1, 2. 1) ¿Kenijkatsa techpaleuia tikiknelijtiasej Jehová? 2) ¿Tlake tlajtlanili tijnankilisej ipan ni tlamachtili?

TOTATA Jehová kiijtojtok kinteochiuas itekipanojkauaj katli amo kitlauelkauaj. Kiampa kinextia tlauel techiknelia. Uan “tojuantij tikikneliaj toTeko, pampa yajaya achtoui techiknelik” (1 Juan 4:19). Uan pampa nojua tikiknelijtiauij Jehová, nojua tlauel kuali titlaneltokaj ipan ya, uan timotemachiaj nelia kinteochiuas katli kiikneliaj (xijpoua Hebreos 11:6).

² Jehová tlauel kineki kinteochiuas itekipanojkauaj, pampa ya nochipa ipa kiampa kichiua. Tlaj tojuantij amo timotemachiskiaj Jehová kinteochiua katli kitekipanouaj ika nochi ininyolo, uajka tijnextiskiaj amo kuali titlaneltokaj. ¿Kenke tikijtouaj nopa? Pampa tlaneltokili kiijtosneki “tijneltokaj para temachtli panos nopa tlamantli tlen toTeko techtenkauilijtok” (Heb. 11:1). Tlaneltokili kiijtosneki nelia timotemachiaj toTeotsij kinteochiuas katli amo kitlauelkauaj. ¿Kenijkatsa  techpaleuia timotemachisej teipa nelia tijselisej miak tlateochiualistli? ¿Kenijkatsa uejkajkia Jehová kinteochijki itekipanojkauaj? ¿Kenijkatsa techteochiua nama?

3. ¿Tlake kiijtojtok toTeotsij ipan Malaquías 3:10?

³ Jehová kiijtojtok kinteochiuas itekipanojkauaj. Uan kiijtoua kiampa kichiuas tlaj tojuantij tijtekipanouaj ika nochi toyolo. Jehová techiljuia: “Xinechyejyekokaj”. Uan teipa kiijtoua: “Uan inkiitasej para nijtlapos [...] iluikaktli uan niinmechtitlanilis miak tlateochiualistli hasta tlauel mokauas” (Mal. 3:10). Tlaj ‘tijyejyekosej’ toTeotsij kej ya techiljuia, tijnextisej nelia tlauel tijtlaskamatiliaj.

4. ¿Kenke uelis timotemachisej ipan tlen Jesús kiijtok ipan Mateo 6:33?

⁴ Jesús kiniljuik itokilijkauaj toTeotsij kinmakaskia tlen moneki tlaj inijuantij kitekipanoskiaj ika nochi ininyolo (xijpoua Mateo 6:33). Ya kiniljuik nopa pampa kimatiyaya Jehová nochipa kichiua tlen kiijtoua (Is. 55:11). Tojuantij nojkia uelis timotemachisej ipan Jehová. Tlaj kuali titlaneltokaj, ya kichiuas tlen kiijtok: “Axkema niinmechkajteuas, nochipa niitstos inmouaya” (Heb. 13:5). Ni tlajtoli techpaleuia ma timotemachikaj ipan tlen Jesús kiijtok ipan Mateo 6:33.

5. ¿Kenke techyolchikaua tlen Jesús kinankilik Pedro?

⁵ Apóstol Pedro kiiljuik Jesús: “Tojuantij tijkajtejtokej nochi tlen tijpixtoyaj para  timitstokilisej. Uajka ¿tlachke tijpiasej?” (Mat. 19:27). Jesús amo kiajuak Pedro kema kitlajtlanik nopa. Ya kiniljuik itokilijkauaj toTeotsij tlauel kinteochiuaskia pampa kikajtoyaj miak tlamantli uan kitekipanouayayaj. Maske teipa apóstoles uan sekinok toTeotsij itekipanojkauaj tlanauatisej iuaya Jesús ne iluikak, Jesús kiniljuik kiseliskiaj miak tlateochiualistli: “Tlen kikajtejtok ichaj, o itlakaikniuaj, o isiuaikniuaj, o inana, o itata, o ikoneuaj, o imil, o isiua pampa nechneltokiliaj, kipantis cien uelta tlen kikajtejtok uan nojkia toTeko kimakas yolistli tlen yankuik para nochipa” (Mat. 19:29). Ipan ni tonali, tojuantij nojkia tijpiaj nopa tlateochiualistli ipan tlanechikoli, pampa sekij tikinitaj kej totatauaj, tonanauaj, totlaikniuaj uan tosiuaikniuaj. Ni tlateochiualistli nelia tlauel kuali uan tlauel tijpatiitaj, amo kej nochi tlamantli tlen tijkajtokej.

