1, 2. 1) ¿Kenijkatsa kinita Jehová katli tlajtlakolchiuaj uan amo moyolkuepaj? 2) ¿Tlake kineki Jehová ma kichiuakaj?

 JEHOVÁ amo kipaktia kema se akajya tlajtlakolchiua (Sal. 5:4-6). Maske ya kimati amo senkistok tijchiuasej tlen techiljuia pampa titlajtlakolejkej, kena kineki ma tijtlepanitakaj iTlanauatiljuaj tlen techmakatok ipan Biblia (Sal. 130:3, 4). Pero nojkia amo kinitasneki “maseualmej [katli] amo tlatlepanitaj uan amo pinauaj tlajtlakolchiuasej pampa kiijtouaj Dios kinextia ueyi iyolo ika nochi tojuantij” (Jud. 4). Biblia nojkia kiijtoua Dios kintsontlamiltis “tlen fierojtikej” ipan Armagedón (2 Ped. 3:7; Apoc. 16:16).

² Jehová “axkineki niyon se ma poliui”. Ipan tlamachtili tlen timomachtijtokej, tikitstokej Jehová kineki “nochi ma moyolpatlakaj” (2 Ped. 3:9). Ueuejtlakamej kichiuaj kampeka kipiasej ininyolo kema kipaleuiaj se akajya katli kichijtok se ueyi tlajtlakoli, pampa kinekij ma moyolkuepa uan sampa ma mouampojchiua iuaya Jehová. Maske ueuejtlakamej kiampa kichiuaj, amo nochi kinekij moyolkuepasej (Is. 6:9).  Sekij amo kinekij kichiuasej tlen kiniljuiaj maske ueuejtlakamej miakpa kintlalnamiktijtokej. ¿Tlake moneki mochiuas kema kiampa pano?

“XIJKIXTIKAJ NOPA MASEUALI KATLI KICHIUA TLEN TLAUEL AMO KUALI”

3. 1) ¿Tlake moneki kichiuasej ueuejtlakamej kema se akajya kichiua se ueyi tlajtlakoli uan amo moyolkuepa? 2) Kema se akajya amo moyolkuepa, ¿kenke uelis tikijtosej ya iselti kitlapejpenik ma kikixtikaj tlen tlanechikoli?

³ Tlaj se akajya kichiua se ueyi tlajtlakoli uan amo moyolkuepa, ueuejtlakamej moneki kichiuasej tlen kiijtoua 1 Corintios 5:13: “Xijkixtikaj nopa maseuali katli kichiua tlen tlauel amo kuali katli itstok kampa inmojuantij”. Uelis tikijtosej nopa tlajtlakolchijketl iselti kitlapejpenik kichiuas nopa tlamantli (Gál. 6:7). ¿Kenke kiampa tikijtouaj? Pampa amo kikaua ueuejtlakamej ma kipaleuikaj maske miakpa kitlalnamiktijtokej (2 Rey. 17:12-15). Tlen kichiua, kinextia mosentlalijtok amo kichiuas Jehová iTlanauatiljuaj (Deut. 30:19, 20).

4. Kema kikixtiaj se tlajtlakolchijketl tlen tlanechikoli, ¿kenke moneki kinmatiltisej toikniuaj?

⁴ Kema kikixtiaj se tlajtlakolchijketl, kinmatiltiaj nochi toikniuaj tlen tlanechikoli nopa maseuali ayokmo eli se Jehová itlajtoltemajka. a Nopa tlamantli mochiua amo para kipinaualtisej, mochiua pampa kinekij sekinok toikniuaj ma kichiuakaj tlen Biblia kiijtoua uan ayokmo ma mouikakaj iuaya yon ma tlakuakaj iuaya (1 Cor. 5:9-11). Jehová kiijtojtok kiampa ma kichiuakaj para kuali itstosej. Apóstol Pablo kiijtok: “Se kentsi levadura kisoneua nochi harina” (1 Cor. 5:6). Tlaj amo kikixtisej tlen tlanechikoli, sekij toikniuaj uelis moiljuisej amo moneki kichiuasej kampeka moyakanasej ika Jehová iTlanauatiljuaj (Prov. 13:20; 1 Cor. 15:33).

5. ¿Kenijkatsa kinamiki tikitasej se katli ayokmo eli Jehová itlajtoltemajka, uan kenke?

