1. ¿Kenke techpaktia tiitstosej ininuaya katli kinextiaj kipiaj ininyolo?

 NOCHI techpaktia tiitstosej ininuaya katli kinextiaj kipiaj ueyi ininyolo. ¿Kenke? Pampa kuali tikitaj kema se akajya amo nima kualani. Tlauel tijpatiitaj kema se akajya amo nima techajua kema timokuapolouaj. Uan tlauel tijtlaskamatiliaj katli techmachtik ika Biblia pampa kinextik kipia iyolo kema amo tijkuamachiliyayaj yon tijneltokayayaj tlen techmachtiyaya o kema amo nima tijpatlayayaj tonemilis. Nojkia, tlauel tijtlaskamatiliaj Jehová pampa kinextia kipia ueyi iyolo ika tojuantij (Rom. 2:4).

2. ¿Kema uelis tijmatisej ouij tijnextisej tijpiaj toyolo?

² Nochi techpaktia kema sekinok kinextiaj kipiaj ininyolo. Pero kema tojuantij moneki tijnextisej, kemantika tijmatij ouij. Se neskayotl, kema tijnekiskiaj tiasej kanajya uan amo nima pano carro, uelis tijmatij ouij tijnextisej tijpiaj toyolo. Nojkia, uelis nima tikualanij kema se akajya kichiua se tlamantli tlen amo techpaktia. O uelis kemantika tijmatij ouij pampa Jehová amo nima kichiua tlen kiijtojtok. Nochi techpaktiskia tijnextisej tijpiaj toyolo, yeka ipan ni tlamachtili tikitasej kenijkatsa uelis tijnextisej uan kenke moneki kiampa tijchiuasej. Nojkia, tikitasej se keski tlamantli tlen techpaleuis ma tijnextikaj tijpiaj toyolo.

3. ¿Tlake kichiua se akajya katli kipia iyolo kema kikualankamakaj?

³ Ma tikitakaj naui tlamantli tlen kinextia se akajya katli kipia iyolo: 1) amo nima kualani. Kichiua kampeka amo nima kualanis kema motetsoptok uan amo momakuepas kema sekinok kikualankamakaj. Ipan Éxodo 34:6 kiijtoua tlake  kichiua se akajya katli kipia ueyi iyolo, uan kinextia tlake kichiua Jehová. Ni texto kiijtoua: “Na niDIOS, moTEKO. Na tlen nitetlasojtla uan nijpia ueyi noyolo ika tlakamej. Ouij para nikualanis, pampa tlauel niteiknelia. Uelis timotemachis ipan na pampa senkistok nitemachtli”.

4. ¿Tlake kichiua se akajya katli kipia iyolo kema moneki mochias?

⁴ 2) Se akajya katli kipia iyolo mochia uan amo nima kualani. Amo tlauel mokuesoua uan amo kualani kema se tlamantli amo nima pano (Mat. 18:26, 27). Onka miak tlamantli kampa moneki tijnextisej tijpiaj toyolo. Se neskayotl: kema se akajya techiljuia tlen kipano, moneki tijnextisej tijpiaj toyolo uan amo tijtlajtolkotonasej (Job 36:2). Nojkia, moneki tijnextisej tijpiaj toyolo kema moneki tijpaleuisej katli tijmachtiaj ika Biblia ma kikuamachili se tlamachtili o ma kikaua se tlamantli tlen amo kuali.

5. ¿Tlake sekinok tlamantli kichiua katli kipia iyolo?

⁵ 3) Se akajya katli kipia iyolo amo nima kichijtiuetsi tlen moiljuia. Kemantika kena moneki nima tijchiuasej se tlamantli. Pero kema se akajya kipia iyolo amo nima kichijtiuetsi tlen tlauel ipati. Uan amo moisiuiltia pampa kineki nima kitlamiltis. Katli kipia iyolo kuali moiljuia kenijkatsa kichiuas se tlamantli uan teipa yolik kichijtia pampa kineki kuali ma kisa.

6. ¿Tlake kichiua se akajya katli kipia iyolo kema kiixnamiki tlaouijkayotl?

