• “Nijyolmatiyaya kejuak noueue nochipa nechkajkayauayaya ika seyok siuatl”.

• “Nipinauayaya, nimoiljuiyaya amo niyejyektsi uan amo tleno nopati”.

• “Noselti nitlaijiyouiyaya pampa amo aka ueliyaya nikiljuia tlen nechpanoyaya”.

• “Pejki nimoiljuia Jehová amo kitekipachouayaya tlen nechpanoyaya”.

Tlen kiijtouaj ni siuamej kinextia tlake kiyolmati se siuatl kema iueue kiita pornografía. Tlaj se tlakatl kitlachilijtok pornografía miak metstli o xiuitl, uelis isiua kimatis ouij sampa motemachis ipan ya. Se siuatl kiijtoua: “Kemantika nijmatiyaya kejuak amo nikixmatiyaya noueue. Uan nimoiljuiyaya tlake sekinok tlamantli nechtlatiliyaya”.

Tlaj moueue kitlachilia pornografía, a ni tlamachtili mitspaleuis. Nikaj tikitasej se keski textos tlen mitsyolchikauas, tlen mitspaleuis tikitas Jehová itstok mouaya, uan mitspaleuis sampa kuali xijyolmati uan kuali xitlaneltoka. b

Maske amo uelis tijchiualtis moueue ayokmo ma kiita pornografía, kena uelis tijchiuas tlen mitspaleuis kuali xijyolmati. Uelis tijchiuas ni:

Amo ximotlajtlakolti. Kemantika siuamej motlajtlakoltiaj pampa ininueue kiita pornografía. Kiampa kipanok Alicia. c Ya moiljuiyaya iueue kiitayaya pornografía pampa ya amo eliyaya yejyektsi. Yeka motlatsintokiyaya: “¿Kenke noueue kipaktia kintlachilis sekinok siuamej uan amo na?”. Se keskij siuamej motlajtlakoltiaj pampa moiljuiaj inijuantij kichiuaj ayokmo kuali ma itstokaj kema kualanij. Daniela kiijtoua: “Tlauel nikualaniyaya pampa noueue kiitayaya pornografía. Uan nimoiljuiyaya na nijchiuayaya ayokmo kuali ma tiitstokaj”.

Tlaj nojkia kiampa tijyolmati, xikilnamiki Jehová amo mitstlajtlakoltia. Santiago 1:14 kiijtoua: “Pero nopa tlamantli fiero tlen se tlakatl o se siuatl tlauel kineki kichiuas ipan itlalnamikilis, ya  nopa kiyoltilana” (Rom. 14:12; Filip. 2:12). Uajka, Jehová amo mitstlajtlakoltia. Ya tlauel mitspatiita pampa amo tijtlauelkaua (2 Crón. 16:9).

Tlaj moueue kiita pornografía, amo kiijtosneki ta amo tiyejyektsi. Tijmajtos ni tlauel mitspaleuis. Ixtlamatinij kiijtouaj pornografía kichiua se tlakatl ma kineki kichiuas tlen amo kinamiki uan se siuatl amo kema uelis kiyolpakiltis kej ya kinekiskia.

Amo san ximoiljuijto ipan nopa tlamantli. Catarina nochipa moiljuiyaya kenke iueue kiitayaya pornografía. Uan Francisca kiijtoua: “Kema amo nijmati kanke itstok noueue, tlauel nimotekipachoua”. Se keskij tosiuaikniuaj pinauaj kema itstokej ininuaya toikniuaj katli kimatij tlake kichiua ininueue. Uan sekij kimatij itstokej ininselti pampa moiljuiaj sekinok amo kikuamachiliaj tlen kinpano.

Maske kiampa tijyolmati, tlaj san timoiljuijtos ipan nopa kuesoli, más amo kuali tijyolmatis. Tlauel mitspaleuis tlaj timosentlalis kuali timouikas iuaya Jehová, pampa nopa kichiuas xikijiyoui nopa kuesoli (Sal. 62:2; Efes. 6:10).

