1, 2. ¿Kenijkatsa techpaleuia Romanos 5:12?

ROMANOS 5:12 kiijtoua: “Tlajtlakoli pejki ipan Tlaltipaktli pampa san se tlakatl tlajtlakolchijki. Uan pampa pejki tlajtlakoli, nojkia pejki miki[li]stli. Uajka ama miki[li]stli techasi nochi titlakamej, pampa nochi titlajtlakolchijtokej”. Tojuantij kuali tikixmatij ni texto pampa tlauel tijtekiuiaj kema titlajtolmoyauaj.

² Ni texto tlauel miakpa nesi ipan amochtli ¿Tlake nelnelia tlamachtia Biblia? Uelis kema tikinmachtiaj tokoneuaj o sekinok maseualmej nochipa tijpouaj Romanos 5:12 ipan tlamachtili 3, 5 uan 6. Ika nopa texto tikinixtomiliaj kenke Tlaltipaktli amo eli se xochimili, kenke monejki ma techmakixtikaj uan kenke timikij. Nopa texto nojkia uelis techpaleuis nojua tlauel ma tijpatiitakaj timouampojchijtosej iuaya Jehová. Uan nojkia techpaleuis nojua tlauel ma timosentlalijtokaj tijchiuasej tlen ya kipaktia uan tijchixtosej tlen kiijtojtok techmakas.

3. ¿Tlake moneki nochi tikilnamiktosej?

 ³ Nochi moneki tikilnamikisej titlajtlakolejkej uan mojmostla timokuapolouaj. Uan maske Jehová kimati nopa, ya tlauel techtlasojtla uan kineki techtlapojpoljuis (Sal. 103:13, 14). Jesús kiijtok moneki tijtlajtlanisej toTeotsij ma techtlapojpoljui (Luc. 11:2-4). Yeka, tlaj Jehová ya techtlapojpoljuik pampa uejkajkia tikixpanokej o titlajtlakolchijkej, ayokmo kinamiki tikilnamiktosej o timoyolkokojtosej ika tlen tijchijkej. Ma tikitakaj kenke Jehová ueli techtlapojpoljuia.

4, 5. 1) ¿Tlake techpaleuia ma tijkuamachilikaj kenke Jehová uelis techtlapojpoljuis? 2) ¿Tlake kiijtosneki toTeotsij “ueyi iyolo”?

⁴ Romanos capítulo 6 techpaleuia ma tijkuamachilikaj kenke Jehová uelis techtlapojpoljuis. Ipan Romanos 3:23, 24, apóstol Pablo kiijtok nochi titlajtlakolchijtokej, uan teipa kiijtok: “Ueyi iyolo toTeko ika tojuantij uan yajaya techchiua ma tiitstokaj tixitlauakej iixpa san tlapik, pampa Jesucristo ya tlaxtlajki totlauikilis ipampa totlajtlakoljuaj kema mijki”. Kema Pablo kiijtok “ueyi iyolo”, kiijtosnekiyaya toTeotsij kichijki se tlamantli tlen tlauel kuali katli techpaleuiskia maske amo timotlanilijtokej uan maske amo kinamiki tijselisej, uan kema kichijki nopa amo moiljuijtoya monekiyaya ma tijtlaxtlauikaj.

⁵ Se katli tlauel ixtlamati kiijtok kema Biblia kiijtoua toTeotsij o Cristo ueyi iyolo, kiijtosneki nochi tlen inijuantij kichijtokej pampa kinekij kinmakixtisej maseualmej tlen tlajtlakoli uan mikilistli. Yeka, ipan Traducción del Nuevo Mundo kitlajtolkuepa kej “tlaiknelili tlen amo kinamiki tijselisej”. Ma tikitakaj tlake kichijki Jehová uan kenijkatsa pampa techiknelia o kipia “ueyi iyolo”, techpaleuia ipan ni tonali uan kichiua ma timotemachikaj kuali tiitstosej teipa.

6. ¿Ajkia inijuantij kinpaleuia pampa toTeotsij ueyi iyolo?