⁵ Uajka, ¿kenijkatsa moneki tikitasej nopa maseuali katli ayokmo eli Jehová itlajtoltemajka? Maske ayokmo timouikaj iuaya, amo kinamiki timoiljuisej ayokmo kema tlakuepilis, pampa uelis teipa kena kinekis sampa monechikos touaya. Ma tikilnamikikaj nopa maseuali nojkia motemaktilijtok ika Jehová. Pero nama ayokmo monejnemiltia kej Jehová kipaktia, yeka eli mauilili pampa uelis kintlanauis sekinok (Ezeq. 18:31). Maske kiampa kichiua, Jehová uelis kitlasojtlas uan nopa maseuali uelis sampa tlakuepilis. Yeka, ¿kenijkatsa ueuejtlakamej uelis kinpaleuisej katli kinkixtijtokej tlen tlanechikoli?

¿KENIJKATSA UEUEJTLAKAMEJ KINPALEUIAJ KATLI KINKIXTIJTOKEJ TLEN TLANECHIKOLI?

6. ¿Tlake moneki kichiuasej ueuejtlakamej para kipaleuisej katli kikixtijtokej tlen tlanechikoli?

⁶ ¿Tlake kichiuaj ueuejtlakamej kema se tlajtlakolchijketl kikixtiaj tlen tlanechikoli? ¿Kitlauelkauaj uan ayokmo kipaleuiaj ma tlakuepili? Amo. Kema nopa eyij ueuejtlakamej kiiljuiaj kikixtisej tlen tlanechikoli, nojkia kiiljuiaj tlake moneki kichiuas para tlakuepilis. Pero amo san ya nopa kiiljuiaj. Nojkia uelis kiiljuisej, kinpaktiskia sampa monechikosej iuaya kema panotos se keski metstli para kiitasej tlaj ya moyolpatlatok. Tlaj nopa maseuali kena kinekis, kema sampa monechikosej, ueuejtlakamej kiiljuisej ika tlaiknelili ma moyolkuepa uan ma tlakuepili. ¿Uan tlaj ayamo moyolpatla? Ueuejtlakamej nojua kichiuasej kampeka kipaxalojtinemisej para kipaleuisej.

7. ¿Kenijkatsa ueuejtlakamej kichiuaj kej Jehová kema kamanaltij iuaya nopa maseuali tlen kikixtijtokej tlen tlanechikoli? (Jeremías 3:12).

 ⁷ Ueuejtlakamej moneki kichiuasej kampeka kinextisej tetlasojtlaj kema kamanaltisej iuaya se akajya katli kikixtijtokej tlen tlanechikoli pampa Jehová kiampa kichiua. Uejkajkia, kema israeleuanij amo tlaneltokayayaj, Jehová amo san kinchiayaya ma tlakuepilikaj. Ya kitemoliyaya kenijkatsa kinpaleuis maske inijuantij amo moyolkueptoyaj. Kej timomachtijkej ipan tlamachtili 32, Jehová kinextik tlauel tetlasojtla ika tlen Oseas kipanok. Kiiljuik Oseas ma kiiljuiti isiua sampa ma tlakuepili iuaya maske nojua momekatiyaya (Os. 3:1; Mal. 3:7). Ueuejtlakamej kichiuaj kej Jehová pampa nojkia kinekij ika nochi ininyolo nopa maseuali ma moyolkuepa uan ma tlakuepili ipan Jehová itlanechikol. Yeka, amo kitlauelkauaj uan kipaleuiaj (xijpoua Jeremías 3:12).

8. ¿Kenijkatsa techpaleuia nopa tlapoualistli tlen nopa telpokatl katli kistejki ichaj más kuali ma tijkuamachilikaj Jehová techtlasojtla? (Lucas 15:7).

⁸ Ipan tlamachtili 32, tikitakej tlapoualistli tlen nopa telpokatl katli kistejki ichaj. Kema itata kiuejkaitak, nimantsi “motlalojtejki uan kinamikito, kinajnauajki uan kitsoponik ika miak tlaiknelili” (Luc. 15:20). Nopa tetaj amo mochixki achtoui kitlapojpoljuis ikone. Ya nima kinamikito kej kichiuaskia se tetaj katli teiknelia. Ueuejtlakamej nojkia kinikneliaj katli mokuapolojtokej, yeka kichiuaj kampeka kinpaleuisej para ma tlakuepilikaj (Luc. 15:22-24, 32). Kema se tlajtlakolchijketl tlakuepilia, Jehová, Jesús, ángeles uan toikniuaj ipan tlanechikoli, tlauel yolpakij (xijpoua Lucas 15:7).

