TLAMACHTILI 33
Jehová kiita tlen kinpano itekipanojkauaj
“ToTeko, kena, yajaya nochipa techtlachilijtok tojuantij tlen [tijmakasij]” (SAL. 33:18).
UIKATL 4 Jehová nechmokuitlauia
TLEN MOIXTOMAS *
1. ¿Kenke Jesús kiiljuik Jehová ma kinpaleui itokilijkauaj?
IPAN nopa youali kema Jesús nechka kimiktiskiaj, kitlajtlanik iTata ma kinmokuitlaui itokilijkauaj (Juan 17:15, 20). Maske tijmatij Jehová nochipa kinpaleuijtok uan kinmokuitlauijtok itekipanojkauaj, Jesús kimatiyaya Satanás nojua tlauel kintlaijiyouiltiskia, yeka monekiyaya Jehová ma kinpaleui.
2. Kej kiijtoua Salmo 33:18-20, ¿kenke amo kinamiki tijmakasisej tlaouijkayotl?
2 Satanás tlauel techtetsopa ika miak tlamantli. Tlaouijkayotl tlen tikixnamikij uelis kichiuas ayokmo ma tijpiakaj chikaualistli uan nojkia uelis kichiuas ma tijtlauelkauakaj Jehová. Kej tikitasej ipan ni tlamachtili amo kinamiki timajmauisej pampa Jehová kiita nochi tlen techpano uan nochipa kineki techpaleuis. Nojkia tikitasej ome tlapoualistli tlen kinextis ya “nochipa techtlachilijtok tojuantij tlen tijmakasij tikixpanosej” (xijpoua Salmo 33:18-20).
KEMA TIJYOLMATIJ TIITSTOKEJ TOSELTI
3. ¿Tlake tlamantli uelis kichiuas ma tijyolmatikaj tiitstokej toselti?
3 Maske itstokej tlauel miakej toikniuaj, kemantika uelis tijyolmatisej tiitstokej toselti. Uelis telpokamej kiampa kiyolmatisej kema kiixtomasej ininixpa katli ininuaya momachtiaj kenke kineltokaj toTeotsij o kema yauij ipan seyok tlanechikoli. Uelis kemantika tlauel timokuesouaj o timoiljuiaj amo tlauel topati uan amo aka techpaleuis. Yeka, amo tikiniljuiaj sekinok tlen techpano pampa timoiljuiaj amo techkuamachilisej. Uan kemantika uelis timoiljuisej amo aka kitekipachoua tlen techpano. Maske amo sanse tlaouijkayotl tikixnamikij, tlaj timoiljuiaj toselti tiitstokej nopa kichiuas ma timoiljuikaj amo techpaleuisej kema monekis uan tlauel ma timokuesokaj. Jehová amo kineki kiampa ma tijyolmatikaj. ¿Kenke kiampa tikijtouaj?
4. ¿Kenke Elías kiijtok “noselti nimokajtok”?
4 Ma tikitakaj tlen kipanok Elías. Ya motlatijtinenki 40 tonali pampa Jezabel kinekiyaya kimiktis (1 Rey. 19:1-9). Iselti itstoya ipan se tlakoyoktli, uan nopaya kiiljuik Jehová: “San na noselti nimokajtok” (1 Rey. 19:10). Maske moiljuiyaya ayokmo itstoyaj sekinok tlajtolpanextianij, nopa amo nelia pampa Abdías amo kikajki Jezabel ma kinmikti 100 tlajtolpanextianij (1 Rey. 18:3, 4, 7, 13). Uajka, ¿kenke Elías kiyolmatki itstoya iselti? Uelis pampa moiljuik kinmiktijtoyaj nochi nopa tlajtolpanextianij katli Abdías kinmanauijtoya. O uelis pampa amo aka kinejki kitekipanos Jehová maske kiitakej tlen kinpanok Baal itlajtolpanextijkauaj ipan tepetl Carmelo. Nojkia uelis moiljuik amo aka kikuamachiliyaya tlen kiixnamikiyaya yon kitekipachouayaya tlen kipanoyaya. Maske Biblia amo kiijtoua nochi tlen kipanok, kena kiijtoua Jehová kikuamachiliyaya tlen Elías kiyolmatiyaya uan kuali kimatiyaya kenijkatsa kipaleuiskia.
