1. ¿Kenke tlauel moneki timoatsonpoliuiltisej? (Xikita nopa achtoui tlaixkopinkayotl).

SEJSE xiuitl moatsonpoliuiltiaj miakej katli momachtiaj Biblia. Sekij elij telpokamej uan sekinok konemej. Uan uelis inintatauaj kinmachtijkej tlen melauak. Uan ta, ¿nojkia timoatsonpoliuiltijtok? Tlaj kena, tlauel tiyolpakij pampa kiampa tijchijki. Nochi Cristo itokilijkauaj tlauel moneki kichiuasej ni tlaj kinekij momakixtisej (Mat. 28:19, 20, TNM; 1 Ped. 3:21, TNM).

2. ¿Kenke amo kinamiki timajmauisej tijmaktilisej Jehová tonemilis?

² Maske tijselis miak tlateochiualistli teipa kema timoatsonpoliuiltis, nojkia moneki tijchiuas se keski tlamantli, pampa kema timoatsonpoliuiltik, tikijtok kena kema tijnankilik ni tlajtlanili: “Pampa tijneltoka Jesucristo temaktilik inemilis, ¿timoyolkueptok tlen motlajtlakoljuaj uan tijmaktilijtok Jehová monemilis pampa tijneki tijchiuas tlen ya kineki?”.  Kema timoatsonpoliuiltik tijnextik tijmaktilijtoya Jehová monemilis, tijtenkauilik san ya tlauel tikikneliskia uan san tijchiuaskia tlen ya kineki. ¿Kinamiki timoiljuis amo kuali tlen tijchijki pampa tijtenkauilik toTeotsij nopa tlamantli? Amo. Tlauel kuali tlen tijchiuaj kema tijkauaj tonemilis imako toTeotsij. Amo onka seyok tlamantli tlen tlauel kuali. Tlaj amo tijtekipanos Jehová, uajka Satanás mitsyakanas. Uan ya amo kineki ximomakixti, ya kineki xijpaleui uan xijtlauelkaua Jehová, maske nopa kichiuas ayokmo xiitsto nochipa.

3. ¿Tlake tlateochiualistli tijselijtok pampa tijmaktilik Jehová monemilis?

³ Ximoiljui ipan nochi tlateochiualistli tlen tijselijtok pampa timoatsonpoliuiltik. Pampa tijmaktilijtok Jehová monemilis, temachtli uelis tikijtos: “ToTeko itstok nouaya para nechpaleuis, yeka ayok nimajmaui, niyon axnijmakasi tlen uelis nechchiuilisej tlakamej” (Sal. 118:6). Nelia se ueyi tlateochiualistli tiitstosej inechka toTeotsij uan tijmatisej kuali tiitstokej iixpa.

4, 5. 1) ¿Kenke san tojuantij kinamiki tikitasej tlake tijchiuaj pampa timotemaktilijtokej? 2) ¿Tlake tikixnamikij nochi katli tijtekipanouaj toTeotsij?

⁴ Tlaj timoatsonpoliuiltijtok, amo kinamiki timoiljuis kuali timouampojchijtos iuaya Jehová san pampa motatauaj kuali kitekipanouaj. Maske nojua tiitstok ininuaya motatauaj, moneki ta tijchiuas se keski tlamantli tlen mitspaleuis timomakixtis. ¿Kenke tlauel moneki tikilnamiktos nopa? Pampa amo tijmati tlake tlaouijkayotl tikixnamikis teipa. Uelis ta timoatsonpoliuiltik kema tieliyaya tiokichpil. Uan nama pampa ya titelpokatl, uelis tlen tijyolmati uan tlen mitsyoltilana ayokmo sanse kej kema tieliyaya tiokichpil. Se ichpokatl kiijtok ni: “Kema ayamo tiueyi, amo kenijki tikitas tlaj amo tijkuas se pastel tlen temakaj kema kiaxitiaj ininxiui pampa tieli se tlen Jehová itlajtoltemakauaj. Uan kema ya tiueyias uan tlauel tijnekis timotekas iuaya akajya, tlauel moneki tijmajtos kuali tiitstos tlaj tijneltokas toTeotsij itlanauatiljuaj”.

⁵ Amo san telpokamej kiixnamikij tlaouijkayotl tlen amo kema kinpanotoya, katli moatsonpoliuiltiaj kema ya uejueyij nojkia kiixnamikij se keski tlamantli tlen kichiua ma kinextikaj tlaj nelia kuali tlaneltokaj, kej kuesoli ika ininchampoyouaj, kema mokokouaj o kema amo kipiaj tekitl. Tlaj tiuejueyij o amo, nochi moneki tijnextisej amo tijtlauelkauaj Jehová kema tikixnamikij tlaouijkayotl (Sant. 1:12-14).

