TLAMACHTILI 33
UIKATL 130 Ma titetlapojpoljuikaj
¿Kenijkatsa kineki Jehová ma tikitakaj katli kichiua se ueyi tlajtlakoli?
“Intla se akajya tlajtlakolchiuas, tijpiaj se totlatempaleuijka” (1 JUAN 2:1).
TLEN MOIXTOMAS
¿Tlake techmachtia tlen kichijkej ipan tlanechikoli tlen Corinto kema se toikni kichijki se ueyi tlajtlakoli?
1. ¿Tlake kineki Jehová ma tijchiuakaj?
JEHOVÁ techkaua toselti ma tijtlapejpenikaj tlake tijchiuasej. Mojmostla tijtlapejpeniaj se keski tlamantli. Kema se akajya kimaktilia Jehová inemilis uan moatsonpoliuiltia, kitlapejpenia tlen tlauel ipati. Ya kineki nochi maseualmej kiampa ma kichiuakaj. ¿Kenke? Pampa tlauel kiniknelia uan kineki ma yolpakikaj, ma mouampojchiuakaj iuaya uan ma itstokaj nochipa (Deut. 30:19, 20; Gál. 6:7, 8).
2. ¿Tlake kineki Jehová ma kichiuakaj katli tlajtlakolchijtokej uan amo moyolkueptokej? (1 Juan 2:1).
2 Jehová amo aka kichiualtia ma kitekipano, ya kineki sejse ma kitlapejpeni tlen kichiuas. ¿Uan tlaj se akajya katli moatsonpoliuiltijtok kichiua se ueyi tlajtlakoli? Tlaj amo moyolkuepa, moneki kikixtisej tlen tlanechikoli (1 Cor. 5:13). Maske kiampa panos, Jehová kineki katli tlajtlakolchijki sampa ma kitekipano. Ya temaktilik iKone pampa kineki kintlapojpoljuis katli moyolkuepaj (xijpoua 1 Juan 2:1). Jehová tlauel teiknelia, yeka kineki kinpaleuis katli tlajtlakolchijtokej ma moyolkuepakaj (Zac. 1:3; Rom. 2:4; Sant. 4:8).
3. ¿Tlake tikitasej ipan ni tlamachtili?
3 Jehová kineki ma tikitakaj tlajtlakoli uan kema se akajya tlajtlakolchiua kej ya kiita. Uan ni tlamachtili techpaleuis kiampa ma tijchiuakaj. Achtoui tikitasej tlake mochijki kema se akajya kichijki se ueyi tlajtlakoli ipan tlanechikoli tlen Corinto. Nojkia tikitasej tlake kiniljuik Pablo ma kichiuakaj toikniuaj kema moyolkuepki nopa tlakatl katli tlajtlakolchijtoya. Uan teipa, tikitasej kenijkatsa Jehová kinita katli kichiuaj se ueyi tlajtlakoli.
¿TLAKE MOCHIJKI IPAN ACHTOUI SIGLO KEMA SE AKAJYA TLAJTLAKOLCHIJKI?
4. ¿Tlake panoyaya ipan tlanechikoli tlen Corinto? (1 Corintios 5:1, 2).
4 (Xijpoua 1 Corintios 5:1, 2). Kema Pablo ika expa uejka tlajtolmoyauato, kimatki ipan tlanechikoli tlen Corinto se akajya kichijtoya se tlamantli tlen tlauel amo kuali: se toikni momekatiyaya iuaya itepotsna. Pablo kiijtok nopa tlamantli eliyaya “se ueyi tlajtlakoli tlen tlauel fiero, tlen hasta katli amo tlaneltokaj amo kiampa kichiuaj”. Toikniuaj kuali kiitayayaj nopa tlakatl uan moiljuiyayaj amo kenijki tlaj nojua itstoya ipan tlanechikoli. Kiampa kichiuayayaj pampa moiljuiyayaj tetlasojtlayayaj sanse kej Jehová. Pero Jehová amo kipaktia ma tlajtlakolchiuakaj ipan itlanechikol. Ika tlen kichiuayaya nopa tlakatl, miakej maseualmej mosentlachilijkej uan kiijtojkej tlamantli tlen amo kuali tlen tlanechikoli. Uan nojkia ueliskia kichiuas sekinok toikniuaj ma tlajtlakolchiuakaj. Uajka, ¿tlake kiniljuik Pablo katli itstoyaj ipan tlanechikoli tlen Corinto?
