DIANA kipia 80 xiuitl. Iueue, kipixki nopa kokolistli Alzheimer, uan kema ayamo mikiyaya, itstoya kampa kinmokuitlauiaj ueuentsitsij. Diana nojkia tlauel tlaijiyouik pampa kipixki cáncer de mama uan ome ikoneuaj mijkej. Maske kiixnamikij miak tlaouijkayotl, toikniuaj katli kiitaj ipan tlanechikoli o kema tlajtolmoyaua kiijtouaj nochipa yolpaki.

John tlatekipanok kej katli tepaxaloua chijchikuasej metstli kipano 43 xiuitl. Maske tlauel kipatiitayaya kiampa tlatekipanos, ayokmo uelki kiampa kichiua pampa monejki kimokuitlauis se iuikal katli mokokouayaya. Kema toikniuaj katli uejkajkia kiixmatij kipantiaj ipan ueyi tlanechikolistli, kiijtouaj san kej ipa tlauel yolpaki.

¿Tlake kipaleuia Diana uan John ma yolpakikaj? ¿Kenijkatsa uelis yolpakis se akajya tlaj kiixnamiki tlaouijkayotl o ayokmo ueli tlatekipanoua kej achtouia? Biblia tlanankilia: “Katli xitlauak mopakilismakas ipan Jehová” (Sal. 64:10). Ma tikitakaj tlake uelis kichiuas nelnelia tlauel ma tiyolpakikaj, kiampa uelis tijkuamachilisej tlake kiijtosneki ni texto.

Ipan ni tonali onka se keski tlamantli tlen kichiua ma tiyolpakikaj, kej kema timonamiktiaj o timosiuajtiaj, kema tikinpiaj tokoneuaj o kema tijseliaj se tekitl ipan Jehová itlanechikol. Tiyolpakij pampa Jehová techmakatok ni tlamantli. Ya kichijki ma timosenkauakaj, ma tikinpiakaj tokoneuaj uan ya kichiua ma tijtekipanokaj ipan itlanechikol (Gén. 2:18, 22; Sal. 127:3; 1 Tim. 3:1).

Maske ni tlamantli kichiua ma tiyolpakikaj, ni pakilistli amo uejkaua pampa inamik tlen katli mosenkajtok uelis mikis o momekatis (Ezeq. 24:18; Os. 3:1). Kemantika uelis konemej amo kintlepanitaj inintatauaj uan amo kitlepanitaj toTeotsij, yeka kinkixtiaj tlen tlanechikoli. Ikoneuaj tlajtolpanextijketl Samuel amo kitekipanojkej Jehová kej kinamiki; uan pampa tlanauatijketl David tlajtlakolchijki,  ichampoyouaj tlauel tlaijiyouijkej (1 Sam. 8:1-3; 2 Sam. 12:11). Kema pano ni tlamantli tlauel titlaijiyouiaj uan ayokmo tiyolpakij.

Nojkia kiampa pano kema tijtekipanouaj toTeotsij, uelis kokolistli, kema mopatla se keski tlamantli ika tochampoyouaj o kema mopatla se keski tlamantli ipan Jehová itlanechikol, ueliskia kichiuas ayokmo ma titlatekipanokaj kej achtouia. Miakej toikniuaj sampa kinekiskia kuali kiyolmatisej kema tlatekipanouaj kej kema tlatekipanouayayaj achtouia.

Maske ipan ni tonali tiyolpakij, tlen tikitakej kinextia nopa pakilistli amo uejkaua. Tlen kipanok Samuel, David uan sekinok kinextia onka se pakilistli tlen kena uelis kichiuas nelnelia ma tiyolpakikaj, maske mopatlas se keski tlamantli ipan tonemilis o tikixnamikisej tlaouijkayotl.

Jesús kimatiyaya tlen se kiyolmati kema nelnelia yolpaki. Kema itstoya iluikak tlauel yolpakiyaya, yeka kiijtok “nochipa niyolpaktoya iixpa [Jehová]” (Prov. 8:30, TNM). Maske kema ualajki ipan Tlaltipaktli kiixnamikij tlaouijkayotl, Jesús tlauel yolpajki kitekipanos iTata (Juan 4:34). Kema nechka kimiktiskia, ¿tlake kipaleuik ma kiijiyoui kema kitlaijiyouiltijkej? Biblia kiijtoua: “Pampa kimajtoya tlauel yolpakiskia teipa, kiijiyouik nopa kuauitl kampa kitlaijiyouiltijkej” (Heb. 12:2, TNM). Ma tikitakaj ome tlamantli tlen Jesús kiijtok tlen katli nelnelia yolpakij.

Se tonali, 70 itokilijkauaj Jesús tlajtolmoyauatoj, kema tlakuepilijkej tlauel yolpakiyayaj pampa kichijtoyaj uejueyi tlamantli, kej kinkixtisej amo kuali ajakamej. Jesús kiniljuik: “Amo xipakikaj miak pampa ajakamej inmechchiuiliaj inmotlajtol. Más xipakikaj pampa ya ijkuilijtok inmotoka ipan iama toTeko nepa iluikak” (Luc. 10:1-9, 17, 20). Maske titlatekipanosej ipan Jehová itlanechikol kichiua ma tiyolpakikaj, nelnelia tiyolpakisej tlaj toTeotsij kuali techita.