6. 1) ¿Tlake kiijtosneki tijtenkauilik Jehová amo kema tijtlauelkauas maske tijpias tlen ueli tlaouijkayotl? 2) ¿Tlake tijyekoua ipan Filipenses 4:11-13?

⁶ Tlaj nochipa tikilnamiktos tijtenkauilik Jehová tijtekipanoskia maske tijpiaskia tlen ueli kuesoli, mitspaleuis amo kema xijtlauelkaua Jehová. Ni kiijtosneki tijtenkauilik totlanauatijka ta nochipa tijtekipanoskia maske motatauaj o mouampoyouaj kitlauelkauaskiaj toTeotsij (Sal. 27:10). Kema tijpias se kuesoli, nochipa uelis tikiljuis Jehová ma mitsmaka chikaualistli uan kiampa uelis tijchiuas tlen tijtenkauilik (xijpoua Filipenses 4:11-13).

7. ¿Kenijkatsa tijnextiaj ‘tijmakasij tikixpanosej toTeko’?

⁷ Jehová kineki ximouampojchiua iuaya. Yeka tlaj tijneki nochipa timouampojchijtos iuaya, moneki tijchiuas se keski tlamantli tlen mitspaleuis timomakixtis. Ipan Filipenses 2:12 kiijtoua: “Xiitstokaj keja tlakamej tlen uiuipikaj pampa tlauel kimakasij kiixpanosej toTeko Dios”. Ni texto kinextia moneki kuali timoiljuis tlake uelis tijchiuas uan kiampa nojua timouampojchijtos iuaya Jehová uan amo kema tijtlauelkauas  maske mitspanos miak tlaouijkayotl. Amo ximoiljui amo tleno kichiuas xijtlauelkaua toTeotsij. Xikilnamiki sekij katli nojkia kitekipanojkej toTeotsij nojkia mokuapolojkej. Uajka, ¿tlake mitspaleuis ximomakixti?

8. ¿Tlake moneki tijchiuasej kema timomachtisej, uan kenke tlauel ipati?

⁸ Tlaj tijnekij kuali timouampojchiuasej iuaya Jehová, moneki tijtlakakilisej uan tikamanaltisej iuaya. San uelis tijtlakakilisej Jehová tlaj timomachtisej Biblia. Ni kiijtosneki moneki tijpouasej Biblia uan amatlajkuiloli tlen nopaya mokixtijtok, uan timoyoliljuisej ipan tlen tijpouaj. Kema timomachtis, amo san ximoiljui moneki tijtsontekontlalis se keski tlamantli kej kema se akajya kichiua se examen. Kema timomachtia eli kej kema tia kanajya kampa uelis tijtemos uan tijpantis yajyankuik tlamantli tlen Jehová kinextia. Nopa mitspaleuis ximonechkaui iuaya, uan ya monechkauis mouaya (Sant. 4:8).

9. ¿Tlake tlamantli mitspaleuijtok kuali ximomachti?

⁹ Jehová itlanechikol techmakatok tlauel miak tlamantli tlen techpaleuia kuali ma timomachtikaj. Ma tikitakaj se keski tlamantli tlen uelis tijpantis ipan jw.org. Kampa kiijtoua “Jóvenes”, tijpantis “Actividades para estudiar la Biblia”, nopaya tijyekos miak tlamantli tlen se keski tlapoualistli. Nopaya nojkia tijpantis tlen ika uelis timomachtis, itoka “¿Qué enseña realmente la Biblia?”, tlen mitspaleuis kuali xitlaneltoka uan kuali xikixtoma tlen tijneltoka. Ipan ¡Despertad!, abril 2009, nopa tlamachtili “Los jóvenes preguntan. ¿Cómo disfrutar la lectura de la Biblia?”, kiijtoua sekinok tlamantli tlen uelis tijchiuas kema timomachtis. Uajka, tlauel ipati timomachtis uan timoyoliljuis ipan tlen timomachtia pampa nopa mitspaleuis ximomakixti (xijpoua Salmo 119:105).

10. ¿Kenke katli moatsonpoliuiltijtokej tlauel moneki momaijtosej?