6. ¿Kenijkatsa techpaleuia tijmatisej Jehová kiijtojtok kinteochiuas itekipanojkauaj?

⁶ Maske ipan ni tonali tijpiaj miak tlateochiualistli, nojua tijchixtokej sekinok tlateochiualistli tlen tijselisej teipa (1 Tim. 4:8). Jehová kiijtojtok kinteochiuas itekipanojkauaj, uan kema tijmatij ni, techpaleuia ma tikijiyouikaj miak tlaouijkayotl. Pampa nelia timotemachiaj Jehová “kintlaxtlauia tlakamej tlen nelia kitemouaj”, techpaleuia amo kema ma tijtlauelkauakaj (Heb. 11:6).

7. ¿Kenke tlen tijchiaj tijselisej kichiua kejuak ‘kuali ma tiilpitokaj’?

⁷ Kema Jesús kinmachtik itokilijkauaj ipan se tepetl, kiijtok: “Xipakikaj uan amo ximokuesokaj pampa toTeko ueyi inmechtlaxtlauis nepa iluikak. Kej nopa tlakamej nojkia kintlatsakuiltijkej iteokamanalojkauaj toTeko uejkajkia” (Mat. 5:12). Sekij toTeotsij itekipanojkauaj yasej iluikak uan sekinok itstosej nochipa ipan Tlaltipaktli kema mochiuas se xochimili. Inijuantij nojkia tlauel yolpakij pampa kiselisej ni tlateochiualistli (Sal. 37:11; Luc. 18:30). Yeka, Biblia kiijtoua “toalma kuali ilpitok” pampa tijchiaj tijselisej miak tlamantli (Heb. 6:17-20). ¿Tlake kiijtosneki “toalma kuali ilpitok”? Maske tijpiaj miak tlaouijkayotl, tojuantij tiitstokej titemachmej uan nopa techpaleuia ma tikijiyouikaj uan amo ma tijtlauelkauakaj Jehová.

8. ¿Kenijkatsa tlen tijchiaj tijselisej kichiua amo tlauel ma timotekipachokaj?

⁸ Tlen tijchiaj tijselisej nojkia techpaleuia amo tlauel ma timotekipachokaj. Kej se pajtli tlen timopolouaj techpaleuia kampa techkokoua se tlenijki, tlen toTeotsij kiijtojtok techmakas nojkia techyolseuia. Tlauel techyolchikaua tijmatisej kenijkatsa Jehová techmokuitlauis kema tijkauasej  imako nochi tlen techkuesoua (Sal. 55:22). Uelis timotemachisej toTeotsij “kichiuas onpano más miak uan axkeja nochi tlen ueli tijtlajtlaniaj o tlen tiuelij timoiljuiaj” (Efes. 3:20). Ni kiijtosneki Jehová kichiuas “onpano más miak” nochi tlen tijtlajtlanisej pampa kineki techpaleuis.

9. ¿Tlake moneki tijchiuasej tlaj tijnekij Jehová ma techteochiua?

⁹ Tlaj tijnekij Jehová ma techteochiua, moneki kuali titlaneltokasej ipan ya uan nochipa tijchiuasej tlen technauatia. Moisés kiniljuik israeleuanij: “InmoTeko Dios nelia inmechteochiuas miak nopona, inkineltokatiasej nochi nopa tlanauatili tlen ama niinmechmakatok. Kena, inmoTeko Dios inmechteochiuas keja kiijtojtok kichiuas” (Deut. 15:4-6). ¿Nelia timotemachiaj ika nochi toyolo Jehová techteochiuas tlaj amo kema tijtlauelkauaj? Onka miak tlamantli tlen kichiua ma timotemachikaj.

10, 11. ¿Kenijkatsa Jehová kiteochijki José?

¹⁰ Jehová kichijki ma moijkuilo Biblia pampa kimatiyaya techpaleuiskia. Nopaya uelis tijpouasej kenijkatsa kinteochijki itekipanojkauaj katli amo kitlauelkajkej (Rom. 15:4). Ma tikitakaj tlen kipanok José. Kema telpokatl, itepotsikniuaj kinamakakej kej se tlatekipanojketl. Teipa, se siuatl kiistlakauik uan kiijtok kinekiyaya kipinaualtis, yeka kitsajkej ne Egipto. ¿Kitlauelkajkej José pampa tsaktoya? Amo, Biblia kiijtoua: “ToTeko nojua itstoya iuaya José uan kinextilik kejatsa kiiknelia”. Uan teipa kiijtoua: “ToTeko itstoya iuaya uan kichiuayaya para nochi ma kisa kuali” (Gén. 39:21, 23). Maske kipixtoya miak tlaouijkayotl, José kipixki iyolo uan kichixki Jehová ma kipaleui.