Kema tijyolmatij tiitstokej toselti, ¿kenijkatsa techyolchikaua kema tikilnamikij Jehová kipaleuik Elías? (Xikita párrafos 5, 6).
5. ¿Tlake kichijki Jehová uan kiampa kipaleuik Elías ayokmo ma kiyolmati itstoya iselti?
5 Jehová kipaleuik Elías ika miak tlamantli. Kipaleuik ma kiijto tlen kiyolmatiyaya, yeka ompa kitlatsintoki: “¿Tlake tijchiua nikaj, Elías?” (1 Rey. 19:9, 13). Uan kema kiijtok tlen kiyolmatiyaya, Jehová kitlakakilik. Teipa, kinextik ya itstoya nopaya uan kipia miak chikaualistli. Nojkia, Jehová kiiljuik ipan Israel nojua itstoyaj miakej katli kitekipanouayayaj (1 Rey. 19:11, 12, 18). Uelis Elías tlauel kuali kiyolmatki kema kiijtok nochi tlen eltoya ipan iyolo uan kema kiitak kenijkatsa Jehová kinankilik. Nojkia, kiselik sekinok tekitl tlen tlauel ipati: monekiyaya kintlapejpenis Hazael ma tlanauati ipan Siria, Jehú ipan Israel uan Eliseo kej tlajtolpanextijketl (1 Rey. 19:15, 16). Kema Jehová kimakak Elías nopa tekitl, kipaleuik ma moiljui kej kinamiki, uan nojkia kichijki kuali ma mouampojchiua iuaya Eliseo. ¿Tlake uelis tijchiuasej tlaj tijyolmatij tiitstokej toselti uan tijnekij Jehová ma techpaleui?
6. Kej kiijtoua Salmo 62:8, ¿tlake uelis tikiljuisej Jehová kema tijyolmatisej tiitstokej toselti?
6 Jehová kineki ma tijtlapokaj toyolo kema timomaijtouaj. Ya kiita tlen tijyolmatij uan techiljuia nochipa techtlakakilis (1 Tes. 5:17). Ya tlauel kipaktia kinkakis itekipanojkauaj (Prov. 15:8). ¿Tlake uelis tikiljuisej Jehová kema tijyolmatisej tiitstokej toselti? Uelis tijchiuasej kej Elías (xijpoua Salmo 62:8). Ma tikiljuikaj tlen techtekipachoua, tlen eltok ipan toyolo uan ma techpaleui tikitasej tlake uelis tijchiuasej. Tlaj titelpokatl, ¿tlake uelis tijchiuas tlaj tijyolmati tiitstok moselti uan timajmaui tikijtos ipan escuela kenke tijneltoka Jehová? Uelis tikiljuis ma mitspaleui amo timajmauis, ma mitsmaka tlalnamikilistli uan kiampa uelis tikijtos tlen tijneltoka (Luc. 21:14, 15). Uan, ¿tlake uelis tijchiuas tlaj tijmati amo tlauel mopati? Xikiljui Jehová ma mitspaleui tikamanaltis iuaya se toikni katli kuali tlaneltoka uan ma kipaleui mitskuamachilis. Tlauel techpaleuis amo tijyolmatisej toselti tiitstokej tlaj nochi tijpouiliaj Jehová, tikitasej kenijkatsa technankilia uan tlaj tijkauaj sekinok ma techpaleuikaj.
¿Tijchiuaj kampeka titlajtolmoyauasej ininuaya sekinok toikniuaj? (Xikita párrafo 7).
7. ¿Tlake tijyekoua ika tlen kichijki Mauricio?