¹⁰ Maske tijtlakakiliaj Jehová kema timomachtiaj Biblia, tlaj tijnekij tojuantij timonojnotsasej iuaya, moneki timomaijtosej. Cristo itokilijkauaj amo timomaijtouaj san pampa timomajtokej o san kema tijnekij kuali ma kisa tlen tijnekij tijchiuasej.  Tlamaijtoli mitspaleuis xijnojnotsa Jehová, uan ya kineki mitstlakakilis (xijpoua Filipenses 4:6). Kema tlauel timotekipachojtos, xikilnamiki Biblia mitsiljuia ni: “Nochi mokuesol xijkaua imako toTeko” (Sal. 55:22). ¿Timoiljuia nelia mitspaleuis tlaj timomaijtos? Tlauel miakej toikniuaj uelis mitsiljuisej kenijkatsa tlauel kinpaleuijtok tlamaijtoli. Uan ta nojkia tlauel mitspaleuis.

11. ¿Kenke moneki nochipa tijtlaskamatilisej Jehová?

¹¹ Moneki nochipa tijnojnotsasej Jehová ika tlamaijtoli uan amo san kema tijnekisej ma techpaleui. Biblia kiijtoua: “Nochipa xi[te]tlaskamatikaj” (Col. 3:15). Kemantika uelis tlauel techtekipachoua tlen techpano, yeka tikilkauaj nochi tlateochiualistli tlen tijselijtokej. ¿Ueliskia timoiljuis san ipan eyi tlamantli tlen mitspanok ipan se tonal katli tijnekiskia tijtlaskamatilis Jehová? Se pilichpokatsi katli motokaxtia Abigail, katli kipia 12 xiuitl, kiijtoua: “Nimoiljuia san Jehová tlauel moneki ma tijtlaskamatilikaj. Nochipa moneki tijtlaskamatilisej nochi tlen techmakatok. Tlauel nechpaktia nikilnamikis tlen kiijtok se akajya: ‘Ma timoiljuikaj se tonali tlanesi uan san tijpiaj nopa tlamantli tlen yaloua tijtlaskamatilijkej Jehová, ¿keski tlamantli tijpiaskiaj?’”. *

12, 13. ¿Kenke tlauel kuali timoiljuis kenijkatsa Jehová kinextijtok kuali iyolo mouaya?

¹² Jehová kipaleuik David ma kiixnamiki miak tlaouijkayotl, yeka uelki kiijtok ni: “Xijyejyekokaj toTeko uan inkiitasej para melauak kuali iyolo touaya. Ueyi pakilistli kipiaj nochi tlakamej tlen ipan ya motemachiaj” (Sal. 34:8). Ni versículo kinextia moselti uelis tikitas kenijkatsa Jehová tlauel kuali iyolo. Kema tijpoua Biblia uan amatlajkuiloli, uan kema tia tlanechikoli, tlauel timoyolchikaua pampa tikita kenijkatsa toTeotsij kinpaleuijtok miakej itekipanojkauaj amo ma kitlauelkauakaj. Uan kema panotia xiuitl, moneki ta tikitas kenijkatsa Jehová mitspaleuia. ¿Kenijkatsa tikitstok ipan monemilis Jehová mitspaleuijtok?

¹³ Jehová kichijtok se tlamantli tlen ika kinextijtok kuali iyolo ika nochi tojuantij. Ya technotstok ma timonechkauikaj iuaya uan ika iKone Jesús. Jesús kiijtok: “Axaka ueli nechtokilis ika iselti. San noTata tlen nechtitlanki uelis kiyoltilanas se tlakatl para ma nechtokili” (Juan 6:44). ¿Timoiljuia Jehová nojkia mitsnotstok? Se telpokatl uelis moiljuis: “Jehová kinnotski notatauaj, uan na san nijchiua tlen inijuantij kichiuaj”. Kema timotemaktilik uan timoatsonpoliuiltik, tijnextik kuali timouampojchijtok iuaya Jehová, uan ya kuali mitsixmati. Biblia kiijtoua: “Intla se nelia kiiknelia toTeko, toTeko kiixmati” (1 Cor. 8:3). Xijchiua kampeka nochipa tijpatiitas tiitstos ipan Jehová itlanechikol.

14, 15. ¿Kenijkatsa tlajtolmoyaualistli mitspaleuis kuali xitlaneltoka?

¹⁴ Nojkia tikitas kenijkatsa Jehová kuali iyolo kema mitspaleuis xikixtoma tlen tijneltoka kema titlajtolmoyaua uan kampa timomachtia. Sekij kimatij ouij kinkamanaljuisej katli ininuaya momachtiaj pampa amo kimatij kenijkatsa kinnankilisej. Uelis ta nojkia mitspanotok. Uan uelis nojua tlauel ouij tijmati kema itstokej miakej. ¿Tlake uelis tijchiuas?