¹¹ Kema panok se keski xiuitl, Faraón kikixtik José uan kitekimakak. Maske achtouia eliyaya san se tlatekipanojketl, nama nojkia kipixtoya tlauel miak tlanauatili ipan altepetl Egipto (Gén. 41:1, 37-43). Teipa kinpixki omej ikoneuaj. Se kitokaxtik Manasés, “pampa kiijtok: ‘ToTeko Dios kichijtok ma nikilkaua noteixmatkauaj uan nochi tlen nitlaijiyouijtok’”. Uan iompa kone kitokaxtik Efraín, “pampa kiijtok: ‘ToTeko Dios kichijtok ma nikinpia nokoneuaj ipan ni tlali kampa nitlaijiyouijtok’” (Gén. 41:51, 52). Jehová kiteochijki José pampa amo kema kitlauelkajki. José kimajtoya nochi nopa tlateochiualistli Jehová kimakatoya (Gén. 45:5-9).

12. ¿Tlake kipaleuik Jesús amo ma kitlauelkaua toTeotsij?

¹² Jesús nojkia nochipa kineltokak toTeotsij maske tlauel tlaijiyouik. Yeka Jehová tlauel kiteochijki. ¿Tlake kipaleuik Jesús amo ma kitlauelkaua toTeotsij? Biblia kiijtoua: “Kiijiyouik nopa ueyi pinaualistli para mikis ipan [se kuauitl] pampa kimatiyaya nopa ueyi pakilistli tlen kichiayaya teipa” (Heb. 12:2). Jesús tlauel yolpajki  pampa kimatiyaya kiueyichiuayaya toTeotsij itoka. Jehová nochipa kuali kiitak uan nojkia kimakak sekinok tekitl. Biblia kiijtoua “ama ya moseuijtok inejmatl toTeko kampa más onka tlatlepanitakayotl”. Uan nojkia kiijtoua “toTeko kiueyitlalik nepa iluikak, uan kichijki más ueyi que nochi sekinok pampa kimakatok nopa tlanauatili tlen más ueyi” (Filip. 2:9).

13, 14. ¿Kenijkatsa kiita Jehová nochi tlen tijchiuaj pampa tijtekipanouaj?

¹³ Uelis timotemachisej Jehová nelia tlauel kipatiita nochi tlen tijchiuaj pampa tijtekipanouaj. Ya amo kualani kema kiita timotekipachouaj o timoiljuiaj amo uelis tijchiuasej se tlenijki. Nojkia kipia ueyi iyolo uan kineki techpaleuis kema kiita timotekipachouaj pampa amo tijpiaj tekitl o amo tijmatij kenijkatsa tikinpanoltisej tochampoyouaj. Techtlasojtla kema kiita ayokmo tiuelij tijtekipanouaj kej achtouia pampa uelis timokokouaj o pampa tlauel timokuesouaj miak tonali. Uelis timotemachisej Jehová techpatiita pampa amo tijtlauelkauaj maske tijpiaj miak kuesoli (xijpoua Hebreos 6:10, 11).

¹⁴ Nojkia moneki tikilnamikisej Jehová techtlakakilia uan ‘technankilia kema timomaijtouaj’ (Sal. 65:2). ToTata katli “techtlasojtla uan ajachika techyoltlalia” techpaleuis amo kema ma tijtlauelkauakaj (2 Cor. 1:3). Jehová tlauel yolpaki kema kiita tojuantij nojkia tikinikneliaj uan tikinpaleuiaj sekinok. Biblia kiijtoua: “Kema se kipaleuia tlen teikneltsi eltok keja kitlanejtiskia ToTeko. Uan yajaya mitstlaxtlauis para nochi tlen kuali tijchijtok” (Prov. 19:17; Mat. 6:3, 4). Kema tikinpaleuiaj toikniuaj, Jehová kiita kejuak tijtlanejtiaj se tlenijki, uan ya kiijtoua teipa kejuak techtlaxtlauis pampa kiampa tijchiuaj.

15. ¿Tlake tlateochiualistli tijneki tijselis? (Xikita nopa achtoui tlaixkopinkayotl).

¹⁵ Katli kintlapejpenijtokej yasej iluikak motemachiaj kiselisej se “corona”, uan nopa Jesús kinmakas (2 Tim. 4:7, 8). Uan katli amo techtlapejpenijtokej nojkia tijselisej se tlamantli tlen tlauel kuali. Miakej maseualmej motemachiaj itstosej nochipa ipan Xochimili, kampa “tlauel pakisej, pampa [toTeotsij] kinteochiuas hasta mokauas” (Sal. 37:11; Juan 10:16).