⁶ Nochi titlajtlakolchiuaj uan timikij pampa Adán tlajtlakolchijki. Yeka, Biblia kiijtoua mikilistli pejki ipan Tlaltipaktli pampa “se tlakatl tlajtlakolchijki”. Maske kiampa panok, Jehová kinextik ueyi iyolo kema “ika se tlakatl”, Jesucristo, kichijki tlen monekiyaya uan kiampa kinmakixtiskia nochi maseualmej (Rom. 5:12, 15, 17). Uajka, pampa toTeotsij ueyi iyolo, nochi uelis techpaleuis. Pampa Jesucristo “kitlamichijki” tlen toTeotsij kinauatik, miakej uelis “timochiuasej tixitlauakej iixpa” uan uelis “techmakas yolistli tlen yankuik” (Rom. 5:19, 21).

7. ¿Kenke nopa tlaxtlauili kinextia toTeotsij tlauel ueyi iyolo uan kenke tlauel kuali tlen techmakatok?

⁷ Ma timoiljuikaj ipan ni tlamantli: maske Jehová amo monekiyaya temakas iKone kej se tlaxtlauili, ya kinextik tlauel ueyi iyolo kema kichijki tlen monekiyaya uan kiampa ueliskia techmakixtis tlen tlajtlakoli uan mikilistli. Yon se maseuali motlanilijtok tlen kichijkej Jehová uan iKone. Yeka, ¡tlauel tikintlaskamatiliaj pampa kichijkej nochi tlen monekiyaya uan kiampa ueliskia techtlapojpoljuisej uan timotemachisej tiitstosej nochipa ipan Xochimili! Uelis tijnextisej tlauel  tikintlaskamatiliaj tlaj nochipa timonejnemiltiaj kej kinamiki.

8. ¿Tlake amo kinamiki timoiljuisej?

⁸ Maske tijmatij toTeotsij kineki techtlapojpoljuis totlajtlakoljuaj, maske tlauel ueyi tlajtlakoli tijchijtokej, amo kinamiki timoiljuisej uelis tijchijtosej tlen amo kuali san pampa Jehová ueyi iyolo. Uan nojkia amo kinamiki timoiljuisej ni: “Amo kenijki pampa Jehová nechtlapojpoljuis”. Kema nojua itstoyaj se keskij apóstoles, se keskij Cristo itokilijkauaj kiampa moiljuijkej (xijpoua Judas 4). Ipan ni tonali, sekij nojkia kiampa moiljuiaj, yeka tlauel moneki timomokuitlauisej uan kiampa amo timoiljuisej kej inijuantij.

9, 10. ¿Kenijkatsa Pablo uan sekinok kinmakixtijkej tlen tlajtlakoli uan mikilistli?

⁹ Pablo kiniljuik Cristo itokilijkauaj amo kinamikiyaya moiljuisej ueliskia tlajtlakolchijtosej san pampa Jehová kintlapojpoljuiskia. Yeka kiniljuik: “Tojuantij keja timijkatsitsij tlen titlankejya ika tlajtlakoli” (xijpoua Romanos 6:1, 2). ¿Tlake kinejki kiijtos?

¹⁰ Pampa toTeotsij temaktilik iKone, uelki kitlapojpoljuik Pablo uan sekinok toikniuaj katli itstoyaj ipan achtoui siglo. Jehová kintlapejpenik ika itonal uan kiampa ueliskiaj elisej ikoneuaj. Tlaj amo kema kiixpanoskiaj, yaskiaj iluikak uan tlanauatiskiaj iuaya Cristo. Inijuantij nojua itstoyaj ipan Tlaltipaktli, uajka ¿kenke Pablo kiijtok inijuantij eliyayaj ‘mijkatsitsij tlen tlankejya ika tlajtlakoli’? Kiijtok nopa pampa kinekiyaya kinextis mopatlatoya kej monejnemiltiyayaj. Yeka nojkia kiixtonki tlen panok ika Jesús. Kiijtok Jesús kiyolkuitoyaj uan ayokmo kema mikiskia, uan yeka mikilistli “ayok tleno ueli kichiuilia”. Uajka, katli kintlapejpenijtoyaj nojkia kejuak miktoyaj pampa kipatlatoyaj kej monejnemiltiyayaj uan ayokmo kikauayayaj ‘tlajtlakoli ma kinyoltilana’. Inijuantij kichijkej kampeka monejnemiltisej kej toTeotsij kineki, uan yeka ‘itstoyaj yoltokej’ pampa kinextiyayaj “iueyitilis toTeko Dios ika ichikaualis Jesucristo” (Rom. 6:9, 11).

