. 5:19). Nojkia, Jehová uelki kinselia 144,000 maseualmej katli amo kema kitlauelkajtokej uan kiampa elisej kej ikoneuaj (Rom. 8:15-17; Apoc. 14:1).

¹¹ Nojkia, itstokej tlauel miakej maseualmej katli kichiuaj tlen ya kineki uan motemachiaj elisej kej ichampoyouaj kema tlamis nopa Mil Xiuitl (Sal. 25:14; Rom. 8:20, 21). Inijuantij kimatij tlen kiselisej, yeka kema momaijtouaj kiitaj Jehová kej ininTata (Mat. 6:9). Nojkia, nochi katli moyolkuisej uelis kiyekosej tlen Jehová kineki ma kichiuakaj. Uan katli kineltokasej elisej kej ichampoyouaj.

12. ¿Tlake tlajtlanili tijnankilisej?

¹² Kej tikitstokej, Jehová kichijtok miak tlamantli uan kiampa kinuejkapantlalijtok maseualmej. Katli kintlapejpenijtok ma yakaj iluikak ya kinselijtok kej ikoneuaj, uan nopa miakej maseualmej nojkia elisej ikoneuaj kema itstosej ipan yankuik Tlaltipaktli (Apoc. 7:9). ¿Tlake uelis tijchiuasej uan kiampa tijnextisej nochipa tijnekij tielisej ichampoyouaj?

13. Kej kiijtoua Marcos 12:30, ¿tlake uelis tijchiuasej tlaj tijnekij tielisej Jehová ichampoyouaj?

¹³ Ma tijnextikaj tikikneliaj Jehová kema tijtekipanouaj ika nochi toyolo (xijpoua Marcos 12:30). Jehová techmakatok miak tlamantli, uan techkaua  ma tijueyichiuakaj. Kema tijchiuaj tlen technauatia, tijnextiaj tlauel tikikneliaj (1 Juan 5:3). Ya kineki ma tijchiuakaj tlen Jesús technauatik, ma tikinpaleuikaj maseualmej ma mochiuakaj itokilijkauaj uan ma moatsonpoliuiltikaj (Mat. 28:19, TNM). Nojkia, Jesús technauatik ma timoiknelikaj (Juan 13:35). Jehová kinselis kej ichampoyouaj katli kitlepanitaj (Sal. 15:1, 2).

14. Kej kiijtoua Mateo 9:36-38; Romanos 12:10, ¿kenijkatsa uelis tijnextisej tikinikneliaj sekinok?

¹⁴ Ma tikiniknelikaj sekinok. Jehová nochipa kinextia tlauel teiknelia (1 Juan 4:8). Maske ayamo tikixmatiyayaj, ya ipa techiknelijtoya (1 Juan 4:9, 10). Kema tikinikneliaj sekinok, tijchiuaj kej Jehová (Efes. 5:1). Tijnextiaj nopa tlaiknelili kema tikinmachtiaj maseualmej tlen ya kineki, uan tijchiuaj ipan ni tonali kema ayamo kintlatsakuiltia (xijpoua Mateo 9:36-38). Kema kiampa tijchiuaj, tikinpaleuiaj nojkia ma elikaj Jehová ichampoyouaj. Uan kema se akajya moatsonpoliuiltia, moneki nojua tikiknelisej uan tijtlepanitasej (1 Juan 4:20, 21). Yeka tlaj se toikni techyolkokok, ma timoiljuikaj amo kiampa kinekiyaya kichiuas uan ma tijtlapojpoljuikaj. Nojkia, moneki nojua tikiknelisej uan tijpatiitasej (xijpoua Romanos 12:10; Filip. 2:3).

15. ¿Ajkia kinamiki tikintlasojtlasej uan kuali tikinkamanaljuisej?

¹⁵ Ma tikintlasojtlakaj uan kuali ma tikinkamanaljuikaj nochi maseualmej. Tlaj nochipa tijnekij tielisej Jehová ichampoyouaj, moneki nochipa tijchiuasej tlen Biblia kiijtoua. Jesús kiijtok moneki tikintlasojtlasej uan kuali tikinkamanaljuisej nochi maseualmej, maske sekij techkualankaitaj (Luc. 6:32-36). Moneki kiampa tijchiuasej maske kemantika tijmatisej ouij. Tlaj kiampa techpano, moneki tijchiuasej kampeka timoiljuisej uan tijchiuasej kej Jesús. Kema tijchiuaj kampeka tijchiuasej tlen Jehová kineki uan kej Jesús, tijnextiaj tijnekij tielisej Jehová ichampoyouaj.