⁶ 4) Se akajya katli kipia iyolo kiijiyouia tlaouijkayotl uan amo kisenijtojtok. Uajka, katli kipia iyolo nojkia kiijiyouia tlen kipano. Ni amo kiijtosneki amo kinamiki tikiljuisej se touampo kenijkatsa tijyolmatij kema tikixnamikij se tlaouijkayotl. Pero se akajya katli kipia iyolo, kichiua kampeka mosentlalis ipan tlamantli tlen kuali uan nojua kitekipanojtos Jehová ika pakilistli (Col. 1:11). Katli  tijtekipanouaj Jehová moneki tijnextisej tijpiaj toyolo ika ni naui tlamantli. Ma tikitakaj kenke.

7. Kej kiijtoua Santiago 5:7, 8, ¿kenke tlauel moneki tijnextisej tijpiaj toyolo? (Nojkia xikita tlaixkopinkayomej).

⁷ Tlaj tijnekij timomanauisej, moneki tijnextisej tijpiaj toyolo. Sanse kej toTeotsij itekipanojkauaj katli uejkajkia itstoyaj, tojuantij nojkia moneki tijnextisej tijpiaj toyolo uan tijchiasej Jehová ma kichiua tlen kiijtojtok (Heb. 6:11, 12). Biblia kiijtoua tielij kej “se tojketl” (xijpoua Santiago 5:7, 8). Se katli milchiua tlauel tekiti kema kitoka xinachtli uan kiatekia maske amo kimati kema moskaltis. Ya kinextia kipia iyolo uan motemachia kipixkas tlen kitojki. Cristo itokilijkauaj nojkia kiampa kichiuaj, chikauak kitekipanouaj Jehová maske amo kimatij kema asis ininteko (Mat. 24:42). Katli tijtekipanouaj Jehová tijchiuaj kampeka tijpiasej toyolo, pampa timotemachiaj kichiuas nochi tlen kitenkajtok. Tlaj ayokmo kiampa tijchiuasej, tisiauisej uan tijtlauelkauasej Jehová. Uan san timosentlaliskiaj ipan tlamantli tlen techpakilismakas se keski tonali. Pero tlaj tijpiaj toyolo, tikijiyouisej nochi uan timomanauisej (Miq. 7:7; Mat. 24:13).

8. ¿Kenke kema tijpiaj toyolo techpaleuia kuali ma timouikakaj ininuaya sekinok? (Colosenses 3:12, 13).

⁸ Tlaj tijpiaj toyolo kuali timouikasej ininuaya sekinok uan kuali tikintlakakilisej (Sant. 1:19). Nojkia, techpaleuis amo ma timokualanikaj ininuaya sekinok. Uan kema timotetsoptosej, amo tijchijtiuetsisej o tikijtojtiuetsisej se tlamantli tlen teyolkokos. Uan maske se akajya techyolkokos, amo nima tikualanisej yon timomakuepasej. Tlaj tijpiaj toyolo tijchiuasej kampeka kuali timouikasej ininuaya sekinok uan tikintlapojpoljuisej ika nochi toyolo (xijpoua Colosenses 3:12, 13).

9. ¿Kenke kema tijpiaj toyolo techpaleuia kuali ma tijtlapejpenikaj tlen tijchiuasej? (Proverbios 21:5).

⁹ Kema tijpiaj toyolo, nojkia techpaleuia kuali ma tijtlapejpenikaj tlen tijchiuasej. Techpaleuis amo nima ma tijtlapejpenikaj se tlenijki, kuali ma timoiljuikaj tlen tijchiuasej, tijkixtisej tonali uan tikitasej tlake nelnelia techpaleuis (xijpoua Proverbios 21:5). Ma timoiljuikaj ipan ni tlamantli: tlaj amo tijpiaj tekitl, uelis nima tijnekisej tijselisej tlen ueli tekitl maske ayokmo tiasej tlanechikoli o uelis ayokmo tlauel titlajtolmoyauasej. Pero tlaj tijpiaj toyolo, techpaleuis kuali ma tikitakaj kanke mokaua nopa tekitl, keski horas titekitisej, tlaj techpaleuis kuali ma tiitstokaj ininuaya tochampoyouaj o tlaj techpaleuis nojua kuali ma tijtekipanokaj Jehová. Uajka tlaj tijpiaj toyolo, techpaleuis kuali ma tijtlapejpenikaj tlen tijchiuasej.

10. ¿Tlake techpaleuis más ma tijnextikaj tijpiaj toyolo?