11. ¿Kenijkatsa ipan ni tonali Cristo itokilijkauaj nojkia elij kejuak ‘mijkatsitsij tlen tlankejya ika tlajtlakoli’?

¹¹ ¿Kenijkatsa tojuantij nojkia kejuak “timijkatsitsij tlen titlankejya ika tlajtlakoli”? Uejkajkia, uelis tijchijkej tlamantli tlen amo kuali pampa amo tijmatiyayaj kenijkatsa kiita Jehová. Tiitstoyaj “imako tlajtlakoli” uan yeka kejuak technauatiyaya (Rom. 6:19, 20). Uan kema timomachtijkej ipan Biblia kenijkatsa kineki toTeotsij ma timonejnemiltikaj, pejki tijpatlaj miak tlamantli ipan tonemilis, tijnejkej tijmaktilisej tonemilis uan timoatsonpoliuiltijkej. Tijnejkej tijneltokasej Jehová ika nochi toyolo uan timonejnemiltisej kej ya kineki. Kiampa kejuak techtojtonkej “tlen tlajtlakoli” uan pejki tijchiuaj “nochi tlen xitlauak” (Rom. 6:17, 18).

12. ¿Tlake moneki tijtlapejpenisej tijchiuasej?

¹² Pablo kiijtok: “Ayok xijkauilikaj tlajtlakoli ma inmechnauati uan ma inmechyoltilana xitlajtlakolchiuakaj [...]. Amo xijneltokakaj tlen axkuali inmotlalnamikilis kineki kichiuas” (Rom. 6:12). Uajka, nochi moneki tijtlapejpenisej se tlen ni tlamantli: tijchiuasej tlen techyoltilana o tijchiuasej kampeka amo tijchiuasej. Ma timotlajtlanikaj: “¿Nijkaua ma moskalti tlen nechyoltilana uan teipa nijchiua tlen amo kuali? ¿O nimantsi nijchiua kampeka amo nimoiljuijtos ipan nopa tlamantli?”. Tlaj nelia tijtlaskamatiliaj  Jehová pampa ueyi iyolo, uajka nochipa tijchiuasej kampeka tijyolpakiltisej.

13. ¿Kenijkatsa tijmatij kena uelis tijchiuasej tlen kuali?

¹³ Tlen kinpanok nopa achtoui Cristo itokilijkauaj techpaleuis ma tikitakaj kena uelis tijchiuasej tlen kuali uan amo titlajtlakolchiuasej. Se keskij maseualmej katli itstoyaj ipan altepetl Corinto eliyayaj tlachtekinij, mosiuanekiyayaj o motlakanekiyayaj, momekatiyayaj, kinueyichiuayayaj teotsitsij uan moiuintiyayaj. Kema inijuantij kiixmatkej Jehová uan kiiknelijkej, ayokmo kichijkej tlen amo kuali. Amo kuali kiyolmatkej pampa tlajtlakolchijtoyaj (Rom. 6:21; 1 Cor. 6:9-11). Katli itstoyaj Roma nojkia monekiyaya kipatlasej ininnemilis. Pablo kiniljuik: “Amo xijtekiuikaj [...] inmotlakayo para ma tlajtlakolchiuas, pero ximotemakakaj senkistok ika toTeko pampa ineltoyaj keja inmiktoyaj, pero ama ya inkipiaj yolistli tlen yankuik. Uajka sejse tlen inmojuantij ma kitekiui [...] sejse tlamantli tlen kipia ipan itlakayo para kichiuas tlen nelia xitlauak keja toTeko kineki” (Rom. 6:13). Pablo kimajtoya inijuantij ueliskia kichiuasej tlen kuali uan kiampa kiitaskiaj kenijkatsa toTeotsij kinnextiliskia tlauel ueyi iyolo.