7 Jehová techmakatok se tekitl tlen tlauel ipati. Ya kiita uan kipatiita tlen tijchiuaj ipan tlanechikoli uan kema titlajtolmoyauaj (Sal. 110:3). ¿Kenke kema tlauel tijtekipanouaj techpaleuia amo ma tijyolmatikaj tiitstokej toselti? Ma tikitakaj tlen kipanok Mauricio. * Kema panotoya se keski tonali moatsonpoliuiltijtoya, se iuampo pejki mouejkatlalia tlen Jehová. Ya kiijtoua: “Kema nikitak nouampo kitlauelkajtiajki Jehová, kichijki ma nimotlatsintoki tlaj nochipa nijtekipanoskia Jehová o nojkia nechpanoskia kej ya. Nijyolmatiyaya amo aka nechkuamachiliskia”. ¿Tlake kipaleuik? Ya kiijtoua: “Pejki tlauel nitlajtolmoyaua, nopa nechpaleuik amo ma nimosentlali ipan tlen nechpanoyaya yon ma nimoiljui tlen amo kinamiki. Kema nitlajtolmoyauayaya ininuaya sekinok toikniuaj, nechpaleuiyaya tlauel ma niyolpaki uan amo tlauel ma nijyolmati niitstoya noselti”. Tojuantij nojkia tlauel timoyolchikauasej tlaj titlajtolmoyauasej ininuaya toikniuaj maske san tijchiuasej amatlajkuiloli o titlanojnotsasej ika teléfono. ¿Tlake sekinok tlamantli kipaleuik Mauricio? Ya kiijtoua: “Pejki nojua tlauel nitlapaleuia ipan tlanechikoli uan kuali nijkualchijchiuayaya tlamachtili tlen nijpanoltiyaya, kema nijchijki nochi ni tlamantli nikitak Jehová nechiknelia uan nojkia toikniuaj”.
KEMA TECHTEKIPACHOUA SE UEYI TLAOUIJKAYOTL
8. ¿Kenijkatsa uelis tijyolmatisej kema tikixnamikisej uejueyi tlaouijkayotl?
8 Nochi tijpiasej tlaouijkayotl pampa tiitstokej ipan itlamia tonali (2 Tim. 3:1). Maske tijmatij ni tlamantli, uelis tlauel timosentlachilisej tlaj tijpiasej se ueyi tlaouijkayotl o pampa amo timoiljuijtoyaj tlaj kiampa techpanoskia. Uelis amo tijpiasej tomij, techiljuisej tijpiaj se ueyi kokolistli o mikis se katli tlauel tikikneliaj. Kema kiampa techpanos uelis tlauel timotetsopasej uan timotekipachosej, uan nojua tlauel kiampa tijyolmatisej kema tikixnamiktokej se kuesoli uan asi seyok o mosansejkotilia. Tlaj kiampa techpanos, ma tikilnamikikaj Jehová techmokuitlauia uan techpaleuis ma tikixnamikikaj tlen ueli tlaouijkayotl.
9. ¿Tlake tlaouijkayotl kiixnamijki Job?
9 Ma tikitakaj tlen Job kipanok. San ipan se keski tonali kipixki miak tlaouijkayotl. Kiiljuijkej miktoyaj nochi itlapialjuaj, itlatekipanojkauaj uan nojua tlauel tlaijiyouik kema kiiljuijkej miktoyaj ikoneuaj. Ni panok san ipan se tonali (Job 1:13-19). Uan kema nojua tlaijiyouijtoya, kipixki se ueyi kokolistli tlen kichijki tlauel ma tlakayopalani (Job 2:7). Nochi tlen kipanok elki tlauel ouij, yeka kiijtok: “Nelia nikijia noyolis pampa axtleno ipati” (Job 7:16).
Jehová kiiljuia Job tlauel kuali kimokuitlauia nochi tlen kichijchijtok. Ika nopa tlamantli kinextia nojkia kinmokuitlauia itekipanojkauaj ika tlaiknelili. (Xikita párrafo 10).
10. ¿Kenijkatsa Jehová kipaleuik Job ma kiixnamiki tlaouijkayotl? (Xikita tlaixkopinkayotl ipan ipantsajka).