¹⁵ Achtoui ximoiljui kenke tijmati nelia  melauak tlen tijneltoka. Ipan jw.org, eltok tlen ika uelis timomachtis, tlen mitspaleuis tijmatis ipan tlake titlaneltoka, kenke tijneltoka uan kenijkatsa tikixtomas. Kualtiaskia tijkixtis nopa amatl. Tlaj temachtli tijmati melauak tlen tijneltoka uan kuali timokualchijchiua, uajka tijnekis tikinmachtis sekinok ajkia Jehová (Jer. 20:8, 9).

16. ¿Tlake mitspaleuis amo timajmauis tikiniljuis sekinok tlen tijneltoka?

¹⁶ Maske kuali timokualchijchiuas, uelis nojua timajmauis tikijtos tlen tijneltoka. Se ichpokatl tlen kipia 18 xiuitl kiijtoua: “Maske nijmati melauak tlen nijneltoka, kemantika ouij nijmati nikixtomas”. ¿Tlake kichiua nopa toikni? Ya kiijtoua: “Nijchiua kampeka nikamanaltis kej nochipa nijchiua. Katli ininuaya nimomachtia amo pinauaj kiijtosej tlen inijuantij kichiuaj. Yeka na nojkia amo nipinaua nikijtos tlen nijneltoka. Uan kema nikiniljuijtok se tlenijki, nikijtoua: ‘Namanok nijmachtijtoya se akajya ika Biblia uan...’. Uan nikiniljuia nochi tlen nijchijki. Maske amo nikinpouilia Biblia, tlen nikiniljuia kichiua ma kinekikaj kimatisej se keski tlamantli uan nechtlajtlaniaj tlake nitlamachtia tlen Biblia. Pampa kiampa nijchiua, nechpaleuia amo ma nimajmaui nikinkamanaljuis. Uan kuali nijyolmati pampa nijmati nikinmachtia tlen melauak”.

17. ¿Kenke moneki tijnextisej timotemachiaj melauak tlen tijneltokaj?

¹⁷ Tlaj tikintlepanitas uan mitstekipachos tlen kinpano sekinok, uajka inijuantij nojkia kuali mitsitasej. Xikita tlake moiljuiyaya Olivia, katli kipia 17 xiuitl uan moatsonpoliuiltik kema nojua eliyaya siuapil: “Kema nimonojnotsayaya ininuaya sekinok, amo nijnekiyaya nikijtos yon se achi tlen Biblia pampa amo nijnekiyaya sekinok ma moiljuikaj na san nimoseniljuijtok ipan noreligión. Teipa ayokmo kiampa moiljuik. Ya kiijtoua: “Miakej telpokamej amo kimatij tlake kichiuaj Jehová itlajtoltemakauaj, san techixmatij tojuantij. Yeka, kej timonejnemiltiaj uelis kichiuas ma techtlepanitakaj o amo. Tlaj amo kema tikinpouiliaj tlen tijneltokaj o timajmauij, uajka uelis moiljuisej amo techpaktia tielisej Jehová itlajtoltemakauaj. O uelis amo techtlepanitaskiaj pampa moiljuiskiaj amo timotemachiaj ipan tlen tijneltokaj. Yeka, tlaj tikinnextilisej timotemachiaj melauak tlen tijneltokaj uan amo timajmauij tikinpouilisej tlen timomachtijtokej, uelis tlauel techtlepanitasej”.

18. ¿Tlake tlamantli mitspaleuis ximomakixti?

¹⁸ Ipan ni tlamachtili tikitakej tlauel moneki tikitas tlake tlamantli mitspaleuis ximomakixti. Yeka, moneki tijpouas Biblia uan timoyoliljuis ipan tlen tijpoua, timomaijtos uan timoyoliljuis ipan nochi tlateochiualistli tlen Jehová mitsmakatok. Ni kichiuas ximotemachi Jehová eli mouampo. Uan nojkia mitsyololinis tikinpouilis sekinok tlake tlamantli tijneltoka (xijpoua Salmo 73:28).

19. ¿Kenke tlauel ipati tijchiuasej kampeka timomakixtisej?

¹⁹ Jesús kiijtok: “Intla se tlakatl kineki nechtokilis, ma kitlauelkaua tlen yajaya kineki. Uan ma kitlalanas [ikua] uan nechtokilis mokualtlalijtos para mikis nopampa na” (Mat. 16:24). Tlaj tijneki tijtokilis Jesús, achtoui moneki tijmaktilis Jehová monemilis uan timoatsonpoliuiltis. Kiampa ipan ni tonali tijselis miak tlateochiualistli uan ipan Xochimili tiyoltos nochipa. Yeka tlauel moneki tijchiuas kampeka tikitas tlake tlamantli mitspaleuis ximomakixti.