¿Kenijkatsa mitspaleuis tlaj tijpouas Biblia uan timoyoliljuis ipan tlen kiijtoua? Ipan Biblia kiijtoua kenijkatsa se keskij siuamej kiixnamijkej tlaouijkayotl uan kenijkatsa kinpaleuik kema kiiljuijkej Jehová tlen kinpanoyaya. Maske Jehová amo kinkixtilik nopa kuesoli, kena kinpaleuik sampa kuali ma kiyolmatikaj. Ximoiljui ipan tlen kipanok Ana, ya kipiayaya “miak kuesoli”. “Ana uejkajki momaijtok iixpa TOTEKO”, uan nopa kipaleuik kuali ma kiyolmati maske amo kimatiyaya tlake kipanoskia teipa (1 Sam. 1:10, 12, 18; 2 Cor. 1:3, 4).

Xikiniljui ueuejtlakamej ma mitspaleuikaj. Inijuantij mitspaleuisej maske tlen tikixnamiki eli kej se “ueyi ajakatl o keja atl tlen uetsi nelchikauak” (Is. 32:2). Nojkia, uelis mitsiljuisej xikamanalti iuaya se tosiuaikni katli mitsyolchikauas uan katli uelis tijpouilis tlen mitspano (Prov. 17:17).

¿Uelis tijpaleuis moueue ayokmo ma kiita pornografía? Uelis kena. Biblia kiijtoua kema tikixnamikij se tlaouijkayotl o tijnekij tijtlanisej se tokualankaitaka, “achi más kuali kema omej [...] tekitij sansejko uan axtekiti setsi iselti”  (Ecl. 4: 9- 12). Ixtlamatinij kiijtouaj tlaj se tlakatl ayokmo kineki kiitas pornografía uan kineki isiua sampa ma motemachi ipan ya, tlauel kinpaleuis tlaj sansejko mopaleuiaj.

Moneki tikitas tlaj moueue nelnelia mosentlalijtok ayokmo kiitas pornografía. ¿Kiiljuijtok Jehová uan kiniljuijtok ueuejtlakamej ma kipaleuikaj? (2 Cor. 4:7; Sant. 5:14, 15). ¿Kichijtok se keski tlamantli tlen uelis kipaleuis? ¿Ayokmo tlauel kitekiuia celular o sekinok tlamantli tlen uelis kichiuas sampa ma kiita pornografía? (Prov. 27:12). ¿Kineki xijpaleui uan mitsiljuia nochi tlen kipano? Tlaj kiampa kichiua, uelis tijpaleuis.

¿Pero kenijkatsa uelis tijpaleuis? Xikita tlen kichiua Feliciana. Ya monamiktijtok iuaya Iván, katli pejki kiita pornografía kema eliyaya okichpil. Feliciana kipaleuia iueue nima ma kiiljui kema sampa kineki kiitas pornografía. Iván kiijtoua: “Nikiljuia nosiua nochi tlen nechpano. Ya tlauel nechiknelia uan nechpaleuia ayokmo ma nikita pornografía. Nojkia, kemantika nechtlajtlania tlaj ayokmo ouij nijmajtok uan nechpaleuia ma nijtekiui internet kej kinamiki”. Maske Feliciana kiampa kichiua, kemantika nojkia kiyolkokoua pampa kiita iueue kiyoltilana pornografía. Pero ya kiijtoua: “Maske kemantika tlauel nikualani uan nimoyolkokoua, nijmati nopa amo kipaleuis noueue. Yeka achtoui tikamanaltij ika tlen ya kipano, uan teipa tikitaj tlake nechpaleuis ayokmo tlauel ma nimoyolkoko”.

