TLAMACHTILI 31
UIKATL 12 ToueyiTeko Jehová
¿Tlake kichijtok Jehová pampa kinejki techmakixtis tlen tlajtlakoli uan mikilistli?
“Dios nelia tlauel kiniknelik katli itstokej ipan Tlaltipaktli” (JUAN 3:16).
TLEN MOIXTOMAS
¿Kenijkatsa techmakixtia Jehová tlen tlajtlakoli uan kenijkatsa techpaleuis teipa ayokmo ma tijpiakaj tlajtlakoli uan kiampa tiitstosej nochipa?
1, 2. 1) ¿Tlake eli tlajtlakoli, uan kenijkatsa uelis timomakixtisej? (Nojkia xikita “Tlen tlauel ipati”). 2) ¿Tlake tikitasej ipan ni uan ipan nopa sekinok tlamachtili tlen ni pilamochtsi? (Nojkia xikita ipan ni amatlajkuiloli “Tlen moneki tijmatisej”).
¿MITSPAKTISKIA tijmatis kenijkatsa mitsiknelia Jehová? Uelis tijmatis tlaj kuali timomachtia tlen ya kichijtok para mitsmanauis tlen tlajtlakoli uan mikilistli. Amo aka ueli momakixtia tlen tlajtlakoli a pampa eli kejuak se tokualankaitaka katli kipia miak chikaualistli. Nochi titlajtlakolchiuaj mojmostla, titlajtlakolejkej uan yeka timikij (Rom. 5:12). Pero timotemachiaj Jehová techmakixtis tlen tlajtlakoli.
2 Jehová kinpaleuijtok maseualmej se 6 mil xiuitl ma kichijtokaj kampeka mouampojchiuasej iuaya maske tlajtlakolejkej. ¿Kenke kiampa kichijtok? Pampa tlauel techiknelia. Kema techchijchijki pejki tlauel techiknelia, yeka kichijtok miak tlamantli para techpaleuis. Ya kimati tlajtlakoli kichiua ma timikikaj, uan kineki techpaleuis ma tiitstokaj nochipa (Rom. 6:23). Uan ya nojkia kineki kiampa xiitsto. Ipan ni tlamachtili tijnankilisej eyi tlajtlanili: 1) ¿tlake kichijki Jehová pampa kineki ma timotemachikaj teipa kuali tiitstosej?, 2) ¿tlake kichiuayayaj maseualmej uejkajkia pampa kinekiyayaj kiyolpakiltisej Jehová maske eliyayaj tlajtlakolejkej? Uan 3) ¿tlake kichijki Jesús para kinmakixtis maseualmej tlen tlajtlakoli uan mikilistli?
JEHOVÁ KICHIJKI MA TIMOTEMACHIKAJ TEIPA KUALI TIITSTOSEJ
3. ¿Kenijkatsa Adán uan Eva tlajtlakolchijkej?
3 Kema Jehová kinchijchijki Adán uan Eva, kinekiyaya ma yolpakikaj. Yeka, kinkajki ma itstokaj kampa tlauel tlayejyektsi, kichijki ma mosenkauakaj uan kiniljuik ma kinpiakaj miakej ininkoneuaj, nojkia kinnauatik ma kichiuakaj nochi Tlaltipaktli ma eli yejyektsi kej xochimili Edén. San kiniljuik amo ma kichiuakaj se tlamantli uan kiniljuik tlaj amo tlaneltokaskiaj, mikiskiaj. Uan ya tijmatij tlake panok teipa: Satanás katli amo kiiknelia Jehová yon kinikneliyaya Adán uan Eva, kichijki ma tlajtlakolchiuakaj. Inijuantij amo kineltokakej Jehová uan kichijkej tlen Satanás kiniljuik. Uan nelia panok tlen Jehová kiijtok, ipan nopa tonali pejkej ueuejtiaj uan teipa mijkej (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Kenke Jehová tlauel kikualankaita tlajtlakoli, uan kenke techpaleuia ma timomakixtikaj tlen tlajtlakoli? (Romanos 8:20, 21).