16. ¿Tlake uelis tijchiuasej uan kiampa amo kinijilnamikisej Jehová ichampoyouaj?

¹⁶ Amo ma tijchiuakaj ma kinijilnamikikaj Jehová ichampoyouaj. Ipan se kali, konemej nochipa kinekij kichiuasej kej ininikniuaj katli ya uejueyij. Yeka, tlaj katli ya uejueyij kichiuaj tlen Biblia tetlajtolmaka, uajka ininpilikniuaj nojkia kiampa kichiuasej. Uan tlaj amo kuali monejnemiltiaj, uajka nojkia amo kuali monejnemiltisej. Ika Jehová ichampoyouaj nojkia uelis kiampa panos. Tlaj se akajya kichiua tlen amo kinamiki uan kineltoka tlen apóstatas kiijtouaj o amo kuali monejnemiltia, uelis sekinok nojkia kiampa kinekisej kichiuasej. Kema se akajya kiampa kichiua kisokiuia Jehová itlanechikol o kichiua ma kinijilnamikikaj Jehová ichampoyouaj (1 Tes. 4:3-8). Yeka, amo ma tijchiuakaj kej katli amo kuali monejnemiltiaj uan amo ma tijkauakaj yon se tlamantli ma techuejkatlali tlen toTata Jehová.

17. ¿Tlake amo kinamiki timoiljuisej, uan kenke?

¹⁷ Ma timotemachikaj ipan Jehová uan amo ipan tlen tijpiaj. Jehová kiijtoua tlaj tikachtouitlaliaj tijtekipanosej uan tijchiuaj tlen ya technauatia, techmakas tlen moneki kej tlakualistli, tlen timokentisej uan kampa tiitstosej (Sal. 55:22; Mat. 6:33). Yeka, amo timoiljuiaj nopa tlamantli tlen nikaj onka uelis techpaleuis uan kichiuas ma tiyolpakikaj. Timotemachiaj tlaj tijchiuaj tlen Jehová kineki, tiitstosej ika tlaseuilistli (Filip. 4:6, 7). Nojkia,  maske uelis tijpiaj tomij tlen ika timotlakouisej, moneki timoiljuisej tlaj tijpiaj tonali tijtekiuisej tlen tijkouaj uan tlaj uelis tijmokuitlauisej. Yeka, ma timotlasintokikaj: “¿Tlauel nijpatiita tlen nijpia?”. Ma tikilnamikikaj Jehová kineki ma timosentlalijtokaj titlapaleuisej ipan itlanechikol. Yeka amo ma tijkauakaj yon se tlamantli ma techtonalpolo. Amo kema tijnekij tijchiuasej kej nopa telpokatl katli tlauel kipatiitak se keski tlamantli kema Jesús itstoya, uan amo kinejki kitekipanos Jehová yon elis se tlen ichampoyouaj (Mar. 10:17-22).

18. ¿Tlake tlateochiualistli kiselisej katli kineltokasej Jehová?

¹⁸ Katli kineltokasej Jehová kipiasej se ueyi tlateochiualistli: nochipa kiiknelisej uan kiueyichiuasej Jehová. Katli itstosej ipan Xochimili kimokuitlauisej Tlaltipaktli katli Jehová techmakatok. ToTeotsij iTlanauatijkayo nechka kichiuas Tlaltipaktli sampa ma nesi yejyektsi, kej uejkajkia eliyaya. Jesús kitlamiltis nochi tlaouijkayotl tlen techpanoltilijkej Adán uan Eva kema kitlapejpenijkej ayokmo elisej Jehová ichampoyouaj. Jehová nojkia kinyolkuis tlauel miakej maseualmej katli nojkia uelis itstosej nochipa uan ayokmo mokokosej kema Tlaltipaktli elis se xochimili (Luc. 23:42, 43). Kema sejse Jehová ichampoyouaj ayokmo elisej tlajtlakolejkej, kinextisej tlen David kiijtok: “Titechmakatok toueyitilis moixpa” (Sal. 8:5).

19. ¿Tlake moneki tikilnamikisej?

¹⁹ Tlaj ta tieli se tlen nopa tlauel miakej maseualmej, tijselis se ueyi tlateochiualistli. Xikilnamiki Jehová mitsiknelia uan kineki xieli se tlen ichampoyouaj. Yeka, xijchiua kampeka nochipa tijyolpakiltis. Nojkia, mojmostla ximoyoliljui ipan tlen Jehová mosentlalijtok kichiuas. Uan xijpatiita pampa nama tijueyichiua Jehová uan teipa nojkia kiampa tijchiuas.