Seyok tonali, kema Jesús kinmachtiyaya miakej maseualmej, se siuatl katli eliyaya judía kiijtok inana Jesús tlauel yolpakiyaya  pampa ikone kuali tlamachtiyaya. Jesús kiiljuik: “Más kuali kipantiaj [o yolpakij] nopa tlakamej tlen kikakij itlajtol toTeko uan kineltokiliaj” (Luc. 11:27, 28). Se tetata yolpaki kema kipia kuali ikoneuaj, maske nopa kichiua ma yolpaki, nelnelia tlauel yolpakis tlaj kineltoka Jehová uan kuali mouampojchiua iuaya.

Tlaj Jehová kuali techita nelnelia tiyolpakisej. Maske tlaouijkayotl amo kichiua ma tiyolpakikaj, tlaj tikijiyouiaj uan amo tijtlauelkauaj Jehová, nopa techpaleuis nojua nelnelia ma tiyolpakikaj (Rom. 5:3-5). Xikilnamiki, Jehová kinmaka itonal katli motemachiaj ipan ya, uan itonal techpaleuia ma tiyolpakikaj (Gál. 5:22). Yeka Salmo 64:10 kiijtoua: “Katli xitlauak mopakilismakas ipan Jehová”.

Ni techpaleuia ma tijkuamachilikaj kenke Diana uan John, katli tikijtokej achtouia, yolpajkej maske kiixnamijkej tlaouijkayotl. Diana kiijtoua: “Sanse kej se konetl momanauia ipan itatauaj, na nojkia nimomanauia ipan Jehová. Nikitstok kenijkatsa Jehová nochipa nechpaleuijtok ma niyolpaki kema nitlajtolmoyaua”. Uan John kiijtoua: “Ipan 1998 nechiljuijkej ma nikinmachti toikniuaj ipan Escuela de Entrenamiento Ministerial uan nopa kichijki tlauel ma nimomachti”. ¿Kenijkatsa kipaleuik nopa? Ya kiijtoua: “Maske ayokmo nitlatekipanouayaya kej katli tepaxaloua chijchikuasej metstli, tlauel nimomachtis nechpaleuik ma niyolpaki uan tlauel ma nimotekiui ipan tlajtolmoyaualistli, kiampa nosiua uan na amo ouij tijmatkej tijchiuasej tlen Jehová techtlajtlania. Tlauel tiyolpajkej pampa kiampa tijchijkej”.

Miakej Cristo itokilijkauaj kiitstokej nelia melauak tlen kiijtoua Salmo 64:10. Ma tikitakaj tlen kipanok se toikni iuaya isiua katli tlatekipanojkej kipano 30 xiuitl ipan kali Betel tlen Estados Unidos uan teipa kiniljuijkej ma tlatekipanokaj kej precursores. Inijuantij kiijtouaj: “Maske uelis timokuesos pampa mopatla se keski tlamantli ipan monemilis, amo kinamiki nochipa timotekipachojtos”. Inijuantij nima pejkej tlajtolmoyauaj ininuaya toikniuaj. Nojkia kiijtouaj: “Tlauel timomaijtouayayaj. Kema tikitayayaj Jehová technankiliyaya, tlauel techyolchikauayaya uan tiyolpakiyayaj. Kema tiasitoj ipan tlanechikoli, sekinok toikniuaj nojkia mochijkej precursores. Nojkia tlauel tiyolpajkej pampa uelki tikinmachtia ika Biblia ome maseualmej”.

Ipan ni tonali amo nochipa uelis tiyolpaktosej pampa kemantika uelis timokuesosej. Maske kiampa tijyolmatisej Jehová techyolchikaua ika tlen kiijtoua Salmo 64:10. Maske timotekipachojtosej, uelis timotemachisej katli xitlauakej mopakilismakasej “ipan Jehová”. Ni kiijtosneki maske tijpiasej kuesoli, tlaj tijtekipanouaj Jehová tlauel tiyolpakisej. Tijchiaj nopa tonali kema uelis tikitasej nopa “yankuik iluikaktli” uan nopa “yankuik tlaltipaktli” tlen Jehová techtenkauilijtok. Ipan nopa tonali nochi Jehová itekipanojkauaj elisej xitlauakej uan nelnelia tlauel yolpakisej (Isa. 65:17, 18).

Ximoiljui kenijkatsa tiitstosej ipan nopa tonali: ayokmo timokokosej uan tlauel tiyolpakisej. Ayokmo tikilnamikisej tlen techtlaijiyouiltiyaya. Jehová kiijtoua “axaka moiljuis tlen nopa iluikaktli uan tlaltipaktli tlen eltoya”. Sampa uelis tikinitasej tochampoyouaj pampa moyolkuisej katli miktokej. Miakej maseualmej tlauel yolpakisej, sanse kej itatauaj nopa ichpokatl katli Jesús kiyolkuik (Mar. 5:42). Uan asis nopa tonali kema nochi maseualmej katli itstosej ipan Tlaltipaktli, nochipa nelnelia tlauel yolpakisej uan mopakilismakasej “ipan Jehová”.