10 Jehová kiitayaya nochi tlen kipanoyaya Job. Ya tlauel kiikneliyaya, yeka kipaleuik ma kiijiyoui tlen kiixnamikiyaya uan amo kema ma kitlauelkaua. Nojkia, kikamanaljuik Job uan kiiljuik ya kipia miak tlalnamikilistli uan kimokuitlauia ika miak tlaiknelili nochi tlen kichijchijtok. Uan kiiljuik kenijkatsa kinchijchijtok miakej tlapialmej (Job 38:1, 2; 39:9, 13, 19, 27; 40:15; 41:1, 2). Teipa toTeotsij kititlanki Eliú ma kiyolchikauati Job, ma kiiljui ya amo kema kintlauelkaua katli kitekipanouaj ika nochi ininyolo uan nojkia ma kitlajtolmaka. Ika tlaiknelili, Eliú kipaleuik ma kiita Jehová ueli kichiua miak tlamantli uan amo kej maseualmej (Job 37:14). Teipa toTeotsij kiiljuik Job ma kinmaijto nopa eyij iuampoyouaj katli tlajtlakolchijtoyaj (Job 42:8-10). Uan ipan ni tonali, ¿kenijkatsa techpaleuia Jehová kema tikixnamikij tlaouijkayotl?
11. ¿Kenijkatsa techyolchikaua Biblia kema tikixnamikij tlaouijkayotl?
11 Maske Jehová amo techkamanaljuia sanse kej kichijki ika Job, ya techmakatok Biblia (Rom. 15:4). Nojkia, tlauel techyolchikaua pampa kiijtojtok teipa kuali tiitstosej. Ma tikitakaj se keski textos tlen techyolchikauas kema tijpiasej tlaouijkayotl. Ipan Biblia, Jehová techilnamikilia maske tikixnamikisej se ueyi tlaouijkayotl amo uelis “techiyokakauas tlen iteiknelijkayo” (Rom. 8:38, 39). Nojkia kiijtoua ya techtlakakilia kema timomaijtouaj pampa itstok “ininnechka nochi tlen kinotsaj” (Sal. 145:18). Jehová techiljuia tlaj timotemachiaj ipan ya uelis tikijiyouisej tlen ueli tlaouijkayotl uan tiyolpakisej maske titlaijiyouisej (1 Cor. 10:13; Sant. 1:2, 12). Biblia nojkia techiljuia tlaj timoyoliljuiaj ipan nopa nemilistli tlen axkema tlamis, techpaleuis ma tikitakaj amo tlauel ouij tlen tikixnamikij (2 Cor. 4:16-18). Jehová kiijtojtok kintsontlamiltis Satanás uan nochi katli kipaleuiaj pampa kichiuaj ma titlaijiyouikaj (Sal. 37:10). Yeka, ma timotlatsintokikaj, ¿tijtsontekontlalijtokej textos tlen techpaleuis kema tikixnamikisej tlaouijkayotl?
12. ¿Tlake uelis tijchiuasej tlaj tijnekij ma techpaleui tlen Jehová techiljuia ipan Biblia?
12 Tlaj tijnekij ma techpaleui tlen Biblia kiijtoua, moneki mojmostla tijpouasej uan timoyoliljuisej ipan tlen tijpouaj. Tlaj tijchiuaj tlen timomachtiaj, kichiuas nojua kuali ma titlaneltokakaj uan nojua ma timouampojchijtokaj iuaya. Uan nopa techpaleuis ma tikijiyouikaj kema tijpiasej se kuesoli. Nojkia, tlaj timotemachiaj ipan Biblia, Jehová techpaleuis ika itonal. Kiampa uelis tikijiyouisej pampa tijpiasej nopa “ueyi chikaualistli” tlen ya temaka (2 Cor. 4:7-10).
13. ¿Kenijkatsa techpaleuis nopa tlamachtili tlen techmaka “tlalnamijkatlatekipanojketl”?
