Ipan nopa tlamachtili tikitakej maseualmej uan ángeles moneki tijpajpakchiuasej Jehová itoka. Para mopajpakchiuas itoka moneki 1) monextis san Jehová kuali tlanauatia. Uan 2) tijnextisej amo tijtlauelkauaj maske tijpiaj tlaouijkayotl.

¿Uan kenke nama tikijtouaj tlauel moneki ma moueyichiua uan ma mopajpakchiua Jehová itoka? Ma tikitakaj eyi tlamantli.

Se, ipan xochimili Edén, Satanás kitlaijiljuik Jehová. Ika tlen Satanás kiiljuik Eva, kinejki kiijtos toTeotsij amo kipaktia temakas tlen kipia uan kinnauatik ma kichiuakaj tlen tlauel ouij. Teipa, Satanás kiijtok amo nelnelia panoskia tlen Jehová kiijtojtoya pampa kinekiyaya maseualmej ma moiljuikaj istlakati. Ika ni istlakatili kichijki amo kuali ma kiitakaj Jehová. Ipan nopa tonali, Satanás mochijki “Diablo”, tlen kiijtosneki “teistlakauijketl” (Juan 8:44). Eva kineltokak tlen Satanás kiiljuik yeka pejki kiijixnamiki toTeotsij uan ayokmo kinejki ma kinnauati (Gén. 3:1-6). Ipan ni tonali, Satanás nojua kitlaijiljuia Jehová uan kiampa kichiua maseualmej amo kuali ma kiitakaj. Katli kineltokaj nopa istlakatili kiijixnamikij Jehová. Uan katli tijtekipanouaj tlauel techyolkokoua kema tikitaj kenijkatsa kiistlakauijtokej. Nochi tlen Satanás kiijtoua kichijtok tlauel ma titlaijiyouikaj uan ma mochiua tlen amo kuali ipan Tlaltipaktli.

Ome, Jehová kineki nochi kuali ma tiitstokaj, yeka mosentlalijtok kiuejkapantlalis uan kipajpakchiuas itoka. Ya tlauel kineki kichiuas ni tlamantli. Yeka, ipan Ezequiel 36:23, kiijtok: “Na nijnextis para nelia niueyi uan nitlatsejtseloltik”. Kema Jesús technextilik kenijkatsa timomaijtosej, kiijtok: “Nochi tlakamej ma kiueyichiuakaj motoka”. Kiampa kinextik kema timomaijtosej moneki titlajtlanisej ma mopajpakchiua Jehová itoka (Mat. 6:9). Biblia miakpa techmachtia moneki tijueyichiuasej Jehová. Ma tikitakaj tlen kiijtoua se keski textos: “Xijmakakaj TOTEKO nopa tlatlepanitakayotl tlen kinamiki kiselis” (1 Crón. 16:29; Sal. 96:8). “¡Xiuikakaj teouikatl tlen tepouilia para tlauel ueyi ya!” (Sal. 66:2). “Nimitspakilismakas ika nochi noyolo uan nimitsueyitlalis para nochipa” (Sal. 86:12). Se tonali kema Jehová kamanaltik iuaya iKone, Jesús itstoya ipan teokali, uan kiiljuik iTata: “Papá, xijchiua para nochi tlakamej ma mitsueyitlalikaj”. Uan Jehová kinankilik: “Ya nijchijtok para ma nechueyitlalikaj uan sampa nijchiuas” (Juan 12:28). a

Eyi, Jehová mosentlalijtok kichiuas nochipa ma moueyichiua itoka. Ma timoiljuikaj kenijkatsa mopajpakchijtos Jehová itoka kema ya panotos nopa Mil xiuitl uan kema ya panotos nopa tonali kema Satanás sampa techyejyekos. ¿Tlake moiljuisej maseualmej uan ángeles tlen Jehová, ipan nopa tonali? Tlaj tijnekij  tijmatisej, sampa ma tikitakaj nopa ome tlamantli tlen moneki para mopajpakchiuas Jehová itoka: 1) monextis san Jehová kuali tlanauatia. Uan 2) tijnextisej amo tijtlauelkauaj maske tijpiaj tlaouijkayotl. Ipan nopa tonali, maseualmej ayokmo kinyejyekosej pampa ya elisej xitlauakej uan ya kinextijtosej amo kitlauelkauaj Jehová pampa ya panotos nopa tonali kema Satanás techyejyekos. Ipan nopa tonali, maseualmej ayokmo mikisej. ¿Uan nojua monekis monextis san Jehová kuali tlanauatia? Amo, pampa ya monextijtos ni tlamantli uan maseualmej uan ángeles ya kimatisej. Uan, ¿tlake panos ika Jehová itoka?

Itoka Jehová ya mopajpakchijtos uan ayokmo tleno kisokiuis. Maseualmej uan ángeles tlauel kitlepanitasej Jehová, ¿kenke? Pampa kiitasej tlauel kuali nochi tlen kichiua. Jesús amo moueyimati, yeka sampa kimaktilis nopa Tlanauatijkayotl iTata. Kiampa Jehová sampa “kipias nochi tlanauatili ika nochi tlen onka” (1 Cor. 15:28). Teipa, nochi maseualmej “tiitstosej timalakantokej tlen nopa tlatelchiuali, uan nochi elis tlauel yejyektsi” (Rom. 8:21). Kiampa Jehová kichiuas tlen mosentlalijtoya: maseualmej uan ángeles mosentikapaleuisej (Efes. 1:10).

¿Uan kenijkatsa kiyolmatisej nochi katli kitekipanouaj Jehová? Maseualmej uan ángeles kinekisej kiuejkapantlalisej Jehová itoka. Se katli kiijkuilok se salmo, kiijtok: “Ma tijueyichiuakaj TOTEKO Dios [...]. Nochipa ma tijpakilismakakaj” (Sal. 72:18, 19). Nochipa tijyekojtiasej sekinok tlamantli uan nopa kichiuas ma tijnekikaj tijueyichiuasej Jehová itoka.

Jehová itoka kinextia kenijkatsa eli. Kema timoiljuiaj ipan itoka, nima kichiua ma timoiljuikaj ya tlauel teiknelia (1 Juan 4:8). Nochipa tikilnamikisej Jehová techchijchijki uan kiualtitlanki Jesús pampa techiknelia, uan pampa techiknelia nojkia kinextia eli se kuali tlanauatijketl. Uan teipa nojkia tikitasej kenijkatsa Jehová kinextia techiknelia uan kiniknelia ángeles. Uan ipan nochi nopa xiuitl tlen tiitstosej, tijpantisej miak tlamantli tlen techpaleuis ma timonechkauikaj ika Jehová uan ma tijueyichiuakaj itoka (Sal. 73:28).