4 Tlen panok ipan nopa tonali tlauel techyolkokoua, pero Jehová kikajki ma moijkuilo ipan Biblia pampa kineki techmachtis kenke tlauel kikualankaita tlajtlakoli. Tlajtlakoli kichiua ma timouejkatlalikaj tlen Jehová uan ma timikikaj (Is. 59:2). Satanás kipaktia tlajtlakoli pampa kimati uelis kichiuas ma tijtlauelkauakaj Jehová. Yeka, kichijki Adán uan Eva ma tlajtlakolchiuakaj uan kineki tojuantij nojkia kiampa ma tijchiuakaj. Kema inijuantij tlajtlakolchijkej, Satanás uelis moiljuik Jehová ayokmo kichiuaskia tlen mosentlalijtok. Pero amo kikuamachiliyaya Jehová tlauel techiknelia uan amo kipatlak tlen mosentlalijtoya kinmakas iteipaixuiuaj Adán uan Eva. Ya tlauel kiniknelia maseualmej, yeka nima kichijki tlen kinpaleuiskia ma motemachikaj teipa kuali itstosej (xijpoua Romanos 8:20, 21). Kimatiyaya se keskij maseualmej kiikneliskiaj uan mosentlaliskiaj kineltokasej. Uan pampa Jehová tlauel techiknelia, kichiuaskia se tlamantli tlen kinpaleuiskia ma kinechkauikaj uan ma momakixtikaj tlen tlajtlakoli uan mikilistli. ¿Kenijkatsa kichiuaskia?
5. ¿Kema uan kenijkatsa Jehová kiniljuik maseualmej teipa kuali itstoskiaj? (Génesis 3:15).
5 (Xijpoua Génesis 3:15). Kema Jehová kiijtok kitsontlamiltiskia Satanás, nojkia kiijtok maseualmej kuali itstoskiaj. Kiijtok se iteipaixui nopa siuatl eliskia tlauel ipati pampa teipa kitsontlamiltiskia Satanás, uan kikualtlaliskia nochi tlen kichijki ipan xochimili Edén (1 Juan 3:8). Iteipaixui nopa siuatl tlauel tlaijiyouiskia pampa Satanás kichiuaskia ma miki, uan nopa tlauel kiyolkokoskia Jehová. Pero ya kiijtok kena kichiuaskia tlen mosentlalijtoya pampa kiampa miakej maseualmej ueliskiaj momanauisej tlen tlajtlakoli uan mikilistli.
¿TLAKE KICHIUAYAYAJ MASEUALMEJ PAMPA KINEKIYAYAJ KINECHKAUISEJ UAN KIYOLPAKILTISEJ JEHOVÁ?
6. ¿Tlake kichijkej Abel uan Noé pampa kinejkej kinechkauisej Jehová?
6 Jehová ika yolik kiijtojtiajki kenijkatsa maseualmej ueliskia kinechkauisej. Kema Adán uan Eva tlaijixnamijkej, Abel elki katli achtoui kuali tlaneltokak. Ya kiikneliyaya Jehová, kinekiyaya kinechkauis uan kiyolpakiltis, yeka kimakak se tlakajkaualistli. Abel eliyaya se tlapialmokuitlauijketl uan kimakak Jehová se keskij pilborregojtsitsij “tlen achtoui tlakatkej”. Uan Jehová “kikualitak Abel ika itlakajkaualis uan kiselik” (Gén. 4:4). Teipa, Jehová nojkia kiselik tlakajkaualistli tlen kichijkej sekinok maseualmej katli kiikneliyayaj uan motemachiyayaj ipan ya, kej Noé (Gén. 8:20, 21). Kiampa kinextik maseualmej uelis kinechkauisej uan kiyolpakiltisej maske elij tlajtlakolejkej. b
7. ¿Tlake techmachtia tlen Abrahán mosentlalijtoya kichiuas?
7 Jehová kiiljuik Abrahán, katli nojkia kuali tlaneltokayaya, ma kichiua se tlamantli tlen tlauel ouij kimatiskia: ma kimaka kej tlakajkaualistli ikone Isaac. Uelis Abrahán tlauel kiyolkokok kema Jehová kitlajtlanik nopa tlamantli. Maske kiampa kiyolmatki, ya kinejki kichiuas. Uan kema nechka kimiktiskia ikone, Jehová kiiljuik amo ma kimikti. Tlen kichijki Abrahán, kinmachtia se tlamantli tlen tlauel ipati katli kuali tlaneltokaj: Jehová temaktiliskia iKone pampa tlauel kiniknelia maseualmej (Gén. 22:1-18).
8. ¿Tlake kinextiyaya nopa tlakajkaualistli tlen temakayayaj israeleuanij? (Levítico 4:27-29; 17:11).
