Ipan 2 Corintios 12:2, 3, Pablo kiijtok: “ToTeko nechuikak ipan nopa expa iluikak”. ¿Tlake kinejki kiijtos? Ipan ni amatlajkuiloli tlen Pablo kintlajkuiljuilik toikniuaj katli itstoya Corinto, ya kiijtok toTeotsij kitekimakatoya kej apóstol (2 Cor. 11:5, 23). Nopaya kiijtok kiitak “tlanextili [...] tlen toTeko”. Nika amo kamatki tlen sekinok toikniuaj. Ni kinextia yaya kiitak nopa tlanextili (2 Cor. 12:1, 5).

Ni kiijtosneki apóstol Pablo elki katli kiuikakej ipan “nopa expa iluikak” uan ipan nopa “iluikak kampa tlauel tlayejyektsi [‘xochimili’, TNM]” (2 Cor. 12:2-4). Pablo kiijtok kiitak “tlanextili”, ni kiijtosneki toTeotsij kimatilti tlen panoskia teipa.

¿Tlake kinextia “nopa expa iluikak” tlen pablo kiitak?

Ipan Biblia, nopa tlajtoli “iluikak” kiijtosneki miak tlamantli. Se. Kiijtosneki nopa iluikaktli tlen uelij tikitaj (Gén. 11:4; 27:28; Mat. 6:26). Ome. Tekichiuanij katli nama tlanauatiaj (Dan. 4:20-22). Uan eyi. ToTeotsij iTlanauatijkayo (Apoc. [Rev.] 21:1).

Uajka, ¿tlake kiijtosnekiyaya Pablo kema kiijtok “nopa expa iluikak”? Kemantika, kema Biblia kineki kipankixtis se tlajtoli, expa kiompauia (Is. 6:3; Rev. 4:8). Kema Pablo kiijtok “nopa expa iluikak” kinekiyaya kinextis se tlanauatijkayotl tlen tlauel pankisa: toTeotsij iTlanauatijkayo kampa tekichiua Jesucristo uan nopa 144,000 tlapejpenilmej katli iuaya tlanauatisej. Apóstol Pedro kiijtok tijchiaj “nopa yankuik iluikaktli” katli toTeotsij techtenkauilijtok (2 Ped. 3:13).

¿Uan tlake kiijtosnejki Pablo kema kiijtok “iluikak kampa tlauel tlayejyektsi [‘xochimili’, TNM]”?

Nopa tlajtoli xochimili uelis nojkia kiijtosneki eyi tlamantli: Se. Nopa Xochimili tlen mochiuas ipan Tlaltipaktli, kej kampa itstoyaj Adán uan Eva. Ome. Kinextia kenijkatsa toTeotsij itekipanojkauaj tlauel kuali itstosej ipan nopa yankuik Tlaltipaktli. Uan eyi. Uelis kiijtosneki “kampa itstok toTeko” ne iluikak, kej kiijtoua Apocalipsis [Revelación] 2:7 (xikita Tlen Tematiltia, Julio 1, 2015, iamayo 13, párrafo 8).

Uelis Pablo kinekiyaya kiijtos ni eyi tlamantli kema kiijkuilok tlen kipanok ipan 2 Corintios 12:4.

Tlen tlauel pankisa:

“Nopa expa iluikak” tlen ijkuilijtok ipan 2 Corintios 12:2, uelis kiijtosneki toTeotsij iTlanauatijkayo kampa tekichiua Jesucristo uan nopa 144,000, ni kiijtosneki “nopa yankuik iluikaktli” (2 Ped. 3:13).

Kitokaxtia “nopa expa iluikak” pampa san toTeotsij iTlanauatijkayo tlauel pankisa.

Uelis nopa ‘xochimili’ tlen Pablo kiitak ipan se temiktli kiijtosneki: Se. Xochimili tlen mochiuas ipan Tlaltipaktli. Ome. Kenijkatsa toTeotsij itekipanojkauaj tlauel kuali itstosej ipan nopa yankuik Tlaltipaktli. Uan eyi. “Kampa itstok toTeko” ne iluikak; ni eyi tlamantli nesis ipan nopa yankuik Tlaltipaktli.

Ipan nopa Xochimili tikitasej “nopa yankuik iluikaktli” uan “nopa yankuik Tlaltipaktli”. Nopaya tekichiuas toTeotsij iTlanauatijkayo uan maseualmej katli itstosej ipan Xochimili kitekipanosej Jehová.