16. ¿Kenijkatsa techyolchikaua 1 Juan 3:19, 20?

¹⁶ Kemantika uelis timoyolkokouaj pampa timoiljuiaj amo tlauel kuali tijtekipanouaj Jehová, o uelis timoiljuiaj ya amo kipatiita tlen tijchiuaj. Uan uelis timoiljuiaj amo kinamiki Jehová ma techmaka se tlenijki. Yeka, moneki nochipa ma tikilnamikikaj “tlen toTeko kiijtoua tlen tojuantij ipati más tlen nopa tlen toyolo techiljuia, pampa yajaya kimati nochi tlen onka” (xijpoua 1 Juan 3:19, 20). Tlaj tijtekipanouaj Jehová pampa titlaneltokaj ipan ya uan pampa tikikneliaj, uelis timotemachisej ya techteochiuas maske timoiljuiskiaj amo tlauel ipati tlen tijchiuaj (Mar. 12:41-44).

17. ¿Kenijkatsa Jehová techteochiua ipan ni tonali?

¹⁷ Maske Satanás tlanauatijtok ipan itlamia tonali, Jehová tlauel kinteochiua itekipanojkauaj ipan ni tonali. ¿Kenijkatsa  kichiua? Ya techmaka miak tlamachtili tlen techpaleuia kuali ma titlaneltokakaj uan techmaka tlaseuilistli (Is. 54:13). Uan kej Jesús kiijtok, Jehová techmakatok miakej toikniuaj ipan nochi Tlaltipaktli katli tlauel techikneliaj (Mar. 10:29, 30). Uan katli kichiuaj kampeka kichiuasej tlen ya kineki, nojkia kinmaka tlaseuilistli uan pakilistli (Filip. 4:4-7).

18, 19. ¿Kenijkatsa tijyolmatij kema timoyoliljuiaj ipan nochi tlateochiualistli tlen Jehová techmaka?

¹⁸ Jehová nelia tlauel kinteochijtok nochi itekipanojkauaj. Bianca, katli eua Alemania, kiijtoua: “Amo nijmati kenijkatsa nijtlaskamatilis Jehová, pampa ya nechpaleuijtok ika nochi nokuesoljuaj uan mojmostla itstok nouaya. Maske ipan Tlaltipaktli pano tlen tlauel amo kuali, na amo nimajmaui pampa nijmati Jehová kejuak kuali nechitskitok kema nijtekipanoua. Kema na nijkaua se tlenijki pampa nijtekipanoua, ya nechmaka cien tlateochiualistli”.

¹⁹ Nojkia ma timoiljuikaj ipan tlen kipano Paula, katli eua Canadá. Ya kipia 70 xiuitl, uan amo ueli kichiua miak tlamantli pampa kipia se kokolistli ipan itepotskuayo. Ya kiijtoua: “Nitlajtolmoyaua ipan teléfono uan kampa nikinpantia maseualmej. Pampa nijneki nimoyolchikauas, nijpixtok se cuaderno kampa nikijkuiloua textos uan se keski tlamantli tlen kiijtoua amatlajkuiloli, uan nochipa nikompauijtok. Na nijtokaxtia ‘Nocuaderno tlen nechyolchikaua’. Kema timosentlaliaj ipan tlen Jehová techmakas, amo tlauel uejkaua timokuesouaj”. Maske uelis amo techpano kej Bianca uan Paula, nojkia tikilnamikij kenijkatsa Jehová tlauel techteochijtok tojuantij uan sekinok katli tikinixmatij. Nochi katli tijtekipanouaj Jehová tlauel timoyolchikauaj kema tikitaj kenijkatsa techteochiua ipan ni tonali uan kema timoiljuiaj kenijkatsa tlauel techteochiuas teipa.

20. ¿Ipan tlake uelis timotemachisej tlaj nojua tijchijtosej kampeka tijtekipanojtosej Jehová?

²⁰ Amo kema ma tikilkauakaj Jehová nochipa techtlakakilis uan techpaleuis kema timomaijtosej. Tlaj tijchiuasej “nochi ipakilis toTeko”, uelis timotemachisej “yajaya temachtli [t]echmakas nochi tlen [t]echtenkauilijtok” (Heb. 10:35, 36). Yeka, nojua kuali ma titlaneltokakaj uan ma tijchiuakaj kampeka nojua kuali tijtekipanosej Jehová. Tlaj kiampa tijchiuasej, ¡Jehová temachtli techteochiuas! (Xijpoua Colosenses 3:23, 24).