5. ¿Tlake kiniljuik Pablo toikniuaj tlen tlanechikoli uan tlake kiijtosnekiyaya? (1 Corintios 5:13; nojkia xikita tlaixkopinkayotl).
5 (Xijpoua 1 Corintios 5:13). Jehová kichijki Pablo ma kiijkuilo monekiyaya kikixtisej tlen tlanechikoli nopa tlakatl katli amo moyolkueptoya. ¿Kenijkatsa monekiyaya kiitasej sekinok toikniuaj? Pablo kiniljuik ayokmo kinamikiyaya mouampojchiuasej iuaya yon tlakuasej sansejko (1 Cor. 5:11). Kema titlakuaj iuaya se akajya, uelis kuali timokamanaljuiaj uan nopa kichiua ma timouikakaj iuaya. Yeka, Pablo kiniljuik toikniuaj amo kinamikiyaya itstosej iuaya nopa tlakatl. Kiampa amo tlajtlakolchiuaskiaj sanse kej ya (1 Cor. 5:5-7). Nojkia, katli tlajtlakolchijtoya kiitaskia kenijkatsa kiixpanotoya Jehová uan pinauaskia ika tlen kichijtoya, nopa kipaleuiskia ma moyolkuepa.
Pablo kiniljuik toikniuaj tlen Corinto ma kikixtikaj tlen tlanechikoli se akajya katli tlajtlakolchijtoya uan amo moyolkueptoya. (Xikita párrafo 5).
6. ¿Tlake kichijkej toikniuaj tlen Corinto kema kiselijkej nopa amatlajkuiloli tlen Pablo kintitlanilik, uan tlake kichijki katli tlajtlakolchijtoya?
6 Kema Pablo ya kintlajkuiljuilijtoya toikniuaj tlen Corinto, kinekiyaya kimatis kenijkatsa kiitayayaj tlen kiniljuik. Kema panok se keski tonali, Tito kiiljuik Pablo, toikniuaj kena kitlakakilijkej uan kichijkej tlen kiniljuik (2 Cor. 7:6, 7). Uan teipa kema Pablo ya kititlantoya nopa amatlajkuiloli, nopa tlakatl moyolkuepki. Ayokmo kichijki tlen amo kuali uan sampa pejtoya moyakana ika Jehová iTlanauatiljuaj (2 Cor. 7:8-11). ¿Uan nama tlake kiniljuiskia Pablo toikniuaj tlen Corinto?
¿KENIJKATSA KINAMIKIYAYA KIITASEJ TOIKNIUAJ NOPA TLAKATL KATLI MOYOLKUEPKI?
7. ¿Tlake panok pampa kikixtijkej tlen tlanechikoli nopa tlakatl? (2 Corintios 2:5-8).
7 (Xijpoua 2 Corintios 2:5-8). Pablo kiijtok: “Miakej tlen inmojuantij tlauel inkitlalnamiktijtokej nopa tlakatl, uajka ika nopa ya kuali”. Nopa kiijtosneki kema kikixtijkej tlen tlanechikoli, nopa tlakatl kiitak monekiyaya moyolkuepas, uan nelia kiampa kichijki (Heb. 12:11).
8. Teipa, ¿tlake kiniljuik Pablo toikniuaj tlen Corinto?
8 Teipa, Pablo kiniljuik toikniuaj kenijkatsa monekiyaya kiitasej nopa tlakatl katli tlajtlakolchijtoya, kiniljuik: “Moneki inkitlapojpoljuisej ika nochi inmoyolo uan inkiyoltlalisej”. Uan nojkia kiijtok: “Xijnextilikaj inkiikneliaj”. Pablo kinekiyaya nopa tlakatl ma tlakuepili ipan tlanechikoli uan kinekiyaya toikniuaj ma kinextikaj ika tlen kiijtouayayaj uan kichiuayayaj, nelnelia kitlapojpoljuiyayaj uan kiikneliyayaj. Kiampa nopa tlakatl kuali kiyolmatiskia pampa toikniuaj yolpakiskiaj kema kiitaskiaj sampa tlakuepilijtoya.