9. ¿Tlake kiniljuia Jehová katli kichijtokej se ueyi tlajtlakoli?

⁹ Hasta nama tikitstokej Jehová amo kikaua ma itsto ipan tlanechikoli se akajya katli kichiua se ueyi tlajtlakoli uan amo moyolkuepa. Maske kikixtiaj tlen tlanechikoli, Jehová amo kitlauelkaua pampa kineki ma tlakuepili. Ipan Oseas 14:4 kiijtoua kenijkatsa Jehová kinita katli moyolkuepaj, ya kiijtoua: “Na nijchikauas ika nochi tlen fiero inmechchiuilijtok nopa miak tlajtlakoli. Na niinmechiknelis ika nochi noyolo pampa nokualankayo ya inmechtlalkauijtok”. Ueuejtlakamej moneki kiitasej tlaj nopa maseuali katli tlajtlakolchijki peua moyolkuepa. Uan katli kitlauelkajtokej Jehová, moneki kiitasej ya tlauel kiniknelia uan kineki ma tlakuepilikaj.

10, 11. ¿Kenijkatsa ueuejtlakamej kinpaleuiaj katli ya uejkajtok kinkixtijkej ipan tlanechikoli?

¹⁰ ¿Uan tlake kichiuaj ueuejtlakamej ika maseualmej katli uejkajkia kinkixtijkej tlen tlanechikoli? Uelis nopa maseuali ayokmo kichiua tlen amo kuali o ayokmo kiilnamiki kenke kinkixtijkej. Ueuejtlakamej moneki kitemosej uan kipaxalosej nopa maseuali. Kema kipaxalosej, uelis kiiljuisej tlaj kineki ma momaijtokaj iuaya uan kiiljuisej ika tlaiknelili sampa ma tlakuepili ipan tlanechikoli. Tlaj se akajya ya uejkajtok ayokmo kitekipanoua Jehová, ayokmo kuali tlaneltoka. Yeka, tlaj nopa maseuali kineki tlakuepilis, ueuejtlakamej moneki kiitasej ajkia uelis kimachtis ika Biblia, maske ayamo tlakuepilia. Nochi ni tlamantli san ueuejtlakamej kinamiki kiitasej.

¹¹ Ueuejtlakamej kichiuaj kampeka tetlasojtlasej sanse kej Jehová kichiua. Yeka, kintemouaj uan kinpaxalouaj maseualmej para kinpaleuisej sampa ma tlakuepilikaj. Tlaj se akajya kinextia ya moyolkuepki uan ayokmo kichiua tlen amo kuali, ueuejtlakamej uelis kiitasej tlaj nima uelis tlakuepilis ipan tlanechikoli (2 Cor. 2:6-8).

12. 1) ¿Kema ueuejtlakamej moneki kuali kiitasej se keski tlamantli tlaj se akajya kinekis tlakuepilis ipan tlanechikoli? 2) ¿Kenke amo kinamiki timoiljuisej katli kichijkej se keski tlajtlakoli Jehová amo kema kintlapojpoljuis? (Nojkia xikita nota).

 ¹² Kemantika ueuejtlakamej moneki kuali kiitasej se keski tlamantli kema se akajya kinekis sampa tlakuepilis ipan tlanechikoli, kej kema se maseuali kichiuilia tlen amo kuali se konetl, eliyaya apóstata o kema kitemolik kenijkatsa kikajkayauas inamik pampa kinekiyaya moamaxelos iuaya. Kema se akajya kichiua se tlen ni ueyi tlajtlakoli, ueuejtlakamej moneki kiitasej tlaj nelnelia moyolkueptok (Mal. 2:14; 2 Tim. 3:6). Ueuejtlakamej moneki kinmokuitlauisej toikniuaj, pero nojkia moneki kiilnamikisej Jehová kena uelis sampa kiselis se akajya katli nelia moyolkueptok uan ayokmo kichiua  nopa tlajtlakoli tlen momajtoya. Yeka, maske ueuejtlakamej moneki kuali kiitasej tlaj nelia moyolkueptok katli kichijki se tlen ni ueyi tlajtlakoli, amo kinamiki moiljuisej Jehová amo kema kitlapojpoljuis (1 Ped. 2:10). b

¿TLAKE UELIS KICHIUASEJ NOCHI TOIKNIUAJ TLEN TLANECHIKOLI?

13. ¿Kenijkatsa tikinitaj katli kintlalnamiktiaj uan katli kinkixtiaj tlen tlanechikoli?