Kema se tlakatl kamanalti iuaya isiua tlen ni tlamantli, kipaleuia ayokmo ma kineki kiitas pornografía uan nojkia kipaleuia isiua sampa ma motemachi ipan ya. Nojkia kema se tlakatl kiiljuia isiua tlake tlamantli kiyoltilana, tlake kichijtinemi o kanke itstoya, kipaleuia isiua sampa ma motemachi ipan ya.

¿Timoiljuia nojkia uelis tijpaleuis moueue? Tlaj kena, uajka ueliskia sansejko inkipouasej ni tlamachtili. ¿Tlake moneki kichiuas moueue? Moneki mosentlalis ayokmo kiitas pornografía uan kichiuas kampeka sampa ximotemachi ipan ya. Amo kinamiki kualanis pampa tijneki tikamanaltis iuaya tlen ni tlamantli. Moneki kichiuas kampeka kiitas kenijkatsa mitsyolkokoua tlen kichiua. Uan, ¿tlake moneki timosentlalis tijchiuas ta? Moneki tijpaleuis ayokmo ma kiita pornografía uan tijchiuas kampeka sampa timotemachis ipan ya. Tlauel inmechpaleuis tlaj sansejko inkiitasej kenke maseualmej kiitaj pornografía uan tlake kipaleuis ayokmo ma kiita. d

 Tlaj timoiljuia ouij tijmatis tikamanaltis iuaya moueue tlen ni tlamantli uan timoiljuia inmokualanisej, uelis itstos inmouaya se ueuejtlakatl kema inkamanaltisej. Tlaj kiampa inkichiuasej, xijtlapejpeni se ueuejtlakatl katli iuaya inomej kuali inkiyolmatij. Uan xikilnamikto, maske moueue ayokmo kiitas pornografía, uelis ta amo nima sampa timotemachis ipan ya, pero nojua xijchiua kampeka. Ximosentlali ipan nopa kuajkuali tlamantli tlen inkichijtiauij sansejko. Tlaj tijpias moyolo, ika yolik sampa kuali initstosej (Ecl. 7:8; 1 Cor. 13:4).

Uan tlaj moueue sampa kiita pornografía, ¿kiijtosneki amo nelnelia moyolkueptok uan amo kema uelis kikauas? Amo, xikilnamikto tlaj moueue momajtok kiita pornografía, monekis nochipa kichijtos kampeka ayokmo kitlachilis. Uan maske ya panotos miak xiuitl, uelis sampa kiitas. Tlaj ayokmo kineki uetsis ipan nopa tlajtlakoli, moneki kichiuas sekinok tlamantli tlen kipaleuis (Prov. 28:14; Mat. 5:29; 1 Cor. 10:12). Moneki kipatlas itlalnamikilis uan kikualankaitas “tlen axkuali”. Nopa kiijtosneki moneki kikualankaitas pornografía uan sekinok tlamantli, kej kema se akajya moijitskia kampa amo kinamiki (Efes. 4:23; Sal. 97:10; Rom. 12:9). Tlaj kichiua kampeka, uelis kipatlas inemilis. e

Tlaj tikita moueue amo kineki kichiuas yon se tlamantli tlen kipaleuis, uelis miakpa timoyolkokos, tijyolmatis mitskajkayaua uan tlauel timokualankamakas. Xikiljui Jehová nochi tlen mitspano uan ya mitspaleuis kuali xijyolmati (1 Ped. 5:7). Xijchiua kampeka nojua timomachtis, timomaijtos uan timoyoliljuis, kiampa tijnechkauis Jehová uan tikitas kenijkatsa ya mitsnechkauia. “TOTEKO itstok ininnechka [...] tlen mokuesouaj” uan kineki kinpaleuis sampa ma yolpakikaj (Sal. 34:18). Xijchiua kampeka nojua kuali titlatekipanos. Xikiniljui ueuejtlakamej ma mitspaleuikaj uan ximotemachi uelis teipa moueue kinekis kipatlas inemilis (Rom. 2:4; 2 Ped. 3:9).