8 Kema panok miak xiuitl, Jehová kiniljuik israeleuanij ma temakakaj tlapialmej kej tlakajkaualistli para kintlapojpoljuis inintlajtlakoljuaj (xijpoua Levítico 4:27-29; 17:11). Nopa tlakajkaualistli kinextiyaya Jehová nojkia temakaskia se tlakajkaualistli tlen tlauel kinpaleuiskia maseualmej, pampa kiampa ueliskia kintlapojpoljuis nochi inintlajtlakoljuaj. Dios kichijki teokamanalouanij ma kiijtokaj se akajya tlaijiyouiskia uan mikiskia. Ni elki iKone iyojtsi katli eliskia kej se pilborregojtsi tlen temakaskiaj kej se tlakajkaualistli (Is. 53:1-12). Jehová temakaskia iKone kej se tlakajkaualistli para mitsmakixtis uan kinmakixtis sekinok maseualmej tlen tlajtlakoli uan mikilistli.
¿TLAKE KICHIJKI JESÚS PARA KINMAKIXTIS NOCHI MASEUALMEJ?
9. ¿Tlake kinextik tlen kiijtok Juan katli teAtsonpoliuiltia? (Hebreos 9:22; 10:1-4, 12).
9 Ipan xiuitl 29, Juan katli teAtsonpoliuiltia kiitak Jesús uan kiijtok: “¡Xikitakaj, iBorregojtsi Dios katli kikixtia tlajtlakoli ipan Tlaltipaktli!” (Juan 1:29). Kiampa kinextik Jesús eliyaya katli Dios kiijtojtoya ualaskia para kinmakixtis maseualmej. Jesús motemaktiliskia kej tlakajkaualistli, kiampa kinpaleuiskia maseualmej ma momakixtikaj tlen tlajtlakoli uan mikilistli (xijpoua Hebreos 9:22; 10:1-4, 12).
10. ¿Kenijkatsa Jesús kinextik ualajki para kinpaleuis “katli tlajtlakolejkej”?
10 Jesús kinekiyaya kinpaleuis katli amo kuali kiyolmatiyayaj pampa eliyayaj tlajtlakolejkej uan kiniljuiyaya ma kitokilikaj. Ya kimatiyaya tlajtlakoli kichiua ma tlaijiyouikaj nochi maseualmej. Yeka kinnechkauiyaya tlakamej uan siuamej katli tlaijiyouiyayaj pampa sekinok kinitayayaj kej tlajtlakolchiuanij. Teipa Jesús kiijtok: “Katli amo mokokouaj amo moneki kiitatij se tepajtijketl, pero katli mokokouaj kena”. Uan nojkia kiijtok: “Amo niualajtok para nikinnotsas katli kichiuaj tlen kuali, nikinnotsako katli tlajtlakolejkej” (Mat. 9:12, 13). Uan kiampa kinextik ika tlen kichijki. Se neskayotl, kitlapojpoljuik itlajtlakoljuaj nopa siuatl katli kiikxipajpajki ika iixayo (Luc. 7:37-50). Uan kimachtik miak tlamantli tlen tlauel ipati nopa siuatl samariaejketl katli itstoya ipan ameli maske kimatiyaya momekatiyaya (Juan 4:7, 17-19, 25, 26). Maseualmej mikij pampa tlajtlakolejkej, pero Jehová kimakak Jesús chikaualistli para kinyolkuis tlakamej, siuamej uan konemej (Mat. 11:5).
11. ¿Kenke maseualmej katli tlajtlakolchiuayayaj kinekiyayaj kinechkauisej Jesús?
11 Maseualmej katli tlauel tlajtlakolchiuayayaj nojkia kinekiyayaj kinechkauisej Jesús pampa ya kikuamachiliyaya tlen kinpanoyaya uan kintlasojtlayaya (Luc. 15:1, 2). Nojkia kinpaleuiyaya uan kiniljuiyaya tlauel kuali pampa kineltokayayaj (Luc. 19:1-10). Ika tlen kichijki, Jesús kinextik iTata tlauel tetlasojtla (Juan 14:9). Nojkia kinextik Jehová tlauel techiknelia, kikuamachilia tlen techpano uan kineki techpaleuis ma timomakixtikaj tlen tlajtlakoli. Jesús kinpaleuiyaya katli tlajtlakolchiuayayaj ma kinekikaj kipatlasej ininnemilis uan ma kitokilikaj (Luc. 5:27, 28).
12. ¿Kenijkatsa kiijtok Jesús kinpaleuiskia imikilis?