¹³ Kej tikitakej ipan tlamachtili 34, kemantika ipan tlanechikoli tematiltiaj se toikni kitlalnamiktijkej. Kema kiampa pano, nojua uelis timouikasej iuaya pampa tijmatij ya moyolkuepki uan ayokmo tlajtlakolchiua (1 Tim. 5:20). Ya nojua itstok ipan Jehová itlanechikol uan moneki toikniuaj ma kipaleuikaj nojua ma kichiua tlen kuali (Heb. 10:24, 25). ¿Uan tlake tijchiuaj kema se akajya kikixtiaj tlen tlanechikoli? Ayokmo timouikaj ‘yon titlakuaj iuaya’ (1 Cor. 5:11).

14. ¿Tlake moneki tijtlapejpenisej kema se akajya kikixtijtokej tlen tlanechikoli? (Nojkia xikita tlaixkopinkayomej).

¹⁴ Uajka kema se akajya kikixtiaj tlen tlanechikoli, ¿kiijtosneki ayokmo tijchiuilisej cuenta? Amo. Maske amo uejkauas timokamanaljuisej iuaya, sejse tlen tojuantij moneki kitlapejpenis tlaj tijtlaneuisej ma monechiko touaya se touikal, toteixmatka o se touampo katli kikixtijtokej tlen tlanechikoli. ¿Uan tlake moneki tijchiuasej tlaj nopa maseuali yaui tlanechikoli? Achtouia amo tijtlajpalouayayaj, pero nama, tlaj totlalnamikilis amo techyolkokoua, sejse tlen tojuantij moneki kitlapejpenis tlaj kitlajpalos o amo. Uelis sekij amo kenijki kiitaj tlaj kitlajpalosej nopa maseuali kema yaui tlanechikoli. Pero amo kinamiki tlauel tiuejkauasej timokamanaljuisej yon timouampojchiuasej iuaya.

15. ¿Tlen ajkia kamanalti 2 Juan 9-11? (Nojkia xikita recuadro “ ¿Juan uan Pablo kamanaltiyayaj tlen sanse tlajtlakoli?”).

¹⁵ Uelis tikilnamikij Biblia kiijtoua tlaj se akajya kitlajpaloua ni maseuali kejuak ‘kipaleuia ika tlen axkuali kichiua’. Pero ipan sekinok versículos tlen eltok achtoui uan teipa  tlen 2 Juan 9-11 (xijpoua) kamanalti tlen apóstatas uan katli kinekij sekinok nojkia ma kichiuakaj tlen amo kuali (Apoc. 2:20). Uajka, tlaj se akajya kimoyaua tlamachtili tlen amo melauak o kichiua sekinok tlajtlakoli, ueuejtlakamej amo kinamiki kipaxalosej. Maske nopa maseuali kena uelis kipatlas inemilis, tlaj ayamo kiampa kichiua, amo tijtlajpalosej yon tijtlaneuisej ma monechiko touaya.

MA TITETLASOJTLAKAJ SANSE KEJ JEHOVÁ

16, 17. 1) ¿Tlake kineki Jehová ma kichiuakaj katli tlajtlakolchiuaj? (Ezequiel 18:32). 2) ¿Kenijkatsa ueuejtlakamej kipaleuiaj Jehová?

¹⁶ ¿Tlake timomachtijkej ipan ni makuili tlamachtili? Jehová kineki nochi ma momanauikaj (xijpoua Ezequiel 18:32). Kineki katli tlajtlakolchijtokej sampa kuali ma mouampojchiuakaj iuaya (2 Cor. 5:20). Yeka, Jehová miakpa kiniljuijtok katli tlajtlakolchijkej ma moyolkuepakaj uan sampa ma kitekipanokaj. Uan eli se ueyi tlateochiualistli pampa ueuejtlakamej kipaleuiaj Jehová para kinpaleuisej katli tlajtlakolchijtokej ma moyolkuepakaj (Rom. 2:4; 1 Cor. 3:9).

¹⁷ ¡Tlauel techpaktia timoyoliljuisej kenijkatsa ipan iluikak tlauel yolpakij kema se akajya moyolkuepa! ToTata Jehová tlauel yolpaki kema se akajya sampa tlakuepilia ipan tlanechikoli. Tlaj nochipa timoyoliljuiaj kenijkatsa Jehová techtlasojtla, techteikneltiita uan tlauel techiknelia, techpaleuis más ma tikiknelikaj (Luc. 1:78).