¹⁰ Ma tikiljuikaj Jehová ma techpaleui más tijnextisej tijpiaj toyolo. ToTeotsij itonal kichiua ma tijnextikaj ni kuali tlamantli (Gál. 5:22, 23). Yeka moneki tikiljuisej Jehová ma techmaka ichikaualis tlen techpaleuis ma tijnextikaj sekinok kuajkuali tlamantli ipan tonemilis. Tlaj tikixnamiktokej se tlaouijkayotl uan tijmatij ouij tijnextisej tijpiaj toyolo, ma tikiljuikaj Jehová ma techmaka ichikaualis (Luc. 11:9, 13). Nojkia, uelis tikiljuisej ma techpaleui tikitasej tlen techpano kej kinamiki. Uan teipa ma tijchiuakaj kampeka mojmostla tijnextisej tijpiaj toyolo. Tlaj nochipa tikiljuiaj Jehová ma techpaleui  uan tijchiuaj kampeka tijnextisej ni kuali tlamantli, kej panotias tonali tikitasej más tijnextiaj tijpiaj toyolo.

11, 12. ¿Kenijkatsa kinextijtok Jehová kipia ueyi iyolo?

¹¹ Ma timoiljuikaj tlen kichijkej se keskij toTeotsij itekipanojkauaj katli itstoyaj uejkajkia. Biblia kiijtoua kenijkatsa se keskij kinextijkej kipiayayaj ininyolo. Tlaj timoyoliljuiaj ipan tlen kichijkej, techpaleuis ma tijnextikaj ni kuali tlamantli. Tikitasej tlen kichijkej se keskij toTeotsij itekipanojkauaj. Pero achtoui ma tikitakaj tlen kichiua Jehová, pampa san ya más kinextia kipia iyolo.

¹² Ipan xochimili Edén, Satanás kiistlakauik Jehová uan kiijtok amo kuali tlanauatia uan amo teiknelia. Maske Satanás kiampa kichijki, Jehová amo nima kitsontlamiltik. Kinextik kipia ueyi iyolo uan kuali monauatia, pampa kimatiyaya monekiyaya panos tonali uan kiampa kinextis san ya kuali tlanauatia. Uan ipan ni tonali maske kisokiuiaj itoka, Jehová nojua kinextijtok kipia ueyi iyolo. Yeka miakej maseualmej ueltokej kiixmatij uan uelis itstosej nochipa (2 Ped. 3:9, 15). Tlaj timoiljuiaj kenijkatsa techpaleuijtok pampa Jehová kinextijtok kipia ueyi iyolo, techpaleuis amo ouij tijmatisej tijchiasej nopa tonali kema ya kitsontlamiltis tlen amo kuali.

13. ¿Kenijkatsa Jesús kinextik kipia iyolo sanse kej iTata? (Nojkia xikita tlaixkopinkayotl).

¹³ Jesús nojkia kichiua kej Jehová, kinextia kipia ueyi iyolo. Uan kiampa kinextik kema ualajki ipan Tlaltipaktli. Uelis ouij kimatki kinextis kipia iyolo ika escribas uan fariseos, pampa inijuantij amo kichiuayayaj tlen Biblia kiijtoua (Juan 8:25-27). Pero Jesús amo nima kualanki, pampa kichijki kej Jehová. Amo kinkualankanankilik  ikualankaitakauaj kema kitlaijiljuijkej (1 Ped. 2:23). Jesús kipixki iyolo uan kiijiyouik tlen kichiuilijkej, yeka Biblia technauatia: “Ximoyoliljuikaj tlen nochi tlen Jesús kiijiyouik uan tlen nochi nopa fiero tlamantli tlen axkuajkualmej kichiuilijkej” (Heb. 12:2, 3). Uajka ika Jehová itlapaleuil, uelis tijnextisej tijpiaj toyolo uan tikijiyouisej nochi tlen techpanos.

14. ¿Tlake techmachtia tlen kichijki Abraham? (Hebreos 6:15; nojkia xikita tlaixkopinkayomej).

