Apóstol Pablo kiniljuik Cristo itokilijkauaj tlen Tesalónica: “Tlaj se akajya amo kineltoka tlen tiinmechiljuiaj ipan ni carta, kuali xijtlachilikaj ajkia kichiua nopa” (2 Tes. 3:14). Achtouia timoiljuiyayaj ni tlamantli san ueuejtlakamej monekiyaya kichiuasej. Tlaj se akajya amo kinekiyaya kichiuas tlen Biblia kiijtoua maske miakpa kitlajtolmakatoyaj, ueuejtlakamej monekiyaya kiixtomasej se tlamachtili kampa kiijtouayayaj kenke amo kinamikiyaya mouikasej iuaya. Kema kiampa kiniljuiyayaj, toikniuaj ayokmo mouikayayaj iuaya nopa toikni, pero kena kinojnotsayayaj ipan tlanechikoli uan ipan tlajtolmoyaualistli.

Nama tijkuamachiliaj tlen Pablo kiijtok kinextia tlen moneki kichiuas sejse toikni kema panos se keski tlamantli. Yeka, ueuejtlakamej ayokmo kinamiki kiixtomasej se tlamachtili kampa kiijtosej ayokmo kinamiki mouikasej iuaya se akajya katli amo kuali monejnemiltia. ¿Kenke mopatlak kej tijkuamachiliyayaj ni texto? Ma tikitakaj tlake sekinok tlamantli kiijtok Pablo.

Pablo kiijtok ipan tlanechikoli se keskij toikniuaj amo monejnemiltiyayaj “kej kinamiki”. Amo kichiuayayaj tlen kiniljuiyaya maske kintlajtolmakayaya ika iTlajtol Dios. Se neskayotl, kema achtoui kinpaxalok, kiniljuik: “Tlaj se akajya amo kineki tekitis, nojkia amo ma tlakua”. Maske kiampa kiniljuik, sekij amo kinekiyayaj tekitisej para mopanoltisej, maske kena ueliskiaj kichiuasej. Nojkia mokalakiyayaj “kampa amo inincuenta”. ¿Kenijkatsa toikniuaj monekiyaya kiitasej se akajya katli amo monejnemiltiyaya kej kinamiki? (2 Tes. 3:6, 10-12).

Pablo kiijtok: “Kuali xijtlachilikaj ajkia kichiua nopa”. Ika griego, nopa tlajtoli kiijtosneki tikitas ajkia amo kuali monejnemiltia uan amo timouikas iuaya para amo timonejnemiltis kej ya kichiua. Ni tlanauatili kiniljuijkej nochi toikniuaj uan amo san ueuejtlakamej (2 Tes. 1:1; 3:6). Uajka, tlaj se toikni kiitayaya se akajya ipan tlanechikoli kiixpanoyaya tlen Biblia tlanauatia, ya iselti monekiyaya kitlapejpenis ayokmo mouikas iuaya.

Uajka, ¿kiijtosneki monekiyaya kiitasej nopa toikni kej se katli kikixtijtokej tlen tlanechikoli? Amo, pampa Pablo nojkia kiijtok: “Nojua xijtlalnamiktikaj kej se inmoikni”. Yeka, sejse toikni nojua ueliskia kinojnotsas ipan tlanechikoli uan ipan tlajtolmoyaualistli, pero amo itstoskiaj iuaya kema moyolpakiltiskiaj. Pablo kiijtok monekiyaya kiampa kichiuasej “para ma pinaua”. Yeka tlaj toikniuaj ayokmo mouikaj iuaya, uelis mopinauas uan kipatlas kej monejnemiltia (2 Tes. 3:14, 15).

¿Uan kenijkatsa tojuantij uelis tijchiuasej tlen kiijtoua 2 Tesalonicenses 3:14? Achtoui, moneki kuali tikitasej tlaj nopa noikni nelnelia kichiua tlen amo kinamiki. Pablo amo kamanaltiyaya tlen toikniuaj katli kichiuaj se keski tlamantli tlen tojuantij amo kuali tikitaj pero amo kiixpano tlen Biblia kiijtoua, o katli kinpaktia se keski tlamantli tlen tojuantij amo. Nojkia amo kamanaltiyaya tlen toikniuaj katli techyolkokojkej. Ya kamanaltiyaya tlen toikniuaj katli xitlauak kintlajtolmakatokej pero nojua kiixpanoj tlen Biblia kiijtoua.

Tlaj tikitaj se toikni amo kichiua tlen Biblia kiijtoua, a sejse tlen tojuantij moneki tijtlapejpenisej amo timosentilisej iuaya kema timoyolpakiltisej o kema tijchiuasej sekinok tlamantli. Nopa san tojuantij uelis tijtlapejpenisej, yeka amo kinamiki tikiniljuisej sekinok katli amo elij tochampoyouaj. Pero nojua tikamanaltisej iuaya ipan tlanechikoli uan kema titlajtolmoyauaj. Kema sampa kuali monejnemiltis, uajka sampa uelis timouikasej iuaya kej achtouia.