9. ¿Kenke se keskij uelis ouij kimatkej kitlapojpoljuisej nopa tlakatl katli tlakuepilik?
9 Uelis se keskij toikniuaj amo kinpaktik pampa nopa tlakatl katli tlajtlakolchijtoya sampa tlakuepilijtoya ipan tlanechikoli. Kiampa kiyolmatkej pampa kichijtoya ma onka kuesoli ipan tlanechikoli uan uelis se keskij toikniuaj nojua moyolkokojtoyaj ika tlen kichijki. Uelis se keskij moiljuiyayaj amo kinamikiyaya kiselisej ika miak tlaiknelili pampa kichijtoya miak tlamantli tlen amo kuali, uan inijuantij nochipa kichijtoyaj kampeka monejnemiltisej kej Jehová kipaktia (nojkia xikita Lucas 15:28-30). Pero, ¿kenke monekiyaya sampa kuali kiselisej nopa tlakatl?
10, 11. ¿Tlake panotoskia tlaj ueuejtlakamej amo kitlapojpoljuijtoskiaj nopa tlakatl?
10 ¿Tlake panotoskia tlaj ueuejtlakamej amo kikajtoskiaj ma tlakuepili maske ya moyolkueptoya o toikniuaj amo kiselijtoskiaj ika tlaiknelili? Nopa tlakatl ueltoskia “tlauel moyolkokos” pampa tlauel mokuesoskia. Nojkia ueltoskia moiljuis ayokmo kema sampa ueliskia kitekipanos Jehová yon tlakuepilis ipan tlanechikoli.
11 Uan amo san ya nopa panoskia. Tlaj toikniuaj tlen nopa tlanechikoli amo kitlapojpoljuiskiaj nopa tlakatl, ueltoskia ayokmo kuali mouikasej iuaya Jehová. ¿Kenke? Pampa kinextiskiaj amo kichiuaj kej Jehová, katli kintlapojpoljuia katli moyolkuepaj, uan kinextijtoskiaj eliyayaj kej Satanás pampa ya amo kuali iyolo uan amo tetlasojtla. Nojkia Satanás ueltoskia kintekiuis uan kiampa kichiuaskia nopa tlakatl ayokmo ma kineki kitekipanos Jehová (2 Cor. 2:10, 11; Efes. 4:27).
12. ¿Kenijkatsa toikniuaj tlen Corinto ueliskiaj kichiuasej kej Jehová?
12 Uajka, ¿kenijkatsa toikniuaj tlen Corinto ueliskiaj kichiuasej sanse kej Jehová uan amo kej Satanás? Monekiyaya tetlasojtlasej sanse kej Jehová kintlasojtla katli moyolkuepaj. Xikita tlake kiijtojkej tlen Jehová se keskij tlakamej katli kiijkuilojkej Biblia. David kiijtok: “Ta nelia tikuali uan timoketstok timokualtlalijtok para titetlapojpoljuis” (Sal. 86:5). Miqueas kiijtok: “Axaka seyok Dios keja ta. Ta titetlapojpoljuia tlaixpanoli uan [ . . . ] tikilkaua inintlajtlakoljuaj” (Miq. 7:18). Uan Isaías kiijtok: “Nochi tlajtlakolchijkatlakamej ma kikauakaj nopa fiero ojtli tlen kitokiliaj uan ipan inintlalnamikilis ma kikixtikaj nochi tlamantli tlen axkuali tlen yajuantij moiljuiaj, uan ma mokuepakaj noka na niDIOS niinmoTEKO. Uan na temachtli nikintlasojtlas uan nikintlapojpoljuis” (Is. 55:7).
13. ¿Kenke ueuejtlakamej monekiyaya kikauasej nopa tlakatl sampa ma tlakuepili ipan tlanechikoli? (Xikita nopa recuadro “ ¿Kema kikauilijkej sampa ma tlakuepili nopa tlakatl tlen Corinto?”).