¹⁴ ¿Tlake techpaleuis ma tijchiakaj ma asi nopa tonali kema Jehová kitsontlamiltis nochi tlen amo kuali? Uelis kemantika timoiljuiaj ya asitoskia nopa tonali o ayokmo tikitasej kema moaxitis nopa tlamantli. Ma tikitakaj tlen kipanok Abraham. Kema Jehová kiiljuik kimakaskia miakej iixuiuaj, ya kipiayaya 75 xiuitl uan amo kipiayaya yon se ikone (Gén. 12:1-4). ¿Kiitak Abraham kenijkatsa moaxitik tlen Jehová kitenkauilijtoya? San se keski tlamantli. Monejki achtoui kiixkotonas ueyatl Éufrates uan kichixki ma pano 25 xiuitl, uajka tlakatki ikone Isaac. Uan kema panok seyok 60 xiuitl, tlakatkej iixuiuaj Esaú uan Jacob (xijpoua Hebreos 6:15). Maske Abraham ya kinpixtoya iixuiuaj, amo kiitak kenijkatsa momiakilijkej yon kenijkatsa moaxkatijkej nopa tlali tlen kitenkauilijtoyaj. Maske amo kiitak kenijkatsa moaxitik ni tlamantli, ya nochipa kuali mouikak iuaya Jehová (Sant. 2:23). ¿Kenijkatsa timoiljuia kiyolmatis Abraham kema moyolkuis? Ipan nopa tonali kimatis miakej maseualmej kiselijkej miak tlateochiualistli pampa ya kuali tlaneltokak uan kinextik kipia iyolo (Gén. 22:18). ¿Tlake techmachtia? Maske amo tikitasej kenijkatsa Jehová kiaxitis nochi tlen kitenkajtok, tlaj tijpia toyolo sanse kej Abraham, uelis  timotemachisej Jehová techteochiuas nama uan nojkia ipan yankuik Tlaltipaktli (Mar. 10:29, 30).

15. ¿Tlake uelis timomachtis moselti?

¹⁵ Biblia kiijtoua miakej toTeotsij itekipanojkauaj kipixkej ininyolo (Sant. 5:10). Uelis timomachtis tlen kichijkej. b Ma timoiljuikaj tlen kipanok David. Kema kiiljuijkej eliskia tlanauatijketl, nojua eliyaya okichpil uan monejki mochias miak xiuitl uan kiampa kiselik nopa tekitl. Simeón uan Ana nochipa kuali kitekipanojkej Jehová uan kichixkej ma asi Mesías (Luc. 2:25, 36-38). Kema timomachtis tlen kichijkej, ximotlatsintoki: “¿Tlake kipaleuik ma kinexti kipia iyolo? ¿Kenijkatsa kipaleuik pampa kinextik ni kuali tlamantli? ¿Kenijkatsa uelis nijchiuas kej ya?”. Nojkia, tlauel mitspaleuis tlaj timomachtis tlen kichijkej katli amo kipixkej ininyolo (1 Sam. 13:8-14). Uelis timotlatsintokis: “¿Kenke amo kipixkej ininyolo? ¿Tlake kinpanok pampa kiampa kichijkej?”.

16. Xikijto kenijkatsa techpaleuia kema tijnextiaj tijpiaj toyolo.

¹⁶ Ma timoiljuikaj kenijkatsa techpaleuia kema tijnextiaj tijpiaj toyolo. Kema tijnextiaj ni kuali tlamantli, techpaleuia ma tiyolpakikaj, amo ma timotetsopakaj, amo ma timokokokaj uan kuali ma tijyolmatikaj. Nojkia techpaleuia kuali ma tiitstokaj ininuaya maseualmej uan kuali ma timouikakaj ininuaya toikniuaj tlen tlanechikoli. Tlaj amo nima tikualanij kema se akajya kichiua se tlamantli tlen techkualankamaka, uajka nopa kuesoli amo moueyilis (Sal. 37:8; Prov. 14:29). Uan tlauel kuali kema tijnextiaj tijpiaj toyolo pampa tijchiuaj kej Jehová uan techpaleuia nojua kuali ma timouampojchiuakaj iuaya.

17. ¿Tlake moneki timosentlalisej tijchiuasej?

¹⁷ Kej tikitakej ipan ni tlamachtili, kema se akajya kinextia kipia iyolo, sekinok kuali kiitaj uan kipaleuia kuali ma itsto. Maske kemantika tijmatij ouij tijnextisej tijpiaj toyolo, Jehová techpaleuis kiampa ma tijchiuakaj. Uan maske Jehová ayamo kikualtlalijtok Tlaltipaktli, uelis timotemachisej “yajaya nochipa techtlachilijtok tojuantij tlen tikimakasij tikixpanosej. Techmokuitlauia tlen timochiaj ipan iteiknelilis” (Sal. 33:18). Uajka, moneki nochi tijchijtosej kampeka tijnextisej tijpiaj toyolo.