14, 15. ¿Tlake moneki timotlajtlanisej?

¹⁴ Ipan ni tonali nojkia kiampa panotok. Sekij toikniuaj uelis nojkia kinpanok kej katli itstoyaj ipan Corinto. Uan kema kiixmatkej Jehová, nojkia kipatlakej ininnemilis uan kejuak ‘mopajpajkej tlen inintlajtlakoljuaj’. Maske nochi tojuantij monejki tijpatlasej miak tlamantli pampa tijnejkej tijyolpakiltisej Jehová, moneki nojua tijtlaskamatilijtosej Jehová pampa kipixki ueyi iyolo. ¿Kenijkatsa uelis tijchiuasej? Moneki timosentlalisej amo tijchiuasej tlen techyoltilana uan timosentlalisej tijtekipanosej Jehová ika nochi toyolo.

¹⁵ Moneki amo tijchiuasej yon se tlajtlakoli tlen tlauel amo kuali kej katli kichijtoyaj katli itstoyaj ipan Corinto. Amo kinamiki tijchijtosej se ueyi tlajtlakoli uan timoiljuisej Jehová techtlapojpoljuis pampa ueyi iyolo. Uan, ¿tlake pano ika nopa tlajtlakoli katli sekinok moiljuiaj amo tlauel ueyi? ¿Timosentlalijtokej tijchiuasej kampeka tijneltokasej nochi tlen Jehová technauatia? (Rom. 6:14, 17).

16. ¿Kenijkatsa tijmatij nojkia amo kinamiki tijchiuasej sekinok tlajtlakoli tlen amo uala ipan 1 Corintios 6:9-11?

¹⁶ Ma timoiljuikaj ipan Pablo, ya kiijkuilok: “San nitlajtlakolchijkatlakatl. Eltok keja nimotemaktilik para nijtekipanos notlajtlakolchijkayolo. [...] Nelia nijneki nijchiuas tlen kuali, pero axnijchiua. Pero nopa tlen nijkokolia, ya nopa nijchiua” (Rom. 7:14, 15). Maske amo kichiuayaya yon se tlajtlakoli tlen kiijtoua 1 Corintios 6:9-11, Pablo kiijtok nojua tlajtlakolchiuayaya. Ya kinekiyaya kiyolpakiltis toTeotsij uan yeka kichijki kampeka kichiuas tlen kuali (xijpoua Romanos 7:21-23). Tojuantij nojkia uelis tijchiuasej kampeka  nochipa tijneltokasej Jehová kej Pablo kichijki.

17. ¿Kenke amo tiistlakatij?

¹⁷ Tojuantij tijmatij moneki tijchiuasej tlen xitlauak tlaj tijnekij tijtekipanosej Jehová, yeka amo kinamiki tiistlakatisej (xijpoua Proverbios 14:5; Efesios 4:25). Amo tijnekij tielisej kej Satanás, pampa “nochi istlakayotl peua ika ya”. Moneki tikilnamikisej Ananías uan isiua mijkej pampa istlakatkej. Yeka tojuantij amo tiistlakatij (Juan 8:44; Hech. 5:1-11). Tijchiuasej tlen xitlauak amo san kiijtosneki amo tiistlakatisej. Tlaj nelia tijtlaskamatij toTeotsij pampa ueyi iyolo, nojkia moneki tijnextisej tijchiuaj tlen xitlauak ipan sekinok tlamantli.

18, 19. ¿Kenijkatsa tijnextisej tijchiuaj tlen xitlauak?

¹⁸ Se akajya uelis kinextis amo kichiua tlen xitlauak maske amo istlakati. Jehová kiniljuik israeleuanij: “Amo xitlachtekikaj. Amo ximokajkayauakaj. Amo ximoistlakauikaj se ika seyok”. ¿Kenke amo kinamikiyaya kichiuasej ni? Jehová kiniljuijtoya: “Xiitstokaj intlatsejtseloltikej pampa na, niinmoTeko Dios, nitlatsejtseloltik” (Lev. 19:2, 11). Maske amo tiistlakatij, amo tijchiuaj tlen xitlauak tlaj tijchiuaj sekinok ma kineltokakaj se tlenijki tlen amo melauak.