13 Jehová kipaleuia “tlalnamijkatlatekipanojketl” ma techmaka tlamachtili, videos uan uikatl tlen techpaleuia kuali ma titlaneltokakaj (Mat. 24:45). Moneki timomachtisej nochi ni tlamachtili pampa kisa kema kinamiki. Kipia se keski tonali se tosiuaikni katli eua Estados Unidos kiijtok tlauel kitlaskamati pampa tijpiaj tlauel miak tlamachtili. Ya kiijtok: “Ipan 40 xiuitl tlen nijtekipanojtok Jehová, miakpa monektok nijnextis tlaj nelia kuali nitlaneltoka”. Ni tosiuaikni kiixnamiktok tlaouijkayotl tlen tlauel ouij: se tlakatl katli kinemiltiyaya carro kema iuintitoya kimiktik iueyitata, teipa itatauaj mijkej pampa kipixkej se ueyi kokolistli uan ya ompa kipixki cáncer. ¿Tlake kipaleuik ma kiijiyoui? Ya kiijtoua: “Jehová nochipa nechmokuitlauijtok. Uan nopa tlamachtili tlen techmaka ika ‘tlalnamijkatlatekipanojketl’ nojkia nechpaleuijtok ma nikijiyoui. Ika nochi ni tlapaleuili nijyolmati kej Job kema kiijtok: ‘¡Tlaj ayamo nimiktos amo nijkauas nijtekipanos [toTeotsij] ika nochi noyolo!’” (Job 27:5, TNM).
¿Kenijkatsa uelis tikinpaleuisej toikniuaj tlen totlanechikol? (Xikita párrafo 14).
14. ¿Kenijkatsa Jehová techyolchikaua ika toikniuaj? (1 Tesalonicenses 4:9).
14 Jehová kinmachtijtok itekipanojkauaj ma moiknelikaj uan ma moyolchikauakaj kema kiixnamikij se tlaouijkayotl (2 Cor. 1:3, 4; xijpoua 1 Tesalonicenses 4:9). Toikniuaj kichiuaj kej Eliú pampa techpaleuiaj amo ma tijtlauelkauakaj Jehová kema tijpiaj se kuesoli (Hech. ). Kiampa kiitak se tosiuaikni katli itoka Diane. Kema iueue tlauel mokokok, toikniuaj tlen tlanechikoli kiyolchikajkej uan kipaleuijkej nojua kuali ma tlaneltoka. Ya kiijtoua: “Maske tlauel ouij tlen techpanok, tikitakej kenijkatsa Jehová tlauel techiknelia uan techpaleuia. Toikniuaj kichijkej miak tlamantli tlen ika techpaleuijkej: techpaxalojkej, technojnotskej ika teléfono uan kinextijkej techikneliaj... Nojkia, kiitayayaj kenijkatsa nechuikasej tlanechikoli uan kema nitlajtolmoyauayaya pampa amo nijmati nijnemiltis carro”. ¡Tijpiaj se ueyi tlateochiualistli pampa tiitstokej ipan Jehová itlanechikol kampa tlauel timoikneliaj! 14:22
TIJTLASKAMATIJ PAMPA JEHOVÁ TECHMOKUITLAUIA IKA TLAIKNELILI
15. ¿Kenke timotemachiaj uelis tikijiyouisej tlaouijkayotl?
15 Maske nochi tikixnamikisej tlaouijkayotl, amo toselti tiitstokej. Kej se tetaj katli tlauel teiknelia, Jehová nochipa kiita tlen techpano. Ya nochipa itstok tonechka uan techtlakakilia kema tikiljuiaj ma techpaleui (Is. 43:2). Timotemachiaj uelis tikijiyouisej tlaouijkayotl pampa Jehová nochipa techmaka tlen techpaleuia ma tikijiyouikaj se kuesoli, kej tlamaijtoli, Biblia, tlauel miak tlamachtili uan toikniuaj katli techikneliaj.
16. ¿Tlake moneki tijchiuasej tlaj tijnekij Jehová nojua ma techmokuitlauijto?
16 Tlauel tiyolpakij pampa tijmatij toTata Jehová nochipa kiita tlen techpano. Yeka, “ma tiyolpakikaj ipan [ya]” (Sal. 33:21). ¿Kenijkatsa uelis tijnextisej tijtlaskamatij pampa techmokuitlauia ika miak tlaiknelili? Kema tijtekiuiaj sejse tlamantli tlen ya techmaka. Tlaj tijnekij ma techmokuitlaui moneki tijneltokasej uan tijchiuasej tlen kipaktia. Jehová nochipa techmokuitlauijtos tlaj kiampa tijchiuasej (1 Ped. 3:12).
UIKATL 30 NoUampo, noTata uan noTeotsij