13 Toikniuaj tlen Corinto kichiuaskiaj sanse kej Jehová tlaj kuali kiseliskiaj nopa tlakatl uan kinextiskiaj kiikneliaj. Pablo kiijtok tlaj kitlapojpoljuiskiaj, kinextiskiaj kichiuayayaj nochi tlen kinnauatiyayaj (2 Cor. 2:9). Maske amo panotoya miak metstli, nopa tlakatl motlalnamiktik uan moyolkuepki ika nochi iyolo pampa kikixtijkej tlen tlanechikoli. Yeka, ueuejtlakamej ueliskiaj kikauasej sampa ma tlakuepili ipan tlanechikoli pampa amo tleno kintsakuiliyaya.
¿TLAKE TECHMACHTIA PAMPA JEHOVÁ TETLASOJTLA UAN KICHIUA TLEN XITLAUAK?
14, 15. ¿Tlake techmachtia tlen panok ipan tlanechikoli tlen Corinto? (2 Pedro 3:9; nojkia xikita tlaixkopinkayotl).
14 Jehová kichijki ma moijkuilo ipan Biblia tlen panok ipan tlanechikoli tlen Corinto pampa kinejki “techmachtis” (Rom. 15:4). Ni kinextia Jehová amo kineki ma mochiua uejueyi tlajtlakoli ipan itlanechikol. Sekij moiljuiaj pampa Jehová tetlasojtla, kinkaua nojua ma itstokaj ipan tlanechikoli katli amo moyolkuepaj. Pero nopa amo nelia. Maske Jehová tetlasojtla, amo kikaua yon se maseuali ma kiixpano iTlanauatiljuaj yon kiuejkamajkaua tlen tlanauatia (Jud. 4). Tlaj Jehová nojua kikauaskia ma itsto ipan itlanechikol se akajya katli tlajtlakolchiua uan amo moyolkuepa, uajka kinextiskia amo tetlasojtla pampa sekinok toikniuaj nojkia ayokmo kuali itstoskiaj (Prov. 13:20; 1 Cor. 15:33).
15 Tlen panok nojkia kinextia Jehová amo kineki yon se ma poliui. Ya kineki kinmanauis nochi maseualmej. Kinextia kintlasojtla katli kipatlaj kej monejnemiltiaj uan kichiuaj kampeka sampa kuali mouikasej iuaya (Ezeq. 33:11; xijpoua 2 Pedro 3:9). Yeka, kema nopa tlakatl tlen Corinto moyolkuepki uan ayokmo kichijki tlen amo kuali, Jehová kiniljuik toikniuaj tlen nopa tlanechikoli monekiyaya kitlapojpoljuisej uan sampa kuali kiselisej.
Toikniuaj kinextiaj teikneliaj uan tetlasojtlaj kej Jehová kichiua pampa kinseliaj katli sampa tlakuepiliaj ipan tlanechikoli. (Xikita párrafos 14, 15).
16. ¿Tlake timoiljuia tlen Jehová kema tikita kenijkatsa kisenkajki nopa ueyi kuesoli ipan tlanechikoli tlen Corinto?
16 Tlen panok ipan tlanechikoli tlen Corinto techpaleuia ma tikitakaj Jehová tlauel teiknelia uan nochipa kichiua tlen xitlauak (Sal. 33:5). Kema tikitaj nopa kuajkuali tlamantli tlen kinextia, kichiua ma tijnekikaj tijueyichiuasej. Nochi tojuantij titlajtlakolejkej, yeka moneki Jehová ma techtlapojpoljui. Tlauel tijtlaskamatiliaj pampa temaktilik iKone uan kiampa techtlapojpoljuia totlajtlakoljuaj. Tlauel techyolchikaua pampa Jehová nelia techiknelia uan kineki kuali ma tiitstokaj.
17. ¿Tlake tikixtomasej ipan sekinok tlamachtili?
17 Uan tlaj ipan ni tonali se akajya kichiua se ueyi tlajtlakoli, ¿tlake moneki kichiuasej ueuejtlakamej para kinextisej teikneliaj sanse kej Jehová uan kipaleuisej nopa maseuali ma moyolkuepa? ¿Tlake kinamiki tijchiuasej kema ueuejtlakamej kikixtiaj se akajya o kikauaj sampa ma tlakuepili? Ipan sekinok tlamachtili tijnankilisej ni tlajtlanili.
UIKATL 109 Ma titeiknelikaj ika nochi toyolo