 ¹⁹ Ma timoiljuikaj ipan ni tlamantli. Se tlakatl kiiljuia katli kitekipanoua uan sekinok katli nopaya tekitij moneki kisas nimantsi pampa kiitati tepajtijketl. Kiijtoua nopa pampa kimati ipan nopa tonali kisas vacaciones, yeka kineki nima kisas uan amo pampa nelia kiitati tepajtijketl. San moneki yas kikouati pajtli uan kiixtlauas tlen tepajtijketl kiinanki kema kipajtik. ¿Tikijtoskia nopa tlakatl kichiua tlen xitlauak, o san tlakajkayaua? Ni tlakatl kichijki sekinok ma kineltokakaj se tlenijki tlen amo melauak. Kemantika, sekij maseualmej tlakajkayauaj pampa kinekij kiselisej se tlenijki o pampa amo kinekij ma kintlatsakuiltikaj. Tojuantij tijneltokaj Jehová, katli techiljuia: “Amo ximokajkayauakaj”. Tijnekij tijchiuasej tlen kuali uan tlen toTeotsij kiita tlatsejtseloltik (Rom. 6:19).

20, 21. ¿Tlake amo tijchiuasej tlaj nelia tijtlaskamatiliaj toTeotsij pampa ueyi iyolo?

²⁰ Maske tojuantij amo timomekatiaj, amo timoiuintiaj yon tijchiuaj sekinok uejueyi tlajtlakoli, tlaj nelia tijtlaskamatiliaj toTeotsij pampa ueyi iyolo, uajka tijchiuasej kampeka amo tijchiuasej yon se tlamantli tlen Jehová amo kipaktia. Tojuantij amo tijchiuaj tlen ueli tlamantli ika se tlen axtonamik, uan nojkia amo tijnekij timoyolpakiltisej ika tlamantli tlen sokiyo. Amo timoiuintiaj, uan nojkia amo tikijij miak uan tijkauaj kema tijmatij nechka tiiuintisej. Maske uelis tijmatij ouij amo tijchiuasej ni, tojuantij uelis tijchiuasej tlen kuali.

²¹ Ma timosentlalikaj tijchiuasej tlen Pablo kiijtok: “Ayok xijkauilikaj tlajtlakoli ma inmechnauati uan ma inmechyoltilana xitlajtlakolchiuakaj [...]. Amo xijneltokakaj tlen axkuali inmotlalnamikilis kineki kichiuas” (Rom. 6:12; 7:18-20). Maske tlajtlakoli nochipa techyoltilantos, kena uelis tijchiuasej kampeka amo tijchiuasej yon se tlajtlakoli, kiampa tijnextisej tikintlaskamatiliaj Jehová uan Jesús pampa ueyi ininyolo.

22. ¿Tlake tijselisej tlaj nelia tijtlaskamatiliaj toTeotsij pampa ueyi iyolo?

²² Jehová techtlapojpoljuijtok totlajtlakoljuaj uan nojua uelis kiampa kichijtos. ¡Tlauel tijtlaskamatiliaj pampa technextilia ueyi iyolo! Yeka, ma tijchiuakaj kampeka amo tijchiuasej tlen amo kuali, maske sekinok maseualmej moiljuiaj amo kenijki tlaj tlajtlakolchiuaj. ¿Tlake tijselisej tlaj nochipa kuali timonejnemiltisej? Pablo kiijtok: “ToTeko inmechmakixtijtok uan inmechmalakanik imako tlajtlakoli para ayok uelis inmechnauatis. Uan inmochijtokej itlatekipanojkauaj toTeko Dios uan [...] ama ueli inkichiuaj nopa kuali tlamantli tlen inmechchiua intlaiyokatlalilmej para toTeko uan yeka inkiselisej yolistli tlen yankuik para nochipa” (Rom. 6:22).