12 Jesús kuali kimatiyaya tlake kipanoskia. Miakpa kiniljuik itokilijkauaj se tlen inijuantij kitemaktiliskia uan kimiktiskiaj ipan se kuauitl (Mat. 17:22; 20:18, 19). Nojkia kimatiyaya ika tlen kichiuaskia kinpaleuiskia maseualmej ayokmo ma kipiakaj tlajtlakoli, kej kiijtojtoyaj Juan uan sekinok teokamanalouanij. Nojkia kiijtok teipa kema kimiktiskiaj, kichiuaskia ma kinechkauikaj “maseualmej tlen kampa ueli euaj” (Juan 12:32). Katli tlaneltokaskiaj ipan Jesús uan kichiuaskiaj tlen kiijtok, ueliskiaj kiyolpakiltisej Jehová uan kinmakixtiskiaj “tlen tlajtlakoli” (Rom. 6:14, 18, 22; Juan 8:32). Jesús amo majmajki uan kinejki temakas inemilis maske tlauel kitlaijiyouiltiskiaj (Juan 10:17, 18).
13. ¿Kenijkatsa mijki Jesús, uan kenijkatsa imikilis techpaleuia ma tikixmatikaj Jehová? (Nojkia xikita tlaixkopinkayomej).
13 Jesús kitemaktilijkej, kiitskijkej, kitlaijiljuijkej, kiistlakauijkej, kiiljuijkej kimiktiskiaj uan tlauel kitlaijiyouiltijkej. Teipa se keskij soldados kikuapilojkej ipan se kuauitl para kimiktisej. Jesús kiijiyouik nochi tlen kichiuilijkej uan Jehová tlauel kiyolkokok kema kiitak nochi tlen kichiuiliyayaj iKone. ¿Kenke Jehová kikajki ma kitlaijiyouiltikaj? Pampa tlauel techiknelia. Jesús kiijtok: “Dios nelia tlauel kiniknelik katli itstokej ipan Tlaltipaktli, yeka temaktilik iKone iyojtsi uan kiampa nochi katli tlaneltokasej ipan ya amo kintsontlamiltisej, uan kipiasej nemilistli tlen amo kema tlamis” (Juan 3:16).
Jehová kinejki techmakixtis tlen tlajtlakoli uan mikilistli, yeka kikajki ma kimiktikaj iKone maske tlauel kiyolkokok. (Xikita párrafo 13).
14. ¿Tlake mitsmachtia tlen Jesús kichijki kema motemaktilik?
14 Tlen Jesús kichijki kinextia Jehová tlauel kiniknelia iteipaixuiuaj Adán. Nojkia kinextia tlauel mitsiknelia ta. Maske tlauel kiyolkokok kema kimiktijkej iKone, Jehová kinejki techmakixtis tlen tlajtlakoli uan mikilistli (1 Juan 4:9, 10). Ya kineki techpaleuis sejse tlen tojuantij ma tijchiuakaj kampeka tijneltokasej uan ma timomakixtikaj tlen tlajtlakoli.
15. ¿Tlake moneki tijchiuasej tlaj tijnekij ma techpaleui Jesús imikilis?
15 Jesús imikilis eli se regalo tlen Jehová techmakatok, uan techpaleuia ma techtlapojpoljuikaj totlajtlakoljuaj. Pero nochi moneki tijchiuasej se tlamantli. Juan katli teAtsonpoliuiltia uan Jesús kiijtojkej tlake moneki tijchiuasej: “Ximoyolpatlakaj pampa nopa Tlanauatijkayotl tlen eltok iluikak monechkauijtok” (Mat. 3:1, 2; 4:17). Yeka, tlaj tijnekij tijchiuasej kampeka amo titlajtlakolchiuasej uan tijnechkauisej Jehová, moneki timoyolkuepasej. Pero, ¿tlake kiijtosneki timoyolkuepasej uan kenijkatsa techpaleuia ma tijyolpakiltikaj Jehová maske titlajtlakolejkej? Ipan tlamachtili 32 tijnankilisej ni tlajtlanili.
UIKATL 18 Tlaskamati pampa techmakixtik
a TLEN TLAUEL IPATI: Kema ipan Biblia motekiuia nopa tlajtoli tlajtlakoli, amo kiijtosneki san setsi tlamantli. Se neskayotl, kema se akajya kichiua se tlamantli tlen Jehová amo kipaktia o amo kichiua tlen technauatia, eli se tlajtlakoli. Pero tlen Adán techpanoltilik nojkia kiiljuiaj tlajtlakoli, pampa nama ayokmo tixitlauakej uan yeka timikij.
